KONGKHAK KIVEI

July 6
Nipi

KONGKHAK KIVEI

SIMDING
Jeremiah 6:13-20

Lamka bomah ding unla khuadak un. Lamhoih ahi lampi luite dong unla tawn un. Tua hileh na tawldam ding uh hi.– Jeremiah 6:16

KUMTAWN LAI SIANGTHO:
 Job 32-33
 Sawltak 14


Kammal i zak ngei tek ding khat, “A beisa hun pen lamlak hisak inla, kongkhak kivei bang sak kei in” cih kammal na za ngei hiam ? A beisa hunte in mailam ading bang hong hilh nuam hiam, cih kantel ding kisam hi. A beisa hunte sialsial-in hun i beisak leh, bangmah sem theilo zah dingin i ma hong bing ding hi. 

    Jeremiah pen khuaneu khat pan Pasian in a sap khiat hi-a “gam tampite ading kamsang pa” ahi hi (Jer. 1:5). Amah pen Judah mite tunga piang ding siatnate a genkhol dingin kisawl hi. Jeremiah in tua bang a tangko ciangin Pasian’ sawlna bang hi, ci-in gen den hi (7:1-2).
  
  “Topa in, ‘Lamkabom ah ding unla khuadak un. Lam hoih ahi lampi luite dong unla tawn un. Tua hileh, na tawldam ding uh hi,’ a ci hi. Ahih hangin amaute in, ‘Ka tawn kei ding uh hi’ aci uh hi” (6:16).
 
    Pasian in amite mailam a kalsuan nadingin a beisa hunte etkik ding hanthawn hi. Lamluite a kicih ciangin, a paisa mite’ zuihsa ‘lampi hoih’ a gen nuam ahi hi. Pasian’ thumanna, hong maisakna, le hong sapnate ahi hi.
  
 Pasian in Amah tawh i tonkhop a beisa hunte sung pan thu theihtelna hong pia hi. – David McCasland

Bang hong piang ding ka thei kei –
Bang om ding cih zong thei keng,
Pasian pen thuman-in citak,
Ama’ hoih lam ka thei taktak. – Anon.
A beisa hun-a Pasian’ hong makaihna in mailam ading tha hong guan hi.

Read More

KHANTOHNA LAHNA

July 5
Kigin ni


KHANTOHNA LAHNA

SIMDING
2 Peter 3:10-18


Jesuh’ hehpihna le amah theihna ah khanto ta un.
— 2 Peter 3:18


KUMTAWN LAI SIANGTHO:
 Job 30-31
 Sawltak 13:26-52

Tu-a ka teenna inn pan a kikhin ding hile ung, ka inn kongkhak khuampi ka pua kawikawi nuam hi. Tua kongkhak khuam pen ka naupangte kumsim a khantohna ka ciaptehna om hi. Ka innkuanpih tawh khasim phialin, ka tate tua khuam tungah kitehsak-in, a tun sanna ka ciamteh hi. Ka ciaptehna ah ka tanu pen kum khat sungin letmat 4 bang khang hi.
   
 Ka tate khasim tun sanna ka teh den bangmah, kha thu lamah zong Khris tawh kisutna ah bang ciang hiam, cih i kiteh den ding thupi hi. Peter in, “Jesuh’ hehpihna le amah theihna ah khantoh ding” (2 Peter 3:18) gen hi. Amah in upna lamah picinna pen Khris hong pai hun ciang kigin kholhna hi, ci hi. Jesuh Khris hong pai ciangin eite thuman citak a nuntak ding hong deihsakna hizaw hi (tg. 14). Pasian’ kammal pen a khial le khiallo telcian thei ding, upna lamah picinna a gennuam ahi hi (tg. 16-17).
 
    Pasian tawh a gamla bangin i kingiahsut laitak, amah in Jesuh Khris tawh kisuun dingin hong bawlpha nuam-a, hong huh ahihlam theisiam ding hihang. Ama’ kammal in “Na hoih a sem ding a kiging mite pen Jesuh Khris hong pai ciang a nasep zo ding hi” (Fil. 1:6) ci hi. – Jennifer Benson Schuldt

Topa aw, Na Kha Siangtho kong sam uh hi
Nangma deih bang mi ka hih nading hong bawlpha in.
Jesuh sungah ka muh sianthona
Kei sungah hong kimu sak ta in.
Kha khantohna  pen Pasian’ kammal limcite neekna pan ahi hi.

Read More

KIZOPNA

July 4
Laithai

KIZOPNA

SIMDING
Johan 15:1-13

Keimah in lenggui ka hi-a, note pen a hiang na hi uh hi. Kei tawh hong kizom mi in, ama sungah kei ka oma, gah tampi gah ding hi. Kei tawh lo-in bangmah na sem thei kei ding uh hi”— John 15:5

KUMTAWN LAI SIANGTHO:
 Job 28-29
 Sawltak 13:1-25

US gamah July 4 ni-in Kumpi zumkhak nasia takin kibawla, mite in innpua ah anhuan-in, tuipi gei-ah suakta takin kikhawlkhawm ngeingai uha; khuapi khempeuh ah mipi in nuamtakin pawi bawl zihziah uh hi. Gualnopna tuamtuam le pawi namkimte kibawl kawikawi hi. Tuate khempeuh pen 1776, July 4 ni-in gam 13 kipawl khawma suahtakna ngah hun phawkna ahi hi. 

    Suahtakna cih pen, “ukcipna, zawhthawhna, panpihna, huhna cihte panin suahtakna” ahi hi. Khangnote in suahtakna thu a gen ciangin lamdang i sa kei hi. Khanglaite zong suakta takin hau nuam uh hi. Khanghamte nangawn in zong suahtakna kisam uh hi. 

    Gamthu lamah suahtakna pen thu khat hi-a, kha lam suahtak ding pen a genhakpi khat ahi hi. I kisap taktak pen i zungpi tawh hoih taka kizop ding a kisam hizaw hi. Jesuh in, “Keimah in lenggui ka hi-a, note pen a hiang na hi uh hi. Kei tawh hong kizom mi in, ama sungah kei ka oma, gah tampi gah ding hi. Kei tawh lo-in bangmah na sem thei kei ding uh hi” (John 15:5) ci hi. 

    Ei le ei i tuamdin ding sangin, eite taang dinga hong si Topa tawh i kizop den ding a phamawh ahi hi. Nisim-in amah tawh kizop ni, hisak den ni. – Bill Crowder

Nang kong deih tawntung hi, migi ka To
Lungnopna hong pia thei, A dang om lo
Kong deih hi, Nang kong deih hi, Nang kong deih tawntung hi;
Thupha hong pia’n Topa aw, Nang kong zuan  hi. – Hawks/Lowry 
 
I hatna pena vanglian Pasian tawh kizopna pan hi.

Read More

KEPNA KHOINA

July 3
Laizing


KEPNA KHOINA


SIMDING
1 Thessalonika 2:1-7


Nute in a tate uh itna tawh a bawl bangin note ka hong bawl uh hi. — 1 Thess. 2:7


KUMTAWN LAI SIANGTHO:
 Job 25-27
 Sawltak 12


Max in loneu khat nei hi. Tua sungah ama’ sep khop ding bawng khawi a, ni khat a va et leh bawngno khat na suak mawk hi! Bawng a lei lai-in a gai ahih lam tello hi. Kamsia-in tua bawngpi hong si citciat a, Max in bawngnawi vui lei-in thawl tawh a no anpia hi. “Kei pen a pi hong sa hi” ci-in Max in gen hi.
  
  Thessalonika khua Pawlpite tungah Paul in, “Nute in a tate uh itna tawh a bawl bangin note ka hong bawl uh hi” (1 Thess. 2:7) ci hi.
  
  Paul in mite thuhilhna tawh pantah hi.     Thu-umte in khalam khantoh nadingin Pasian’ kammal ahi nawizu kisam uh hi (1 Peter 2:2).  Pawlkhatte limpha takin en-in pantah hi. “Pate in atate uh a kep bangin kote in zong kong don uh hi. Note tha hong pia, hehnem-in Pasian ading nuntakna ah thakhauh ding kong hanthawn uh hi” (1 Thess. 2:11-12) ci-in Paul in gen hi.
 
    Eite khat le khat i  kihuh ciangin, honpa hong itna tawh i kisepsak ding hi. Leitung i khualzinna sungah eite tha i kipia ciat ding hi (Heb. 10:24). – Dennis Fisher

Topa midangte a huhzo dingin hong huh in.
Nangmah in kote itna kip le kho tawh
nong it bangmah midangte hong it theisak in.
Topa in midangte’ tungah i hopsawn theih ding Ama’ itna tui hong buak hi.

Read More

LUNGKHAMNA

July 2
Nilai ni


LUNGKHAMNA

SIMDING
Late 3

Topa aw, mi tampi takte in kei hong langpan’ nainai uh hi.– Late 3:1


KUMTAWN LAI SIANGTHO:
 Job 22-24
 Sawltak 11

Ka lawm khat in tui a dima kikoih hai  khat khut tawh ka khai ding hong pia hi. A sawt ciangin hong gik mahmah mawk hi. A tawpna ciangin ka khut kham a, tua hai ka khia hi. “Lungkhamna i cih zong tua hai i tawi tawh kibang hi,” ci-in amah in hong gen hi. “Sawtvei lungkham tektek lehang, tua lungkhamnate in tha hong zawsak hi” ci hi.
  
  Kumpi David in tua thu tel hi. A nuntakna zong kilumlet hiau hi. A tapa Absalom in a kumpi gam a nawngkai sakin tokhom hong tuh sawm hi. David in ama’ lam ah kua omin, kua in a langpang hiam cih telzo nawnlo hi. A sawltakte kiangah, “Hih mun panin taikhia meng ni, Absalom in hong suamlum kha ding hi” (2 Sam. 15:14) ci hi.
 
   Tua banga David galtai-in a om ciangin: “Topa tungah ka kiko-a, Amah in a mual siangtho panin hong dawng hi” (Late 3:4) ci hi. A lau hun ciangin, David in Topa ngak hi. Topa in a hehpihna lak-a, a kumpi tokhom piakik hi.
 
    I lung kiat theih nading thu tampi om hi. Pasian’ khut sungah tuate ap lehang, haksatna sung pan Amah’n hong hon ding hi. – Anne Cetas

Topa lungdam ing.
Lungkhamna in hong zo gawp sak lo na hih manin ka lungdam. Nong donna nuai-ah kote in ka lungkhamna ka koih zawh nading hong huh in.

Ei bek in i puak ding vangik i Topa in hong suanlo hi.

Read More

AMAH KUA?

July 1
Pithai

AMAH KUA?


SIMDING
Matthai 27:32-44


I Pasian pen sihna pana a nungtakik Pasian’ tapa’ thu ahi hi. – Rom 1:3-4


KUMTAWN LAI SIANGTHO:
 Job 20-21
 Sawltak 10:24-28

Kelly Steinhaus in Harvard College sangnaupangte’n Jesuh koici muh hiam, cih dotna khat nei ngei hi. Amau’ dawnkiknate zong lunglut huai thei mahmah hi. Khat in “Mite a hehpih thei pa.” A dang khat in “Mi nasia mahmah khat hi.” Khat leuleu in, “Ei bang lel hi e. Gumpa dingin zong ngaihsun zo kei ing. Pasian kiang tun nading lampi bek hi ing, a cih zong sang thei ke’ng” ci hi. 

    Tuma kum 2000 lai-in, mi tampi in ciamnuih bawl-in mi mawkmawk bangin simmawh uh hi. A sih ciangin zong: “JEW-TE’ KUMPI JESUH” (Matt. 27:37) ci-in singlamteh tungah kisuang hi. Amaute in, “Ka biakinn na susia uh zong ni thum sungin ka lamkik ding a ci pa, nang le nang kihon in!” (tg. 40) ci-in a vangliatna muanglo uh hi. Biakna makaite in, “Amah’n midangte honkhia-in, amah le amah kihonkhia zo lo” (tg. 42) ci lailai uh hi.
    A sih laitak Jesuh pen vanglian lo hi. A tangthu a cingin i sim ciang, mite’ nuntakna a hotkhiat ding Jesuh kiphal hi. Han sung pan hong thawhkik tak ciangin Pasian’ Tapa ahihna kilang hi. Ama hong sihna a manphatzia na ngaihsut kawmin a thawhkikna vanglian zong thei in. Amah leitung hong honkhia pa ahi hi! – Dave Branon

Han sung pan hong thoto zo,
Vanglian pi tawh galte zo gawp zo
Khuamial gam pan galzo-in hong tho to  hi,
A misiangte manpih ding hingkik zo hi. – Lowry
Jesuh’ thawhkikna in sihna vang susia hi.

Read More

KIPANPHA KIK

June 30 
Pizing

KIPANPHA KIK

Simding:
1 John 1

Pasian kiangah i mawhnate va pulak lehang, amah citakin thuman ahih manin, i mawhnate hong maisakin i hoihloh-nate khempeuh hong siangsak ding hi.
—1 John 1:9

Kumtawn Lai Siangtho:
 Job 17-19
n   Sawltak 10:1-23

Chad Pennington pen American Bawlung siam khat hi-a, liam ahih manin  a kamsia mahmah hong suak hi. Nihvei sitset ki-at a, a kimawlkik zawh nading kha tampi ngak hi. Ahi zongin tua natna pan hong damsiang tak ciangin nidang aa a siamna zahmah tawh hong kimawlzo ahih manin kumkhat sung aa natna pan hong damkik kimawlte lakah ahoih penin kipahtawi hi. Pennington in tua bang ahih theih nadingin kimawl theih ding bekbek a lungsim sungah koih ngiat hi.

    Kha thu lamah Pasian tawh i kizopna mawhna in hong nawngkai sak ciang, khensatna bek tawh a piang thei thu hilo hi. Mawhna in hong zawhthawh khit ciangin, kisik kikna zong a kisam thu ahi hi. “I mawhnate i pulaak ciangin, Amah thuman-in citak a i mawhnate hong maisak-in, i hoihlohna pan hong sawpsiang hi” (1 Johan 1:9).

    Kha thu-ah i puukkhak ciangin, Amah le amah hong kipia tawm Pa tungah i kingak ding thupi hi. Tua bek in lam-etna hong pia thei hi. Eite ading hong si Khris in eite hong it lua ahih manin, i mawh i khialh laitak Ama kiangah i ciahkik ding hehpihna tawh hong ngak gige hi. I mawhna pulaakna hangin Topa tawh i kilemkik theita hi. Topa kiangah ciahkik ni. – Bill Crowder

Ka hi bangin paulap neilo,
Kei a ding Na si luang simloh;
Nangmah in Nong sapna thu tawh,
Pasian’ Tuuno, kong zuan, kong zuan. – Elliott

Mawh kisikkik-na in eite hong puahpha thei hi.

Read More

SINKAWM LE NUNTAK THUAH

June 29 
Nipi Ni

SINKAWM LE NUNTAK THUAH

Simding:
2 Peter 1:2-11
Hih bang hoihnate a kicingin na neih uh leh i Topa Jesuh Khris na theihna uhah thahatin kiman’na na nei ding uh hi.—2 Peter 1:8

Kumtawn Lai Siangtho:
Job 14-16
 Sawltak 9:22-43

William Zinsser in a laigelhna khat  ah, “laigelh siam tampite in a manzawh nading uh in a lungsim gimsak lua hi” ci-in gelh hi. Amaute in a laibu a kizuak kik nading tawh buai uha, geelna, ngaihsutnate zangkhai ngaihsut uh hi. Tua ahih manin Zinsser muhna ah, hih laigelhte in pen tua hun ding ngaihsun lua uh ahih manin a tai kidemna lampi ah zawi dang khat zui kha thei uh hi, ci hi.

    A.W. Tozer in zong tua bangmah lai khat Khristian muhna tawh gelh hi. A laibu sungah, “Eite in a gah khia ding bek i ngaihsun a, singkung hong kipatna a zungpi mangngilh kha hihang” ci-in gelh hi.

    Sawltak Peter in Khris tawh kisun nuntakna pen tu laitaka i hihna bangbang ahihi, ci-in na gen hi. Tua ahih manin Peter in kha lam khantohna ding thu giat: upna, kikep zawhna, pilna, gamtatna, lungduaina, sianthona, midangte huhnopna, le itna hi (2 Peter 1:5-7), ci-in na gelh hi. Tua thu bulpi teng na neih ciangin, Peter in “Khris Jesuh na theihna uh-ah supna le gahkhiatlohna cihte omlo ding hi” (tg. 8) ci-in gen hi.

    Pasian in Amah i theih nading lampi hong honsaka, Ama’ min le vang a kilat zawh nading eite hong bawlpha nuam hi cih hong phawksak hi. – David McCasland

    Topa, a picing pen ka deihna lam-un ka khial kha pahpah uh hi.
Ahi zongin Nangmah in ahun le geelkholhna tawh hehpihna hong pia hi.
Midangte’n thupha a ngah theih nading-un Nangma’ vang kote tungah hong taangsak in.

Khristian nuntakna cih pen Pasian tungah
i kingak laitaka a kimukhia nuntakna ahi hi.

Read More

LUNGLUT-HUAI SAK IN

June 28
Kigin Ni

LUNGLUT-HUAI SAK IN

Simding:
Kolose 4:2-6

A pualam mite tungah a kilawm a kituakin gamta un la, hunhoih na ngah khempeuh uh na valkhongsak ngei kei un.—Kolose 4:5

Kumtawn Lai Siangtho:
 Job 11-13
n  Sawltak 9:1-21

Tangthu khat ah, pasalno khat a kivakna dingin meileng tungah apple va zuak hi. A pai kawm-kawm-in “Apple na duh uh hiam? Apple hong leisak vo” ci hi. Ahi zongin ni thapaisung a zuak hang, a ip sungah apple dimtakin omlai-a, sum zong peek khat zong ngahlo hi.

    Tua bang amu papi khat, om theilo ahih manin tua naupangpa tungah apple pum khat ngen hi. Tua ciangin meileng mailam khan ah va pai-in, a dial tawh a nulsiang sitset khit ciang, mipi lam-ah tua appel ne kawmsa-in hong paiphei hi. A limdan le a limcit-zia zong gen hi. Tua bangin naupangpa in a hih ding sawl hi. Tua bang ahih takpi ciangin, apple khempeuh khawng khin hi. Bang kilamdang hiam? Sun tawntung apple lei nuamlote in hong leinuam panpan uh hi.

    Jesuh Khris thu i gen ciang a limna i lahkhiat theih ding kisam ahihna  hong phawksak hi. I nuntakna ah tua Jesuh in bang hong hihsak hiam, cih i lahkhiat theih ding kisam hi. Paul in, “Midangte’ muhna ah, amaute na zawh zawh nading-un pilvang un” (Kol. 4:5) ci hi. Midangte hehpih-in, itna le lainatna i neih ciang, amu mite in a hang kan ding uha, Pasian’ itna i genkhia thei pan ding hi. – Dave Branon

Topa, gupkhiatna hong vaihawmsak lungdam lua hi ung. 
Tua thu mite in a san theih nading 
a lunglut-huai itna vangliatnate ka nuntakna ah hong palhkhia sak ta in.

A kikheel nuntakna in eite hong bawlpha Pasian a kimuh nading limpha ahi hi.

Read More

DAWM IN

June 27
Laithai

DAWM IN

Simding:
Rom 13:8-10

Midangte a it mi peuhmah in amaute tungah siatna bawl hetlo ahih manin itna i neih ciangin Thukham buppi a zui khinta ihi hi.
—Rom 13:10

Kumtawn Lai Siangtho:
Job 8-10
Sawltak 8:26-40

Tanglai Greek mi Hippocrates pen zatui lam pilna a mukhia pa ahi hi. Amah in zatui a kibawl ciang zuih ding thukhun nei-a tua thukhunte pen tuni dongin kizangin “Hippocratic Oath” kici hi. Ama thukhun teng lak panin a thu bulpi in “Mite na dawm in” cih ahi hi. Zato lam pilna neite in cina nu/pa’ phattuam nading a ngaihsut ding thupi pen hi.

    I nisim nuntakna ah zong tua thukhun in phawksak nop hong nei hi.  Thuciam Thak sungah nun neem takin nuntak ding hong hilh hi. Pasian’ thukham tawh i kitehkaak ciangin, Paul in “Itna i neih ciangin thukham buppi a zui khinta ihi hi” (Rom 13:10) ci hi.

    Nisim-in Jesuh’ nung i zuihna ah, midangte’ nuntakna a khoih khial khalo dingin kidop den ding ahi hi. Tua bang i tuahkhak ciangin zong, ei le ei kidongin, “Hih in Khris hong hilh thu mah ahi diam? Ahih keileh kei le kei a kihehpih bek ka hiam?” citek ni. Liamma tawh a kidim leitungah Khris’ itna hangin damna a piazo dingte i hihi. – Dennis Fisher

Topa, kei’ deihna le kisapna bekbek tawh
ka buaikha lua hiam, hong theisak in.
Midangte zong a it thei dingin nong gen hi.
Midangte ka donzawh nadingin
nang’ nung hong zui siamsak in.

Midangte’ vangik i va dawn siam ciangin, ei’ vangik kiphawk nawnlo hi.

Read More

LAMSAM HUHNA

June 26
Laizing

LAMSAM HUHNA

Simding:
Late 46

Topa pen i bukna hi-a, hong huh pahpah pa zong ahi hi.
– Late 46:1

Kumtawn Lai Siangtho:
Job 5-7
 Sawltak 8:1-25

Ka theih ngei lawm khat in England kumpinu’ gam Balmoral a kicihna munah sabeng hi. Lamkal ah a khe hek ahih manin lampai thei nawnlo-a, a lawmte in mun khat ah koih-in tua mun pan a na ngak dingin gen hi.

Tua mun ah a tut laitak mawtaw khat hong pai a, a gei-ah khawl hi. Mawtaw hawl nupinu in, tua pa hopih hi. Lawmte hong tun dong a ngak ding ka hi, ci-in dawng hi. Tua nupinu in, “Hong tuang in; na omna mun ah hong puak ning” ci-in gen hi. Tua ciangin mawtaw tung a va tuan phei leh, Elizabeth Kumpinu ahih lam thei hi.

Eite zong tua sangin a lamdangzaw huhna a ngah i hihlam kiphawk ni. Van le lei a bawl Pasian leitungah hong pai-in, i haksatnate hong mu-in a huh dingin hong pai hi. Late laphuakpa in, “Topa pen... haksat hun lai-in hong huh pahpah Pa ahi hi” (Late 46:1) ci hi. Topa in i thuak zawh nading hehpihna hong guan hi. A kammal tawh hong cingin, thu hong nget pih ding lawm le gual hong pia-a, i kha nuntakna a picin theih nadingin kimuanna lungsim hong pia hi.

Cimawh lamsam-in na om hun ciang, hong huh ding Topa zong in. – Joe Stowell

Topa, huhna le panpihna ka kisap laitak
nang nong nai om na hih manin ka lungdam hi.
Nang tungah hong kinga-in, kote inn lam ah
hong kha ding na itna bek hong zong thei sak in.

Lungdam in! Hong huh ding Kumpipa hong paita hi!

Read More

TUNGLAM PAN PILNA

June 25
Nilai ni

TUNGLAM PAN PILNA

Simding:
1 Samuel 24:1-10

Tung lam pan hong pai pilna pen siangtho-a, kilemna piangsak hi.
– James 3:17

Kumtawn Lai Siangtho:
Job 3-4
Sawltak 7:44-60

Kiera Wilmot in a sangkah lai-in a muhkhiat thute  a genkhia thei hileh,  mat tampipi ngah ding hi. A kamsiatna tawh amah pen sepkhialhna hangin sang pan kihawlkhia hi. Lai sinna vai tawh kisai muhkhiatna khat lah ding nei ahih mani, a lawmte in a pualam ah lahna neih dingin hanthawn uh hi. Amah thukim lo hi. Thawl sungah chemical teng a gawm ciangin, nasia takin hong puakkham a, tua khan sungah buaina lianpi hong piang hi.

    Thuciam Lui sungah a lawmte’ hanthotna angah David thu i lungngai nuam hi. Saul tawh kigal neihna hangin bu kawikawi hi (1 Sam. 24). A kithuahpihte in ama khut sungah Saul nuntakna baih takin a kipiakna a muh ciangin, thah ding hanthawn hi (tg. 4,10). David in Saul that lum leh, David pen kumpi suak thei ding ci-in ngaihsun uh hi. Ahi zongin David in “Pasian’ sathau nilhsa mipa” (tg. 6) tungah khutlum nga nuamlo hi.

    Nuntakna ah zong a hih huai, a piang ding a kilawm tampi zong i tuakkha theizel hi. Ahi zongin leitung zia leh kha zia pen kilamdang mahmah hi (1 Kor. 2:6-7). Tunglam pana hong pai pilna pen, “siangtho-in, kilemna piangsak a, itna tawh kidim” (James 3:17) ci hi. Midangte in a ngeina tawh thuhkik ding hong gen laitak, eite in i Topa’ lungsim tawh midangte i kaizawl ding hi. – Jennifer Benson Schuldt

Nang deih bang Topa, Nang deih bangbang!
Nangmah beel seek pa, Kei tungman bang
Nangma deih bangin, kei hong bawl in;
Tanglo, mang dingin, Nang kong ngak hi. – Pollard

Tunglam pan pilna a ngah mi peuhmah mipil taktak ahi hi.

Read More

KHAM SINGNAI

June 24
Pithai

KHAM SINGNAI

Simding:
Rom 6:1-17

Bang hang hiam cih leh ama sihna-ah sikhawmin pawlkhat i suah leh amah a thawhkikna-ah zong pawlkhat suakin i thokhawm ding hi.
— Rom 6:5

KUMTAWN LAI SIANGTHO:
 Job 1-2
 Sawltak 7:22-43

England gam Cotswold mun ka zin laitak, a manpha hai pawl khat ka lei hi. Lim phatakin ka kep hangin, a tawpna ciang kiat suahin kitam hi. Tua hai thu ka ngaihsut ciang, Japan bawl Kintsugi ka phawk hi.

    Van khat peuh a kisiat ciangin bawlkik thei lehang, i lungdam mahmah hi. Japan khutsiam khat in kum sawtpi lai-in tua bang hai kitamte a bawlphat kik dan ding na hanciam hi. Amah in kham tui a kizuut singnai tawh tua haite phop kik hi. Tua pen kham meel tawh ahih manin etlawm mahmah hi.

    Leitung piancil lai-in, mawhna hong lut hi (Pian. 3). Pasian thu ngaihsunte in “kiamsukna” ci hi. Tua hangin Pasian tawh kigamlatna hong piang hi. Mite tawh kigamlat ding hanciam thapai i hih manin, i lungtang in natna le kigamlatna lam, manawh hi. Pasian in tua bang kigamlat ding deihlo ahih manin, tua kitapna mun pen a hoih pen ahi dingin phop kik hi.

    Kintsugi khutsiampa bangin Pasian in hong bawlpha hi. Kham sang a manpha zaw a sisan zang hi. Tua pen kham tawh a kibawl sangin mannei zaw-a, Khris’ sihui tawh a kibawlpha i hihi. “Ama’ sihna hangin Amah tawh omkhawm-in a meel i suun hi” (Rom. 6:5). Tua meel tawh a kibang bangmah dang omlo hi. – Julie Ackerman Link

A si hong bua, a nunna hong pia;
Kalvary ah hong kipia khia;
Ei’n bang piakik thei ding
Hong itna lian, dimleet in hong piakhong. – Anon

Mawhna panin suahtakna ding Jesuh’ sisan buakhin zo  hi.

Read More

A BAWLPA IN PUAHPHA KIK

June 23
Pizing

A BAWLPA IN PUAHPHA KIK

Simding:
Kolose 3:8-17

Ngeina thak tawh kituakin gamta un. Eite a hong piangsak Pasian a kicing takin i theih semsemna dingin amah a sun dingin a hong thakbawl tawntung ahi hi.— Kolose 3:10

Kumtawn Lai Siangtho:
Esther 9-10
Sawltak 7:1-21

Kum tampi lai peka kilam inn le munte khuahun hangin hong siasia ta hi. A ngeina banga kepzawh nading a kihanciam laitak, pawl khatte pen a ngei bangin koih ding a hamsat hun zong om thei hi.

    Paul in Kolose Pawlpite tungah, leitung nate tawh kipuahpha kik theilo thu na gen hi. Pasian’ mite kipuah phatna ahi hi. Paul in “Ngeina lui leh gamtatna lui khempeuh a beisak khin na hihna uh kithei-in, ngeina thak tawh kituakin gamta un. Eite a hong piangsak Pasian a kicing takin i theih semsem nadingin amah a sun dingin a hong thakbawl tawntung ahi hi” (Col. 3:9-10). Hong bawlpa in hong sihsan nailo hi. Zong si  ngeilo ding hi. Jesuh Khris hangin kha lamah nuntakna a thak suak dingin hong bawlpa ahi hi. Ama’ hong maisakna in i nuntakna vaang hong liansak a, zat nuam dingin hong bawl hi.

    I nuntakna a bulpi pen khutsiampa Topa’ vaihawmna ah om ahih manin, eite a hi ding bangin hong bawl thei hi. Bangzah takin mawhna niin i baang phial zongin, nuntakna thak le bawlphat kikna hong pia nuam hi. A bawlpa pen si ngeilo-in nungta tawntung ahih manin, eite sungah na hong semsem lai hi. – David McCasland

Vantung Kumpipa phat in,
Ama’ khephung ah va bok in;
Nang hong huh, damsak, nuntakna hong pia,
Amah phatna la aw gingsak in. – Lyte

Jesuh in lemphat kik nasep nakpi takin sem hi.

Read More

KA PA’N JESUH AMUH NI

June 22
Nipi Ni

KA PA’N JESUH AMUH NI


Simding:
1 Timoti 1:15-17

A mawhneipha bel ka hihna thu hang mahin, nidang ciang-in amah umin nun-tak tawntungna a ngahding mite’ etteh theihdingin Khris Jesuh in a lungduai-na cingtakin kei tungah hong lah-theihna dingin Pasian in kei a hong hehpih ahi hi.- 1 Timoti 1:16

KUMTAWN LAI SIANGTHO:
Esther 6-8
Sawltak 6

Ka pu, ka pate unau pen mi lungkhauh hi uha, upna thu tawh kisai a kigen ciangin za nuamlo phadiak uh hi. Ka pa in cancer tawh lupmun tungah zawmcip-in a om laitak, Jesuh’ itna thu a gen dingin ka lungsim sungah hong phul hi. Amah’n hong a tawpna ciangin hong genkhiat thu khat pen, “Ka theih ding a kilawm thei taktak ta ing” hong ci hi.

    Amah tawh Pasian’ thu genkhop ding hun ka ngah nawnloh hangin a ut huna a sim theih ding ci-in Pasian’ itna a kigelh laidal khat ka pia hi. Thu zong ka ngetsak hi. Ka lawm khat in Jesuh amuh dong a nuntak nading thungetna tawh hong huh hi.

    Nitak khat ka pa in hong nusiata ci-in phone hong kiset hi. Vanleng tualah ka sanggampa in hong dawn kawmin, “I pa’n Jesuh kiangah mawhmaina a ngetlam, nang hong theisak nuam hiven” ci-in hong gen hi. “Bang hunin maw?” ka cih leh, “Hong nusiat ni ding zingsang-in” hong ci hi. Pasian in eite tungah a hehpihna hong lah mah bangin ama tungah zong lak hi (1 Tim. 1:16).

    Khat veivei lungdamna thu i gena, khat veivei ei’ thu zong i gen hun om hi. Khat vei leuleu ciangin nuntakna tawh i lak a, thungetna tawh ma i pang den hi. Hotkhiatna cih pen Pasian’ nasepna hi-a, ei’ sepsak theih hilo hi. Pasian pen itna tawh a kidim Pasian ahih manin i thungetna hong kidawng kei zongin, Amah i muang veve hi. – Randy Kilgore 

Damtak le nemtak Jesuh’n hong sam –
Nang le kei hong sam hi;
Jesuh in hong ngak lai gige –
Nang le kei hong en gige – Thompson

Ei’n i tuh a, tui buakin, Pasian bek in khangsak thei hi.

Read More

LAMPAI MANLANG PEEN

June 21
Kigin ni

LAMPAI MANLANG PEEN

Simding:
Luka 10:38-42

A sanggamnu Mary pen Jesuh’ khephung ah tu-in a thungai hi. – Luka 10:39

Kumtawn Lai Siangtho:
Esther 3-5
Sawltak 5:22-42

Leitung cidamna lamte’n mihingte’ cidamna a kan uh ciangin gam 32 pan khuapite lakah Singapore khuamite pen lampai manlang peen uhhi, ci hi. Pi 60 pen second 10:55 sawt uha, New York aa teengte in second 12:00 sawt uhhi. Malawi gam Blantyre khuamite pen second 31:60 sawt hi, ci-in mu uh hi.

    Koimun koimun ah na om zongin, a beisa kum 20 sangin mite pen lampai hatzaw tham uh hi, ci-in kimuthei hi. Leitung pen nidang sangin tampi buaizaw tham hi, ci-in a kithei thei ahi hi.

    Leitung in nang hong lunggim sak lua hiam? Jesuh’ kammal ngaihsun pak dih: “Na nasep tawh buai-in lunggim kisa lua teh. Na kisap khat oma, tua pen Mary in teelzo hi. Ama’ kiang panin sutkhiat huailo hi” (Luka 10:41-42) ci-in Martha kiangah gen hi.

    Tua kammal ciamteh inla, Jesuh in Martha a taai cih lamin la lo-in, a nasep masak ding a nunun kha ahih ding Jesuh in deihlo hi.  Leitung buaina tawh gimsa lua ahih manin Jesuh’ kammalte a zak khakloh pen paammaih sa hizaw hi.

    Topa ading i hanciamna ah, i ngaihsut ding thu khat pen – Topa tawh hun nuam i neih ding a thupi pen hi. – Poh Fang Chia

Amah kei tawh paikhawm, hong hopih,
Ama aa ka hihlam hong hilh
Buaina kawm ah lungdamna taktak,
Kei bek nangawn ka kipaak. – Miles

Ei’n Topa tawh i kikholh khop ding sangin, Topa’n ei tawh kikholhkhop ding lawp zawlai hi.

Read More

PHAWK NAWNLO

June 20
Laithai

PHAWK NAWNLO

Simding:
Late 103:1-8

Ka lungsim aw Topa phat inla, Ama’ hoihna mangngilh ngei kei in.
– Late 103:2

Kumtawn Lai Siangtho:
Esther 1-2
Sawltak 5:1-21

Tunai deuh-in, ka neutuung aa ka  lawm khatin sangkah lai-a maan khat email tawh hong khak hi. Hong hilh Sya nih tawh ko a sangnaupang teng ka tut liailuai na uh ahi hi. Ko pen tai kidemna ah a kihel pawl hi-in tai khat pan tai khat le alang dong ka tai hun uh ka phawkkik tiaituai hi. Ka muhkhak ciang ka lung anop mah bangin, amaute mangngilh-in komau’ nasep tek tawh a buaitek ka hih lam ka kitheih ciang a mangngilh thei pahpah ka hihlam ka kiphawk hi.

    Nuntakna lampi i tot laitak, i pai ngeina mun zong kimangngilh thei-a, i kikholhpih lawmte zong i mangngilh thei hi. Hun hong bei, zanni cih pen tawmvei sungin beipak a, tulai thu bek tawh i tha vaithai ciat hi. Tua bang hunlai mah-in, Pasian eite tungah hong hoih lam zong i phawkkha kei hi. Tua hih manin David in zong, “Ka kha aw, Topa phat in. Ka sunga om khempeuh aw, Ama’ min thupha pia in! Ka kha aw, Topa pahtawi inla, hong hehpihna mangngilh ngei kei in” (Late 103:1-2).

    Tua bang phawk theihna pen koimun koimun ah i om phial zongin kisam hi. Eite hong kimangngilh hi ci-in i ngaihsut laitak, Topa’ hong sepsak sate phawkkik ding thu hoih ahi hi. Tua phawkkikna hangin Topa hong ompihna in tuni bek hilo, hong pai lai ding hunte ah tha hong guan ding hi. – Bill Crowder

Nuntakna tuipi tungah huih nun ciangin,
Si ding cih ngaihsun-in na lungkiat ciangin;
Thupha khat nungah khat na ngaihsun inla,
Topa in tampi hong pia na thei ding hi. – Oatman 

Topa’ thumanna i phawkna in i mailam aa ding thathak hong guan hi.

Read More

SHREK TAWH KIMU

June 19 
Laizing

SHREK TAWH KIMU

Simding:
Ezekiel 34:11-16

Ka tuute keimah in ka zong ding hi. – Ezekiel 34:11

KUMTAWN LAI SIANGTHO:
Nehemiah 12-13
Sawltak 4:23-37

Shrek pen a lampial tuu ahi hi. Amah pen a lawmte kiang pan a paikhiat zawh kum 6 bang phata hi. New Zealand gam mual tung suanghawm sungah amah a kimuh kik ciangin amute in amah pen tuu salo uh hi. “Leitung taangthu sunga kigen ganhing khat tawh kibang” cihzah-in kigen hi. Shrek pen tuu cingpa tawh a kigamla khin a mangthang tuu khat ahi hi.

    Shrek pen tua mual tung panin a kum kik ding hamsa mahmah hi. A pumpi pen pound 60 bang gik a, ama thu-in tuaksuk thei nawnlo hi. Amul bekbek zong giksa ahih manin tua a gammang tuu pen amul a kimeet keileh a suahtak pak nading thubaih hilo hi.

    Shrek’ tangthu in hong phawksak khat pen Jesuh in Tuucing Hoih ka hihi (John 10:11), kici hi.  Pasian in amite pen ka tuuhonte (Ezek. 34:31) cingiat hi. Shrek bangin ei le ei-in ahoih pen teel theilo  hihang. Tua hangin i mawhna vangik hong lianlua hi (Ezek. 33:10). Tua vangikte a zaan theih nadingin, hong cingpa Tuucing hoih kiangah om-in, amah bek i muan theih ding kisam hi. Amah in eite hong bawlsia lo-in hong bawlpha ding hi. – Julie Ackerman Link

Kei hong cingpa itna tawh kidim,
A hoihna kikhel ngei kei;
Ama aa ka hih sapna nei keng,
Amah bek a tawntungin ka nei. – Baker

Pasian hong thuhilhna in upna lamah picin ding dong ngimna nei hi.

Read More

NUI IN!

June 18 
Nilai ni

NUI IN!

Simding:
Gamlak vakna 6:22-27

Topa  in note tungah a maitang hong taangsakin note hong ompih ta hen. – Gamlak vakna 6:25

Kumtawn Lai Siangtho:
Nehemiah 10-11
Sawltak 4:1-22


Ka laisimna sungah nuihna cih pen cidamna ding ahoih mahmah khat hi, ci-in gen hi. Tua sungah nuihna in i lungtang damtakin kisai saka, patauh dipkuatna kiamsak hi, ci hi.
    Nuihna cih pen nang bek ading phattuamna hilo-in, kineih khemna omlo nuihna in a mu khate ading zongin thupha sanna khat ahi hi. Kampau khiat kullo-in, na kiim na paam ate a pakta, amau tawh nuam asa na hihlam kitelsak hiteh. Maitaina in i sukkhak loh mi khat zong a kawi thei, khut tawh kibang hi.
    Nuntakna in nuihna ding thu tampi hong pialo hi. Ahi zongin naungeekte’ nuihna le khanghamte’ maitaina tungtawnin lungsim tha la thei hihang.
    Nuihna cih pen Pasian’ mel kilatsakna hi gige hi. Gamlakvakna Laibu sungah Pasian pen nui hi, ci-in kimu thei hi: “Topa in note tungah a maitang hong tangsak henla, note hong hehpih ta hen. Topa in note tungah a maipha hong pia henla, note tungah nopsakna hong pia ta hen” (Gam. 6:25-26). Hih kammalte pen mite’ nuntakna ah Pasian’ maitaina a tun theih nading lampi khat-in kizang hi.
    Tua hi-a, Topa in nangmah hong it khit nungsang, Amah in Ama’ maitang hong taan ding pen thasial lo-in angtang mahmah lai hi. – Joe Stowell

Topa, ka nuntakna nang ading a deihhuai hong suaksak ta in. 
Nangma maitang kei hong taan den ta in.
Ka nuntakna ah maipha nong piak bangmah-in,
nuihna tawh ka lawmte khat beek thapia zo dingin hong hehpih ta in.

Na maitaina in kha thu lamah a gilkialte adingin Pasian’ lungdamna thu a pulaak na hihi.

Read More

TUUNO KHUAVAK

June 17
Pithai

TUUNO KHUAVAK

Simding:
Mangmuhna 21:14-27

Pasian’ minthan’na vang pen khuavak hi a, Tuuno zong meivak hi khin ahih manin tua khuapi in nitaang leh khataang cihte kisamlo hi. -- Mangmuhna 21:23

Kumtawn Lai Siangtho:
Nehemiah 7-9
Sawltak 3

Leitung piancial aa kipan eite in Ni le Kha pen sun le zan ah khuavak hong pia hi, ci-in i theitek hi. Amaute in i gamtat theihna ding khuavak hong pia-in, anteh theipuam ading a kisam dat zong pia hi. I pumpi ading cidamna hong guan khuavak hong paina Ni le Kha pen Pasian’ bawlsa ahi hi. Piancil Lai Siangtho sungah Pasian in, “khuavak lianzaw pen sun a uk ding, khuavak neuzaw pen zan a uk dingin bawl hi” (Pian. 1:16) ci hi.

Ni khat ni ciangin Topa in tua sangin a lamdang zaw khat bawl lai ding hi. Tawntung mun vantung gam ah, “khuavak apia ding ni le kha kisam nawnlo dinga, Pasian’ vangliatna intaan ding hi. Tuuno in tua khuavak pia ding hi” (Mang. 21:23) ci-in John in gelh hi. A minthang Khris pen leithak le vanthak adingin khuavak apia meivak hong suak ta ding hi.

    Topa Jesuh pen “Leitung mite’ mawhna a puakhia Pasian’ Tuuno” ahi hi (John 1:29). Amah pen kha lam khuavak hong puak ding pa zong hi-a, ama nung a zui peuhmah “leitung khuavak” (Matt. 5:14) ahi uh hi. Tawntung mun ah a mah pen khuavak hong pia den meivak hong suak leuleu hi (Mang. 21:23). Tuuno’ vaang tang nuai-ah i om ding hun pen bangzah takin lawp huai! – Dennis Fisher

Jesuh a beel mite khuamial sung omlo –
Jesuh leitung khuavak ahi;
Hong makaihpa’ khuavak nung i zuih tak ciang –
Jesuh leitung khuavak ahi. – Bliss

Leitung khuavak sungah meimit cih bang om ngeilo hi.

Read More