Pahtawi Tawntungna

December 13
 Ninga

PAHTAWI TAWNTUNG-NA 

SIMDING:
1 Korin 9:24-27

Leitung pumpi tawh hanciamna in tawmno bek sem thei-a, ahi zongin Pasian’ thu tawh na khempeuh kizozo hi.––1 Timoti 4:8

KUMTAWN LAI SIANGTHO:

 Hosea 12-14
Mangmuhna 4

Ukraine mi Larisa Latynina in Olympic tuibual kidemna ah kham medal 18 ngaha kum sawtpi sung kuamah in demzo lo hi. 1956, 1960, le 1964 kum Olympic kimawlna sunga a ngah ahi hi. Tua zawh kum 48 khit 2012 kum London Olympic ah Michael Phelps in medal 19 ngahna tawh hong tungnung hi. Tua hun tak ciangin magazine khat sungah, “(Latynina) pen tangthu sungah kimangngilh kha ei” ci-in kigelh hi. Soviet Union gampi kitamzan ahih manin “amah i mangngilh kha hi” ci-in kigelhbeh hi. 

    Sawltak Paul in hanciamna khat pen kimangngilh kha thei mawk hi, ci hi. Kimawlte in a kisia thei pahtawina a ngah nadingun amau pumpi kikem uh hi (1 Kor. 9:25). Tua pahtawinate bek a kisia thei bek hilo-in, mite’ theihpihna zong hong mang tektek ding hi. Leitung gualzawhna ding kimawlte in a hanciam mah bangun, Khris’ nungzuihna ah a kisia ngei nawnlo ding kham lukhu ngah dingin eite in i hanciam zawk ding kisam hi (1 Tim. 4:8). 


    Kimawlte’ hanciamna pen pahtawina medal cih peuh le sum le paai tawh kiciangtan hi. Tua sangin vantunga om Pasian in Ama’ tate hanciamna pahtawi zawlai hi (Luka 19:17). 


    Pasian in i sepnasa khempeuh mangngilh nawnlo dinga, Ama’ itna tawh ciamteh tawntung ding hi.––C.P.Hia

Topa lungdam ing, Nong piaksa letsong hangin
Nang ading a zangkik thei suak ing.Nang deih bang ka sep theih nading, le “Pha hi” ci-a Na kammal lobuang a dang ka lam-en ngam kei hi, Topa.

Pasian’ gam ading kipiakkhiatna ah pahtawina guaksuak lo hi.

Kizemna Puan maw, Uniform?

December 12
 Nili

KIZEMNA PUAN MAW UNIFORM?

SIMDING:
Rom 13:11-14

Jesuh, puan bangin silh un. Leitung ci le sa’ deihna zuilo-in, lunggulhna nei kei un.––Rom 13:14

KUMTAWN LAI SIANGTHO:

 Hosea 9-11
Mangmuhna 3

Eunice McGarrahan in Khristian nuntakna tawh kisai-in thugenna khat-ah: “Ngeina puan cih pen tomkha sung na kizepna, le na kineihkhemna a hihi. Uniform leuleu ciangin nang bang sem, bang ci mi cih hong lak hi” ci-in gen hi. 

    Tua kammalte pen US galkap sungah training lut ding ka kipat ni-in ka phawk kik tak ciang kituak ka sa mahmah hi. Ka silh ngei kizemna puante pen inn lamah ka khak kik uha, tua ni a kipan galkap puan bekbek mah ka silh uh hi. Tua bang uniform (puan) ka silh tak uh ciangin ka lungsim puakzia le ka sep ding a omsa dimdem ahi hi. 


    “Khuazing sunga na gamtatnate suahkhia unla” ci-in Paul in Rom khua a om Khristian-te tungah, “khuavak galvante tawh kithawi un” (Rom. 13:12) ci hi. Tua madeuh-in Paul in “Topa Jesuh puan bangin silh unla, si le sa deihna kizo sak kei un” (tg. 14) ci hi. Tua sunga i muh “suahkhia un” le “silh un” cih kammalte in mithak ahi eite kikheelna hong piangsak hi (tg. 13). 


    Topa Jesuh’ nung bek zuih ding i khentat ciangin, nisim-in amah tawh a kibang dingin Jesuh in hong puah toto hi. A hilo pi khat ahi bangin kineihkhemna hilo-a, Jesuh Khris sungah i hihna a kilangsak dingte ahizaw i hihi.––David McCasland

Nang tawh kibang ding, Nang bang dingin,
Honpa Topa, Nangmah bang!
Na hoihna le kicinna sungah;
Na hihna hong guansuk in, kei’ sungah. --Chisholm


Nungzuih ding a khawnkhong hi-a... ahi zongin tua in na nuntakna bup hong kal ding hi.-- Dietrich Bonhoeffer

Uplahna Tawh

December 11
 Nilai ni

UPLAHNA TAWH

SIMDING:
Isaiah 55:6-13

Ka kam panin a suakkhia ka kammal peuhmah; kei’ kiangah a mawkna-in hong ciah kik lo dinga, kei deihna bangin sem ding hi.––Isaiah 55:11


KUMTAWN LAI SIANGTHO:
Hosea 5-8
Mangmuhna 2

Chaplain khat ka hih manin minamkim tawh ka kiho kha theizel hi. Pawl khatte bang Khristian upna zong muang ngam nawnlo hi. Tua banga ka kiho ciangin thu thum in Pasian’ hotkhiatna tawh kigamlasak hi, ci-in ka mu hi. 

    Amasa pen in Pasian omlo hi cih upna hi tuanlo-a; “Pasian in kei hong thupi sim mah hiam?” cih muanlahna hang ahi hi. Nihna pen, Pasian in ka mawhna teng maisak takpi mah ding hiam?, cih muanlahna hi. Amau le amau thu a khente hi uh hi. Athumna e? Mun khat peuhpeuh ah Pasian om ahih leh, bang hangin Pasian in amau hopih lo hiam? cih ahi hi. 


    A nunung lam pan pantoto-in  Pasian hong gente lungngai ni. Amasa-in, Pasian pen ngaihsutna a  nei bek hilo-in a taangtungsak pa zong ahi hi. Ama’ kamciamte a picingsak pahpah pa hi (Isa. 55:11). Thu khatin gen lehang,  tua Lai Siangtho mun i sim ciang, Pasian in eite hong hopih ahihna i mu ding hi. Tua in Lai Siangtho hong gen hehpihna  le itna hong kilatna ahi hi (tg. 7). Mawhmaisak nopna hong neih pen ei’ ngaihsutna sangin thukzaw hi. A kammal tungtawnin Topa’ aw za thei aa, a itna i san theih leh, i kiko ciang eite kikona hong za ding ahih lamtak i theitel ding hi. 


    Pasian’ lampi pen lamdang hi. Mikim adingin lam-etna hong pia hi.–– Randy Kilgore


I lungsim in a muanlah hun hong om thei ding,
Upna i cih bang, ci-in hong dong zong om thei ding;
Amah i um thei a, Amah in eite hong it a -
Topa pen thuman hi-a, Lai Siangtho’ gen bang hi. --Fitzhugh

Kineih khemna kihello muanlahna tawh upna kipan hi.

Piakkhiat Kidemna

December 10
 Ninih

PIAKKHIAT KIDEMNA

SIMDING:
2 Korin 9:6-15

Sim zawhloh thupha hong piakna hangin Topa tungah lungdam ko un.__2 Korin 9:15


KUMTAWN LAI SIANGTHO:

Hosea 1-4
Mangmuhna 1

TV program khat ah veengta nih, kua’ Christmas zepna in mipi’ lungsim la zaw cih kidemna ka mukha a, muhnop ka sa mahmah hi. A lawm khat in a dang khat ii zepzia va en-a, ama asangin a hoihzaw ding kidem uh hi. Singkung tuamtuam le meitaang tuamtuam tawh zeem keei uh hi. A tawpna lam ciangin kua zaw in midangte tungah letsong va hawmkhia zo cih tawh hong kidem uh hi. 

    Pasian’ tate pen kua in piazo zaw cih a thukhen dingte i hi kei-a, “a pia nuam, pia dinga kigingte” (1 Tim. 6:18) i hihi. Sawltak Paul in Korin Pawlpi tungah: “ (2 Kor. 9:7). 


    Christmas hun ciangin, midangte tawh letsong i kikheek theihzel mah bangin Pasian in eite hong piaknopna thu zong ngaihsun kawm ni -- Amah in a Tapa hong pia hi. Ray Stedman kici pa in, “Jesuh in ama’ hauhna teng  nusia-in, a bawlsa leitung ah zawnna limla-in, Ama’ hehpihna tawh hong hausak hi” ci hi. 


    Leitung aa i piakzawh khempeuh in zong Pasian hong piaksa tukzo lo ding hi hang. Jesuh tawh a kiteh theilo letsong hong piakna hangin lungdam ni! (tg. 15).–Anne Cetas
   
Vanglian i Pa, Kumpipa phat  ni,
Ama’ itna hangin lathak hong sa sak thei;
Hong bawl a, i langpan hangin hong it veve,
I suahtak nading a manpha si tawh hong lei -- Clarkson

Khris hong kipiakna sangin a lianzaw letsong omlo hi.

Sia le Pha

December 9
 Nipi Khuavaak

SIA LE PHA

SIMDING:
Jonah 4


Topa in singkung khat posak a... lungno in nei-in tua singkung a keu hi.–Jonah 4:6-7

KUMTAWN LAI SIANGTHO:

Daniel 11-12
Jude

Jonah tangthu i sim ciangin Pasian in eite pen thupha le thusia ading hong zang thei ahihna ka phawk hi. Jonah Lai Siangtho sungah tua bang thu pen nga vei bang kimu thei hi.
 

   Jonah 1:4 sungah Pasian in huihpi nungsak hi. Amah in tuipi tungah huih nungsak a, tui maitang ah tuihual piangsak hi. Teembaw nasemte in Jonah pen huihpi pianna ding thusia bawlpa hi ci-in a theih ciangin, tui sungah lawnsuk hi (1:15). Tua ciangin Pasian in “Jonah a valh dingin ngapi khat sawla, tui a kiat loh nadingin honkhia hi” (1:17).
 

   Sim suksuk lai lehang nisa sungah niliim a pia dingin Pasian in singkung po sak hi. (4:6). Tua khit ciangin tua singkung a susia dingin lungno le huihlum nungsak lailai hi (4:7-9). Tua thute i ngaihsut ciangin Jonah pen a lungkim theilo, a langpang thei nuntakna nei hi, cih kimu hi. Tua bang laitak mah-in Pasian in a lungsim nopmawhna muthei sak hi.
 

    I tuahkhak thu kibanglo-a, i mailam ah hong pai lai ding thupha le thusiate Pasian bek in thei hi cih i tel ding kisam hi. Tuate tungtawnin i nuntakna i kilam thak ding hong deih hi (James 1:1-5). Amah in ahoih le asia zangin khualzinna lampi ah lam hong lak ding hi.____Dennis Fisher

Vanpi leipi a siam Pa in,
Mihingte’ kisap thei lua veh,
Tua kisapna khempeuh,
Ama’ geelna sa bangin dim veh.- Crane


Topa’n hong pia a, lakik hi. Topa’ min thang tahen.

Lau Luatna

December 8
 Nipi ni

LAU LUATNA

SIMDING:
Luka 2:8-20

Lau kei un. Mi khempeuh a lungdamsak ding thu hoih khat note-a ding ka hong puak hi.__Luka 2:10

KUMTAWN LAI SIANGTHO:

Daniel 8-10
3 John

1983 kumin naupang Christmas choir lasa dingin kisinsin uha, a tawpna peetmah ciangin sak ding hun hong tungta hi. Naupangte khat khit khat mipi mai-ah hong lut-lut uha, tua laitak a nunglam panin awging khat kiza hi. Ka zi tawh a en dingin ka va pai uhleh, ka tapa Matt ahih lam ka thei uh hi. A maitang ah launa le dahna tawh kidim-in lut nuamlo-in kongkhak kil len thapai hi. Mipi mai-ah lutphei nuam lo hi. Tua ciangin a makaipipa in mipi mai-ah hong paisak kei ning, a cih ciangin lungkim pan hi. Tua ciangin Matt pen ko tawh hong tukhawm-in, tua panin a launa hong bei zawdeuh hi. 

    Christmas hun pen launa tawh kidim hun ahih sam loh hangin, Jesuh’ hong suah hun laitak pen khimkhua zing bang hi. Luka in “Amaute kiangah Topa’ vantung mi khat hong kilang a, Topa’ minthanna vang in amaute hong taan’ ahih manin a lau mahmah uh hi” (Luka 2:9). Tuucingte in lamdang sa mahmah uha, ngaihsun banlo uh hi. Ahi zongin vantung mi in: “Lau kei un. Mi khempeuh a lungdamsak ding thu hoih khat note-a ding ka hong puak hi” (tg. 10) ci hi. 


    Launa tawh kidim leitung-ah, Jesuh pen Kilemna Kumpi (Isa. 9:6) dingin hong pai ahihlam phawkciat ni. Tua kilemna i kisam hi. Amah’n i launa teng thengmang sak thei-a, lungsim daihna hong pia thei hi.—Bill Crowder


Dawn un, kilemna Kumpi,
A thuman Ni hong taang hi;
Nuntakna le khuavakna,
Hong puaksuk khawm cidamna.-- Wesley


Pasian mi bangin hong pianna in launa beisak hi. --F.B.Meyer