Nisim Thalakna: CIDAMNA PIANGSAK

October 26

Kigin Ni



CIDAMNA PIANGSAK

Simding:

Paunak 4:14-27



 Na lungsim ngaihsutnate nuntakna naak hi-a, na neihsa a manpha pen bangin na kep ding ahi hi. ___Paunak 4:23

Kumtawn Lai Siangtho:


Jeremiah 9-11
1 Timoti 6


Ka zi Martie pen vanlei bel mahmah khat hi. A vanleite limci-in zong cidam huai hi. A tuamna bangzah takin a thak sitset ahi zongin bang teng kihel hiam cih en masa hamtang hi. Kammal haksa pawlkhat om leh bel, hih pen zatui tawh kibawl hi ding, ci-in lei ding ngaihsun nawnlo lel hi. Tua ciangin zatui kihello, cidamna tawh kituak neek theih khat peuh lei ding hanciamzaw hi.

         Tua bang ka ngaihsut ciangin Pasian in zong eite i nuntakna hong encik ding cih ka thei hi: I sunglam nuntakna thupi zaw hi. I pualam tawh kisai lo hi. Tua ahih manin Paunak laigelh pa in, “Na lungsim ngaihsut nate nuntakna naak hi-a, na neihsa a manpha pen bangin na kep ding ahi hi” (Paunak 4:23) ci hi. Puan hoih nono silh-in ei le ei i kizeem ding zong himah a, i lungsim sungah duhhopna, huatna, enna, angsung deihna.. cih-te zong i neih loh ding kisam hi.

         Tua ahih  manin: Mite in ka lungsim ngaihsutna mite in a pholhkhia ding hileh, cidam huai ngaihsutna, Khris’ min thansakna ding thute kei’ tungtangah a mu diam? cih kidong in. Hehpihna, itna, lungduaina, le mite huhnopna tawh Khris’ mel kilangsak in.–– Joe Stowell

         Topa, a pualam  nate sangin ka lungsim a zuun zo ding hong siam in. Ka sunglam nate ka kepcing zawh nading, le tua tungtawnin midangte’ tung thupha a luangsak dingin hong siam in.


Na puatham kizepna sangin na lungsim sunga kikoih thute thupi zawtham hi.

Nisim Thalakna: ITNA LE THEIHNA

October 25
Ninga

ITNA LE THEIHNA

SIMDING:
Rom 5:6-11

Eite mawhna nei ihih laitakin Khris pen eite ading hong si-a, Pasian in hong it mahmahna hong lak hi.__Rom 5:8


KUMTAWN LAI SIANGTHO:

Jeremiah 6-8
1 Timoti 5

Jonathan Safran Foer gelh tangthu sungah mikhat in New York aa Empire State innpi pen amuh ciang: “Hih innpi ka theihna thudang hang hilo-in a it aa it ngiat ka hihman hi” ci hi. 

    Tua kampau in itna le theihna kizopzia hong ngaihsun sak hi. Na khat peuhpeuh i it ciangin, a thu i kantel nuam hi. Mun khat i lunggulh ciangin tua mun ah omte zong i theinuam hi. Mikhat peuh i ngaih ciangin zong, ama’ nuntakzia i theitel nuam hi. Ama’ deih i theinuam a, amah’n bang hun ciang hun awng nei, koi pan khangkhia, kuate tawh kikhawl, thu koici ngaihsut cihte i thei nuam hi. Tualo tampi omlai ding hi. Pawl khatte in kuama’ theih loh pi-in mi’ it ding lunggulh thei uh hi. Ei hong kithei kei leh, hong ki-it loh ding cih a tamzaw in i thei hi. 


    Pasian tawh kisai-ah patauh ding bangmah omlo hi. Ama’ itna pen ei’ theihbat hilo-a: “Eite mawhna nei ihih laitakin Khris pen eite ading hong si-a, Pasian in hong it mahmahna hong lak hi” (Rom 5:8). Eite tungah hong kipulaak lai hi. Piansakna tawh, Lai Siangtho, le Khris tungtawnin Ama’ itna hong lak hi. Eite’ picinlohna hangin Pasian in hong ita, i mawhna zong ama tungah i pulaak thei hi. Pasian in hong theihloh ding patauh kullo hi. Amah i theih ding pen i it ding ahi hi. __Julie Ackerman Link 


 Om hithiat inla Pasian thei in
Na lampi haksa-in ling tawh kidim,
Ama’ hong piak hilo, hong ompihna
Nang ading kicing hi. __Anon

Pasian in hong it cih sangin lungdamna lianzaw omlo hi.

Nisim Thalakna: KIKHEELNA

October 24
Nili

KIKHEELNA

SIMDING:
2 Korin 5:12-21


Khris sungah a om mi peuhmah mithak hi uha, alui nate kikheel-in, a thak a suakzo hi.
__2 Korin 5:17


KUMTAWN LAI SIANGTHO:
Jeremiah 3-5
1 Timoti 4

Chris Simpson’ nuntakna pen huatna tawh kidim hi. A ta masa pen a sihsuah ciangin a lungsim puazo nawnlo-in hehbaih pahpah hi. Minam pawlkhatte huatpi-in hua-a, a pumpi tung teng zong hehna laimal bekbek gelhsak hi. 

    A tapa in ama’ gamtatna teng mukha leh awilo ding cih a theih ciangin a nuntakna a kipuah ding kiphawk hi. Tua a kipan Khristian thu le Biakinn pai ding lawp mahmah ta hi. Tua zawh kha khat ciangin piangthakin tui kiphum hi. Simpson pen mithak hita-a, huatna khempeuh nusiata hi. A citunga lai kigelh teng phiatsiang kik hi. 


    Sawltak Paul in zong tua bang kikheelna hong gen hi. Jesuh hua lua kisa-in a nungzuite bawlsia hi (Sawl. 22:4-5; 1 Kor. 15:9). Ahi zongin Khris tawh hong kimuh tak ciang (Sawl. 9:1-20) a nuntakna hong kikheela, singlamteh vangliatna in a nuntakna ah na hong semta hi. Khris tawh a kipawlna hangin Paul, mithak hong suak hi. Mawhna thuneihna, sihna, le angsung ngaihsutnate in paisan ta uha, kipatna thak, thuciam thak, muhna thak tawh nuntakna thakah kalsuan ta hi. 


    Jesuh zuih cih pen khua hun hanga singteh pulhna lim tawh kigenteh thei tuanlo-a; a thak Topa khat nuai-a nuntakna thak a gen nuam hizaw hi.–– Marvin Williams


    NGAIHSUT BEH DING:
Khris tawh pumkhat-in ka omkhopna hangin bang phattuamna ka nei hiam? Kei’ pian dan ding
nangawn tawh ka nungta zo tuan hiam?



Khris sungah i omna pen noptuamna hilo-in kikheelna a hihi.

Nisim Thalakna: NUNTAKNA MANSUAHNA LE MUHKIKNA

October 23
Nilai

NUNTAKNA MANSUAHNA LE MUHKIKNA

SIMDING:
Luka 9:18-27

Nuntakna a hu nuamte in a nuntakna bulpi nangawn tawh suplawh ding a, kei’ hangin a nuntakna a suplawhte in a nuntakna bulpi huzo ding hi.__Luka 9:24



KUMTAWN LAI SIANGTHO:
Jeremiah 1-2
1 Timoti 3

1997 kumin Mother Teresa asih tak ciang, Khris ading le a cimawh mite ading a nasepnate mipi in ngaihsun pha uh hi. Amah in kum 50 sung mizawngte, cinate, meigongte, le genthei aa om Calcutta khuamite ading nasem hi. 

    Ama tungah dotna teng a neih khit ciang laigelh Malcolm Muggeridge in: “Mihing hihna thu hoihtak ka kikum thei uha, mi tam theithei va honkhia zo leng, tua sungah hamphatna tampi kingah ding cih amah’n thei hi. Tam zangkhia tektek lecin tam zawsem na ngah ding hi. Mother Teresa in amah le amah suplawh-in nasemsem mahleh, amah sum tuanlo hi. Amah bang mi leitung ah ka muh ding kikhaat mahmah hi” ci-in gelh hi. 


    Mi tampite in Jesuh’ kammal ahi bangin mang lehang bang thuak ding cih lunglau uh hi: “Kei nong zuih nopleh, ama deihna bangin gamta nawnlo-in nisimin a singlamteh pua-in hong zui ding hi. Nuntakna a hu nuamte in a nuntakna bulpi nangawn tawh suplawh dinga, kei’ hangin a nuntakna a suplawhte in a nuntakna bulpi huzo ding hi” (Luka 9:23-24). 


    Honpa in eite nuntakna bucing hong pia ding hong pai ahihna hong gen hi (Johan 10:10).  Khris ading i suplawhna, nuntakna taktak i muhna bulpi hong suakzaw hamtang ding hi.___ David McCasland


    Na singlamteh pua in kei hong zui
ci-in honpa in hong sam ka za;
Tua awnem bangci kei’n dawng thei,
Amah’n kei ading vekpi hong pia. ___Ackley
Khris ading i nuntakna i suplawh ciang, Ama’ sungah nuntakna bit i ngah hi.

Nisim Thalakna: KI-PAWLNA

October 22
Ninih


KI-PAWLNA

SIMDING:
Rom 15:1-7

Mite tawh kilem theihna ding le kha thu-ah khatlekhat thahat theihna ding thute hanciam ciat ni.__Rom 14:19

KUMTAWN LAI SIANGTHO:

Isaiah 65-66
1 Timoti 2

Kum simin khangnote pawlkhat “Be Nice” (Hoih in!) cih kipawlkhopna ah kihel den uha, a lungsim uh navak-sak hi. 2012 kumin, sangnaupang 6000 in tua kammal BE NICE cih laimal pen tualpi dimin lai-a gelhna nei uh hi. A sang-ukpa in, “Sanginn ah sangnaupangte launa, lungzinna, le nopmawhna cihte tawh a om ding uh ka deih kei hi. Amaute khat le khat kipanpih ding ka hilh uha, kisimmawh loh ding ka khaam uh hi” ci hi. 

    Paul in Rom aa Pawlpite tungah itna picing a neih ding uh lunggulh hi. Upna neu le gol-te zong kilem lo uha, kigal  neih uh hi (Rom. 14:1-12). Khat le khat kisimmawh uha neektheih le neektheih loh ding  (tg. 2-3), bang ni tawlnga ding (tg. 5-6) cihte thukhun-in nei uh hi. Paul in: “Mite tawh kilem theihna ding le kha thu-ah khatlekhat thahat theihna ding thute hanciam ciat ni” (tg. 19) ci hi. Midangte’ lungnop theih nading hanciam ding hong hilha, ei’ nop nading ciang bek hong cilo hi. Paul in, “Khris zong ama’ nopsak theih nading gamta lo hi” (15:3) ci hi. 


    Ei tawh a kibanglo mite zong a it thei dingin tua bang kipawlnate tha va pia ni. Topa’ min thangsak ding hihang (tg. 7).–– Anne Cetas

Topa, midangte a it thei ding le a hehpih thei ding mi ka suak nuam hi. Midangte’ nuntakna a lamsang thei ding kammalte
hong zangsiam sak in. Nangma’ min zong thangsak nuam ing.

Hehpihna cih pen nunneemna hanga luangkhia itna hi.

Lai Siangtho Sinna (Matt. 13:24-30, 36-43)~ Honorary Pastor

Lai Siangtho Sinna (Matt. 13:24-30, 36-43)~ Honorary Pastor Rev. Khoi Lam Thang (20 OCT 13)
27 Tua ciangin lonei pa’ nasemte ama kiangah hong pai-in, ‘Na lolai-ah na vawh khaici pen taangci hoihte ahi hi. Hih tahumte koi pana hong piang ahi hiam?’ a cih ciangin 28 amah in, ‘Galte’ vawh ahi hi,’ ci-in a dawng hi. A nasemte in ama kiangah, ‘Tua ahihleh kote va kuanin ka va bot ding uh hiam?’ ci-in a dong uh hi.
36 Tua ciangin mihonte lak panin Jesuh paikhia-in inn sungah a lut hi. A nungzuite ama kiangah hong pai uh a, “Lolai-a om Tahum Thugentehna a khiatna hong gen in,” a cih uh ciangin 37 Jesuh in, “Taangci hoih a vawhpa pen Mihing Tapa ahi hi.
38 Lolai pen leitung hi a, taangci hoih i cih pen Pasian’ ukna sungah a om mite ahi uh hi. Tahumte pen Gilopa tawh a kipawl mite hi a, 39 tahum tang a vawh gal pa pen Dawimangpa ahi hi. Anlak hun pen leitung bei nading hun hi a, anla nasemte pen vantung mite ahi hi. 40 Tahumte kikaikhawmin meikhuk sungah a kikhultum mah bangin leitung bei hun ciangin tua bangmahin kihih ding hi.
41 Mihing Tapa in a vantung mite hong sawl ding a, ama ukna sungah a om migilote le mi a mawh nadingin a bawl mi khempeuh kaikhawmin 42 meikhukpi sungah tua bang mite lawn ding uh a, tua lai-ah amaute kapin a hagawi ding uh hi. 43 Tua hun ciangin Pasian’ mite ahihleh a Pa uh Ukna sungah ni bangin a taang ding uh hi. Zak nading bil a neite in hih thu na za ta un.
38 Lolai = leitung (John Wesley in Leitung = ka lo ci)
taangci hoih = Pasian’ ukna sungah a om mite
Tahumte = Gilopa tawh a kipawl mite
39 tahum tang a vawh gal pa = Dawimangpa
Anlak hun = leitung bei nading hun
anla nasemte = vantung mite
40 Tahumte kikaikhawmin meikhuk sungah a kikhultum mah bangin leitung bei hun ciangin tua bangmahin kihih ding hi.

TAANG LE TAHUN KHANGKHAWM
= Nasemte in bot khia nuam, Jesuh in khang-khawm hen ci.
A deihna:
  1. Thu umte hong khualna (Pasian tate in zong haksat thuakkha ding, phunphun kha kei ni)
  2. Migilote kikhel nading hun hong pia.
(2 Pet 3:15 note khempeuh in hotkhiatna na ngah theih nading uh hun hong piakna-in Topa hong zekai ahihna thu na phawk un)
41 Mihing Tapa in a vantung mite hong sawl ding a, ama ukna sungah a om migilote le mi a mawh nadingin a bawl mi khempeuh kaikhawmin 42 meikhukpi sungah tua bang mite lawn ding uh a, tua lai-ah amaute kapin a hagawi ding uh hi. 43 Tua hun ciangin Pasian’ mite ahihleh a Pa uh Ukna sungah ni bangin a taang ding uh hi. Zak nading bil a neite in hih thu na za ta un.

LUNGDAM
Rev. Khoi Lam Thang

Nisim Thalakna: NIPHA!

October 21
 Nipi Khuavaak 

NIPHA!

SIMDING:
Matt. 27:27-31; 28:1-6

Amah himun-ah omlo hi. Amah thokik zo!__Matthai 28:6

KUMTAWN LAI SIANGTHO:

Isaiah 62-64
1 Timoti 1

Tua zawh ni khat khit. Ka thapiak team-te in guallel uha a khatna ngah nawnlo uh hi. Khuadamsa-in zong a pualam pusuah ding ka ngap kei hi. Nasep ding zong ka kinzo nawn kei-a, kei-a dingin a lungzuan huai Nipi Khuavak hong suakta hi. 

    Tua laitak radio panin la khat hong kihong-a, tua in ka ngaihsutna hong lumlet hi. Casting Crowns lasate in “A Vaanglian Nipha” cih la hong sa uh hi. “Nikhat, Kalvary mual kahto sak uha, sing tung kilhcip uh khailum dingin ah.” Lawp huai nai kei. “Mawhna teng pua in, simmawh, bawlsiat, huat in” - suksia zawlai. Ahi zongin Khrist’ thawhkikna le sihna a zawhna la hong sa uh hi. 


    Ni hoihlo pen sung pan - Jerusalem mual tung teng khimkhua bang zing - mihingte ading lam-etna hong piangkhia hi. Jesuh: “Nungta in hong it, si in hong hon hi, kivui-in ka mawhna a puakhia hi” - Lungdam huai bel hi, hong paikik ta ding hi! 


    Tuni nang ading kipatna hoihlo peuh hikha thei hi. Buaina bu lomtang in na hun le nite hong nawngkaisak kha hiam? Jesuh en in. Kalvary ah nang ading hong sepsakte ngaihsun inla, ama’ thawhkikna hangin sihna zawhna le: “Amah hiah om nawnlo; Amah thozo”! (Matt. 28:6) cih lungdamna thu in nipha hong musak thei ding hi!––Dave Branon


 Nungta in hong it, si in hong hon hi,
Kivui in ka mawhna a puakhia hi;
Thokik in hong diksak, Khawngkhong tawntung hi,
Lungdamhuai bel hi, hong paikik ding hi! 

Khris ii taisansa hankhuk pen lam-etna tawh kidim hi.

Nisim Thalakna: LAMKHIAL LUNGTANG

October 20
 Nipi Ni 

LAMKHIAL LUNGTANG

SIMDING:
Paikhiatna 32:21-35


Hih mite in khialhna lianpi bawl uha, kham tawh amau' pasian ding bawl uh hi._Paikhiatna 32:31


KUMTAWN LAI SIANGTHO:

Isaiah 59-61
2 Thessalonika 3

Tuuk sung khat ka lampi khat pen nai tampi sung bawngsialte in lam kantan ahih manin kikhak hi. Tua bawngte pen huang sung pan taikhia-in lampi tungah a ut bangun a taikhia ahi hi. Tua thu ka ngaihsut leh, Paikhiatna 32 sunga Pasian’ mite lamkhialhna ka phawk kha hi.
   

 Taanglai Israel kumpi gam sungah Jeroboam Kumpipa in mipite’ biak dingin bawng lim nih bawl hi (1 Kumpite 12:25-32). Kham le ngun tawh milim bawl ding amah tawh a kipan hi nailo lai hi. Sal dinmun pan a suahtak khit phet nangawnin, Israelmite in Pasian’ kiang pan lamkhialh ding ngaihsun pah himhim uh hi (Pai. 32). Moses pen Sinai mual tungah thukham va la dingin a pai ciang, a sanggampa Aaron in bawnglim bawlin biakna pia dingin lamkhialhpih hi. Hebrew laigelhpa in “a khial thei lungtang-te” (Heb. 3:10) tungah Pasian’ hehna phawksak zel hi.
    

Pasian in i lungsimte pen a khial thei ahih lamtak thei hi. Ama’ kammalte in Pasian ahihna hong kilangsak a, ‘pasian dangte biakloh ding’ hong khaam hi (Pai. 20:2-6).
    

“Pasian pen a lian Pasian hi-a, pasian dangte sangin lian zawtham hi” (Late 95:3). Amah bek a maan Pasian hi!  __Cindy Hess Kasper
   

 Ka pheiphung hong zang inla,
Nang ading ngal hatsak in,
Ka aw zong Nang tang inla,
Ngaihtak Na min phatsak in.


Pasian sangin na lunggulh zawk na khat peuhpeuh a omleh, tua pen milim biakna ahi hi. ____A.B.Simpson