U Zaw Aye Maung [Racial Affairs (Rakhaing) Minister of Yangon Regional Area Government] in TBC-Y Biakinn Kong Hon Ni a thugenna tom

U Zaw Aye Maung [Racial Affairs (Rakhaing) Minister of Yangon Regional Area Government]






















 
Na vekpi-un lungdam kipahna tawh kong hopih masa hi. Kei zong ka neulai 1968 kum kiimin Mindat khuapi ah sangkah-in ka om hi. Tua hun pek aa kipan Chin (Zomi) Sya/ma, Sangnaupangte tawh ka kikhawlkha hi. Tua a kipan ka theih khat in Chin mite pen Rakhaing mite tawh a kivalaak mahmah ahih lamtak ka thei sansan hi. Ei' tungah thuhoih khat hong kibawl leh, thu hoih mah tawh thuhkik ding i hanciam mah bangin, thusia hong kibawl leh, siatna tawh a thuk pahpah minamte ihi hi. Tua bang ihihna pen mi thuman le mi citakte ihihna hong kilangsak hi. I citak mahmah a, nasep zong i hahkat mahmah hi. Tangthu ah i et ciangin Dr. Than Tun (Historian) genna ah, "Kawlgam tangthu kikan theih nailoh hun pek a kipan a masa pen hong lut minamte lakah Chin mite zong kihel hi," ci hi. Chin le Kayin a masa pen hihtuak hi. Minam tampi a om Kawlgam sungah Chin-te pen a na teeng masa minamte hi citciat uh te! Tua pen kipah huai mahmah ka sa hi.

Tua bek hilo Kawlgam Mangkang kumpi' khut sungah i tun laitak, minam tuamtuam-te in ei' pansan ciatciat panin i dotek hi. Tua hunin Bo Con Bik, Khai Kam cih bangin na do uh hi. Tuate in Kawlgam suahtak nading a hanciam minamte na hihna uhh hong kilangsak hi.

Tua bek hilo Chin gam le Rakhaing pen kizomin Paletwa bangzong Chin gamah a om hangin Rakhaing gam tawh kinai ahih manin Rakhaing gam sungah zong Chin mi tampi om hi. Tua ahih manin 2008 gam ki-ukna upadi (Constitution) ah Chin Affairs Minister zong Rakhaing gamah kikoih hi. Tu laitak Yangon ah zong ka theih ciangciang Chin mi zong tam mahmah uh teh. Hong tung ding 2015 kiteelna ah zong Chin Affairs Minister na ngah theih nadingun 2014 Census tungtawnin mi omzah ii 0.1% na om uhleh Minister khat ngahzo phial ding hi uhteh. Tua bangin Minister khat ne le ucin, no' tangpi phattuam nading tampi hong panpih thei ding hi. Tu tadih-in Yangon Regional Area ah, kei le Kayin Affairs Minister khat ka om uh hi. Ko' tungah zong hong ko un. Hong pulaak un. Kong huh theihna ciangciang hong dinpih ding hi ung. Tua zong Kawlgam sunga om minamte kihuh, kidonna a hang khat zong hipah ding hi.

Kawlgam pen Democratization lamah i manawh, kal i suan toto ta hi. Tua bang a i kalsuan laitak, minam khempeuh i kipumkhat kul hi. Tua ahih manin Kachin, Kayah, Kayin, Chin, Mon, Bama, Rakhaing, Shan cih bangin minam ahaampi-in (8) bang i om pen a deihna khat oma, tua in Bama-te zong minam khat mah hi-a, amau minampi deuh cihna om tuanlo hi. Tua ahih manin minam khat ii ngah theihna khuan (rights) pen kibangkim khin ding hi. Minamte i kipibawl ciang bekin mihing hihna a thupipan ding ahi hi. Rakhaing in Chin khat thupi sim ding, Chin in Kayin, Bama in Chin cih bangin thupi simna omkim ciat leh, minam lapsangna lianpi khat hipah hi. Tui tamzah zui-a tuitung paakte (singteh) a saan tohtoh, a kahtoto tawh kigente thei hi.

Kawlgam sunga teeng mite in ei' biaknop biakna suakta takin biak theihna thukhun zong 2008 in kikipsak khinzo hi. Kumpi in zong hong theihpih Christian biakna zong na hi uh hi. Tu-in zong hih Biakinn na honzawhna uh pen na khantohna lahna (indication) khat hipah hi, ci-in ka mu hi. Hih minamte pen khangto uh, hau uh, pil uh, picing uh, kipumkhat uh hi, cih pen hong lakkhiapi (image) ding hih Biakinn in teci hong pang hi. Leitung kampau-in gen leng hih muh theih innpite (infrastructure) in na minam kitehna piciang bang hipah hi. Hih TBC-Y Biakinnpi kilamkhinzo cih pen Chin minamte' matutna (capacity) a sanna hong lak ahi hi. Tua bangin kong muh ciangin zong ka lungdamna kisuangsawn hi. Hih Biakinnpi kumsawt khomin, a dinzawh, a kikepzawh ding zong thupi seem hi. Kipawlna khat tua bang aa a kip den zawh nadingin a makaite pen mawhmatna, ze-etna, gensiatna tampi zong thuak ding hi uh teh. Tua bang teng thuakzo-in i om ciang leitung beima teng Kawlgam a om mah bangin, Kawlgam a om laiteng Chinmi zong omin, tua Chin mi a om lai siahsiah hih Tedim Baptist Church - Yangon Biakinnpi zong om den ding hi, ci-in muanna tawh "The Church: 2013 to Eternity" cih thulu guanin upna lianpi tawh ka thugenna ka khum nuam hi.