SUANG MUAL

June 14
Kigin Ni
  
SUANG MUAL

Simding:
Late 34:15-22


Pasian’ mit in thuman mite encika, a kahna aw uh ngai hi. – Late 34:15

Kumtawn Lai Siangtho:
Ezra 9-10
Sawltak 1

2003 kum May ni khat ni-in mual tunga aa om “Mualtung Puteekpa” hong pilhkhia hi. Tua pen New Hampshire aa White Mountains a cihna munah ama thu aa piangtawm pi 40 bang agol puteek maitang lim ahi hi. Tua a en dingin khualzin mite zong hong pai ziahziah uh hi. Tua muna omte adingin a angtanpih mahmah suang mual ahi hi. Nathaniel Hawthorne in “Suang Maitang Lianpi” ci-in laibu gelh-in a tangthu zong na suut hi.

    Tua muna teeng khuamite in tua Puteekpa hong kiat peetpeet ciangin dah mahmah uh hi. Nupi khat bang in: “Ka gal mual mun khat panin hong ki-en hi, cih lungmuanna tawh a khangkhia ka hi hi. Kei hong ki-en, kivil nawnlo ding hitah cih ka ngaihsut ciang dah ing” ci-in pulaak hi.

    I belh ding mun le mite a bei hun hong om ding hi. I muan mahmah khat in hong nusiat ciang, i khalau hi. Sihna in maw, nasep taanna maw, damlohna hang maw? Tua bangte in i ngaihsutna hong linglawngsak a, kilung patau hi. Pasian nangawn in hong don nawnlo hiam, cih hun zong om thei hi.

    Ahi zongin “Thuman mite Topa in encik gige a, amau kahna aw a za hi” (Late 34:15). “Lungsim tamkham mite kiim nai-ah Topa om hi” (tg. 18). Amah pen i bukna suangpi hi tawntung hi (Thkna. 32:4).

    Pasian in hong ompih takpi hi. Hong encik gige hi. I bukna suangpi Amah hi. – Anne Cetas

Khang Suangpi ka bukna aw,
Nang na om tawntung hi;
Amah in kei hong en gige veh,
Ka lungkhamna thengsak zo veh. – Keith


Topa koi-ah om ci-a dot ding hilo-a, koi-ah omlo hiam cih ding ahi hi.

KHAMUANG

June 13
Laithai

KHAMUANG

Simding:
1 Peter 1:3-5

Ama hong hehpih mahmahna hangin … eite tungah nuntakna thak a hong pia hi. … Tua thuphate sia ngeilo, nin ngeilo, mual ngeilo-in a om tawn-tungna vantungah note-a’ dingin a hong koihsak hi.
— 1 Peter 1:3-4


KUMTAWN LAI SIANGTHO:
Ezra 6-8
John 21


Kentucky gamke Fort Knox aa om United States Bullion Depository sungah kham le van manpha bekbek ton 5,000 bang kikoih a, kumpi in cing hi. Fort Knox pen ton 22 bang apha van tuamtuam tawh ki-um zihziah a: galphawnna, video camera, electric sikkhau, thau tawi galkap, mine, helicopter-te cih bang tawh nasia takin kicing hi. Tua banga kicinna hangin Fort Knox pen leitung ah lungmuan a om pen mun hi, ci-in kiciamteh hi.

    Fort Knox pen lungmuan a om mah bangin, eite ading tua sang lungmuan zawkna mun khat oma, kham sangin zong manpha zawlai hi. Tua mun pen vantung hi-a, i tawntung nuntakna hong kikepsak hi. Sawltak Peter in a nungta lam-etna i nei hi – tua in Jesuh’ thu i theih semsem ciangin i lam-etna hong kip semsem-in, i tha hong khauhsak semsem hi (1 Peter 1:3) ci hi. A thokik Khris hangin i lam-etna kip hi.  Gal le sa hangin tua khamuanna liinglo ding hi. Topa in a tawntungin hong kepsak ahih manin a vang zong kiam tuanlo ding hi. Lauhuai patauhna hong tung zongin Pasian in i nuntakna kha hong kepsak hi. I thaman pen muanhuai mahmah hi. 

    A thuapthuap aa kicing mun muanhuai bangin, eite hong hotkhiatna Pasian in kemcing hi. – Marvin Williams

Ngaihsut beh ding
Hotkhiatna in lungdamna lianpi hong koici piak hiam?
Tua hotkhiatna lungdamna
Topa in kem cih nang koici bangin thei na hiam
?

Van aa i luah ding hamphatna in khamuan penna mun ah om hi.

PATAU KEI INLA SEMSUAK

June 12
Laizing

PATAU KEI INLA SEMSUAK

Simding:
Ezra 5:7-17

Van le lei abawl Pasian’ sawltakte i hihi. – Ezra 5:11

Kumtawn Lai Siangtho:
Ezra 3-5
John 20

Patau kei inla, na nu sam in.” “Patau kei inla, na an ne in.” Cih bang kammalte pen “Patau kei inla, Semsuak in” cih pan hong pai ahi hi. Hih kammal pen 1939 kuma Leitung Galpi Nih lai-a Great Britain-te kihanthotna kammal ahi hi. Makaite in mipite muh theih dingin laimal golpipi tawh mun khempeuh ah suang uha, gal sungah lau loh ding leh patauh loh dingin thapia hi.

    Galmatna pan Israelte hong ciahkik tak ciangin, Biakinnpi lamnopna leh galte’ nawngkaisakna hangin launa le buaina in ukcip hi (Ezra 3:3). Biakinn kiuli a kiphuh khit ciangin, a langpangte in “amau’ ngimna a susia dingin thusia bawlte kawm-in mawhsak uh hi” (4:5). Kumpi thuneite tungah lai-in gelh uha, a Biakinn lam uh ziakai sak tuam mahmah hi (tg. 6,24). Tua bang kawmkal ah, Kumpi Darius in tua Biakinnpi a kizawh dong lam ding thupia hi (6:12-14).

    Topa’ na i sepna ah hong kikhaktan ciangin, Israel mite bangin “Van le lei abawl Pasian’ sawltakte i hih manin” (5:11) ci-in nungkik lo-in mainawt ding hihang. Haksatnate in hong nawngkaisak ciangin, “Ka Pawlpi ka lam ding hi, hell vangliatna in zozo lo ding hi” (Matt. 16:18) cih Jesuh’ kammalte i muang ding hi. Ei’ sepzawhna hilo-in, Pasian’ vangliatna tawh tuate i semzo ding hi. – Jennifer Benson Schuldt

Ka nuntakna bulpi Nangmah na hi,
Ka neih le lam, hatna hong pia Nangmah.
Na thumanna le vangliatna tawh hong cing in,
Haksat hun-in thahatna tawh hong gualzawh pih in.  – Late


Pasian’ kha in i teci panna khempeuh vang hong guan hi.

A THUMAN NUNTAKNA

June 11
Nilai ni

A THUMAN NUNTAKNA

Simding:
Late 15

Nangmah in lungsim entelin thumanna-ah na lungkimna ka thei hi. Lungsim thuman-na leh citna tawh hih nate khempeuh kong pia khin hi. --  1 Khang Tangthu 29:17

Kumtawn Lai Siangtho:
Ezra 1-2
John 19:23-42

Hanmual mun khat ah tunung-in ka va tung kha hi. Tua tengah a kigelh khat pen: “J. Holgate: A Thuman Pa” kici hi.

    Holgate’ nuntakna theihpih lo hi’ng. Tua lai kigelh ka muh tak ciangin hih pa zah aa thuman ding kikhaat ahihlam zong ka phawk giugiau hi. Bangbang a bawl zongin a tawpna ah a mah a kitheihna pen: “A Thuman Pa” ahi hi.

    Greek mi thungaihsun Diogenes pen thuman zong pa hi-a, ahi zongin a thuman citakzo kuamah omlo hi, ci-in gen hi. A thuman mi muh ding haksa a, tua bang nuntakna iplah huai hi. Thumanna pen ahoih pen bek hilo-in, tua bek tawh a nungta ding hizaw hi hang. Pasian’ ompihna sungah hih bang nuntakna tawh anungta ding nu/pa hi hang. David in, “Topa, na mual siangtho ah kuate teeng ding hiam? Thuman tawh a nungtate bek teeng ding uh hi” (Late 15:1-2) ci hi.

    Kei le kei ka kidong hi: ka tat ka heekna khempeuh ah a muanhuai le pahtaak-huai ka himah diam? Ka kampaute a man takpi mah hiam? Thuman thutak itna kammal tawh ka gen hiam? Tu le tu aa a khel tawmtawm ka hi kha hiam? Mite in a lunglut zawk deuh nading ci-in ka uanggen lua kha hiam? Tua bang ka hih khak leh, Topa lamah kihei-in hong hehpihna ka nget ding kisam hi – a thuman lungsim hong pia inla ka nuntakna hong puah hong zuun in. Ka sunga na hoih sempa pen kei adingin ahoih pen hong sepsak den hi. Hong sem teeiteei ding hi. – David Roper

Thuman ding hong huh in ka Pa, Ka sepna le kampauna ah,
Na hehpihna le vangliatna, Hong pia’n nisim nuntakna ah. – Fitzhugh


Mite in thumanna le cihtakna a ngaihsut khak ciangin, nang hong phawk khak theih nadingin etteh baang in.

June 8, 2014 Service

click here to enlarge your view


Lai Siangtho Sinna(Thuhilhsia 12:1)~ Sya Zam Khen Khai,AP

Siampi thungetna~Rev. Dr. Nang Sawm Piang, Principal, TCC

Phatna La~ Tuangpi, Norway

Vante apna(computer & printer)~ Church Pastor

Canon M F 3010 All in One laser printer

Phatna La~ Rev. Sangpui & alawmte

Nipi SUmpi apna(Doxology)~ Nu Hming Lian Chhungi

Hun uk~ Assistant Pastor Zen Dot Mang

"Ka Kha tha bek tawh . . . " by
Rev. Dr. Suan Za Pau, Senior Pastor, WOH
Generl Secretary, General Secretary Council of AOG of Myanmar

Thupha piakna~Church Pastor Rev. Dr. S. Pau Khan EN

Lungdam koh thungetna~ Rev. Lal Sang Lian, Associate Pastor, WOH

MINPHATNA LUKHU

June 10 
Pithai

MINPHATNA LUKHU

Simding:
John 19:1-8


Galkapte in a kumpi lukhu dingin ling vialin Jesuh khusak uh a … —  John 19:2

Kumtawn Lai Siangtho:
 2 Khang Tangthu 34-36
 John 19:1-22

UK gama kham tawh a kibawl Kumpi lukhute pen Tower of London sungah sun le zan-in kicing dena, muanhuai takin kikoih hi. Kum simin tua lukhute en ding bekbek pen mi kiphu ziahziah uha, lamdang zong sa tek uh hi. Tua lukhute in UK gam ii vangliatna ciaptehna hi-a, tua a khu mi khempeuh vaang le liim a pia lukhu hipah hi.

Tua lukhute pen nam thum-in kikhen hi. Khat pen Kumpi tokhom a luah ciangin a kikhusak lukhu; a dang khat pen ukpi lukhu hi-in mun tuamtuam ah kizang a; khat pen Kumpipa’ zi khuk lukhu ahi hi. Tua lukhute in amau’ deihna ciat tawh kikhu hi.

Vantung Pasian pen pahtawina khempeuh ngah ding a kilawm hi-a, tuate tawh a kibanglo lukhu khu hi. Singlamteh tungah a kithah madiak-in bawlsiatna tampi thuak-a, ling lukhu kikhusak hi (John 19:2). Tua ni-in lukhu i cih pen vangliatna le minphatna cih lam-in kaai zaw lo-a, bawlsiatna le ciamnuihna vanzat bangin kizang hi. Hong honpa in tua lukhu khu nuam veve hi. Amah in eite mawhna le maizumna khempeuh hong puaksak khin zo hi.
   
Lukhu hoih pen khu ding a kilawmpa in mindaina lukhu na khu mawk hi. – Bill Crowder

Nuntakna hong pia Pa pahtawi un;
Amah in hankong zo zo;
Haksatna kawm pan thoto zo
Amah’n eite hong tan. – Bridges


Singlamteh om keileh zawhna lukhu khu lo ding hi.

A CINGH PASIAN

June 9
Pizing

A CINGH PASIAN

Simding:
Efesa 3:14-21

Pasian in i nget-zawh le ngaihsut zawh sangin a tampi hong piazo zawkan hi.
– Efesa 3:20

Kumtawn Lai Siangtho:
2 Khang Tangthu 32-33
John 18:19-40

Chicago khuapi ah ka teen lai-un, hamphatna tampi hangin nuam ka sa mahmah uh hi. Ka anneek theihzelna ansai pen ka phawk pen hi. Ka duh mahmah pasta kuang lang ka vaikhak ciangin gai zolo ka hih manin inn ah puak dingin ka tuunsak thei hi. Tua ansai pen nuam lua, lah thunuam uh ahih manin pute’ inn aa anne bangin ka kingaihsun uh hi.

Vantunga i Pa in a itna eite tungah hong bua ahih lam Efesa 1:7-8 sung ka sim ciangin ka thei hi. Eite’ theih bat zawhloh, ngaihsut zawhloh ciang dong hong pia lailai hi (3:20) cih hong lak hi. Pasian in a hehpihna them khat khawng bek hong hawmkhia pak cih hilo-a, a cingh mahmah Pasian ahi hi. A gammangsa mite tungah zong mawh maisakna lian a piapa hi (Luka 15), Amah in nisim-in “hong itna le hong hehpihna” tawh hong tuam den hi (Late 103:4).

Pasian in i nget bangbang-in zong hong pia lo, ci-in i phun theizel hi. Ahi zongin eite’ mawhna hong maisak kei-in, vantung gam hong taansak ding hileh, ei’n banglawh ding? Amah in eite tungah hong cingh mahmah khinta hi! Tua ahih manin, Pasian’ hehpihna lianpi sungah lungdam-in om ni – Joe Stowell

Topa, tampi nong piak ka mangngilh loh nadingin hong phawksak in. 
Tua bang piakkhiatna zong ka kiim ka paam aa omte tungah ka hawmkhia nuam hi. 
Amaute in nangmah hong thei-in, nang sungah nuam hong sa uh hen.

Thupha khempeuh hong pia Pasian!

HANATNA

June 8
Nipi

HANATNA

Simding:
Hebru 12:3-11


Pasian in a it atate thuhilh hi, ci-in na phawk un.
– Hebru 12:7

Kumtawn Lai Siangtho:
2 Khang Tangthu 30-31
John 18:1-18

C.S.Lewis in a laibu sung khatah,  “Ka neulai-in hanat ka nei zel hi” ci hi. Amah in, “Ka natna a nasiat mahmah hun nitak lupkuan ciang bekin ka nu kiang ka ko-a, ka dampak nading zatang hong muamsak hi. Tua lo hun dangah gen hileng, amah in ha siavuante kiangah hong paipih ding ka kihta mahmah hi. Tawmvei sung a noptuam ding ka deiha, ahi zongin ka ha-te pen ni khat khit ni khat sia semsem hi.”

    Vai lemlohna hong tun ciang Pasian kiang pai pahpah ding i kisuangtak hi. Amah in eite hong damsak pak ding i lunggulh thei-a, ahi zongin Pasian in a bulpi dong longkhia nuam hi. I kiginkholh loh khat peuh tawh Pasian in hong sawl ding i kihtak manin Ama tungah kolo-in i om niloh thei mawk hi.

    Tua bang hun ciangin, Topa in “A tate bangin hong bawl hi” (Heb. 12:7) cih i phawk ding kisam hi. Ama hong thuhilhna pen pilna ding hi-a, hong satna zong hong itna hang hizaw hi. I ngeingei-a om ding hong phal lo-a, a Tapa Jesuh tawh a kibang dingin hong deih hi (Rom 8:29). Pasian’ itna in i kihtak khempeuh pailet-in muantak zaw ahihlam thei in. – Poh Fang Chia

Lungdam ung Topa, ka lungsim hoihlohna nong lakkhia hi.
Na ta teekin nong bawl hi. 

Nong sawp siangna ka theitel a, 
Jesuh’ hoihna mite in amuh ding kei hong bawlpha in.

Pasian hong thuhilhna khut pen itna tawh kidim hi.