PUSUAHNA

May 10
Kigin ni

PUSUAHNA

SIMDING:
1 Korin 10:1-13

Na tuah uh ze-etnate khempeuh pen mite’ tuah ngeite mah ahi hi. Pasian in ... thuak zawhloh ding ze-etna hong tuaksak lo ding hi. Suahtakzawh nading lampi hong honsak ding hi. _Isaiah 40:29

KUMTAWN LAI SIANGTHO:
2 Kumpite 10-12
Johan 1:29-51
 
London ah ka om sungin ka painopna a om ciang, leinuai meileeng ka zui thei pahpah hi. A beizah ding ka piak khit ciangin leinuai ah tuaksukin ka painopna teng ka pai hi. Meileeng tung pan i tuahkhiat leuleu ciangin i theih phat luatloh mun ahih  manin kilau simsim pian hi. Na paikhiatna ding na muh kei leh, tua leihawm sungah na gammang ding hi. 

    Tua bang mi tam luatlohna leinuaite ah i pai ciang i lung khat patau den-a, i gamman loh nadingin i kidawm mahmah hi. Tua khit a sawtlo-in bel “Paikhiatna” cih lai kisuang khat ka muh ciangin ka naak dan hong nuamzaw deuh phialmawk hi. Tua zawi zui-in khuasung lampi ka manto kik hi. 

    Paul in eite mawhna sungah puuk baihin i om laitak, “Pasian pen citakin a thuciamna lenkip ahih manin note’ thuak zawhloh ding ze-etna hong tuaksak lo ding hi. Ze-etna na tuah hun uh ciangin zong na thuakzawhna ding uh thahatna hong guan’ ding ahih manin na suahtak zawhna ding uh  lampi hong honsak ding hi” (1 Kor. 10:13).  Mawhna in hong zawh laitak Pasian eite tawh hong omkhawm lo bangin i ngaihsun kha hi. Ahi zongin hih Lai Siangtho in Pasian eite tawh hong omkhawm bek hilo-in Amah’n a sep ding teng zong sem hi. Amah in eite’ thuakna a noptuam nadingin lampi hong honsak hi. 

    Tua ahih manin ze-etna na thuak hun ciang, Pasian in hong huh kei ci-in lungkia kei in. Pasian hong geelsak “suahtakna lampi” om lai hi! Tua kongpi zui inla, suahtakna lampi tawn in. – Joe Stowell 

Topa, ze-etna hun hong tun ciang ko tawh hong omkhawm na hih  lam hong telsak in. Kote ka nungkik loh lam uh zong hong telsiam sak in. Nong geelsaksa suahtakna lampi zong hong musak inla, Na mai kong zon theih nadingun hong huh ta in.

Pasian in nangmah mawhna sungah na gamman loh nadingin nong encik gige hi.

Read More

THUCIAMNA KIP

May 9
Ninga

THUCIAMNA KIP

SIMDING:
Piancil 15:5-21

Ni atum ciangin... tua sate kikal-ah mei beel khu le a kuang meivak a pai hi.___Piancil 15:17

KUMTAWN LAI SIANGTHO:
2 Kumpite 7-9
Johan 1:1-28
 
Taanglai Israel gamveeng kiim  tengah thuneite leh nautaangte thukimna letmat a thuh uh pen Mangkam-in “suzerain treaty” kici hi. Tua pen kipsakna pawi tawh kikham a gan kigo-in phelnih kisuah hi. Tua gan pumpi pen leilak ah mun nih-in kikoih a, a lai-ah kigi omsak hi. Tua ciangin thukim mipawlte tua kikal ah hong pai uha mipi zakin tua thukimnasate ka zui ding hi, ka zuih zawh keileh hih a kigo gan bangin kei hong kihih tahen, ci-in kiciamsak hi.
 
   Abram in Pasian kiangah Ama’ piak thuciamte a tun hun ding ngaklah ahih manin donga, Pasian in zong tua huna kizang suzerain treaty dan mah tawh na kiciamsak hi (Pian. 15). Meihal biakna a kinei sa pen a cin khak ciangin, Abram in Pasian’ thukhun khempeuh zuih ding ama’ nasep ci-in ngaihsun pah hi. 

    Pasian in Abram tawh a neih thukhun mah bangin Jesuh Khris’ nungzuite in zong tua kiciamna i luahtoto hi. Tau ahih manin Paul in Thuciam Thak sungah lai a gelh ciangin Abraham’ suante i hihna hong phawksak phapha hi (Rom. 4:11-18; Gal. 3:29). Eite in Jesuh Khris pen honpa-in i sankhit ciang, Pasian pen i kiciamna khempeuh a kemcing dingpa hileuleu hi (Johan 10:28-29). 

    Bang hang hiam cihleh Pasian pen eite’ gupna a kemcingpa hi-a, tua bang kiciamna hangin Ama’ tungah i lungdam-in i muanna khempeuh Ama’ tungah kinga hi. – Randy Kilgore 

Amah’n hong khah lo ding, Hong taisan lo ding;
Ama’ thuciamna palsat ngeilo ding.
Tua ahih manin mainawt unla, lau kei un;
Ama’ kamciamte kip tawntung ding hi. – Havergal

Eite’ hong kihotkhiatna muanhuai mahmah hi, a hang in Pasian’ khut sung ahih man hi.

Read More

JESUH’ THU GENNA

May 8
Nili

JESUH’ THU GENNA

SIMDING:
2 Korin 4:1-6

Jesuh Khris le eite ading hong kikhaipa’ thu lobuang ka theihnop zawk adang omlo hi.
___1 Korin 2:2

KUMTAWN LAI SIANGTHO:
2 Kumpite 4-6
Luka 24:36-53

Baseball kimawl ngei Tony  Graffanino in Europe gam sunga a nasepnate telgenna khat nei hi. Kumsimin kaal khat sung bang baseball camp nei den uh hi. Tua camp kah sungin Lai Siangtho thusinna zong bawl den uh hi. Tunung kum tengin, tua sunga kihel khempeuh in Pasian’ a up theih  nadingun amakaipa in lampi zong hi. Kum 13 sungin mi 3 in Jesuh’ gumpa le honpa in hong sang uh hi. 

    Tua khit ciangin Graffanino in a nasepzia laihkik hi. Thuman le thutak, kam gualzawhna cihte gen ding sangin Jesuh’ nuntakna le thuhilhnate kikuppih hi. Tua bang ahih ciangin a thungai mi hong tam semsem a,  Jesuh hong sang thei uh hi. 

    Sawltak Paul in Jesuh Khris’ lungdamna thu i genkhiat ciangin, “eite in thumante a telbaih dingin gen ding hi-a, ei’ thu hilo-in Jesuh Khris pen Topa hi ci-a phuankhiat ding hizaw” (2 Kor. 4:2,5) ci hi. Hih pen Paul’ thugenzia ahi hi: “Note kiangah ka om laitakin singlamteh tungah Jesuh Khris a sihna thu simloh thudang peuhmah ngaihsut loh dingin ka khensatsa ahi hi” (1 Kor. 2:2). 

    Lai Siangtho thu i theih ding kisam a, i up i zuih i theih ding kisam-in, a hang zong i tel kulmah hi. Ahi zongin a kisam pen leh mite in a lunglut pen thu in Jesuh Khris pen i laitaak ding kisam hi. – Dave Branon 

Topa ka pa aw, midangte’ nuntakna a kikhelsak dingin kei hong zang in. Jesuh kua hiam, cih bek hong gensiam sak inla, ama’ thu bek ka gennuam hi. Kinialna mawkmawkte a kikum ding hilo-in, Jesuh’ nuntakna a genkhia dingte ka hi uh hi.

A thokik Jesuh pen i genkhiat ding teci ahi hi.
 

Read More

KEI BANG MIHING

May 7
Nilai

KEI BANG MIHING

SIMDING:
1 Korin 6:9-11

Tua bangmah-in note zong na hi uh hi. Ahi zongin note pen Khris hangin hong kisiangtho sak, hong kisawp siangin, thuman-in hong kiciamteh khin hi.1 Korin 6:11

KUMTAWN LAI SIANGTHO:
2 Kumpite 1-3
Luka 24:1-35

Kum tampi lai-in Pastor Ray Stedman  in pulpit tung panin hih Lai Siangtho mun sim hi: “Migilote, Pasian’ Ukna sungah a lut hetlohna ding thu na thei uh hi. Note kihaibawl kei un. Numei tawh a paktatte, milim biate, mi zi ahih keileh mi pasal tawh a mawhte, pasal leh pasal a khialte, a gutate, a huaihamte, zukhamte, mi gensiate, ahih keileh mi’ na a sutte khat beek, Pasian’ Ukna sungah lutthei hetlo ding hi. Note pawl khat, tua bangin na gamta uh hi. Ahi zongin note pen i Topa Jesuh Khris leh i Pasian’ Kha Siangtho hangin mawhna panin a hong kisiangsak khiinsa, Pasian’ tungah a kipiasa, Pasian tawh a kipawlsa mite na hi uh hi” (1 Kor. 6:9-11).

    A simkhit ciangin mipi lam nga-in: “Ka theihnop khat: Hih tenga kigen mawhna lakah kei zong ka kihelkha hi a kici i omkha hiam? I om leh, nong ding thei ding uh hiam?” ci hi.
 
    Tua mun-ah khangno, biakinn a paicil khat zong hong kihel hi. Amah pen Billy Graham’ thugenna cialpi panin a piangthak hi-a, tua Nipi ni keekkeek-in hong kikhawm kha-a, biakpiakna bangci bang hiam cih a theinuam aa hong pai ahi hi. Hong nung gen kikna ah: “Pastor pa in tua bang dotna hong dot ciang mi khat peuh a ding nam, ci-in ka kiim ka paam ka en giaugiau hi. Kuamah ding paklo-a, ahi zongin a sawt ciang mikhempeuh ding uh hi. Tua ciang kei le kei, ‘Hihte zong kei bang mi ahi ve uh maw!’ ka kici hi” ci hi.
  
  1 Korin sunga kigelh mawhnate eite in zong i pelh thei tuankei hi. Ahi zongin kisiikin i mawhna pulaakin Jesuh’ hong tatna thupha i san theih ciang, eite pen hehpihna tawh a kitankhia mithakte i suak hi (Rom. 6:23; 2 Kor. 5:17). – David Roper 

Amah’n hong lawng, hi hi, hong lawng hi,
Tua ciang ka lungsim khempeuh lungdamna tawh kidim!
A lamdang thu khat hong piang ka thei
Amah’n hong lawng, kei ka damta. – Gaither

Khut guak bangmah ka keng kei, Na Singlamteh bek kong masuan hi.

Read More

LUNGSIM’ THU

May 6
Ninih

LUNGSIM’ THU

SIMDING:
Paunak 4:20-27

Na lungsim pen na nuntakna bulpi ahih manin limtakin kem cing in.–Paunak 4:23

KUMTAWN LAI SIANGTHO:
1 Kumpite 21-22
Luka 23:26-56

I lungtang pen minute khat sungin 70-75 vei bang kisai hi. Khatvei a kisai ciang ounces 11 bek hi napi, a cidam lungtang khat in tai 60,000 bang asau sihuite sungah gallons 2,000 bang nikhat sungin hawmkhia ziahziah hi. Nisim-in ngaihsun lecin, i lungtang in vanpua mawtaw golpi khat tai 20 sung a paizawh nading thapia zo hi. Khan khat sungin ahih leh, kha tung dongah va tung bek hilo-in hong kileh dong kikhom lai ding hi. A cidam lungtang in ngaihsutna sangin tampi tak sem thei hi. Lamkhat leuleu  panin, i lungtang in nasem khial leh, i pumpi pen a kikhakcip kongpi tawh kibang hi. 

    I lungsim  kha zong tua bangmah ahi hi. Lai Siangtho sungah, lungtang a kigen ciangin ngaihsutna, thuakna, le genkhiatna-te ii bulpi kici hi. Amah pen thupia ding a kibawl ngiat, i pumpi a uk ahi hi. 

    “Na lungtang kemcing in” (Pau. 4:23) acih tak ciangin, thu tampi a gennopna ahi hi. Tua lungtang pen genzah-in kep ding a haksa mahmah khat hi citciat hi. Nuntakna ah i hun le thaneihna khempeuh tawh i sep ding maban ngaklah huai mahmah khat i mai-ah om hi.  Tua kawmkal-ah Pasian’ kammalte za dingin i hun i piak zawh ding kikhaat mahmah hi. Tua hi-a tulian-in i masak zawk nunung zawk cihte i khentel thei kei dinga, ahi zongin hun hong pai tohtoh ciang hong lauhuai mahmah ta ding hi. 

    Pasian in a kammal eite hong pia ahih manin ka lungdam phadeuh hi. Ama’ hong huhna i kisam dena, tua bek hilo-in i lungsim zong tua kammal tawh nisimin i kidiah ding hi. – Poh Fang Chia

Jesuh aw, ka lungtang le ka khutte hong la in,
Thupha tawh hong dim in, thu ka hong ngen:
Nong itna kip hangin i khanglian dinga
Nang tawh kong kibang zawsem ding uh hi. – Garrison

 Na kha a cidam nadingin, Zato Mangpa tawh va kilak in.

Read More

KUA MEET?

May 5
Nipi Khuavak

KUA MEET?

SIMDING:
Jeremiah 9:23-26

A kisathei mi peuhmah in, kei hong thei-in, hong tel ta uh hen.__Jeremiah 9:24

KUMTAWN LAI SIANGTHO:
1 Kumpite 19-20
Luka 23:1-25
 
Chris Langan akici pa pen Albert Einstein sangin a khuak ngaihsutna (IQ) sangzaw hi, kici hi. Moustafa Ismail in letmat 31 agol elguh pi nei-a pound 600 agik vante domzo hi. Bill Gates’ neih billion tawm nawnlo ding hi. Tua banga midang tawh teh theih ding ahilote pen amau’ hihna sangin zong ki-uang genzaw theilai hi. Ei’ gualzawhna, hih zawhna kisialh theih nadingin kihoih, kihat, kineisak ding hituanlo hi. Tua bang minthan’na taktak pen kuate tungah kipia hiam: kuate in ngah uh hiam?
 
    Thukhenna hun sungin Topa in Israelte tungah Jeremiah tungtawnin thugen hi. Amah in: “Mipilte in a pilna uh kisaktheihpih kei uh henla, mi hatte in a hatna uh kisak theihpih kei uh hen. Mihaute in zong amau hauhna uh kisaktheihpih kei uh hen” (Jer. 9:23). “A kisatheite in, keimah, leitungah migitna, thuman le thutang a zang ka hihna leh tute sungah nuam a sapa ka khihna thu hong theihna uhah kisathei uh hen” (tg. 24) ci hi. Pasian in Ama mite, Ama’ sepzawhna, sepsa nate ah kipaak ta uh hen, ci hi.
 
    Mihing’ hoihna bek i ultunsak leh, eite in “na hoihte... Pa Pasian kiang pan hong pai hi” (James 1:7) cih i mangngilh kha ding hi. Pasian’ min i phat ding thupi a – Amah a kilawm bek hilo-in, kiphatsakna lauhuaina panin zong eite lungsim hong dal hi. Amah pen Pasian, “Na lianpi a sem Topa.... a kisim zolo na lamdangte sem hi” (Job 5:9). – Jennifer Benson Schuldt

Kei hilo, Khris bek, kiphat, ki-it, kiphat ta hen;
Kei hilo, Khris bek, kimu, kithei, kiza ta hen;
Kei hilo, Khris bek, muhna le sepna ah kimu;
Kei hilo, Khris bek, ngaihsutna le kampauna tawh kipulaak hen. – Whiddington

Pasian’ min phat dingin eite hong kibawl hi.

Read More

LUNGDAMNA KHITUI

May 4
Nipi Ni

LUNGDAMNA KHITUI

SIMDING:
1 Korin 11:23-32

I Topa’ hong pai mateng, ama’ sihna na gen-gen ding uh hi.__1 Korin 11:26

KUMTAWN LAI SIANGTHO:
1 Kumpite 16-18
Luka 22:47-71

Ka kikhopna biakinn ah neekkhawm hun ka zat laitak, pastor le upate’ piak moh le leenggahzu dawn dingin mipite a mailam hong zuan tek uh hi. Amaute in Jesuh’ thuakna le sepsakna teng mimalte tungah gen ciatciat uh hi. Tua bang hun zong ka nuntakna ah ka lungsim hong la mahmah neekkhawm ahi hi. Ka tutna ah ka tutkik ciangin, mite in kapkawmsa-in amau’ mawh-nate uh suutin Topa’ tung ki-apna a neihna uh zong ka mukha hi. Bang hang ci-in amaute tawh ka kigenkik uh ciangin lungdamna khitui ahihlam ka theikik zel hi.
  
  Lungdamna khituite pen neek-khawm i neekna ii a bulpi khat ahi hi. Paul in Korin khua-a pawlpite tungah neekkhawm thu a gen ciangin hih bangin kician takin gen hi: “Tua moh le hai na dawn simun, Topa’ sihna le hong paikik nading teci apang na hi uh hi” (1 Kor. 11:26) ci hi. Neekkhawm neekna in Khris’ sihna le eite taanga sepna hong theisak ahih manin, tuate pen ngeina dan mawkmawk lel-in ngaihsun lo-in – Khris tawh kisai hi, ci-in i lungngaih ding ahi hi. Ama’ itna. Ama’ hong kipiakkhiatna. Ama’ singlamteh. Eite-a ding.
 
   Khris tawh a kilawm ding kammal i zatsiam kei hi! Ahi zongin lungdamna khituite in kammal tawh a kipulaak theilo lungsim kuulthuk pen genkhia thei hi. – Bill Crowder
 
Leitung khempeuh pia thei hileng,
Tamlua ka ci ngei kei ding hi;
A hong itna ke’n ngaihsun leng,
Ka pum ka tak ka pia nuam hi. – Watts

Singlamteh tunga hong kilak Khris’ itna pen kam tawh genzawh ding hilo hi.

Read More