KITHAK PATKIKNA

April 12
Kigin ni

KITHAK PATKIKNA

SIMDING:
Isaiah 43:14-21

Tu-in a thak na khat ka bawl a, tu-in hong piangkhia hi. Note in theilo na hi uh hi? __Isaiah 43:19

KUMTAWN LAI SIANGTHO:

1 Samuel 19-21
Luka 11:29-54 

Ki thak patkik cih omthei mah hi.  Bravan na dong un. Amah pen kum 12 a phakin sang tawp in lamlak gilote tawh kikhol in kham theih guih theih zatui zong zang thei hi. Kumpi’ kham zatui zuak a hih manin sang pan a kihawlkhia hi a, lamlak gilo pawl pan tawpin inn a ciah ciangin thubaih satuan lo hi. Sang dang khat ah a va ki-ap leh a tuahkhak thute lai tawh gelh ding a siapa in hanthawn a, Bravan in tuate gelhkhia in a gamtat lui panin a nuntakna na kithak patkik hi.
  

  Kamsang Isaiah tungtawnin Pasian in saltang Israelte thapia a, “Masa lam-a nate ciamteh kei un la, a beisa thute ngaihsun kei un (Isa. 43:18),” na ci hi. Egypt pan a paikhiatna uh hita leh saltanna thute hitaleh ngaihsut in a neihloh ding un na tawsawn hi. Tua sangin Babylon panin paikhiatna thak a pia, kipatna thak a vaihawm Pasian bek a mitsuan nadingun gen hi. (tg.19)
 

   Abeisa thute sungpan i lungsim lakhia in a thak kipatna ah Pasian muanna tak tawh  kalsuan ni. I lungtang ah Pasian tawh ki thak patna piangsak ni. -Marven Williams

Ka nuntakna uh nong lawn sak ding,
Ka lungtang uah na nong sep ding,
Ka sepding te uh ka kipat zawh nading,
Topa, nang kong kisam uh hi.


Pasian in sunglam kipat thakna hong pia hi.

A THAHAT PASIAN

April 11
Ninga

A THAHAT PASIAN

SIMDING:
Late 29


Ama’ minthanna Topa tungah pia un.___Late 29:2


KUMTAWN LAI SIANGTHO:


1 Samuel 17-18
Luka 11:1-28
 
Kum 3 a pha ka tanu Katie in ko a nulepa kiangah, “Ka ni le ka nuno, si-in Pasian in vantungah lato cileng. Pasian thahat taktak hilo maw, mate” hong cih ciangin lamdang ka sa uh hi. 

    A lian mahmah Pasian’ hatna theihkhit zawh ding hilo a, a hi zongin naupangte’ theiban sak veve hi. Naupang Katie’ ngaihsutna-ah na khat peuh ahih thei Pasian pen thahat mahmah cih hi. Koi cibang hiam cih a telloh hangin Pasian in a ni leh a nuno pen vantung ah lamdang takin lato hi, ci-in thei hi.


    “Pasian, thahat taktak ei” ci-in bang zah vei i lungngai ngei hiam? Ngaihsun mello in ki om theizel hi. Pasian in a aw tawh leitung na bangci bawl a (Job 38-39; Late 33:9; Heb 11:3), bang ci bangin na kipsak toto hiam (Neh 9:6) cih pen thuhaksa pi a hihi. Bang ci bangin Jesuh hong suak a, ama sihna in hotkhiatna cingsak hiam cih zong i telzo kei hi. Ahi zongin hihthute a man a hih lam i theiciat hi.


    Tehtheih ahih loh hangin a kitelthei veve Pasian thahatna; Amah i phatna ding ahihi. – Dave Branon

I Pasian lamdang hi.
Van panin pilna, itna le,
Thahatna tawh hong uksuk hi.
I Pasian lamdang hi. –Mullins


Pasian’ nasep khempeuh telnop napi’n lamdang hi. –Tertullian

VEILAM ZUI

April 10
Nili


VEILAM ZUI


SIMDING:
Galati 5:1-14


Thukham khem peuh,  “Nang na ki-it bangin na lawmte na it in,” ci-in kitomlak thei hi. __Galati 5:14


KUMTAWN LAI SIANGTHO:

1 Samuel 15-16
Luka 10:25-42

US banglo-in mundang gamte ah veilamzui in mawtaw kihawl cih pen ka lunglut mahmah thu hi.
  

  Tua leh London ka va hawh leh zin tanute khatin veilam zuih vai khat hong gen hi. 1800 kum lai-in sakol lengte leh khelam paite in lampi khat tawn khawm uh cihi. Khat veivei sakol leng hawlna ciang tawh khelam paite satkha zelzel hihtuak hi. Tua bang lemlohna hangin Sakol lengte pen Lampi veilam zui-in paisak ding thukhun khat na bawl uh ci hi.
 

    Lampi thukhunte mihing phattuam nading a hih mah bangin Pasian thukhamte zong tua bang ahihi. Hong it manin i phattuam nading in thukham hong pia hi. Paul in Galati 5:13-14 ah, “Na suahtakna uh na pumpi ut bang in gamtat theihna in zang kei unla, itna tawh midangte khualna-in na zang zaw un. Bang hang hiam cileh thukham khempeuh, “Nang na ki-it bangin na lawmte na it in,” ci-in kitomlak thei hi.,” na ci hi.
 

    Pasianin a mah i it ding leh midangte i huhna dingin lamlahna leh hehpihna hong pia hi cih phawk in a kammalte i lungtangah nungta sak ni. – Dennis Fisher

Tawntung thumanna kammal,
Bang zahin Siangtho na kammal,
Ka Khangno lai lam hong hilh,
Ka teek ciang hong tonpih - Watts

Lai Siangtho ka Pilna ka go ahihi.

ITNA DING ITNA

April 9
Nilai ni


ITNA DING ITNA


SIMDING:
Thuhilhkikna 10:12-22


Peemtate it un. Note zong Egypt ah peemta na hi uh hi. _Thkna. 10:19


KUMTAWN LAI SIANGTHO:

1 Samuel 13-14
Luka 10:1-24

Hitler khutnuai pen Dietrich Bonhoeffer ading in nisimin lauhuai hi. Ahi zongin Filippi 1:21 sungah Paul in a cih bangin vantung tun ding pen a lunggulhna hi a, leitungah nuntak ding pen Pasian’ deihna hi cih thu pomin nei hi. Tua bangin ukpi gilo Hitler ukna nuai ah leinuai Pastor semin gitlohna lehdo in Pasian bia hi.
  

  Tua bang a nisim lauhuaina sungpanin ‘Life Together’ ci-in zindo siamna pen Pasian nasepna cih, laibu khat na gelh khia hi. A Pasian’ nasepna le a thongkiatna cihte ah a gelh thute mah na nuntakpih hi. A nekna, a sepna, a gen a hawmna peuhpeuh ah Khris’ minthanna ding bekin semin genin hawm hi.
 

    Thu hilhkikna sungah Egypt pan a paikhia Israelte in peemtate le meigongte it-in a don ding, Pasian in thu na pia hi (10:18-19, Pai 22:21-33). Pasian in hong it bangin midangte itin kamkhum le gamtatna hoih tawh lampi tuamtuam zangin i panpih ding a hihi. Kha Siangtho in tua bang nasepnate ah hong huh ding hi.
  

  Na kim na veel ah kua khattang in lungleng in om hiam? Tuate va huhin lametna va pia-in i panpih theihna ding Pasian muangin a mah tawh semkhawm ni. – Randy Kilgore
 

Ka hihna teng suahkhia in,
A na ka sepzawh nading,
Hun sim ka ngah, a ma’ letsong,
Nisim ka pia, Khazih ading a khawnkhong. –Anon.

Pasian hong itna tel semsem, midangte itthei semsem.

6 April, 2014 Church Program

  6 April 2014, Bulletin





Photo
Laisiangtho sinna (Matthai 21:15)~ Asst. Pastor Zam Khen Khai 
_____________________________________________________


Audio Files



_____________________________________________________________________________

Photo

Siampi thungetna ~ Rev. Dr. Nang Sawm Piang

Biakinn Thugenna tom ~ Upa Zam Za Thawn, President

Sehsuah Sumpite apna         ~ Church Pastor


Lapawl ~ Yuzana Homecell

Sumpi apna (Doxology)~ Prof. Lt. Col. Dr. Vungh Suan Thang

Thuzaksakna~ Hun uk 

Hanthotna: “A Kilaiphum Pasian”

*Mipi La:“Topa, Hong Ciah Ing”

Neekhawm Hunzatna   ~ Church Pastor

KEI’ HIHNA KHENG-IN

April 8
Ninih Ni


KEI’ HIHNA KHENG-IN

SIMDING:
2 Korin 3:7-18


Eite khempeuh i maitang kiliah nawnlo-in Topa’ vangtaang i kilangsak hi. –2 Korin 3:18



KUMTAWN LAI SIANGTHO:
1 Samuel 10-12
Luka 9:37-62

Ka lawmte lakah kei sangin nasia ka sak zawk khat om hi. Pilzaw. Na a hoih nono thei phadiakin Thungaihsutna zong kician diak hi. A mah tawh ka kikholh simin a mah bangin ka nasia nuam mahmah hi. Tua in ka hihna khengin a lianzaw khat hong lunggulhsak hi.
 

    “Hun la-a, Pasian’ kammal simna in Khris tawh hong kizom sak hi,” cih Kha thukhunpi khat hong phawksak hi. Tehpi omlo Jesuh’ itna thu ka simkhak ciangin a it huailote it ding hong phawk sak hi. A hehpihna leh a thuphate a kilawmlote tung nangawn ah hong piakkhiat ciangin, mawh ka maisak noplohna leh thuhkik ding ka ngaihsutnate ka maizum mahmah hi.
 

    Pasian in a hoih mahmah a thumanna puan tawh hong tuam hi cih ka phawk ciangin ka zumnate khengin a lungdam thei mahmah mikhat ka suakta hi. Alamdang Ama  pilna tawh Ama’ lampi ka zuihding ka lawp mahmahta hi. Ka hihna khengin ama ompihna tawh Amah ka sun semsem nuamta hi.
 

    Paul in 2 Korin 3:18 ah, “Minthanna pan minthanna ah hong khel toto Khris’ vangtaang sungah a lungdam dingin hong zawn,” na ci hi. – Joe Stowell

Nang omna, Nang hihna, ka batzawhna ding un,
Ka mit uh hong vaksak in, ka lungtang uh hong honsak in.
Nong kilah khiat lungdam ung Topa,
Na vanglian sugnah nong omsak lungdam ung Topa.

Pasian tawh naitakin om in. Na kilamdang ding hi.

STRAWBERRY BUAINA

April 7
Nipi Khuavak


STRAWBERRY BUAINA

SIMDING:
Filippi 4:1-5


Pasian’ sungah lungsim kikhat-in na om un.__Filippi 4:2


KUMTAWN LAI SIANGTHO:
1 Samuel 7-9
Luka 9:18-36
 
Ka innthak uah ka kituah zawhuh a sawtlo khatin ka veng pa khatin Strawberry bungpi khat hong kholin ka innmai uah na koih hi. Tua pen veng naupangte’n na mu-in na hong khia a, tua strawberry tawh ka innuh na deng gawp hi. Innlak vak ka ciah ciangun tua ka veng naupangte in kisuangtak takin, “Bang hong kicih tam,” ci-in hong ensim uh hi. Strawberry tawh a san ziazua ka innuh ko le ko in siangsak le ung kingah napi, tua naupangte tawh kilemtheih-kikna dingin a mau samin ka siansuah khawm uh hi.
 

    I nuntakna ah zong khatlekhat kizopna kisia-in kibuai theizel hi. Filippi pawlpi te’n zong hih bang buaina na tuakngei a, Euodia le Syntyche thu um minih na kithu tuaklo uh hi.
 

    Filippi 4:2 ah Paul in tua thubuai leptuah ding pawlpite thapiakna lai na khak hi. “Citakin kei tawh nasemkhawm note (Fillippi) in zong amau tegel na huhna ding uh kong thum hi (Fil 4:3),” na ci hi.
 

   Eite zong i nuntakna ah kiphawkin nemtak  a hong lemtuah ding Pasian huhna muang ciat ni.– Anna Cetas

Mi tawh ka kizopna ah hansanna leh,
Khensatsiamna ka neih theih nang,
Kei nong it bangin itna ka neih nang leh
nemtakin ka leptuah theihna dingin hong huh in Topa.

Itna maan in hong thuhilh in hong lemtuah hi.

TEEL UN

April 6
 Nipi  ni

TEEL UN

SIMDING:
Thuhilhkikna 30:11-20


Note le na suan-le-khakte uh na hin’ theihna dingun nuntakna teel un. Topa na Pasian uh it-in, ama’ thu mangin amah beel un.–Thkna 30:19-20

KUMTAWN LAI SIANGTHO:
1 Samuel 4-6
Luka 9:1-17

Ka nuntakna ah Pasian deihna bang hiam cih lungngai-in ka gol semsem ciangin ka lung buai semsem hi. Tua pen ka nuntak sung theikhia kei mawk leng bang cih ding? Buhtu lak a phim kia zon bangin Pasian pen leitung thulela tampi lak-ah a zon hak mahmah tawh kibangzel hi.
 

   Pasian ka muhzia a manloh ciangin Ama’ deihna ka muhzia zong na man lo pah hi. Pasian in ama’ deihna zongzong a, a gammang cip dingin hong deih lo hi. Tua hi a, Ama’ deihna a kitel sinsen in hong gen hi. Tua banah tampi lakpanin teelding namin zong koih lo in, “Nuntakna le hoihna, sihna le siatna” cih teel ding nam nih bek hong piaziau hi (Thkna30:15). Koi teel zaw ding na hiam? Nuntakna teel un (tg. 19) cihi. Nuntakna i teel theihna dingin Pasian mahmah i teel ding le, Ama’ thu i manding a hihi.
 

   Moses in Israel-te tungah  a nunung pen thumna na nei a, “Na nuntakna uh ahi Pasian thupiak khempeuh zuihna tawh teelna mantak na bawl un,” ci hi (32:46-47). Pasian’ deihna pen nuntakna hi a, tua nuntakna pen A kammal a hihi. Tua kammal pen Jesuh hipah hi. Pasian in aneng atawngin hong hilhloh hangin i etteh ding Jesuh hong pia hi.
 

   Ahoihpen teel ding thubaih lo ding a, a hi zongin Pasian kimakaih sakin Amah bia peuh leng a hoihpen i teel theihna ding pilna hong guan ding hi.–Julie Ackerman Link
 

Topa Jesuh aw, Na mai mu-in
Na deihna ka teel theihnang un
Pilna citak hong hilh in,
A kipia khia na nuntakna, na kammalte hong hilh in.


Pasian’ hong makaihna pen mailam i et sangin a beisa thute lungngai kik lehang kitelmuh zaw hi.