Nisim Thalakna: KEI KUA?

September 28
 Kigin Ni

KEI KUA?

SIMDING:
Paikhiatna 3:7-15


Moses in Pasian kiangah, “Pharaoh kiangah pai-in Egypt panin Israel mite a paikhiat pih dingin kei kua ka hiam?” ci hi.__ Paikhiatna 3:11

KUMTAWN LAI SIANGTHO:
 Isaiah 5-6
 Efesa 1

Kum tampi lai-in Billy Graham pen England gama Cambridge University ah thugen dingin kisam hi. Tua bang mipil cingtengte’ mai-ah thugen ding a pilna in tawk kisalo hi. Degree kician zong ngah lo-in sang minthang ah zong kah ngei beek lo hi. A lawmte khat kiangah amah’n, “Pasian ading hi taleh, Ama’ nasem ding kiging manlo, kicinglo ka kisak tuanna om kei” ci hi. Pasian’ huh ding ngen ahih manin nasep semzom toto-a, Jesuh’ sihna le gupkhiatna thu a genkhia dingin Pasian in zang hi. 

    Moses zong cingtak kisalo pipi mahin Israel mite a honkhia dingin Pasian in sawl hi. Moses in “Pharaoh kiangah a pia dingin kei kua ka hiam?” (Pai. 3:11) ci hi. Ama’ dinmun a ki-et ciangin “kampau awk” (4:10) kisa-a Pasian in, “Nang tawh kong omkhawm ding hi” (3:12) ci-in na ciamkhin zo hi. Pasian’ hotkhiatna ding zong a theikhin hinapi’n Israel mipite kihta ahih manin Moses in Pasian kiangah, “Bang gen ding ka hi hiam?” ci-a, Pasian in “KEIMAH in nang hong sawl hi” (tg. 13-14) ci-in dawngkik hi. Tua “KEIMAH” in Pasian hihna ahi “Tawntungpa,” “A omdenpa” “Abukim Topa” cihte hong theisak hi. 


    Pasian hong sawl nasep sem ding i kimuanloh laitak nangawnin Pasian pen muantaak hi. Ei’ kicinlahnate pen Pasian’ bukimna sungah cihthamlo hi. Ei le ei “kua ka hiam?” ci-in i kidot laitak Pasian in “Keimah” ci-in hong dawng khinta hi.– Jennifer Benson Schuldt


Topa, kei tawh nong omkhop lam hong theisak in.
Kei le kei ka kimuanlah laitakin
Nong huh theihlam ka lungsim sungah hong telsiamsak in.
Kei nasep hong semzosak in.

Pasian nang tawh hong paikhawm cih na theih khit nungsang,
koi-ah pai ding cih lunghimawh kei in.

Nisim Thalakna: MEI LE GUAH

September 27
 Ni Nga

MEI LE GUAH

SIMDING:
Isaiah 16:1-5


Itna kip tawh kumpi tokhom khat kiphut dinga, thuman sep ding a manlang thutang zongin thu a khen mi pa pen... thuman tawh tu ding hi.___Isaiah 16:5



KUMTAWN LAI SIANGTHO:
Isaiah 3-4
Galati 6

Kangmei in Cororado Springs gei-a huangpi a lawhphei tak ciangin gamlak ganhing le inn tampi susia mang hi. Mite Pasian’ tungah kiko uha, tua mei a suphelh dingin guah a zuksak ding thungen uh hi. Tua hileh meiphelhte ading nuamtuam ding ci uh hi. Pawl khatte’ thungetna leuleu pen lunglut-huai mahmah hi. “Guah hong zusak inla, keek bel hong kiasak kei in. Keek kialeh gam kaang veve ding hi,” ci-in lau uh hi.
   

 Hih bang ka zak ciangin i nuntakna pen bitna le kisiatna kikal-ah a kikai-awk bangin om ka kisa hi. Mei tawh an i huan a, khualum zong i ngah hi. Ahi zongin hong kangtum thei hi. Tui tawh i pumpi kisil-in zong i dawn hi, leitung zong vottuam hi. ahi zongin tui in hong tumcip thei hi. A tamlua le a tawmlua in mite’ nuntak lauhuaisak hi.
   

 Kha thu lamah zong tua bangmah ahihna i phawk hi. Leitung khantoh nading ahihleh hehpihna le thumanna (Zech. 7:9) tonkhawmsak theilo mawk uh hi. Jesuh in Pharisee-te kiangah thukham zuih ding bekbek hanthawm uha, “a gikzaw van” (Mat. 23:23) suat ding phamawh sa lo, ci-in taigawp hi.
   

 Eite in hehpihna ahih keileh, thumanna cih tegel lakah khat bek i deih hi. Jesuh in tua tegel zangkhawm thei hi (Isa. 16:5; 42:1-4). Ama’ sihna in Pasian’ thumanna kicingsak a, mite’ kisap hehpihna hong lawhsak hi.–Julie Ackerman Link
   
Topa aw, kei’ hoihsak tawm bek le
Na thumanna ka theihnop hun kibanglo hi.
A hong piang thukhat tungtawnin lungmuang tak
ka khen theih nading hong huh in.


Pasian’ thumanna le hehpihna pen Singlamteh ah kimuton hi.

Nisim Thalakna: PILNA ZAWI

September 26
 Ni Li 

PILNA ZAWI

SIMDING:
Late 38:1-15

Topa aw, Nangmah kong muang hi. Topa ka Pasian aw a hong dawng ding Pa, Nangmah na hi hi. __Late 38:15

KUMTAWN LAI SIANGTHO:
Isaiah 1-2
Galati 5

Albert Einstein gen ngei khat: “A kiciangtan lo thu nih bek oma, vantung le mihingte’ haina hi. A masa zaw ka telcian kei hi” ci citciat hi. Eite zong i hai lamtak koici kitheih cih zong haksa mai hi. I gamtatna  hang maw, ahih keh i teelkhialhna hang maw, cih i tel kei hi.
    

Tua ahih manin Late 38 sungah laphuakpa in a lungsim sungkhia-in Topa tung kiko hi. Ama’ lungkiatna le haksatna a ngaihsut kik ciangin Tuucing Kumpipa in: “ka haina hangin ka liamnate nai-in uih hi” (tg. 5) ci hi. Ama’ khialhna le meimate a telzaw-in hong gen tuanloh hangin thu khat hong pulaak a -- ama’ haina pen a zungpi ahihlam gen hi.
    

Tua bang haina pen bang tawh sumai kik ding cih ciangin Pasian’ pilna lo a dang om tuanlo hi. Paunak 9:10 in, “Pasian’ zahtakna pen pilna kipatna hi-a, Siangtho Pa theihna in thumuhna ahi hi” ci hi. Pasian, i nuntakna hong puah dingin i kiphal naakleh, tua haina khempeuh i khuplet thei ding hi. Ama’ hong itna khut tawh, sianthona tawh kidim pilna lampi i zui ding hi.
___ Bill Crowder

 Hong it Topa, a kiciangtan lo keima’ haina hong maisak in.
Na pilna hong guan inla,
Nang ading le ka kiim ka paam aate phattuam nading
 keima’ nuntakna hong zang in.

Pasian’ pilna pen kiniamkhiat taka ngente tungah kipia hi.

Nisim Thalakna: MINTHANG LO

September 25
Nilai

MINTHANG LO

SIMDING:
Luka 3:2-6, 15-18

Zekhariah’ tapa Johan tungah Pasian’ thu hong tung hi.– Luka 3:2

KUMTAWN LAI SIANGTHO:
Solomon La 6-8
Galati 4

Mi minthang le mi gualzote pen mipi a dingin madawk le leitung lokte hi uh hi. Luka 3 sungah mi minthang 7 kimu thei-a tua hunlai-in amau munah thunei pente hi uh hi. Rom kumpi Tiberias Caesar pen mipite sihna ding le nuntakna ding ciang dong thuneipa hi. Pontius Pilate pen Rom uk sung Judea gamuk hi-a, tua ciang Herod, Philip, le Lysaniaste in zong amau’ mun tek ah thunei uh hi. Annas le Caiaphas in Biakinn sunga nasep khempeuh ukin Siampi dinmun la uh hi.

Tua bang kawmkal panin upmawh loh khat hong pianga, “Zacharias’ tapa gamlak a om Johan tungah Pasian’ kammal hong tung hi” (tg.2). Gamlak aa om khat in Pasian’ kammal za thei ding, ama sang a kilawmzaw tampi omlo ding hiam? “Mawh maisakna ding tui kiphumna thu” (tg. 3) a hilh dingin Johan, mi minthang khat ahi hiam? Mipite ahih leh tua thuman thutak a zong dingin Johan kiangah kisikna tak tawh hong pai uha, Messiah hi ngelngel ding (tg. 7,15) ci-in ummawh uh hi. Johan in, “Kei nunga hong pai ding Pa in... Note Kha Siangtho le mei tawh hong baptize ding hi” (tg. 16) ci hi.
  
Pasian’ mitmuhna ah mi minthang i cihte kuate cih Johan’ nuntakna in hong telsak hi. Johan bangin, i sepna le hihna khempeuh in Jesuh a kawk thei hisak ni.––David McCasland

Topa, ka minthanna uh
Nang ading bek hong zangsiam sak in.
Na gam zaisak nading nang’ deihna hong deihsak in.
Ka nuntakna a nungta teci-te hong suaksak ta in.

I kiniamkhiat naak leh, Amah’n na lianpi hong sem ding hi.

Nisim Talakna: LAWM

September 24
 Ni Nih 

LAWM
SIMDING:
1 Johan 3:11-18

Ka it tate aw, i kampi bek tawh ki-it lo-in lungsim takpi tawh ki-itin i gamtatna tawh kilangsak ni.
––1 Johan 3:18

KUMTAWN LAI SIANGTHO:
Solomon La 4-5
Galati 3

Asawt nailo hun khatin ka zi’ Janet tawh bawngkhawi ka lawmte kiang pan bawngsa pawlkhat ka lei uh hi. Ama kiangah pen sa sai dangte sangin kimanzaw a, kha tampi sung a kimang ding lei-in tuikhal tawh ka bilhcip hi.
   

 Tua ka leizawh a sawtlo-in keek hong kia a, ko veeng teng mei hong sia dihdih hi. Ni khat sung bang tuikhal kuang suangah koihkhin ka hih manun bangmah ci manlo ding ci-in ka ngaihsun lel uh hi. A ninih ni zong mei hong pai tuan nailo ahih manin ka patau pian uha, ka buai uh hi.
   

 Tua ahih ciangin Lai Siangtho thusinna khat aa ka lawm Ted samin bang ngaihsutna na nei hiam, cih ka dong hi. Tua ciangin amah’n zong midang khat kiangah a pai ding vai khat pai nawnlo-in kei kiangah hong pai-a, meiset khat tawh hong dawk lenlan mawk hi. Tua bang ka muh ciangin Ted tungah ka lungdamna a liat mah bangin Khris a itna ahihlam ka theih ciang Topa’ min ka phat hi.
    

Paunak thuciin ah, “I kitaangsap huna i lawm, i lawm hoih pen hi” cih ka phawkkha hi. Johan in, “I kampi bek tawh ki-it lo-in, lungsim takpi tawh ki-itin i gamtatna tawh kilangsak ni” (1 Johan 3:18) ci hi. Khat veivei hih kammal pen ei’n midang i huh ciang hitaleh, midangte’n ei hong huh ciang hitaleh, zuih ding thubaih hilo hi. Ahi zongin Khris in hong zui khinzo a, eite in tua tua thupha i bawl ding kisam hi.–Dennis Fisher

Topa, Na tapa Jesuh kote ading nong piak manin
Nang innkuan ah hong seh na hihna ka kiphawk uh hi.
Midangte’ huhna a sangsiam ding le
midangte lungdamna takpi tawh a thuksiamte hong hisak in.

Khris i it ciang bek, midang zong i it thei hi.

Maan Tuamtuam Sep 17-20

Innvak thunget te at ေဒါပံု (17 Sep)
Pawlpi's Thanlyin mission (17 sep)
CE SUNDAY REHEARSAL (19 sep)
Ours NEXT GEN (19 sep)
TCC Student , Sport-time. (20 Sep)
Drama "Salt" Rehearsal (20 Sep)
To Zeisu (Download here )

22 September 2013 CE SUNDAY PHOTO

Phatna La~Tg. Kam Sian TUang(Senior)

Nipi Sumpi apna leh donna~Lia Cing Sian Lun(Senior)

LST Lotngah~YUZANA CE

Hun uk~ Sya Thang Hau Tung

Limlahna Primary 1,2

Lai Singtho Simna~Tg. Mang Sian Sik(Inter)

He is Exalted ~Church Choir


Hanthotna : Syma Ann Julie

Lungdamkoh thungetna ~Sm Ngai Dim Niang

Nisim Thalakna: HAKSAT HUN-A LUNGMUANNA

September 23
 Nipi Khuavaak

HAKSAT HUN-A LUNGMUANNA

SIMDING:
Late 91

Sang penpa liahna sung, vanglianpa liim sungah a om mi khempeuh in...
––Late 91:1

KUMTAWN LAI SIANGTHO:
 Solomon La 1-3
Galati 2


Naupangte in pen a pate uh suang mahmah mawk uh hi. Na innkiim khawng a kihonate ngaisim lecin, naupangte in “Kei’ pa nang’ pa sang golzaw” ahih keh, “Nang’ pa sang keipa kician zaw” ci-in kidem uh hi. Tua banga kidemna ah a nasia pen  in “Nang’ pa sang kei’ pa hatzaw” cih ahi hi. Tua bang kiphatsakna in naupangte’ kihona bek hilo-in pate’ dinmun zong sukha ahih manin lamkhat pan lauhuai theizel hi. Pa tektek pen hong kilaisak nuam hipah phot hi.
    

Tua bang muanna le suanna bilbel pen lauhuaina a tuah uh ciangin tampi tak khamuang lungmuangin om thei uh hi. Tua ahih manin i it Pa Pasian pen Vanglian Pa ahih mahmah lungdam huai ka sa hi. Tua akhiatna in kua mah’n ama’ hatna tuk zolo ding hi. Nang le kei “Ama’ Vaangliatna nuai-ah khamuangin i om hi” (Late 91:1). Tua ahih manin Late laphuakpa in “Zan a lauhuaina le sun a thaltang leengte” (tg. 5) kihta lo ding, ci hi.
            

Tuni-a na tuahkhak ding le lauhuainate phamawh sa kei inla, i Pa Pasian pen a lian pen hi ci-in khamuang den in. Lungmuang in! A sia pen hun nangawn ah Ama’ vangliatna tawh a hoih pen a suah ding Topa’ thahatna in nang hong ompih zo hi.––Joe Stowell


Topa Pasian, ka haksatna kawmkal ah,
Nang a vanglian
Na hihna hong kilangsak in.
Kei hong nawngkai sak ding nate sangin
Nang na liatzawk lam hong thei ka hih manin
Na vangliatna ka phat hi.

I tuahkhak lauhuai lianpi sangin Topa lianzaw lai hi.

Nisim Thalakna: HOIH LE SIA

September 22
Nipi 

HOIH LE SIA

SIMDING:
1 Kumpite 14:7-16


Ka nasempa David... in a lungsim khempeuh tawh kei hong zui pa hi.
___1 Kumpite 14:8

KUMTAWN LAI SIANGTHO:
Thuhilhna 10-12
Galati 1


Tunai-in Thuciam Lui sunga Kumpite’ nuntakna ka enkaak hi. Ka gual-et suk ciangin kumpite pen tawmkha bek ‘hoih’ a, tampi tak sia, siazaw, le suuksia mahmah thei mawk uh hi.
    

Kumpi David pen “A lungsim khempeuh tawh Pasian a zuipa” (1 Kumpite 14:8) kici-a kumpi hoih-in kiciamteh hi (3:14; 11:38). Kumpi hoih lote leuleu ciangin Pasian nial-in, a gammite milim biakna a biakpihte ahi uh hi. Israel gam a kiphuat ciang amasa  Kumpi Jeroboam pen a suuksiapen-in kiciamteh hi –“mawhna bawlin, Israel mite mawhna bawlsak hi” (14:16). Ama’ gamtat siatna hangin ama’ nunga hong kah kumpite zong a hoih kei uhleh, amah tawh tehkaak-in “Kumpi hoihlo” ci uh hi (16:2, 19, 26, 31; 22:52).
    

Eite zong mun khat hun khat-ah tehkaakna-in hong kizang theizel a, ahoih lam le a sialam hi kawikawi thei hi. A kiciangtanlo upna in a taangden khuavak le gamh hoih gamh pha nusiatzo hi.
    

Tua tawh Pasian’ min i thangsak thei hi. Ei’ tungtawnin Pasian khuavak hong tang henla, midangte in Amah a naih nading thu hizaw tahen!—Cindy Hess Kasper

Topa, Nang tawh kibangin hong bawl in,
Na vaang lian tawh hong uk in,
Kei, a tangden khuavak bangin
Nang’ hihna mite theisak nuam ing. —Robertson

Khuazing pen hun ah zong a neupen khuavak taang hi.