Nsim Thalakna: KILEMNA MINPHATNA

September 21
 Kigin Ni

KILEMNA MINPHATNA

SIMDING:
Efesa 2:11-18

Keimah tawh hong kipawlna thu hangin lungnopna na neih theih nadingun hihthu a hong gen ka hi hi.––Johan 16:33

KUMTAWN LAI SIANGTHO:
Thuhilhna 7-9
2 Korin 13

Alfred Nobel in dynamite a bawlna hangin hauhlawh-in, leitung gal kidona ah zong kido dan kikheelpah hi. Dynamite zatna hangin gal kidona hong lipkhap huaizaw-a, kum simin kilemna ding a vaihawm mi peuhmah pahtawina piak ding geel hi. Tua pen Nobel Kilemna Pahtawina (Nobel Peace Prize) kici hi.
   

Pasian in kilemna hong lah nadingin A Tapa hong sawl hi. Jesuh hong suah ciangin vantung mite in tuucingte kiangah, “Leitung ah kilemna om henla, mite tung nopna om hen” (Luka 2:14) ci-in taangko hi.
    

Lai Siangtho in kilemna pen, Pasian–mihingte tawh kilemna (Rom 5:1) ci hi. Mawhna in Pasian tawh hong kigamla sak hi (tg. 10). Jesuh hong paina le sihna hong thuakna hangin Pasian’ hehna kamh hi. Amah tawh i kilem theita hi. Pasian tawh hoih tak i kilem zawh ciangin, Jesuh in  mihingte’ kikal aa om kigal neihna khempeuh sumai hi.
    

A dang khat leuleu-ah Pasian ii kilemna (Fil. 4:7) cih zong om hi. Ama’ tungah i deihna teng thuum nading khuan ngah i hih manin, patauh ding bangmah omlo hi.
    

Jesuh in leitungah kilemna hong pia khin ahih manin, Pa’ taklam tokhom ah tu hi (Heb. 12:2). Tuni-in, Pasian tawh kilemna hitaleh, Pasian’ kilemna hitaleh a neite i hi hi.– C.P.Hia
 

Ngai un! vantung mi’n la sa,
A suak Topa minthanna;
Leitung nuamna hong khangsak,
Mawhna khempeuh phel ding ci.—Wesley


Kilemna maan in gal omlohna hilo a;
Pasian’ ompihna hizaw hi. —Loveless

Nisim Thalakna: HAKSATNA MUN

September 20
 Ni Nga

HAKSATNA MUN

SIMDING:
Sawltak 8:4-8

Note kong nusia ngei kei dinga, kong tamasak ngei kei ding hi.– Hebru 13:5

KUMTAWN LAI SIANGTHO:
Thuhilhna 4-6
2 Korin 12


Leitung pilna tawh nasep ding hong haksat semsem ciangin, Scientist khat pa in ansai khat ah nasem hi. Lai Siangtho thusin khit nitak khat amah in a nasep a baihloh zia le kiniamkhiat a kulzia hong gen hi. Amah in, “Kei’ kong gentheih ding thu khat pen khangnote in kei’ upna bangci bang hiam cih thei nuam mahmah ding hi” hong ci hi. Khatpa in, “Na kiniamkhiatna hong zahtak ing. Na upna zong tua tawh kizawitawn dingin lam-en ing” ci hi.
    

Ka lawmpa bangin, Philip zong Samaria ah nasem dingin Pasian in a sawl ciang a ngaihsut tam ding hi (Sawl. 8:4-8). Sehnel gam khat va tunga (tg. 26), tua munah Ethiopian mi khatpa in Lai Siangtho hilh cian ding a kisapna va tuakkha dihdih hi (tg. 27-35). Tua mun aa ding a kisawl ahikha tam!
    

Jesuh in hong nusia ngeilo ding hing ci’n hong kamciam ciang (Matt. 28:20; Heb. 13:5), i haksat laitak le nop i sak laitak hun zong hi thei hi. Haksatna sungah Topa ading i sepna khat peuhpeuh, Pasian in Ama’ geelna bangin bangci sep hiam cih i en ding hi.
    

Haksatna sungah Topa en inla, nang tungtawnin na hong sem hi, cih na mu ding hi.––Randy Kilgore
 

    Lunggimna -- Ama’ lungkimna,
        A hoih na khat beek iksik lo;
    Pampaihna sung nangawn-ah,
        Ama’ hong itna dim veve. —Young

Pasian ading a kihong lungsim pen
Ama’ kammal a khanna ding leihoihna a hihi.

Nisim Thalakna: KIKHEL HUN

September 19
 Ni Li

KIKHEL HUN
SIMDING:
Piancil 12:1-8

Tua lai mun-ah zong amah in Topa adingin Biakna tau khat bawla, Topa tungah thu a ngen hi.––Piancil 12:8

KUMTAWN LAI SIANGTHO:
Thuhilhna 1-3
2 Korin 11:16-33


Thu-um mi tampi takte in Lai Siangtho simna le thungetna tawh nisim-in hun zang nuam tek uh hi. Khat veivei ciangin, nasep tawh kibuai mahmah leuleu hi. Tua bang buaina in nisim-in i hunte hong guksak theizel hi.
    

Oswald Chambers in Topa hong ompihna minutes 5 sung nangawn-in na lianpi kisemzo hi, ci hi. “Hun tomno sung Pasian’ kammal ka sim ciangin thupia ka sa a; Hun tampi lakna tawh eite a kikheel hilo-in, vaang a nei hatna khat in eite hong tuam ciang hizaw hi. Pasian le a kammal tawh minutes 5 sung bekbek zatkhopna in zong ni khat sung tawntung ading kicing hi” ci hi. Chambers in tua bang a gen ciang uang genlua peuh na sa kha ding hi. Ahi zongin a vanglian mahmah thungetna cih zong tawmvei sungin zong a piang thei mahmah ahi hi. Pasian vanglian mahmah hiven!
    

Khat veivei ciangin i hunte pen manlahna kawmkal-ah Topa’ aw zak ding le Amah tawh kiho ding kitasam thei hi. Koikoi-ah om taleng, Abram bangin i kha ading Pasian’ tau a lamzote i hi ding hi (Pian. 12:8). Amah’n vangliatna tawh na hong sem ding hi. Pasian tawh hun lak ding na buai mahmah ciang, minutes 5 bekbek tawh kipan phot in. I Topa in eite tawh kimuh khop ding pen lawp mahmah a, Ama’ vang kilatsak nading zong ngaklah den hi.–Dennis Fisher
    

A vanglian Topa, keimah tawh hun lak ding
ut na hih manin ka lungdam lua hi!
Ka kammalte hong thusim Na hih manin lamdang ka sa hi.
Kei’ tung pan awging khia ding na zaknop pen ka lungdam hi. 
 
Pasian tawh kiho in–Amah’n Na lungsim hong za nuam hi.

Nisim Thalakna: PASIAN’ VAIHAWMNA


September 18
Nilai

PASIAN’ VAIHAWMNA
SIMDING:
1 Peter 1:1-9

Mihing in thu geel a, ahi zongin Topa’ deihna bangin kisemkhia hi.––Paunak 16:9

KUMTAWN LAI SIANGTHO:
Paunak 30-31
2 Korin 11:1-15

Ka lawm Linda pen zatui lam missionary dingin a neutuung peka ama’ ki-apna ahi hi. Pasian it mahmah khat hi-a, zatui zaha haksatna munte ah siavuan nasep semin ahih theih bangin Topa’ nasep ding lunggulh hi. Ahi zongin Pasian in tua bang na geel lo hi. Linda  pen zatui lam tawh kisai missionary ahih sam hangin, ama' ngaihsut bang hilo hi.
    

Kum 14 a phak ciangin, Linda pen  khan tawna damlo ding natna khat ngah kha-a, kum khat sung bekbek in zato ah tamveipi lum-in kikhei zel hi. Tua natna siahuai pan a  nuntakna suakta liamliam ahih hangin Nipi 2 sung bang khua phawklo-in, kha 6 sung bang mittaw-in omlai hi. A suahni pawi zong inn ah ciahvetlo-in zato ah nihvei sitset bawl zen hi. A nuntak ding zong kilam-en nawnloh hun zong tamvei mahmah hi. Ahi zongin Linda pen a lawp, lungdam, le mite a maitai den numei khat ahihna a nuntakna-ah kimu thei hi. Amah in kei kiangah, “Ka neutuung aa zatui lam missionary sem ding cih ka ngaihsutna pen hih zato sung na hi mawk ei. Kei pen Siavuan khat suak khalo citciat-in, mi cina khat peuhin na omkha ing!” ci hi. Bangzah taka cina agim phial zongin, Pasian’ vang in amah taan den hi.
    

Linda in Sawltak Peter’ kammal nuntakpih ka cinuam hi. Haksatna tuamtuam sung ah amah lungdam a, a upna hangin “phatna, pahtawina, le minphatna” cihte Jesuh Khris tungah pia tawntung hi (1 Peter 1:6-7).–Julie Ackerman Link
    

Topa, koikoi ka tung zongin ka lungdam.
Na na ka sem thei veve hi. Nangma’ lim kilangsak in,
kei, hih munah tung ding zong ka kisa kei hi.

Na geelnate laikung tawh gelh inla,
Pasian in a phiatna nei ahihlam zong tel in.

Nisim Thalakna: I KIIM I PAAM-AH PASIAN I MUHNA

September 17
 Ni Nih

I KIIM I PAAM-AH PASIAN I MUHNA
SIMDING:
Isaiah 6:1-6

Leitung khempeuh Ama’ minthanna tawh kidim hi!
––Isaiah 6:3

KUMTAWN LAI SIANGTHO:
Paunak 27-29
2 Korin 10

Ka teenna mun kiim le paam-ah Pasian’ bawlsa a vangliatnate, le  nisim-in vai hong kidawnziate nop ka sa mahmah hi. Tunung deuhin singlak-ah mawtaw tawh ka pai-a, tua mun-ah a san le naipaak tawh kidim singkungte ka mu-a, vandumpi tawh ka muhkhop ciangin nopci ka sa mahmah hi.
    

Khuahun hong kikheelin guah hong phin-in, phalbi daitui hong kaai hun ciang, vuukte in mual le guam hong tuamta uha etlawm zawtham lai hi. Tua khit ciangin khuakhal hong tung leuleu-a, a sisa singkung singtehte zong hong selkik-in paak hong palh-in mel tuamtuam tawh hong kidimkik leuleu hi.
   

I teenna leitung en kawikawi lehang, eite in “Leitung khempeuh Ama’ minthanna tawh kidim hi” (Isa. 6:3) cih kammal a maan taktak ahihna i phawk ding hi. A lamdang thu khat ah hih piansakna khempeuh pen mawhna thu hangin siamang hi (Rom. 8:18-22) kici ta lawmlawm hi. Ahi zongin Pasian in ama’ khut tawh a bawlsate a etlawm kik dingin geelna nei veve hi. Tua in Ama’ itna hi-a, i mawhna bangzah takin a tam zong, itna tawh hong selsak ahih manin tua itna hangin hoihna thupha tampi i ngah thei hi.––Joe Stowell
 

Topa, Nangma’ hehpihna le itna in hong tuama, tuate hong muthei sak in.
Nangma’ bawlsa nate hangin
Na hoihna hong musak thei na hih manin ka lungdam hi.
Na khut tawh Na nasep lamdangte hong muthei sak in.

Pasian’ khutma ahi Nate’ hoihna tungah
na lungdam ding mangngilh kha kei in.

Lai Siangtho Sinna (Matt.12:1-21) ~ Asst. Pastor Zam Khen Khai

Assit Pastor Zam Khen Khai (15 sep 2013)
 

Matthai

Alian 12

1 Tua zawh a sawtloin Sabbath ni khatin mangbuh lo nawkin Jesuh a pai hi. A nungzuite a gil uh kial ahih manin mangbuhvuite zutin a ne uh hi.
2 Farisi mite in a muh uh ciangin Jesuh kiangah, "En in, Sabbath ni-in i hih dingin a kilawmlo gamtatna na nungzuite gamta uh hi," a ci uh hi.
3 Jesuh in amaute kiangah, "David leh a kikholhpihte a gilkial laitakun David' gamtatna thu sim ngeilo na hi uh hiam?
4 Pasian' innsungah amah lut a, siampite lobuang, amah leh a kikholhpihte in a nektheih ding a hilo Ompihna Anlum la-in amah leh a kikholhpihte in a ne uh hi.
5 Tua ahih kei leh zong siampite in Sabbath sim mahin biakinn sungah Sabbath thukham khial napi-in mawhsakna a ngah tuanlohna thu uh, Moses Thukham sungah sim ngeilo na hi uh hiam?
6 Note kiangah kong genin-ah: Tua biakinn sangin a lianzaw khat hih lai-ah hong om hi.
7 Lai Siangtho sungah, 'Ganhing tawh biak ding ka deih kei a, migitna ka deihzaw hi,' a cihnopna thu teltakin thei le uh cin a mawhlopi kimlai na mawhsak kei ding uh hi.
8 Bang hang hiam cih leh Mihing Tapa pen Sabbath ni a ukpa ahi hi," ci-in a dawng hi.
9 Tua lai panin Jesuh paisuakin amau kikhopna innsungah a lut hi.
10 Tua lai-ah a khut langkhat a zaw mi khat a na om hi. Jesuh gamta khial hi, ci-in a mawhna a zong nuam mi pawlkhat tua lai-ah om uh ahih manin tua mite in Jesuh kiangah, "Sabbath ni-in cina damsak ding a kilawm mah ahi hiam?" ci-in a dong uh hi.
11 Jesuh in amaute kiangah, "Note khatpeuh in tuu khat nei un la, Sabbath ni-in dum sungah tua tuu kia leh, tua tuu va lenin kaikhiato ding hilo na hi uh hiam?
12 Mi pen tuu sangin nakpi takin manphazaw ahih manin Sabbath ni-in a hoih sep ding a kilawm ahi hi," ci-in a dawn' khit ciangin
13 A mipa kiangah, "Na khut zan in," a ci hi. A mipa in zong a khut zanpah a, midangte mah bangin hoihtakin a damkik hi.
14 Ahi zongin Farisi mite paikhia uh a, Jesuh a thahtheihna ding uh vai a hawm uh hi.
15 Jesuh in amah a kisawmna thu a theih ciangin tua mun panin a paikhia hi. Mi tampi in amah hong zui uh hi. Amah in cina mi khempeuh damsak a,
16 Pasian in kamsang Isaiah tung tawnin a gen thu a tun'theihna dingin, kuama kiangah ama thu a genlohna dingun thu a pia hi. Tua a genna-ah,
17
18 "Keimah in ka teelsa ka nasempa, ka it mahmah, ka lungkimnapa en un. Keima Kha ama tungah ka pia ding a, Gentail mite tungah upna man a pulak ding hi.
19 Amah in thu seelloin, a aw sangsaklo ding a, konglakah zong a awging kizalo ding hi.
20 Amah in a zawngkhal mite dopbawl ding a, a cimawh mite tungah migi ding hi. Thuman thutang a gualzawhsak mateng khawl ngeilo ding hi.
21 Gentail mite in amah bek mah lametin nei ding uh hi," ci hi.

Nisim Thalakna: PASIAN’ DEIHNA

September 16
 Nipi Khuavaak

PASIAN’ DEIHNA


SIMDING:
Late 37:23-40

Topa in mi a lam pai nading laka, ama lungkim bangin a gamtapa amah in a kipsak hi.
___Late 37:23

KUMTAWN LAI SIANGTHO:
Paunak 25-26
2 Korin 9

Haksatna i tuah hun ciang Pasian’ deihna eite in i zong zel hi. Eite in, kei tungah bang hong piang ding ahi zentam? Kei hiah omcip ding maw, ahihke’h mundang ah paikhia ding? i ci hi. I theihnop taktak leh, Topa’n tu laitak bang hong sawl cih i theih ding kisam-a, a nung ciangin bang sem ding cih Topa’ lamlahna i ngak ding ahi hi.
    

Na teel khit khat na zuih tak ciangin, bang sepzom ding cih na thei ding hi. Khat khit khat hong kizom toto ding hi. Tua pen Pasian’ tawh kalsuanna ii manphatna ahi hi.
    

Nang in, “Kal masa suan khin leng, bang hong piang lai ding?” ci-in na patau hi. Tua pen Pasian’ nasep ding ahi hi. Ei’ sep ding pen tuni hong sawlna zuih ding hi-a, mailam hunte Ama’ khut ah ap ding ahi hi. Late laphuakpa in i kalsuanna khempeuh “Pasian in geelkhol khin hi” (37:23) ci hi. Tuni lamlahna i kisappeen hipah hi. Zingciang ading ei-a ding kisamlo hi. George MacDonald in, “Pasian’ laibu sungah zingciang ading bang kigelh cih i thei kei-a; i mai-a khat bek i mu thei hi. Thu piang khat ii deihna tangtung lo pi-in, a mawkna-in maimang lo hi” ci hi.
    

Pasian’ deihna thei-in tuni upna tawh limtak zui zo lehang,  Amah’n tuni sung hong zawhpih lua ding hi. Jesuh in, “Zingciang thu ding ama thu-in omsak lel un” (Matt. 6:34) ci hi.–David Roper 

Pasian in ka zuih lampite thei
Ka lungkhamna, natna le dahnate;
Ama’ tate Amah’n nusialo,
Ama’ Tate Amah’n it hi.___Bosch


Pasian’ gamtatna lampi a theite le tua lam a zuite in thupha ngah mite ahi uh hi.

Nisim Thalakna: A TAANG NUNTAKNA

September 15
 Nipi

A TAANG NUNTAKNA

SIMDING:
Matthai 5:3-16

Midangte in na gamtatna hoihte uh a muh ciangin vantunga om na Pa uh min a phat theih nadingun mite mai-ah khuavak bangin na kilangsak un.–– Matthai 5:16

KUMTAWN LAI SIANGTHO:
Paunak 22-24
2 Korin 8

Leitungbup Basketball kipawlna in a taangko khiatna-ah, hih kimawl na pen leitung ah mi tam-et penpen nihna hi-a mimal awn 450 in en uh hi, ci hi. US gam-ah March kha-in kipan-a tua hunin makai minthang John Wooden’ tangthu kigen den hi. Kum 27 sung a makaih lai-in ama’ pawlte in 10 vei vilvel a khatna ngah uh hi. Amah ahihleh 2010 kumin hong nusia khina, amah pen ama’ gualzawhna hangin kiphawk hi nawnlo-a, amah mah a kiphawk hita hi.
    

Wooden pen Khristian upna ah zong thahat mi khat hi-a midangte zawh ding cih lungsim zong a pua den khat ahi hi. Ama’ tangthu  Kei Siapa Hong Kici cih laibu sungah “Mite ka theihsaknop thu in basketball cih pen a thupi pen hikei. Tua pen i nuntakna hun sungah thupitna themno ciik bek nei hi. A gualzo taktak nuntakna khat bek oma, Honpa’ khut sungah ama’ upna a koih ngamte hi uh hi. Tua bang a koihzawh mateng, tua mipa/nu pen tupna neilo aa nungta bek hi ding hi” ci hi.
    

John Wooden in a sepna tawh Pasian’ minthangsak-a, tua banga nuntak ding eite hong to hi. Jesuh in, “Na khuavak uh mite’ muhna ah tangsak un. Note’ na hoih bawlte a muh theih nading le vana Na Pa’ min thanna ding ahi hi” (Matt. 5:16) ci hi.–David McCasland

 Lam hong lak in, Topa, ka khuavak tangsak in
Midangte ading etteh huai hong suaksak in;
Nangma’ zia amaute musak nuam in. —Neuer

Tangkhia in – mun bu-a meivak na hi-a, mualtung meikhuampi na hi zongin.