VANDAK TO

Posted on Saturday, May 17, 2014by
May 17
Kigin Ni  

VANDAK TO

SIMDING:
Kolose 1:15-23

Ama hangin leitung le vantunga om a kimu thei le kimu theilona khempeuh kibawl hi.__Kol.1:16

KUMTAWN LAI SIANGTHO:
1 Khang Tangthu 1-3
Johan 5:25-47

Mihingte pen a kimu thei le a kimu theilo kikal-ah i om-a – ngeina le ngeina lo tawh i teengkhawm hi.  Tua mun nihte pen New Zealand gam ah whale ngasa golpite ka va et ciangin ka lungsim sungah ka ngaihsut mahmah thu khat hi citciat hi. Tua whale ngasate pen tui maitang tungah tawmkha vei hong kilaak to pak uha naakpi takin huihdik uh hi. Tua bang a naak ciangin tui khawng phiit sausau a, tua khit ciangin tuithuk sung mah ah khatvei lutsuk kik leuleu hi.

    Tui tawh kisai, tui tawh a kisukha penpen whale ngasate zong tui sung bekbek-ah omle uh oxygen diik dingin hong kilaaktoh zel kul-a, tua hi keileh si thei uh hi. Huih lak thu tawh kisai-in a theih tawm mahmah ding hinapi’n, tua huih omna mun ah a kahtoh ciatciat kul hi.

    Tua whale ngasa-te a bang ka hi hi. Kha huih nuamtakin ka diik theih nadingin tunglam-ah ka daktoh hong kisam hi. Ahi zongin hih munah ngeina le ngeinalo/khengval-te kigamlatna zong kimu thei tuanlo hi. I teenna leitung mahmah pen tua ahih keileh tua (either/or) cih tawh a nungta hi peuhmah lo hi. Khristian’ gamtat bang ka gamtatna – thungetna, biakpiakna, Pasian’ itna cinate tung, meigongte tung, le thongkiate tung ka gen ciangin – muh theih ngeina le muh theihloh kha ngeina zong hizel hi.

    A kimu thei leitung piangsakin acing akem Pasian in, a kimu theilo Ama kiangah i va zuat ding zong hong deih veve hi. Paul in “Nidang lai-in Amah tawh na kigamla ngei uha, na mawhna hangin Ama’ galte na hi uh hi. Ahi zongin Ama’ hong sihna hangin Amah tawh kilemna i ngah hi” (Kol. 1:21-22).

    A kimu thei leitungah nasepna i nei thei-a, eite in lawngin, gimnam namin, mit tawh i mu thei hi. Ahi zongin na khempeuh a bawlpa le acing akempa in i kisap kha lam huih i diik theih nadingin lampi hong honsak hi. – Philip Yancey

Pasian’ tokhom pen Ama’ tate adingin va naih ding hamsa lo hi.

SIA TAMPI

Posted on Friday, May 16, 2014by
May 16
Ninga

SIA TAMPI

SIMDING:
Paunak 15:16-23


Ngaihsut piakna omlo-in geelnate lam pial thei-a, mi tampi’ ngaihsutna tawh tuate kip hi.____Paunak 15:22

KUMTAWN LAI SIANGTHO:
2 Kumpite 24-25
Johan 5:1-24

Kum zalom 15 lai-in Pasian’ thungaihsun Thomas a Kempis in, “Na khempeh a thei a pilvang mahmah kua om ahi hiam? Tua ahih manin nang’ ngaihsutna muang kei inla, midangte’ ngaihsutna zong ngaihsak zel in. Nang’ ngaihsutna pen hoih pen mah ding hinapi, midang’ ngaihsutna le Pasian’ itna tonkhawmsak lecin, nang adingin hamphatna tampi hong pia zaw ding hi” ci hi. Thomas in i nuntakna ah thu i vaihawm ciang midangte’ ngaihsut piakna zong thupi san ding kisam hi, hong ci ahi hi.

    Pasian’ hong geelsaknate i tel theih nadingin, mipilte in ngaihsut piakna tampi deih uh hi. Tuate tungtawnin Pasian in Ama’ pilna hong lak ding hi. Mi khat peuh in midang’ khat ii ngaihsut piakna a santheih ciangin ama’ khensatna ah phattuamna a piangsak ding midang’ ngaihsutna zong a thupi sim ahihna kilang hi.

    Solomon pen Israel kumpite lakah a pil penin kigen hi-a, midang’ ngaihsutna a thupi sim ding a gen ciang: “Thudot lohna tawh, ngaihsutsate peellem thei-a, ahi zongin mipilte’ ngaihsutna dot siam lehang, vai hong lem ding hi” (Paunak 15:22).

    Pasian pen i kuppih ding a lamdang thutheipa hi (Isa. 9:6). Amah in pilna kammalte tawh eite hong cing hong hu nuam hi. Ama tung pan sin inla, Topa tungah lungdam ko in. Nangma’ nuntakna ah zong na vai khempeuh a lem theih nadingin Topa’ lamlahna mantak zui in. – Marvin Williams

Lamdang, lamdang, Jesuh kei ading,
Thulakpa, Nopsakna kumpi, A vanglian Pasian;
Kei hong gumkhia, mawhna le maizumna pan,
Kei hong honpa lamdang lua, Ama’ min phat un! – Lillenas

Lamlak ding mipil zong semsem lecin, na khensatzia ding thubaih tuam hi.

A DAM DING SAWTVEI

Posted on Thursday, May 15, 2014by
May 15
Nili


A DAM DING SAWTVEI

SIMDING:
Mangmuhna 21:1-8

Pasian in amaute’ khitui nulsak dinga... Natna omlo-in, alui nate zong athak hong hi ta ding hi.
--Mangmuhna 21:4

KUMTAWN LAI SIANGTHO:
2 Kumpite 22-23
Johan 4:31-54

Ka tapa Mark US galkap a tumzawh nipi li khit ciangin, a kisinna ah a khuk nasia takin hong liam mawk hi. Tua ahih manin galkap pan kikhawlsak hi. Kum 19 aphak hunin ciangkhut zangin kisin toto a, kum nih sung a damkik nadingin tawlnga-in, kibawl hi. A tawpna ciangin  hong dam pianta ahih manin akhuk atuamna puan zong zang nawnlo hi. Sawtveipi tua natna a thuak sam hangin, damdam-a a kibawlna in akhe nuamtakin kizang sak thei hi.

    Taksa dam ding pen i upmawh sangin zekai zaw thei hi. Kha damna zong tua dan mah ahi hi. I siamlahna hang ahih keileh mite i khasiatsakna in khantawn peuh kimang thei mawkmawk hi. Pasian’ tate ahih leh, lam-etna om tawntung hi. Bukim dam ding cih pen i leitung nuntakna ah a piang theilo thu hi-a, ahih zongin damkik ding pen Pasian’ geelna ah a kihel ahi hi. Sawltak John in, “Amaute’ mit panin khitui khempeuh nulsak ding hi. Thu luisate maimang khinta ahih manin sihna, dahna, leh nasa-a kahna cihte om nawnlo ding hi” ci hi (Mang. 21:4).

    Na i sak laitakin Topa in hong ompih hi cih thei peuh lehang zong ei a dingin lungmuan huai hi. Eite a dam tawntung dingte i hi hi – Bill Crowder

Topa, ka ci ka lu uh a nat hangin Nangma sungah hehnepna le lungnopna kicing ka ngah manun ka lungdam lua uh hi. Ka natna khempeuh nang kiangah hong paipih-in – lungsim, pumpi, kha damlohna khempeuh Nangmah in damsak ding cih upna tawh hong zuansiam sak in aw.

I lungkhamna khitui tawh Khris kiang i zuat ciang, Amah in eite hong damsak hi.

ETLAWM

Posted on Wednesday, May 14, 2014by
May 14
Nilai ni

ETLAWM

SIMDING:
Matthai 23:23-31

A sunglam siansuah masa un.__Matthai 23:26

KUMTAWN LAI SIANGTHO:
2 Kumpite 19-21
Johan 4:1-30

Na sam pen cidam mahmah ei” ci-in sammetpa in ka sam a met khit ciang hong gen hi. “Na sai-a lusawpnate na zat cianga hoih hi inteh maw?” ci-in hong dong hi. Kei’n, “Hi kei” ka ci hi. “Kei’n a kiman leh a gim namtui peuhleh zang lel ing” ci-in ka dawng hi. “Anneek zong hunman taka ne ka hih ciang hi inteh. Tua in tampi a hoihsak hi ding hi” ci-in ka behlap hi.
 
    I mel ahoih theih nadingin bang ci bangin kipuah ding cih ka ngaihsut ciang, kha thu tawh kisai-ah zong ka ngaihsutna khat hong khangsak mahmah hi. Jesuh in Jerusalem aa biakna makaite tungah tua thu genbel-in nei hi (Matt. 23). Amaute in Pasian’ piak ahi khollo biakna tawh kisai zuih ding thukhun khempeuh hanciam takin zui uh hi. Mihing’ muhna ah a etlawm dingin hanciam uha, midangte sangin zong hoih ding hahkat uh hi. Ahi zongin tua bang hanciamna in Pasian lungkimsak zo tuanlo hi. Jesuh in amaute kiangah, “Note in na zat uh kuang le hai a pualam bek na sawp uha, ahi zongin na sunglam uh pen siatna le kihhuaina tawh na kidim uh hi” (tg. 25).  Farisee-te in midang’ muhna ah a etlawm dingin a kineih khemna teng pen Pasian’ muhna ah a kilawm hetlo hong suak hi.
 
    Ngeina khempeuh ah pen zia le dan kinei-a, ahi zongin Pasian in thupi asak pen tuate sungah kimulo hi. Amah’n thupi asak khat pen zong mihing’ mit tawh a kimu theite na hilo sawnsawn theilai hi. Pasian in a siangtho lungtang le ngaihsutna manpha sa hi. Kha cidamna pen sunglam panin a kiluangkhia nate tawh kiteh thei hi. – Julie Ackerman Link

Topa, kei kua ka hih lam Nang nong thei hi. Ka ngaihsutna le lungsimte kong kipia hi. Ka sunglam panin hong siansuah in. Jesuh bangin ka nuntak zawh nading – sianthona le lungsim pha hong guan in.

Sunglam hoihna kihello pualam hoihna bek tawh a lungkim mi tampi tak om hi.

SUAK THAK

Posted on Tuesday, May 13, 2014by
May 13
Ninih

SUAK THAK

SIMDING:
Late 139:7-16

Ka sunglam panin nong bawla, ka nu’ sung nangawn ah nong kemcing hi.
__Late 139:13

KUMTAWN LAI SIANGTHO:
2 Kumpite 17-18
Johan 3:19-36

Naungekte tawh kisai-in na nuih a zak simsimna a om ngei hiam? Naungek khat ii gamtatna khat peuh tawh zong a kiim a paam aa omte in tua naungeek pen lunglut pah hen-han pah thei uh hi. Tua pen ka pa’ kikepna mun khat ah ka va hawh leh ka tuahkhak thu ahi hi. Tua sunga omte pen leengsawnte bek tawh a gamtaang uh hi-a, atei lua meel omlo hi. Tuate lak-ah naungeek tawh i va hawh ciangin lamdang zong sa uha, lungdam zawkan uh hi. Tua naungeek angaih dan le a lunglut dan uh pen zong thangah huai lua mahmah hi.

    A suakciil naungeekte pen manpha uha, it huai  liklek, a mailam dinguh lawphuai mahmah hi. Tua bang naungeek i muh ciangin Pasian’ hong itna lamdang le Ama’ vangliatna i thei thei hi. Amah in hong itlua ahih manin eite nuntakna hong pia-a, nute tungtawnin eite hong piangkhia sak hi. Late laphuakpa bangin “Ka sung lam teng nong bawlpha hi. Ka nu’ gil sung ka omlai-in zong nong kemcing hi” (Late 139:13).

    Leitung nuntakna bek hong pia hilo-in, Jesuh hangin kha nuntakna zong hong pia hi (Johan 3:3-8). Pasian in eite pen pumpi thak le nuntak tawntung na hong piak ding, hong khapsa ahi hi (1 Kor. 15:50-52).

    Pumpi nuntakna le kha suahthakna pen i pa kiang pan i ngah letsong hi-a, i lungdam ding ahi hi. -- Alyson Kieda

    Ama’ mel suunin Pasian in mi bawl,
    Amah in lei la-in a pumpi bawl,
    Khris sungah a om mite zong,
    Tawntung nuntakna hong pia khong. Hess

Kong phat ding hi...; Na sepsate lamdang lua hi. --Late 139:14

NUNTAKPIH DING KAMMAL

Posted on Monday, May 12, 2014by
May 12
Nipi Khuavak

NUNTAKPIH DING KAMMAL

SIMDING:
Thuhilhkikna 4:1-9

Thumanna le thukhen theihna kong genkhinzo a... tuate na zuih ding ahi hi. __Thuhilhkikna 4:5

KUMTAWN LAI SIANGTHO:
2 Kumpite 15-16
Johan 3-1-18

Kum tampi sung ka laibu zat mahmah khat pen “Kampau” cih laibu ahi hi. Tua sungah thului tampi kigelh-in, kammal hoih, le gentehna kammal zong tampi om hi. Tunai ciangin tua laibu sung lempha kik-in a thupi nawnlo zawdeuh teng ka phiatkhia kik hi. Ahi zongin phiatkik tuan mel ding ka thei kei hi. Bang hang hiam cihleh, zong ka kampauna ah hitaleh, ka zatkhiat om nai mello mawk hi. Tua ciangin ka laibu ka khup kika, “Hih laimalte pen gen ding bek hilo-in, tua kammalte tawh nuntak ding ahiveh maw” ci-in ka phawkkik pan hi.
 
    Kum 40 sung sehnel gam ah a vakthap khit ciangin, Moses in Kamciamna gam ah a lut ding kiging mipite tungah: “Tu-in Israel-te aw, note nungta-in, Topa, na pate uh Pasian in note hong piak leitangh ah va pai-in na luah theihna dingun note kong hilh thukhamte leh ngeina kipte don unla zui un” (Thkna 4:1) ci-in vaikhak hi. Tua pen Moses in genkik kika, kep tawntung ding ahih lam phawksak hi. Moses in, “Note tungah Pasian’ thupiakna bangin na gamtat nadingun ka hong hilhkhin zo hi..” (tg. 5) ci hi.
 
   I nuntakpih loh thu khat pen i midang tungah i gen kankan ding khawng pen thubaih mahmah hi.  Kammalte bek tawh hilel a, ahi zongin i sunglam in a thuman khat lunggulh gige hi. Tua bang hun ciangin i kammalte in Pasian’ itna lungsim taktak tawh i kigamla hi. – David McCasland 

Hong huh in Topa, Na thute a za bek hilo-in; a semte zong ka hih zawh nading.  Ko le ko ka hihna taktak ka kitheih nading zong hong panpih in. Nangma lampite ka zui nuam uha, midangte zong nangma lampi ah ka tonpih nuam uh hi.

I kammal a khauh zah khat-in i nuntakzia zong a khauh ding kisam hi.

KA NU’ HUTAWPNA

Posted on Sunday, May 11, 2014by
May 11
Nipi ni

KA NU’ HUTAWPNA

SIMDING:
2 Timoti 4:1-8

Keimah in hoihtak-in ka simzo a, kungdong tai-in, upna ka lenkip khin hi.__2 Tim. 4:7

KUMTAWN LAI SIANGTHO:
2 Kumpite 13-14
Johan 2

Jeff in a nu’ natna a suuk semsem lam a theih ciangin, inn ah ciah ding vaihawm hi. Anu’ lupna gei-ah tu-in a khut dom a, lasakpih-in, thapia-a, amah a itna thu gen hi. Anu hong sih tak ciangin zong, sigal mi tampi takte in tua bang nu a neihkhak hampha ahihna Jeff tungah kigen hi. Amah pen Lai Siangtho hilh zong siam a, mi tawh thu kikupna, thunget makaihna cihte ah zong kihel den hi. Tuate pen Khris ading anuntak tawp kuan a nasepte ahi hi. Khris adingin gualzo takin a si ahi hi. 

    Anu’ nuntakna manpha asak manin, Jeff pen tai 26.5 asau tai kidemna ah va kihel hi. Tua atai kawmkawm-in anu thu ngaihsun-in Pasian’ tungah lungdam zong ko hi. Kung atun ciangin vantung lam-ah a khutme tawh kawkto-in – “Ka nu omna” ci-in paukhia hi. Anu pen Khris’ min a thangsak khat hi-a, Paul ii kammal tawh gen ding cileng: “Kidemna-ah ka hat tawpin ka hih khina, a mong dongin ka tai khin a, upna thu khotakin lenin ka zokhin hi. Thu a manin a khen Topa in tua Ni ciangin kei a hong piak ding thuman lukhu ahi gualzawhna thaman in tu-in kei hong ngak gige hi” (2 Tim. 4:7-8). 

    Eite zong ‘kimawlna saupi” ah i kihel hi. “A kisia theilo lukhu” (1 Kor. 9:25) i ngah nadingin eite zong i va kihel ding hi. Khris ading gualzo takin i nuntak zawhna le amah tawh omkhawm tawntungna pen bangmah dang tawh kitehkak theilo hi. – Dennis Fisher 

Topa’ hehpihna tawh kung dong tai in,
Khuadak inla, Ama’ mai zong in;
Nuntakna hu a bei matengin,
Khris pen i lampi le i  ngah tawntung ding hamphatna hi – Monsell

Khristian-te tai ding kungmui pen tawmvei sung hilo-in – saupi sung ahi hi.
Subscribe to: Posts (Atom)