A HOIHZAW LEITUNG

March 29
Kigin ni

A HOIHZAW LEITUNG

SIMDING:
1 Peter 2:9-12

Gentile mite’ muhna ah a genbaanglo dingin kidawm un... amaute in note’ gamtat mu ding uha, Pasian’ min thang ding hi.__1 Peter 2:12

KUMTAWN LAI SIANGTHO:

Thukhente 7-8
Luka 5:1-16

Cartoon film khat-ah ka deih mahmah pen Peanuts acih hi-a tua sungah Lucy in amah le amah a kigenkhiat ciang: “Bangci bangin ka teenna leitung suuksia zaw ding hiam? Ka suah aa  kipanin leitung pen hoihzaw tektek mawk hi!” ci hi.
  

  Himah hi. Lucy in a piang theilo ding thu khat a gen tawh a kibat hangin a lunglut huai mahmah khat hong pulaak gige ahi hi. Eite i nuntakna ciat panin Khris hong deihsakna nuntakzia bangin nungta peuh leng, leitung a suuksia zawk nading omlo mah hi.
 

   Peter in bawlsiatna a thuak thu-um mite  a laikhakna ah, “nuntak siangtho na nei un” (1 Peter 2:12) ci hi. Tua bek tawh Pasian’ vangliatna kilangsak zo ding hi. Thu khat-ah i gamtatna tawh leitung a hoihsak zo ding ihi hi. Jesuh hong piak ki-itna, hehpihna, mawhmaisakna, thumanna leh kilemnate in leitung koici ciang bawlpha zo, cih na ngaihsun ngei hiam? Ama’ hong hilh nuntakzia bangin zuih ding i hanciam ciang, pawlkhatte bang in, “Ka nasepna pen ____ sep zawh a  kipan hong hoihzaw hi” cithei uh hi. Ahih keileh, “Ka vengte hong nuamzaw  tektek uh hi” kici thei hi. Ahih keileh zong “Ka sangkahna nuamzaw tektek hi” cithei hi.
 

    Ei’ thaguak tawh leitung khempeuh a bawlpha zo ding i hi kei hi. Ahi zongin Jesuh Khris hangin Pasian’ hehpihna tawh i sungah na hong sep ciang i kiim i paam a kikheelsak zo ding i hi hi. – Joe Stowell 

Itna pen leitung’ kisapna i piakna hi-a,
Kha Siangtho’ makaihna a mangzo hi-in,
Leitung in khitui luangin a om laitak i hehnem a,
Khris’ neih itna mit tawh leitung a muthei itna hi. – Brandt

Leitung hoih nading mikhempeuh in hih thei uha – eite nuntakna tungtawnin Khris khuavak i tangsak thei hi.

NGAK ...

March 28
Ninga

NGAK ...

SIMDING:
Late 130

Lam-etna sungah nuamsa inla, thuakna ah lungduai in, thungetna tawh mapang in.___Rom. 12:12

KUMTAWN LAI SIANGTHO:

Thukhente 4-6
Luka 4:31-44

Kum tampi sung Harry in ta banga aneih John in Pasian’ thu tawh kituaklo-in gamta ahih manin, ama adingin Pasian’ tung thungetna nei den hi. Asih dong ngen-ngen lai hi. Tua zawh a sawtlo-in, John in Pasian hong lunggulh ta hi. Harry’ zi Marsha in John tungah Harry in  nisim-in ama ading thu a ngetsakna genkik hi. John in “Kei’n sawtvei ngaklua kha” ci-in kisik takin dawng hi. Ahi zongin Marsha in: “Pasian in Harry’ nuntak lai-a athungetna hong dawng ahih manin ka nuam mahmah hi” ci hi.
 

    Thungetna tawh ngak ding ahihna ka phawka, tha ka ngah mahmah hi. Amah pen thungetna ah citak mahmah-a lungkia lo-in thungen hi (Rom. 12:12).
 

   Late laphuak pa in, “Topa ka ngak a, ka kha in zong ngak hi” (Late 130: 5). Amah in Pasian sung bekah lam-etna nei-a, “Topa bek in hehpihna pia thei-a, Amah bek in hotkhiatna kicing pia” (tg. 7) cih thei hi.
 

    Laigelh Samuel Enyia in Pasian’ Hun cih laigelh ngei-a: “Pasian pen mihingte’ hun ciangtan sungah om lo hi. Eite’ zat hun pen tangthu ciaptehna le akivei kumte hi-a, Pasian’ kum pen a tawntung ahi hi. Amah in ahun acin ciangin na hong sem ding hi. I thungetna ah Topa nawhsa takin i sap ding hituan lo-a, i vaihawmna ah masak ding ahi hi.”
 

    Tua bang Pasian tawh thungetna  tawh i kikholhkhop theih manin angtan huai mahmah-a, Ama’ hun hong tun ciang na hong sep ding i ngaksiam ding ahi hi. – Anne Cetas
 

Thungen niloh in! Tawlnga ke’n,
Lungkia lo-in ngak tawntung in;
Na Topa hong pai hamtang ding,
Amah hong zekai lo ding hi. – Chisholm

Topa in i ngetna hong dawnghak kha thei-a, i muan zawhna Amah’n munuam hi.

NUNTAKNA KIZOPZIA

March 27
Nili

NUNTAKNA KIZOPZIA

SIMDING:
Titus 3:1-11

Ama’ hehpihna hangin hong honkhia-a, Kha Siangtho tawh hong silsiangin athak i suak hi.___Titus 3:5

KUMTAWN LAI SIANGTHO:

Thukhente 1-3
Luka 4:1-30

Kum 16 aphakin Morris Frank (1908-1980) a mit langnih-in taw hi. Tua zawh a sawt ciangin Switzerland gamah khualzin-a tua munah Buddy a kici ui’ makaihna tungtawnin sangkah-in laisin hi. 


    Buddy in lam tawntung-ah makaih a, Frank pen mi tam mahmahna mun nangawn ah vak thei hi. Tua bang a nuntakna a genkik tak ciangin Frank in: “Nuamsa ing: hih ui leh khau-te in hong nungta paisuak sak hi” ci hi. Buddy in Frank pen leitung ii hoihna tuamtuamte theisak, ngahsak hi.
 

    Pasian’ Kha Siangtho in Khris sungah adim nuntakna hong ngah theisak hi. Khris pen Topa-in i san ciang, i mawhna hong kimaisaka athak i suak hi “Jesuh Khris hangin i ngah Kha Siangtho hang ahi hi” (Titus 3:5-6). Khris i theih ciangin, Kha Siangtho in Pasian’ itna hong ciamkha sak hi (Rom. 5:5), a kammal hong telsak hi (Johan 14:26), thu hong ngensak thei (Rom. 8:26), leh lam-etna hong pia hi (Rom. 15:13).
 

   Tuni-in Pasian tawh na kizopna ngaihsun lecin, Khris hangin na ngah Kha Siangtho in nang hong makaih ahihna na phawk gige ding hi (Rom. 8:14). – Jennifer Benson Schuldt

Kha Siangtho, khuavak siang,
Ka lung sungah hong tang den.
Khuazing vangliatna veng,
Khuavakna tawh laih den hen. – Reed

Kha Siangtho in theihna le kha lam picinna lamah hong paipih hi.

BANGMAH LO PAN

March 26
Nilai

BANGMAH LO PAN

SIMDING:
Paikhiatna 8:1-15

Paupha kei in,... kilemna kam, kam khum, mite’ mai-ah kiniamkhiat in om in.–Titus 3:2

KUMTAWN LAI SIANGTHO:

Joshua 22-24
Luka 3

Ka muh teng lakah man ka sak mahmah khat pen: a hi sitset-te pen a ngeina tawh kisailo dingin cih ahi hi. Ka zum sung mahmah zong ka et ciangin a tuunga ahi ziazua lak pan, ahih sitset theih nadingin hun tawmpia-in ka gual hi. Tua bang ahih nadingin va sep kul-a; tua pen angeina-in hong piang thei samlo hi.
 

    Lamdang sak huailo hi. Pasian in bangmah lo panin nate piangsak cih pen zong Lai Siangtho’ gennop thu paipi ahi hi. Tua bang a pian theih nadingin amah in Israel minam hong bawlkhiat tak ciangin hong picing suah hi (Pai. 7-14). Pasian in Hebru mite Egypt saltaanna panin paikhiatpih ding ageel lai-in, Pharoah in phallo hi. A gamsung nuntakna pen Hebru nasemte hangin nuamtuam a, tua mite taisuah ngamlo hi. Pasian in Pharoah’ lungtang khelna dingin, gimna nam 10-te tungsak hi. Pharaoh’ aisiamte in zong a masa nihte ciingthei sam uh hi. Ahi zongin tua gimnate daisak zo tuanlo uh hi. Amaute in a susia ding bawl thei uha, ahi zongin bawlhoih thei tuanlo uh hi. Pasian bek in bawl thei hi.
 

   I hanciamna tawh i omna ding mun ciangciang a nop dingin i bawl thei-a, ahi zongin i lungsim kisiatna le kha cidamlohnate bawldam zolo hi hang. Amah in a kisia nuntakna pan Ama’ deih nuntakna bang – dik ding, mite tawh kilem ding, nunneem ding, le kiniamkhiat ding – cih bangin i nuntak ciang damna bukim hong pia hi. – Julie Ackerman Link
 

Topa, ka leitung uh leh nuntaknate pen kisiatna le buaina bekbek himai hi. Tuate a lempha dingin nang kong kisam uh hi. Nang’ deih bangin ka nuntak theih nading uh hong hilh in – midangte a it thei dingin.

I buainate Topa’ khut sung i ap tak ciangin, Amah in lungtang sungah Ama’ daihna hong guansak hi.

A LAIZANG AH KUA OM?

March 25
Ninih

A LAIZANG AH KUA OM?

SIMDING:
Late 33:6-19

Pasian’ thupiaknate kip tawntung a, a geelsate zong a khangkhang-in kip ngitnget hi.
––Late 33:11

KUMTAWN LAI SIANGTHO:

Joshua 19-21
Luka 2:25-52

Tusawng teng khatin ka lungsim pen tavai manggawp-in leitung-ah a omlo bangin ka kingaihsun hi. Leitung in kei hong huamkha lo dingin ka kingaihsun hi. Kei’ tel theih bangin kiheilo-in, kei’ deih bangin zong hong piang tuanlo bangin ka telkhial kha hi.
 

    I deihzawk khat bang a om sam hangin, nuntakna cih pen ei’ thu bek tawh a kinungta thei hilo hi. Pasian’ thuneihna zia tawh a kipei-pei hizaw hi. Late 33 sungah, na khempeuh pen Amah pan kipan-in, Ama’ kepsa ahi hi (tg. 6-9). Amah in tuipite ciangtan-in, tui maitang leh lei maitang khen hi. Nate khempeuh Ama’ geelsa thu bangin kihei diamdiam uh hi.
  

  Gam khempeuh zong Pasian’ thuneihna tawh kikhel hi (tg. 10-12). Pasian’ lang-ah ngaihsutna dang pangzo lo ding hi. Atawpkhakna ciangin Pasian’ geelsa bangin hong tung ngeingei ding ahi hi. Ama’ geelsate kiliing cih om ngeilo ding hi.
 

    Mihingte’ nuntakna zong Pasian’ khut sung mah ahi hi (tg. 13-19). Pasian in leitung mihing khempeuhte mukim hi. I lungtangte Ama’ hong bawlsak sa ahih manin, i bawl bangbang hong thei hi. I nuntakna zong a deih bangin hong khaktan thei-a, haksatna pan zong hong honkhia thei hi.
 

    I nuntakna pen pumpi’ deihna tawh hilo-in Pasian’ deihna bek tawh a nungta ding ahi hi. Tua bang Pasian i biakkhak lungdam huai mahmah hi. Amah in a vangliatna tawh mihing nuntakna cingin kem hi. – Poh Fang Chia
 

 Kong zahtak zawhna ding hong thuhilh in. Kei leh na bawlsa khempeuh in lamdang sakna tawh om-in, na geelsa khempeuh tangtung ding ci-in theitek ta uh hen.

Ei’ deihna lungsim sisak lehang, Pasian’ deihna nungta ding hi.

March 23, 2014 CHURCH PROGRAM

§  Lai Siangtho thusinna (I Semual 2:1-10)        ~ Asst. Pastor Zam Khen Khai
Audio Files


Siampi thungetna ~ Asst. Pastor Zam Khen Khai

Biakinn sumpi donna leh  apna~ Upa Hang Za Thawn, Vice President

 La Pawl ~ Zolai Sinte 

Nipi Sumpi donna (Lai Siangtho) ~ Hun uk 

Thugenna tom~ Rev. Pau Khan Khai, ZBCM, US


Sumpi apna (Doxology)~ Nu Ciin Pum Cing

Lapawl~ Church Choir

“Nu Leh Pa Asun naupangte” Rev. Gin Lian Tuang
 

THUDAM TAWH PULAAKNA

March 24
Nipi Khuavak 

THUDAM TAWH PULAAKNA

SIMDING:
Sawltak 1:1-11

Jesuh, Judea gam le Samaria gam, leitung mong dong ah keima’ tecite na hi ding uh hi.–Sawltak 1:8

KUMTAWN LAI SIANGTHO:

Joshua 16-18
Luka 2:1-24

Kum tampi lai-in, pi 38 a sang leitung pan kia ka hih manin zato hong kipuak hi. Ka lup hun sungin ka gei-a cinapa’ zi in hong muh ciang hong hopih hi. “Ka lawmpa in na tuahkhak thute hong gen hi” hong ci hi. “Pasian in na nuntakna hong zang nuam lai ahih  manin na nuntakna hong hawisak lai hi. Nang ading thu hong ngetsak ung” ci-in tha hong pia hi.
 

    Lamdang ka sa hi. Ka neutuung a kipan Biakinn ka pai den-a, Pasian in kei’ nuntakna hong zang nuam ahihlam ka phawk ngei kei hi. Tua bang kammal ka zak ciangin honpa Topa in ka nuntakna hong zang nuam cih ka kiphawk-a, Topa ka sanlam ka kisittel semsem hi. Tua bang hong kigen ciangin Pasian’ itna ka theih ngeiloh mi khat tung pan ka zak cilna zong hi-a, tua bang kammal pen manpha ka sa ngaungau hi. Ama’ kammalte in hong itna le hong lainatna kilangsak a, nuntakna a khiatna neihlam hong phawksak phapha hi.
  

  Jesuh in a nungzuite kiangah – Pasian’ itna mite tung gen ding hilh hi: “Kha Siangtho’ hong piak vangliatna na ngah ding uha; note pen Jerusalem, Judea gam le Samaria gam, le leimong dongah ka tecite na hi ding uh hi” (Sawltak 1:8) ci hi.
 

    Kha Siangtho’ vangliatna hangin i kammalte le teci pannate in midang khat ii nuntakna ah a lamdang kikhelna a piangsak kammalte hong suak takpi ding hi. – Bill Crowder
 

Tangthu ka gen-gen nuam hi, Muh nailoh vantung thu;
Jesuh vangliatna lianpi, Jesuh hong itna thu;
Tangthu ka gen-gen nuam hi, Thuman hicih ka thei;
Hong lungkim sak mahmah hi; Tehpih theih ding om kei.

Hehpihna kammalte in ei’ ngaihsutna sang na tampi semzo zaw hi.

KILEMNA PIANGSAK

March 23
Nipi  ni

KILEMNA PIANGSAK

SIMDING:
Paunak 6:16-19

Pasian in... kigalneihna thu a piangsakte a hua hi.___Paunak 6:16,19

KUMTAWN LAI SIANGTHO:

Joshua 13-15
Luka 1:57-80

Paunak 6:16-19 sungah kizang kammal khauhpai ka sa hi. Pasian’ deihloh na nam sagihte lakah “kithutuah lohna a piangsakte” kihel hi. Tua in Khris’ deih  nungzuite kipumkhatna susia-in mawhna lianpi piangsak  hi (Johan 17:21-22).
 

    Tua bang kithutuah lohna a piangsakte’ ngaihsutna limlim ah bel kikhenthangna piangsak ding cih ngimna zong hikhin tuanlo ding hi. Amaute pen amau’ mimal deihna khat ultung sak nuam uh ahih manin ama’ lawmte a sutuah hithei hi (James 4:1-10). Lot’ nasemte le Abraham’ nasemte ngaihsun pak dih in (Pian. 13:1-18); Khris’ nungzuite zong amau’ aituam  ngahna ding bek en uh hi (Luka 9:46); Korin pawlpi sunga pawl kikhenna (1 Kor. 3:1-7) cihte ah kimu thei hi.
 

    Tua hileh kipumkhat nading bang cih leng hoih pen ding hiam? Lungsim khel masak ding kisam hi. Khris’ lungsim bang i neih tak ciangin, kiniamkhiatna tawh mite’ na sem dingin i lungsim i kizo hi (Fil. 2:5-11). Ama hang bekin eite in “I lunggulhna bek ultungsak lo-in midangte ading sem nuam ding” (tg. 4) hihang. Tua ciang bekin ei-a ding bek sep ding sang midangte ading sepnopna hong khang semsem ding hi.
 

   Eite sungah itna hong khan semsem ciangin, kithutuah lohna khempeuh lungdamna le kipumkhatna in hong kheng ding hi (Late 133:1). – Dennis Fisher
 

A thahat galkapte bangin Pasian’ mite;
Unau bangin, taang misiangte totsa lampi tawnin.
Kikhenthang lo, pum khatna tawh –
Upna le zuihna ah pumpi khat i suak ding hi– Baring-Gould

Ei bek in i sep sangin kipawlkhopna tawh gualzawhna i ngah ding hi.