Jan 8 2012 Bulletin

Jan 8 2012

Jan MOMNO 2012

MOMNO for Janunary

Kumcin Kikhoppi Thumasa


I biak i paai tung Pasian in Ama’ thu-um mite zanga 1997 kumin a phuhkhiat TedimTuiphum Pawlpi- Yangon hong ompih-in 2011 kum hong khuppih ahih manin Ama tungah lungdam i ko masa hi. Kamsangpa Isaiah cih mah bangin hih ciang tunga i matutzawhna khempeuh eite’ tha le ngal hilo-in Ama hong matutpih hi (Isaiah 26:12), cih phawkin minthanna khempeuh Ama tungah i tun masa hi. Kum 2011 adingin tuni January 14 ni-a kibawl Kumcin Kikhopna panin i Pawlpi sunga om Pawlpi mi khempeuh le TBC-Y pana thupha sanga Leitung mun tuamtuam a tung i Pawlpi mi khempeuh zong i biak i paai Jesuh Khazih min tawh na khut uh kong len masa hi. Pasian’ daihna le nopsakna note tungah a thakin hong tungkim ciat tahen!

A beisa 2011 sung Pawlpi nuntakna i et ciangin mihingte’ thanemna le zawnkhalna a tuamtuam a om hangin Pasian in eite thupha hong pia-in Pawlpi nungkik lo-in mainawt hi, cih ka mu-aa hih banga ma i nawtna dingin a hun a phaat leh a pil a siamna khempeuh siit lo-a Pasian le Pawlpi ading aa a zang Pawlpi upate, Numei, Pasal, Khangno nasepnate le Naupang pattahna lamah makai khempeuh tungah lungdamna ka ko nuam masa hi. A diakdiakin Pawlpi thukhun mah bangin kum (3) sung Pawlpi Upa sema a huncing-in a khawl ding Pawlpi President, Secretary, Associate Secretary, le Upa Kam Kho Khaat –te tungah lungdam ka ko nuam hi. Amau’ nasepna tampi le vaipuak tampi kawmkal-ah i Pawlpi hiciang a tunna dingin hong makaihna uh etteh-huai le lungdamna ciapteh ding tampi om ka sa hi. Tua bangmah-in i maban lianpen ahi i Biakinn thak lamna ah zong makaite in omkhong het lo-in maa hong nawtpih toto-a gualzawhna kigalmuh theita ahih manin amaute tungah zong lungdamna ka pulaak nuam hi. Pawlpi nasep lian nih ahi Mission nasepna le Tedim Christian College zong dinpihzo lai bek thamlo-in mainawt to zaw i hih manin a sem a bawl makaite khempeuh tungah le a vaihawm Komiti-te tungah lungdamthu ka ko hi. Pawlpi sung kivaanna-ah thu le la bek tawh hilo-in a dim nuntakna i ngah theihna dingin upna tawh i patkhiat Pawlmi Lainatpih Komiti-te in zong gen bek hilo-in sepkhiat hong pan takpi uha mailam-ah i Pawlpi in phattuampih takpi ding hi, cih lam-etna lianpi ka nei hi.

PAWLPI KALSUANPIH DING THULIAN THUM
Mailam-ah i Pawlpi Pasian’ deihna banga a khantoh semsem nadingin i kalsuanna ah thulianpi thum i siksan ding ka lunggulh hi.
1. Pawlpi mi khempeuh ki-itna tawh nuntak khawmna (Spiritual Fellowship)
2. Pasian theihna le upna lamah khangto-a picin zawhna (Education Ministry)
3. Pawlpi mi khempeuh amau’ siamna zui-in nasep khawmna (Gift-oriented Ministry)
I Pawlpi nasepna khempeuh-ah hih a tunga thu thum teng a kim theihna dingin i sep i bawl ding kisam ding hi. Pawlpi sung nasepna (ministry) ah i semkhia ding hi. Pawlpi pua nasepna (mission) ah zong hih a tunga thute mah bulphuh-in i semkhia ding hi. Baptist laigelh minthang Rick Warren in a cih mah bangin, “Kum zalom 21 sungin Khristian Pawlpi pen a khangto Pawlpi hih ding sangin a cidam Pawlpi hih ding manphazaw ding hi.” Tua banga i pianzawhna dingin hih a tunga thupi thuthum teng i Pawlpi sungah kilangkhia theileh cih ka lunggulh mahmah hi.

PAWLPI’ THANEMNA
TBC-Y Pawlpi pen i hihna taktak le i nasep zawhnate ka tehkak ciangin angtan’huai ka kisakna mun tampi om hi. I Pawlpi’ lungtup ahi Khrih le Minam Ading cih mah bangin i sepzawh i bawlzawh zong honpi khat mah om ahih manin lungdam-huai ka sa hi. Ahi zongin Pawlpi sung kivaanna-ah nopna dahna i tuah ciangin i ki-uapdan le i kidondan kiamsak hetlo-a i khauhsak semsem ding ka lunggulh mahmah hi. Mimal i tam semsem ciangin ki-itna le kidon kihuaina peengsak semsem lo-in Pawlpi makaite le Pawlpi mi khempeuh in Pawlsung kihuaina a khauh semsema i zopzawh nadingin hanciam ding kisam mahmah ding hi.

PAWLPI THUBULPHUH
TBC-Y Pawlpi in kumsim kumsim-in thu bulphuh khattek i nei-a tuate i phawkkikna dingin kong lakkik nuam hi.
1997 Nang Nong Paipih Kei Ding Leh...(Paikhiatna 33:15)
1998 Kei Hong Tha Hatsak Khrih Hangin Na Khempeuh ka hih thei hi (Fil. 4:13)
1999 Asia ding honkhia in (Luka 19:10)
2000 Nang kong ompih den hi (Isaiah 41:10)
2001 I Tunna peuhpeuh pan Mainawt ni (Fil. 3:16)
2002 Lau kei inla hang in (Joshua 1:9)
2003 A sangzaw ah (Hab. 3:19)
2004 Khat le khat na ki-it un (Johan 15:12)
2005 Khrih Laitaak Khristian Innkuan (Luka 19:6)
2006 Kha Siangtho Makaih Nuntakna (Johan 16:13)
2007 Teci Pangkhia Pawlpi (Matt. 28:18, Sawl. 1:8)
2008 Khrih Sungah Adim Nuntakna (Johan 10:10)
2009 A Piakhia Pawlpi (Malakhi 3:10)
2010 Jesuh Khrih Eite’ Thahatna (Isaiah 40:31, Hab. 3:19, Fil. 4:13)
2011 Pasian’ Kammal: I Nuntakna (Isaiah 55:10-11; Heb. 4:12)

Kum 2012 ading i thubulphuh le i lungtup pen “Tu Khang Ading A Nungta Pawlpi” (Efe 1:22 ; 4:) a hihi.I cihnopna in tukum (2012) sunga i Pawlpi nasep a tawmpen khat peuhmah tu khang (kum zalom 21) sunga a kizang poimawh nasepna ahih ding i lunggulhna a hihi. Tua bang hileh, i minam in hong phattuampihding hi. I gambup in hong etteh nuam ding hi. Tua ahih manin hih banga khang khat sung kimang ding nasep i geel theihna dingin makaite le Pawlpi bup in pilvang takin kalsuanin mai i nawt ding hi. Kum zalom 21 sunga Pasian’ nasepna (Pawlsung le Pawlpua – ministry and mission) ah midangte etteh taak ding na lian khat ngeingei i sepkhiat zawh nading i hanciam ding hi.
Kum 1910 kumin Leitungbup Sangmang kikhoppi masa pen (World Missionary Conference) Scotland gam, Edinburgh khuapi-ah American Methodist makai John R. Mott makaihna tawh kibawl-a thubulphuh pen “Tu Khangin Leitungbup Khazih Ading” (The World for Christ in This Generation) cih a hihi. A lungtup bangun tua hun khang (kum zalom 20) sungin Leitungbup Khazih Ading cih tun zolo uh hi. Ahih hangin tua kikhoppina panin a beisa huna Khristian biakna ahi lo, biakna dang khempeuh Khristiante’ gal (Anti-Christian Religions) banga hong muhna uh hong kikhel-in Khristian suahma a biaknate (Pre-Christian Religions) ci-in hong mukhia uha tua pen tuni dong le mailam hun dongin a kizang suak ding ngaihsutna le thupom suak den hi. Tua bangmah-in tukuma i Pawlpi nuntakna le nasepna in mailam-a kum tampi a kizang ding nasep i suaksak nuam hi.

Pawlpi nasepna-ah Pawlpi mi khempeuh innteek le leengla omlo-in i vekpi-in innteek i hihi. Pasian’ tungah thu i ngen khawm ding hi. Khut kilenin Pasian’ na i semkhawm ding hi. Pasian’ hong piak ding Ama’ biakinn thak huang sungah lungdamna tawh lutin Topa’ na i semkhawm ding hi.

TBC-Y Pawlpi mimal khempeuh le innkuan khempeuh tungah ahi zongin, TBC-Y panin leitungbup gam tuamtuam-ah Pasian thupha saanga a om Pawlpi mi khempeuh tungah Pasian in Ama’ thupha sun nitaang bangin hong taangsak henla, daupaina le lawhcinna tawh hong tuamkim ciat tahen!

Note hong it,
sd…
Rev. Dr. S. Pau Khan En
Senior Pastor
TBC-Y

(Hih pen Senior Pastor pa in Kumcin Kikhopna (2011) thumasa a a gelh thu hong kisuaksak a hihi. Communication Committee)

Youth Department Panmun Kisehna (2012)

• President---- Tg. Dal Kom Lian • Vice President ---- Tg. Pau Dong Sian • Secretary ---- Lia Ciin Zam Man • Joint Secretary ---- Lia Niang Theih Kim • Treasurer ---- Lia Hau Khawm Huai • Accountant ---- Tg. Mang Vel Khai • Choir ---- Tg. Thang Mun Khai • Music Committee ---- Tg. Thawng Za Cin • Literature Committee ---- Tg. Pum Za Vaan • Social Committee ---- Lia Vung Lam Mang • Cultural Committee ---- Lia Thang Suan Dim • Sport Committee ---- Tg. Tuan Deih Piang