TUNGLAM MUHZIA

Posted on Friday, January 17, 2014by
January 17
Ninga

TUNGLAM MUHZIA

SIMDING:
2 Korin 4:16-18

A kimu thei nate tomno sung bek kiamgna, a kimu theilo nate a tawntungin a kip ding hi.
__2 Korin 4:18

KUMTAWN LAI SIANGTHO:
Piancil 41-42
Matthai 12:1-23

Ciamna Kip Thupha” le “Pasian Amin Thang Hen!” cih la minthangte leh biakna la dawng 9,000 bang a phuak Fanny Crosby pen a ngeksen lai pekin a mittaw hi.

    Pawlkhatte in Fanny pen hehpih huai sa mahmah hi. Thu a lim gen nuam mahmah Pastor khat in “Nang pen Pasian in thupha tampi hong piak hangin khua muhna hong pialo hi” ci-in hehpih hi. Fanny in, “Hi thei hileh ka nu’ sung panin mittaw sa in suakleng utzaw lai ing,” ci-in dawng hi. “Bang hang ci ve, tua bangin mittaw sa in suak vet leng vantung ah ka muh masak ding pen Gumpa Jesuh hipah ding hiven.”

    Fanny in nuntakna pen tawntung mit tawh en hi. I lei mittawh tawntung thu i et ciangin ki lamdang thei hi. “Tu hun lai takin tomno sung lungkhamna ka thuakte uh in ka thuakna uh sangin nakpi takin a lianzaw tawntung minthan’na sung hong tunpihding hi. Bang hang hiam cileh a kimu thei nate tomno sung bek kimang a, a kimu theilo nate a tawntung in kip ding hi (2 Kor 4:17-18).” 

    Minthan ni ciang a i muh ding To Jesuh vang tawh tehkak lehang tuhun a, i lungkhamnate a meng milmial lel ding hi.- Dennis Fisher

Pasian aw, hih lei nuntakna tunglam muhzia tawh hong ensak in.
Nang tawh maitang i kimuh ciangin ka leitung haksatna te uh beimang ding cih hong phawksak in.

Tawntung thu i muhzia in i lei nuntakna hong uk ding hi.

BUK NEU

Posted on Thursday, January 16, 2014by
January 16
Nili


BUK NEU


SIMDING:
Kolose 1:1-12; 4:12

Tua Tapa in Pasian’ pianzia a kimin a neihna ding Pasian mahmah a lungkim hi.__Kolose 1:19

KUMTAWN LAI SIANGTHO:
Piancil 39-40
Matthai 11

1949 kumin Los Angeles ah mihing 6000 in Nipi 8 sung Billy Graham’ thugen ngai-in thangah thei mahmah uh hi.  Tua cialpi ah thungetna le Counselling mun ding a kibawl bukneute om a, mite khukdinin thungen hi. Tua mun pen Cliff Barrows kici Billy Graham’ lawm, lalam makai pa khat in “Pasian nasepna bukneute,” ci-in min phuak hi. Thungen makai pi pen Los Angeles khuami Pearl Goode kici numei khat a hihi.
 
   Kolose khua a, Khristian-te tungah Paulin a khak lai sungah Paul in a lawmte tawh Kolose khuate ading thu a ngetsak denna pulak hi (Kolose 1:3,9). “Pasian’ deihna bangin nungta in lungsim khanghamin kip takin na om theihna dingun amah in thu hong ngetsak tawntung hi(4:12),” ci-in Kolose pawlpi makai Epafras’ thu zong  a gen hi.
 
    Pasian in mipawlkhat pen “Buk Golpi,” ah lungdamna thu a genkhia dingin a seh bangin, Epafras leh Pearl Goode te bangin thungetna ‘buk neu’ ah khukdin in thungetna tawh mi tampi Pasian’ mai a tunpih dingin zong hong seh om hi.-David McCasland
 
Amaute in nakpi takin thungen a,
Pasian’ palaite adingin thungen uh hi.
Amaute in a khukte uh tawh sem uh a,
A guh a tangte thahat semsem hi.

Thungetna pen na sepna ding a kiginna hilo-in, nasep hipah hi.

A KICINGVAL AN

Posted on Wednesday, January 15, 2014by
January 15
 Nilai ni

A KICINGVAL AN

SIMDING:
Matthai 6:25-34

Na nuntakna dingun bang ne-in bang dawn ding cih ahi a, na pumpi uh adingin bang silh ding cih ahi zongin lung himawh lua kei un.__Matthai 6:25

KUMTAWN LAI SIANGTHO:
Piancil 36-38
Matthai 10:21-42

The Jamaica Christian School for the Deaf aa Director a sem, ka lawm Marcia in tunai deuh in “Thupha tawh kipatkhiatzia” cih thulu guanin thupom thusanzia khat hong luikhia hi. Tua thului sungah ‘Tu kumthak ah, budget a cingval tawh ka kipat pen kum 7 sungah ah a khatveina hi’ ci hi. “Bang na cih nopna hiam? Dollars tul tampi Bank koih maw?” “Hilo.” “Tua leh na sang ading, tukum na kisapteng neikhin na cihna maw? Hilo. Tua leh bang?  “Tu khakhat aiding an nek ding neihkhin, ka cihna hi,” ci hi.

    “Naupang 30 aiding budget kigak mahmah tawh thu vaihawm pen vailian mahmah hi,” hong cih kawmin “Amah hoih a hih manin Topa tungah lundamna ko un: A itna kip a tawntung in a kho hi,” cih (I Khang 16:34) hong sim hi.

    Marcia in a sanginn leh a sang naupangte nuntakna Pasian in kum khat khit kum khat sik hi ci-in um hi. Sang vanzat, leh an le tui tampi a neihloh hangin Pasian tungah lungdam ko in a minthangna pulak den hi. Pasian in siktoto ding cih zong um cinten hi. 

    Kumthak na dawn ciangin Pasian hong sikna na um hiam? “Na nuntakna dingun bang ne-in bang dawn ding cih ahi a, na pumpi uh adingin bang silh ding cih ahi zongin lunghimawh luakei un (Mat 6:25),” ci a Jesuh hong itna kammalte umin muang takpi ding hi hang. – Dave Branon
 
Mailam thuding ka lung himawh keilel,
Jesuh in "thei ing" ci lel,
Amah tawh ka tonkhop ding hilel,
Mailam thuding Ama’n theilel.-Stanphill

Lunghimawhna in na zingciang vaidingte siangsak kei. Tuni a na thaneihteng hong hupcip hizaw.

KISIAN SUAH

Posted on Wednesday, January 15, 2014by
January 18
 Kigin Ni  

KISIAN SUAH

SIMDING:
Judah 1:20-25


Jesuh in paubanna a neilo ding le a pukkha lo dingin hong kem ding hi. __Judah 1:24

KUMTAWN LAI SIANGTHO:
Piancil 43-45
Matthai 12:24-50

Kikhawm a, biakinn pai ding cianga, tate i zep i puah pen nasep lian veve hi. A ki zem sitset sa pen Biakinn tunzawh minutes 10 ciangin ka taneu Matthew bang  a nu le a pa’n puahmah lomaw cih ding phial hipah hi. A puan pilpak lah kikhih khinlo, a mit limlang lah kia dekdek, a khedap khau lah khih lo, a moh nekna tawh a puan teng kizem bialbual. A mahbek nusia peuh mahleng nin lua pah.

    Khat veivei Khristian-te zong tua bang kihi thei zel hi. Jesuh’ thuman thutak puan silh khin napi, Pasian neilo te bang a om nuam zel hi hang. Tua man Judah in, “Jesuh in paubanna a neilo ding a pukkhalo dingin hong kem thei hi,” ci-in hong phawk sak hi.

    Pasian neilo te tawh i kibat lohna dingin bang cih ding? A Kha Siangtho le Ama’ lampi i zuih semsem ciangin paubanna a neilo dingin hong kem ding hi. “Pasian kammal tawh kisil hileng (Efe. 5:26),” bang zah takin thuman in i siangtho dan ding gentheih hilo hi.

    Jesuh in paubanna a neilo ding leh a pukkhalo ding hong kem ning hong cih pen thupha taktak a hihi. Ama’ itna leh donna phawk semsem leng Kumpi pa’ tate tawh i kibatna khang sak semsem hi. – Joe Stowell

A hoih mahmah na thuman puan nong silhsak a,
Pasian mai ah Paubanna neilo in a pukkha lo dingin nong kepnate lungdam hong ko ung.

Pa’ ompihna i theihna ding Tapa tungah kinga ni.

TAWLNGAK HUN NUAM

Posted on Tuesday, January 14, 2014by
January 14
 Ninih Ni

TAWLNGAK HUN NUAM

SIMDING:
Late 4

Ka lung sungah nuamna nong guan hi.__Late 4:7

KUMTAWN LAI SIANGTHO:
Piancil 33-35
Matthai 10:1-20

Zan ihmu theilo-in lukham peuh ka lumlehleh hangin ka ihmu thei tuan kei hi.  Ihmuh theihna ding lampi tuamtuam kigen a, a tawpna ah a hoihpen cih omtuanlo hi.

    Ihmuh theihlohna a hang tuamtuam om ding a, a kisamlo pi a, i teisetsat zelna pen lungkhamna, khial kisaknate hang na hi thei hi. Late 4 sung a, David’ nuntakna tawh en lehng. Pasian hehpih ding leh thunget a dawnna dingin Pasian na sam hi (tg. 1). A kikona te Pasian in hong za hi cih zong phawk zel hi (tg. 3). Lupna tungah i lungsimte sittel in  daitak a i om ding David in hong thapia hi (tg. 4). Pasian hoihna, itna, leh hehpihna te i lungsimsungah ngaihsunsun leng, Pasian i muang semsem ding hi (tg. 5).

    Ei le ei in hanciam a, i leptuah sawm, i lungkhamna te pampaih phot in Pasian muang leng hong lemzaw ding hi. Amah in i lungtang sungah nuamna hong guanthei hi (tg. 7).  Tua manin nitak lupding ciangin i lungsim daisak hithiat in i om ding hi. Pasian sungbek ah lungmuanna om hi (tg. 8). –Dave Egner

Na daihna kha  hong guan in la,
Huihpi nung tui kilok te hong awlmawh sak kei in,
Ka sungah na daihna hong phum in la,
Tawlngak hunnuam hong ngah sak in. - Dave

Ihmut theihloh hun nangawnin Pasian in tawlngak hun nuam hong pia thei hi.

SILAH NUNGTA BEK HILO

Posted on Monday, January 13, 2014by
January 13
 Nipi Khuavak

SILAH NUNGTA BEK HILO

SIMDING:
1 Thess. 2:7-3:7

Timoti hong tungkik khina, note’ upna le nong itna uh thute hong gen hi.__1 Thess. 3:6

KUMTAWN LAI SIANGTHO:
Piancil 31-32
Matthai 9:18-38

April kha 1937 kum Mussolini gamkek te in Wallamo gam a om, Missionary khempeuh Ethiopia ah a taisak ciangin Khristian kici 48 bek phalai uh hi. Tuate in Maku lungdamna bu bek mah a neih lianpen ahi hi. A tamzaw in laisim theilo lai hi. Kum 4 a sawt khit Missionnary te hong tunkik ciangin a upmawh uh bangle-in a tulsawm val in thu-um mi na kibehlap ta hi.
 
    Nungzuipi Paul zong Thesalonika khua pan kihawlkhia hi (Sawl 17:1-10). A nutsiat Khristain tawmno cikte a beilohna dingin nakpi takin tha pia hi (I Thes. 2:17).  A nungsang ciangin Timoti va pai a, Paul tungah tua khuate upna leh itna thu a pulak hi (I Thes 3:6). Tua thamlo in Makedonia leh Akhai-a gamte a dingin etteh tak Khristiante na suakto lai uh hi.
 
   Paul in a mission sepna pan in mi bangzah piangthak ci-in a mal tawh gen ngeilo hi. Kua ma dang tungah minla lo-in Pasian tung bekah minphatna pia hi. “Ke’n suanin, Apolos in tuibuak a, Pasian in khangsak hi,” ci lel hi (I Kor. 3:6). Kimlepam haksatna in khatlehkhat hong khenthang gawp thei mah a, a hi zongin Pasian in tua haksatna sungpan mah in pawlpi khangsak hi. Thuman cihtakna bek tawh Pasian tungah minphat na piaciat hi. – C.P. Hia

Topa aw, langpanna ka tuak uh ciangin ka lau uh bang lo-in gualzawhna nengno khat ah min ka deih mahmah uh hi. Pawlpi a lam leh a khangsak Pasia nang bek na hih lam hong theitel sak in.
Ka pawlpi ka lam ding a, sihna nangawn in zo zo ngeilo ding hi –Jesuh (Mat 16:18)

DAI GEI-A KA VENGTE

Posted on Sunday, January 12, 2014by
January 12
 Nipi ni

DAI GEI-A KA VENGTE

SIMDING:
Sawltak 2:41-47

Thu-um khempeuh kikhawlin omkhawm uh hi.__Sawltak 2:44

KUMTAWN LAI SIANGTHO:
Piancil 29-30
Matthai 9:1-17

Ka huang umna daite luita a hih manin ka pasal Carl tawh nikai lam pawlin phelkhiat ka kipan uh hi. Ka upmawh sangin ka zobaih zaw uh hi. Nikhat ka pasal, lopa met-in a om laitak, a ui tawh lam a siau kaveng nupi khat in huang umna dai tawh kisai in ama’ muhna hong gen hi. “Dai na phel khiat pen na huang etlawm zawtham ei. Ken bel dai cih khawng kisam sa khol keng,” ci-in kideidanna a omlo tual nuntak a lunggulhna hong pulak hi.

    Dai kaih pen a hoihna a om sam hangin i vengte tawh hong khen himawk in, tua pen ngaihsut huai mahmah hi. Ka kikkhopna pawlpi ah kal khat khat vei kilawmtatna hun kibawl zel in khat le khat thu kingetsak in tha kipia uh hi. Pawlpi masate hun lai in zong nisim in biakinn ah kimu khawm uh hi (Sawl :44-46). Thu ngen khawm in kilawmta khawm den uh a, lungsim ngaihsutna mahmah ah zong ki thukhat pah uh hi. Khat cimawh le khat in huh theipah hi (Thuhilhna 4:10). 

    Thu-um mite tawh kizopna pen Khristian nuntakna ah a thugil mahmah khat a hihi. Kilawmtatna pen Pasian in a itna hong lakkhiatna lampi khat ahi hi. –Anne Cetas

Khristian ki-itna in,
Lungsim hong henkhawm hi;
Lung kituaka kikholhna in
Vantung itna lim hi.-Fawcett

Hong lam ding leh hong lenkip ding Khristian kilawmtatna i kisam hi.
Subscribe to: Posts (Atom)