NI MAWKMAWK

January 25
Kigin Ni


NI MAWKMAWK

SIMDING:
Matthai 24:36-44

Bang hunin Topa hong pai ding cih theilo na hih manun na pilvang un. ___Matthai 24:42

KUMTAWN LAI SIANGTHO:

Paikhiatna 12-13
Matthai 16

A Day in Pompeii” cih mintawh ‘Tangvan Kepna (Museum) lahpawi’ khat ah “August 24, AD 79” cih ka muhna khempeuh kisuang tua laisuan in ka lungsim hong vut mahmah hi. Tua ni-in Rom gam tuipi gei khuakhat a hi Pompeei a mite 20,000 te annek tuidawn vai tawh a ngei bangin buaitek uh hi. Zingsang nai 8 hong zat ciangin Vesuvius mual sungpan in mei hong khu to in, sumkim ciangin tua mualpi hong puakkham a, nai 24 sungin Pompeii khuamite a tamzaw pen suang meisa nuai ah kivuk nelh ta hi. Uploh hunin hong piangvat hi.
 

   Jesuh in ‘Mite in nisim nuntakna tawh anne tuidawn in kipi kiteng in a buai laitak in kong paikik ding’ ci hi. “Noah hunlai in uploh hunin tuiciin a tun bangin Mihing Tapa hong pai ding” ci hi (Matt. 24:37).
 

    Topa in pilvang tak a a ngak den dingin hong deih hi. “Tua a hih ciangin Mihing Tapa zong na upmawh loh hun laitakun hong pai ding (tg. 44),” ci hi.
 

   Tuni in eite Honpa i dawn ding bangzahin lawphuai a hi hiam? – David McCasland

Tuni Topa hong pai hen la,
A citak a thumante hong zong hihen la,
Laulo in lawpna tawh a ngak te hong mu hen la,
Tua hong nai semsem hun Tuni hong hileh? – Morris

Tuni hikha thei hi.

HONG GENHAK LUATEH

January 24
Ninga

HONG GENHAK LUATEH

SIMDING:
Rom 10:11-15

Ama’ thu za kei leh, kua in a thu-um thei ding ahi hiam? Kigen kei leh, kua in za thei ding ahi hiam?__Rom 10:14

KUMTAWN LAI SIANGTHO:

Jeremiah 6-8
1 Timoti 5

1700 kum kiimin Missionary Egerton Ryerson Young in Canada gam a Salteaux minamte kiangah Pasian’ n sem hi. A teek khit ciang a Lungdamna a zakha pan tua minamte makaipa in Young tungah Pasian thu a genna hangin lungdam ko hi. Pasian pen Young i vantung Pa a hih lam a theih ciangin ‘kei pa zong hilo a hihiam?” ci-in makaipa’n dong hi. ‘Himah hi. Nang pa zong himah hi’ a cih ciangin mipi in khut beng ziahziah hi.

    Minam makaipa’n a thugen zomlai a, “Tua ahih leh ….gamlak a, ko na sanggamte tungah hih lungdamna thu banghangin tu’n hong gen pan mawk na hiam? Hong gen haklua teh” a cih pen Young in mangngilh theilo hi.


    Ka nuntakna akawi amaam-ah Gupna thu ka gen khakloh hunte ngaihsunin ka lungzing theizel hi. Pasian in tu mahmah a, na omna, na kim na paam ah Jesuh thu a za nailo mitampi om cih hong hilh hi. “Topa pen mi khempeuh’ Topa hi kim a, ama kiangah a ngen khempeuh tungah thupha tampi tak a pia hi. Topa tungah huhna a ngen khempeuh in hotkiatna a ngah ding uh hi” cih thu mite tungah i gen ding a hi hi.


    Tua pen tangthu mawkmawk hilo in a kigen khinsa khempeuh lakah a hoihpen thuhing ahi hi. –Randy Kilgore


Mipawl khat in a zak ngeinai loh,
Tangthu ka gen nuam hi,
Pasian Gupkhiatna simloh,
Gen ding dang a hoihzaw omlo hi.
Khut dawh ngen khat in a dang khat kiangah an omna a gen bangin Lungdamna thu i gen ding ahi hi.

PLIMSOLL LAMGIT

January 23
Nili

PLIMSOLL LAMGIT

SIMDING:
1 Peter 5:5-9

Pasian in ama’ hoihsak hun ciangin note hong laptoh theih nadingin a thahat Pasian’ khut nuai-ah kiniam khiatin na om un. __1 Peter 5:6-7

KUMTAWN LAI SIANGTHO:

Paikhiatna 7-8
Matthai 15:1-20

Kum zalom 19 lai a tembawpi te pen na tam kipua saklua a hih manin tui sungah tum theizel hi. Tua bang supna a tawm zawkna dingin 1875 kumin British politician Samuel Plimsoll makai in van bangzah kiguan cih a kitheihna ding tembaw pangah lam git ding kumpi thukhun suah hi. Tua manin ‘Plimsoll Lamgit’ kici hi. Tuni dongin tembawpite tungah kizang suak hi.

    Khat veivei mihingte zong launa, buaina, natnate hangin i vanpuak gik lua thei hi. Ei mahmah in zong tui sung ah a tumding bangin i kingaihsun thei hi. Tua bang hun ciangin eite vangik hong puaksak nuamin Pasian na kiging kholkhol cih phawk ni. Nungzuipi Peter in, “Ama’ hoihsak hun ciangin hong laptoh theihan dingin a thahat Pasian’ khut nuai-ah kiniamkhiat in na om un. Pasian in hong kin a hih manin na lungkhamna teng uh amah suan un(1 Pet. 5:6-7),” ci-in hong phawk sak hi. Nang hong depcip kinna te Pasian in hong vaihawmsak thei hi.


    Vangik pua bangin nuntakna ah sinna leh ze-etna i tuak laitakin, vantung i Pa Pasian in i puakzawhzah ding thei hi cih kipsak zelzel ni. Bangbang i thuak zongin hong huh ding hi. – Bill Crowder


Ka mai nawt zo nawnlo ding ka hiam ci’ng e,
Thanem in gimin tawl kisa ing e,
Ah!! Pasian in ka puak zawhzah hong thei e,
Ama’ hatna in hong puakpih hi e.


Amah i muan zawkna dingin tuithuk sung dongah Pasian in hong paipih kha thei hi.

BUHTU LO, LEISAN

January 22
Nilai


BUHTU LO, LEISAN

SIMDING:
Paikhiatna 6:1-13

Note kong khahkhia dinga ... a thahat ka khut zanin note kong honkhia ding hi.__Paikhiatna 6:6


KUMTAWN LAI SIANGTHO:

Paikhiatna 4-6
Matthai 14:22-36

Mihingte in na khempeuh a kiciangtan zah bek i zang thei hi. Sum ahi a, hun ahi zong, mihing tha ahi a, settha ahi zongin beihun neithei hi. Tua bangin a kiciangtan nate siksanin i sepding tamsemsem zaw thei hi. Tua manin, “Buhtu tomno tawh leisek tampi” kingah nuam hi.
  

  Hih kammal pen Egypt gam a saltang Israelte’ haksatna a gen nopna ahi hi. Pharoah in leisek bawlna ding buhtu pianawnlo in leisek pen a ngeina zahmah sek sak hi. Lei kui liangin buhtu a zon laitakin Pharaoh’ nasem ukte in satin nasep haksa sakzaw lai hi (Pai 5:13). Tua ciangin Israel mite lungkia lua ahih manin Pasian in Moses tungtawnin, “Note kong khakhia ding a, a thaht a khut zanin note kong honkhia dng hi,” a cih nangawn umzo lo uh hi (6:6).
 

    Tua bangin Israel mite in Pasian thu a ngaihnoploh hun nangawn in Pasian in Moses lamlak in thupia in Pharaoh tawh a kimu dingin kiginkhol sak hi. Pasian pen Israelte lamah pangtinten hi. Eite zong lungkia lua-in thapiakna kammalte i awlmawh zawhloh hun omthei hi. Tua bangin nuntakna a mial hun ciangin “Pasian pen kei hong honkhia pa hi (Late 40:14),” cih phawk lehang lungnop huai mahmah hi. Ama’ nasepzia i muh theihloh hangin eitang i Pasian in na sem tawntung hi. – Jennifer Benson Schuldt
 

Ka lungkiatnate kheng in nang kong muanzawh na’ng,
Kha Siangtho lametna ka sungah nong guan na’ng,
Ka nuntakna tawh teci kong pan zawh na’ng in,
Kei hong huhin Topa. 


Haksat hunte pen muanna i neihna ding hunte ahi hi

AW KIHUAL

January 21
Ninih

AW KIHUAL

SIMDING:
1 Peter 4:7-11

Pasian’ na kemsiamte bangin Ama’ kiang panin na ngahte uh midangte phattuam nadingin na zang un.
__1 Peter 4:10

KUMTAWN LAI SIANGTHO:

Paikhiatna 1-3
Matthai 14:1-21

Khauzang 5 a pha Banjo tum leng nuam ka sa mahmah hi. Ahi zongin zang 5 na pen khutme (Chord) dangte ah kihual nuam pha lo in leplep kul hi. Tumging tuamtuam tawh a kitum khop ding cianin Banjo pen lepphat mahmah kul hi.

    Tua bang mah in Pasian’ na i sepna ah i ngah Kha Siangtho letsong, i siamna te leh midangte siamna, i lepphat mahmah kul zel hi. Gentehna in Laihilh siamna a nei khat pen mi kaikhop siamna a nei khat tawh a kikop thei leh hoih a, tua bang mahin kikhopna mun siansuah leh zep a siamte zong tawh a kipawl mahmah kei leh vai lemlo thei hi. Pasian’ deih nasep i zawhna dingin Kha Siangtho letsong i siamnate i gawmkhop a, i leptuah ding thupi mahmah hi.


    Nungzuipi Peter in zong, “Pasian’ nakep siamte bangin Ama’ kiangpan in na ngahte uh nate midangte phattuamna dingin na zang uh (1 Peter 4:10),” ci’n  hong hilh hi. Neihsa kepsiamna cih pen kipawltheih siamna zong kisam hi. Na Kha Siangtho letsongte lungngai dih in (Rom. 12; 1 Kor 12; Efe 4: 1 Peter 4). Tua na siamna te midangte siamna tawh koici leptuah-in manphasak ding cih lungngai kik in. I siamnate pen panpih theihlam a hih nak leh Pasian’ minthanna dingin hong kihual mahmah ding hi. 


Tumging tawh Pasian i phat a,
Lapi sa-in i pahtawi zongin,
Lungsim takpi tawh sa in,
I Kumpi pa’ na i sem ding ta.


Khris tawh mimal kihualna in Pawlpi bup hong kihual sak hi.

LIATNA TAKTAK

January 20
Nipi Khuavak


LIATNA TAKTAK

SIMDING:
Maku 10:35-45


Note lakah a lian nuam khat peuh adangte nasem hi ding hi. __Maku 10:43

KUMTAWN LAI SIANGTHO:

Piancil 49-50
Matthai 13:31-58

Mi pawlkhatte amah le amah gunpiau a, suangtang neu khat bangin kineu ngaihsut thei hi. Bangzah in ei le ei, neu i kisa zongin Pasian in a lianpi-in hong zang thei hi.
 

    Martin Luther King Jr. in 1968 kum kipat lam a, a hunzatna khat ah Maku 10 sung a, Jesuh kammalte bulphuh-in gen hi. “Mi khempeuh mi lian suak thei hi. Bang hang hiam cihleh mi khempeuh in midangte huh thei hi. College degree neih kullo hi. Plato le Aristotle-te a theihloh hangin zong kihuh thei veve hi. Itna a dim, a hehpih lungtang na neih ding kisam bek hi.
 

   Vantungah kua zalian zaw ding ci-in a nungzuite a kituh laitakin Jesuh in, “Note lakah a lian nuam khat peuhpeuh, a dangte’ nasem hi ding a, a makai a hi nuam peuhpeuh, a dangte sila hi ding hi. Mihing Tapa zong, mi dangte nasem sak ding in hong pailo a, mite’ na a sem ding hong pai hi (Maku 10:43-45),” na cih san hi.
 

    Liatna tawh kisai in ei telzia koici bang a hi diam? Mi phawk loh in mite na i sepsak nuam mah diam? I nuntakna pen Pasian a lungdam sak ding hilo a, mi lian i suahna ding hizaw kha hiam? Mi lian i suah nop taktak leh A lianbel pa mah i mitsuat dending a hihi. –Vernon Grounds

Nasep a thupi lo cih omlo a,
Leitung pen tua nasep tawh kidim hi.
Ama’ angsung bek a zongte a neu hi a,
Pasian’ deihna a sem theite milian a hihi.

Jesuh min tawh a kisem a neupente zong  alianpen suak hi.

MI NIH

January 19
 Nipi Ni 

MI NIH

SIMDING:
Johan 11:30-37

A lungsim nakpi takin sukha-in lunggim mahmah ahih manin... Jesuh a kap hi.__Johan 11:33, 35


KUMTAWN LAI SIANGTHO:

Isaiah 59-61
2 Thessalonika 3

Ka tenna khua ah nikhat, mi nih sih khat in hong si hi. Khat pen palik hi a , a dang khat pen inn neilo pasal khat a hihi.

    Palik pa sihna hangin khuabup kidah mahmah hi. Amah pen khangmoi lai-in a veng a pam a huh thei mahmah khat hi a, ki-it mahmah hi. Inn neilo pa bel a inn neilohpih mi tawmno khat in dahpih sam hi. Ahi zongin Pasian pen tua minih sihna hangin dahkhawm ding hi.


    Lazarus sihna hangin Mary, Martha le a lawmte kahna a muh ciangin, “Nakpi takin a lungsim sukha hi (John 11:33).” Mary te unau pen Jesuh in it mahmah hi. Tua hangin a kap a hihi. Lai Siangtho siam pawlkhat bangin Jesuh pen sihna hang a mite dahna a muh ciangin a kap hi ci hi.


    I nuntakna supna dahna tawh a kibawl khawm ahi hi. Ahih hangin Jesuh pen nuntakna le thawhkikna (tg. 25) hi a, Amah a um mite in dahna le kahnate a bei hun khat mukha ding uh hi. Tu tadihin ahih leh Jesuh mahmah eitawh hong dahkhawm in hong kap khawm lai hi (Rom 12:15).– Anne Cetas

Nang kong sut semsem na dingin,
A hehpihthei a nem na lungtang hong guan in la,
Ka kim ka paam a, a lungleng te hong hehnem sak in.
Na hehpihna tawh kei hong tuam in.-Amon

Lainatna in midangte’ lungsim natna damsak hi.