Nisim Thalakna: Pasian In Thei


September 7
 Kigin Ni


PASIAN IN THEI 

SIMDING:
Late 139:1-10

Pasian hong hehpihna lian  mahmah a, A pilna le thu neihnate thuuk mahmah hi.–Rom 11:33


KUMTAWN LAI SIANGTHO:
Paunak 1-2
1 Korin 16

Vanleng lenglai khat ii tuntunna a kimuh theihna internet pan Kathy in Chicago lam azuan a pasal’ hawl vanleng pen en kawikawi hi. Tua vanleng pen ama’ omna mun panin nuamtakin en hit-hiat hi. Bang hun ciang lei-ah tu ding cih nangawn dong thei hi. Tuama kum sawm lai hun-in a pasal Chuck pen Africa gam-ah vanleng hawl khat hingei-a tua lai-in aw bek tawh kiho thei uh hi. Hun khat khat bang ciangin ni thum sung nangawn-in tunna mel kitheilo-in om thei, cih Kathy in gen hi. Tua hun lian mahin zong a lawmpa pen a vanleng nasia takin kisia-a lengzo nawnlo ahih lam nungtheih pan hi. 

Ahi zongin Pasian in Chuck pen koi mun ah om cih thei sitset a, bang hih cih zong theilai hi. Tuamah bangin eite zong hong thei hi (Job 34:21). Ama’ muhlohna omlo hi (Heb. 4:13). I ngaihsutna le kammalte tawh zong hong thei hi (1 Khang. 28:9; Late 139:4). Bang hong piang ding cih zong theikhol hi (Isa. 46:10). 

Pasian in na khempeuh thei hi (1 Johan 3:20). Amah’n hong tel sitset hi (Late 139:1-10). Haksatna khempeuh, lungkhamna khempeuh, natna, lunghimawhna, le dahna khempeuh zong tel hi. 

Lai Siangtho in a gen, “Pasian hong hehpihna lian mahmah a, A pilna le thu neihnate thuuk mahmah hi” (Rom. 11:33) a kici Pa i theih khak pen naak lungmuan huailua hi.---Cindy Hess Kasper


Ama’ hong cinna nuai-ah, 
A misiangthote tawlnga uh hi; 
Na khempeuh a bawl khut in
A tate cingzo lua ding hi. ---Doddridge


Na khempeuh a thei Pasian i muang hi.


September 6
 Ni Nga

KHANGTO NUAM 

SIMDING: 
1 Peter 1:22-2:3

Naungeek suakciilte na bang unla, note khangto-in hotkhiatna na ngah theih na dingun kha thu tawh kisai nawizu siangtho duh belin na nei tawntung un.–1Peter 2:2


KUMTAWN LAI SIANGTHO:
Late 148-150
1 Korin 15:29-58

Naungeek li-te thu a kikanna pen “Babies” cih min kipia video ah kilak a, Nambia, Mongolia, Tokyo, le San Francisco pan  naungeekte hi uh hi. Ahilh, a pantah, ahopih cih bang omlo-in amau suahna munmun a awgingte tungtawnin na khempeuh kisinsak hi. A lungdam uh ciang nui kauhkauh uha, na a sak, a gil uh a kial ciang kap uh hi. Nawitui duh tek uh hi! Tua video sungah naupang teng hong khanzia uh kilak hi. 

Naungeekte in nawitui a duh uh mah bangin, Khris’ nungzuite in zong i khalam khantoh theih nading kha nawitui ahi Ama’ kammal i kisam hi. Sawltak Peter in “Naungeek suakciilte na bang unla, note khangto-in hotkhiatna na ngah theihna dingun kha thu tawh kisai nawizu siangtho duh belin na nei tawntung un” (1 Peter 2:2) ci hi. Bawlsiatna hanga kithehthang Khristian-te tungah hanthotna kammal ahi hi. Midangte tungah huatna le hazatna neilo-in, khat le khat kilem takin nuntak ding zong hong hilh hi (tg. 1). A suakciil naungeek bangin Ama’ nawizu siangtho duh belin nei-in khangto ni (tg. 2). 



Topa in Ama’ hong piak theih nopna sungah i khancin ding hong lunggulh hi. Ama’ tate i khantoh ding hong munuam hi!––David McCasland 

Topa, Nang tawh hong kibang nuam ing. 
Na kammal siangtho hong dawndawn sak in. 
Ka kampau le gamtatna ah Nangma’ zia le tongte 
hong pulaakkhia sak thei ta in.

Pasian’ kammal i thukzaw lamah i tawhsuk ciang, i khangto semsem hi.



September 5
 Ni Li

LUNGKIM DEKTAK


SIMDING: 
1 Timoti 6:6-12

Deihluatna tawh na kipelhna dingun na nuntakna uh kikem unla, na neihzah uh tawh lungkim un. Pasian in “Note kong nusia ngei kei ding a, kong tamasak kei ding hi” ci hi.
---Hebru 13:5


KUMTAWN LAI SIANGTHO:
Late 146-147
1 Korin 15:1-28

Sun-an neek khit ciangin ansai pan ka paikhia uha, tua laitak pick-up khat mawtaw khawlna ah hong kithawh zeza-in lauhuai mahmah hi. Tua bang mawtaw hawlpa’ lungsim bangci hi ding hiam ci-in a mawtaw license peek tung ka etsak leh, “Lungkim dektak!” cih laimal ki-at citciat hi. Tua ii a khiatna ka ngaihsut ciang khiatna mel nei ka sa kei-a, tua ahih manin lungkim dektak cih bang omlo hi, ci-in ka mu hi. I lungkim le lungkim hi-in, i lung a kim keileh, lungkimlo hipah lel hi. 

Lungkim ding cih pen phimbil vang sunga khau zang khum bang hi. I teenna leitung pen i duh i deih kitasam den mun hi-a, lungkim ding cih pen mualmong et bang hi. Ahi zong, thuthak a piang cih bang hituanlo hi. Hebru Lai Siangtho sungah, “Deihluatna tawh na kipelhna dingun na nuntakna uh kikem unla, na neihzah uh tawh lungkim un. Pasian in, ‘Note kong nusia ngei kei ding a, kong tamasak ngei kei ding’ hong ci hi” (Hebru 13:5). Deihluatna lungsim pen Pasian’ sunga lungnopna bek in daisakzo hi. I deih i kisap khempeuh Amah in hong sikhzo a, leitung a i muh zawhloh lungnopna khempeuh Amah bek in hong pia thei hi. 

Lungkim dektak maw? Tua bang om kei! Khris sungah lungkimna taktak i nei hi. ---Bill Crowder


Ama’ hong hehpihna sungah lungkimna ka ngah, 
Ama’ maitang bangmah in liahzo kei; 
Haksatna ka tuahkhak hang, 
Thungetna mun nuam ka mu ta. ---Dunlop

Lungkimna cih pen i deih i ngahna hilo-a,
 i neih tawh lungdamna hizaw hi.




September 4
Nilai

NI THUPI 


SIMDING:
Luka 11:1-4

Tuni pen Topa’ bawlsa ni hi.––Late 118:24


KUMTAWN  LAI SIANGTHO:
Late 143-145
1 Korin 14:21-40

September ni 4 ni pen thupi diak ahiam? Hih ni pen khat teeiteei  adingin a suahni ahih kei leh ni thupi khat hi ding hi. Tua hangin thupi diak ding hi. Tangthu sungah thupiang khat hangin zong hih ni thupi bawl kha ding hiteh. 1781 kumin Los Angeles khuapi pen hih ni-in kiphut hi. 1993 kumin New York Yankees aa kimawl minthang Jim Abbott pen ama’ bawlung lot peuhmah kuamah’n dawngkik theilo hi. A suah tuung aa kipan taklam khut nei ngiatlo hi. TV et na uuk leh, 1951 kumin San Francisco pan tuipi gal khat le gal khat-ah TV khahkhiat kipan hi.

Hih nite pen nang tawh kisai nading themno khat zong a om keileh, ni thupi na ci thei diam? Ngaihsun in:

Tuni in Topa in Ama’ minphat nading hunpha hong pia hi. Late 118:24 ah, “Tuni pen Topa’ bawlsa ni hi-a; lungdam-in i kipaak ding hi.”

Tuni-in Topa’n na kisap teng hong huh-in, Amah na muan ding hong deih hi. “Tuni ka khamkhop ding an hong pia in” (Luka 11:3).

Tuni-in Ama’ kammal tungtawnin hong hopih nuam hi. Berea khua-a thu-umte in “nisimin Lai Siangtho sim tanghtangh uh hi” (Sawltak 17:11).

Tuni-in Topa in na lungsim hong thaksuaksak nuam hi. “Ka kha nuntakna pen ni khat khit ni khat thaksuak hi” (2 Kor. 4:16).

Topa’n hong tonpih peuhleh, September 4 le ni khempeuh ni thupi suakta hi.––Julie Ackerman Link
Tuni in Topa’ bawlsa hi, 
Hunte Ama’ aa ci; 
Vantung lungdam hen, leitung thawn hen, 
Phatna in tokhom kiim tuam den tahen- Watts

Na paina lampi dik ahih ding kician sak in, a bulkip sak in.––Abraham Lincoln



Biakna Thu Kinlo


September 3
Ni Nih
Simding: Johan 5:18, 37-47

Akpi in akha tawh a note a huai mah bangin na mite ka huai nuam tawntunga ahi zongin na ut kei hi. ___Matthai 23:37


Pawlpi tawh kisai mipi tungah taangko khiatna khat-ah: “Khristian thu zakhin na hih manin Biakna thu lunglut lua-in kong um kei hi. Tua bangmah-in Jesuh in zong biakna thu kinlo hi. Amah in ahih leh, holimna le khat le khat i ki-it theih ding thuthuk hong hilh hi. Tua ban-ah ka Pawlpi uh zong lungtu lo kha ding hiteh. Ko pen kiholimna, leh Pasian le mite koici kilawmtat ding cih ka sinsin laitak hi. Nang zong hong sam hi ung” ci-in radio pan kigen hi. 

Hih Pawlpi in Jesuhh’ thu le biakna thu a kilawm ciang a gen mah hiam, thei kei hang. Lai Siangtho in biakna man taktak pen midangte huh ding le panpih ding (James 1:27) ci hi. Jesuh pen ama’ hun-a biakna makaite tawh nop mawhna tampi nei hi. Pharisee-te kiangah dan le thukhun tawh kizui-in itna a kihello amau’ gamtatna a muh ciang “Mite’ muhin mihoih mahmah bang napi’n na sungtawng taktak uhah mawhna le kineih khemna bek dim hi” (Matt. 23:28) ci hi. Amau’ lungsim sungah Pasian itna omlo hi (Johan 5:42). Jesuh in amaute tawh kiholim nuam napi’n a maute a ut kei uh hi (tg. 40). 

Biakna i cih in hong Honpa tawh nuamtak holimna omlo-in i gamtat hoihna ding thukhunte azui bek hileng, Jesuh in lunglut lo mah hi. Jesuh in amah tawh a kiholim nuamte adingin maisakna le itna tawh hong sam lai hi.–– Anne Cetas 

Biakna man tak in,
Khris hong hilh itna;
Biakna man taktak in,
Lungsim gimte itna lak ding. –D. De Haan

TBC-Y TU’N KOI-AH LEH? by Rev. Dr. S. Pau Khan En



Church Pastor Rev. Dr. S. Pau Khan En (1 sep 2013)
 
Download

Paikhiatna

Alian 23

20 "En un, keimah in ka bawlsa munah note hong paipih ding leh lamkalah note hong cing dingin note' mai-ah vantung mi khat ka sawl hi.
21 Amah thudonin ama aw ngai un la, amah lehdo kei un. Bang hang hiam cih leh amah in note' thu palsatna hong maisaklo ding hi. Bang hang hiam cih leh keima min tawh nasem ahi hi.
22 "Ahih hangin note in ama aw limtakin ngai-in keima gen bangin na gamtat uh leh na galte uh' tungah gal ka hi ding a, na langte uh' tungah lang ka hi ding hi.
23 "Note' mai-ah ka vantung mi pai-in Amor mite, Hit mite, Perez mite, Kanaan mite, Hiv mite, leh Jebus mite kiangah note hong paipihin, keimah in amaute ka phiat khiat ciangin,....

Solomon La Alian 2 Aneu 15
"I leengguite pak ta ahih manin ngiano hon in a suksiat ma-in tua ngiano honte man ni," hong ci hi.

Lai Siangtho Sinna (Matt.10:34-42)~ Asst. Pastor Zam Khen Khai

Asst. Pastor Zam Khen Khai (1 Sep 2013)


Download

Tedim Laisiangtho Matthai 10:34-42

Matthai

Alian 10

34 "Leitungah kilemna a omsak dingin hong pai hi, ci-in hong ngaihsun kei un. Kilemna a omsak dingin a hong pai ka hi kei a, kidona ding namsau a khah dingin a hong pai ka hizaw hi.
35 Tate leh pate a kidosak ding, tanute leh nute a kidosak ding, monute leh teeknute a kidosak dingin a hong pai ka hi hi.
36 Mi khat-a' dingin a gal lianpenpen ama innkuanpih mite mah hong hi ding hi.
37 "Kei sangin a nu a pa a itzawte kei tawh kilawmlo a, kei sangin a tapa a tanu a itzawte kei tawh kilawmlo hi.
38 Ama singlamteh mah puatawm lopi-in ka nung hong zuite kei tawh kilawmlo hi.
39 Hih leitung nuntakna a hon nuamte in a nuntakna taktak taanlawh ding a, keima hangin a nuntakna a taanlawhte in a nuntakna taktak a ngah ding uh hi.
40 "Na thugen uh a hong sangte in kei' thu a hong sang hi a, kei a hong sangte in kei a hong sawlpa zong a sang ahi uh hi.
41 Pasian' thugen ahihna hangin Pasian' thugen mi a sangte in Pasian' thugente' thaman ngah ding a, mihoih hihna hangin mihoih a sang mite in mihoihte' thaman ngah ding uh hi.
42 Keima nungzui mi a neupen khat nangawn, keima nungzui ahihna hangin tuivot hai khat bek a suahte nangawn in pelloin thaman a ngah ding lamtak phawk un," ci-in a vaikhak hi.