LAMPAI MANLANG PEEN

June 21
Kigin ni

LAMPAI MANLANG PEEN

Simding:
Luka 10:38-42


A sanggamnu Mary pen Jesuh’ khephung ah tu-in a thungai hi. – Luka 10:39

Kumtawn Lai Siangtho:
Esther 3-5
Sawltak 5:22-42

Leitung cidamna lamte’n mihingte’ cidamna a kan uh ciangin gam 32 pan khuapite lakah Singapore khuamite pen lampai manlang peen uhhi, ci hi. Pi 60 pen second 10:55 sawt uha, New York aa teengte in second 12:00 sawt uhhi. Malawi gam Blantyre khuamite pen second 31:60 sawt hi, ci-in mu uh hi.

    Koimun koimun ah na om zongin, a beisa kum 20 sangin mite pen lampai hatzaw tham uh hi, ci-in kimuthei hi. Leitung pen nidang sangin tampi buaizaw tham hi, ci-in a kithei thei ahi hi.

    Leitung in nang hong lunggim sak lua hiam? Jesuh’ kammal ngaihsun pak dih: “Na nasep tawh buai-in lunggim kisa lua teh. Na kisap khat oma, tua pen Mary in teelzo hi. Ama’ kiang panin sutkhiat huailo hi” (Luka 10:41-42) ci-in Martha kiangah gen hi.

    Tua kammal ciamteh inla, Jesuh in Martha a taai cih lamin la lo-in, a nasep masak ding a nunun kha ahih ding Jesuh in deihlo hi.  Leitung buaina tawh gimsa lua ahih manin Jesuh’ kammalte a zak khakloh pen paammaih sa hizaw hi.

    Topa ading i hanciamna ah, i ngaihsut ding thu khat pen – Topa tawh hun nuam i neih ding a thupi pen hi. – Poh Fang Chia

Amah kei tawh paikhawm, hong hopih,
Ama aa ka hihlam hong hilh
Buaina kawm ah lungdamna taktak,
Kei bek nangawn ka kipaak. – Miles


Ei’n Topa tawh i kikholh khop ding sangin, Topa’n ei tawh kikholhkhop ding lawp zawlai hi.

PHAWK NAWNLO

June 20
Laithai

PHAWK NAWNLO

Simding:
Late 103:1-8


Ka lungsim aw Topa phat inla, Ama’ hoihna mangngilh ngei kei in.
– Late 103:2

Kumtawn Lai Siangtho:
Esther 1-2
Sawltak 5:1-21

Tunai deuh-in, ka neutuung aa ka  lawm khatin sangkah lai-a maan khat email tawh hong khak hi. Hong hilh Sya nih tawh ko a sangnaupang teng ka tut liailuai na uh ahi hi. Ko pen tai kidemna ah a kihel pawl hi-in tai khat pan tai khat le alang dong ka tai hun uh ka phawkkik tiaituai hi. Ka muhkhak ciang ka lung anop mah bangin, amaute mangngilh-in komau’ nasep tek tawh a buaitek ka hih lam ka kitheih ciang a mangngilh thei pahpah ka hihlam ka kiphawk hi.

    Nuntakna lampi i tot laitak, i pai ngeina mun zong kimangngilh thei-a, i kikholhpih lawmte zong i mangngilh thei hi. Hun hong bei, zanni cih pen tawmvei sungin beipak a, tulai thu bek tawh i tha vaithai ciat hi. Tua bang hunlai mah-in, Pasian eite tungah hong hoih lam zong i phawkkha kei hi. Tua hih manin David in zong, “Ka kha aw, Topa phat in. Ka sunga om khempeuh aw, Ama’ min thupha pia in! Ka kha aw, Topa pahtawi inla, hong hehpihna mangngilh ngei kei in” (Late 103:1-2).

    Tua bang phawk theihna pen koimun koimun ah i om phial zongin kisam hi. Eite hong kimangngilh hi ci-in i ngaihsut laitak, Topa’ hong sepsak sate phawkkik ding thu hoih ahi hi. Tua phawkkikna hangin Topa hong ompihna in tuni bek hilo, hong pai lai ding hunte ah tha hong guan ding hi. – Bill Crowder

Nuntakna tuipi tungah huih nun ciangin,
Si ding cih ngaihsun-in na lungkiat ciangin;
Thupha khat nungah khat na ngaihsun inla,
Topa in tampi hong pia na thei ding hi. – Oatman 


Topa’ thumanna i phawkna in i mailam aa ding thathak hong guan hi.

SHREK TAWH KIMU

June 19 
Laizing

SHREK TAWH KIMU

Simding:
Ezekiel 34:11-16


Ka tuute keimah in ka zong ding hi. – Ezekiel 34:11

KUMTAWN LAI SIANGTHO:
Nehemiah 12-13
Sawltak 4:23-37

Shrek pen a lampial tuu ahi hi. Amah pen a lawmte kiang pan a paikhiat zawh kum 6 bang phata hi. New Zealand gam mual tung suanghawm sungah amah a kimuh kik ciangin amute in amah pen tuu salo uh hi. “Leitung taangthu sunga kigen ganhing khat tawh kibang” cihzah-in kigen hi. Shrek pen tuu cingpa tawh a kigamla khin a mangthang tuu khat ahi hi.

    Shrek pen tua mual tung panin a kum kik ding hamsa mahmah hi. A pumpi pen pound 60 bang gik a, ama thu-in tuaksuk thei nawnlo hi. Amul bekbek zong giksa ahih manin tua a gammang tuu pen amul a kimeet keileh a suahtak pak nading thubaih hilo hi.

    Shrek’ tangthu in hong phawksak khat pen Jesuh in Tuucing Hoih ka hihi (John 10:11), kici hi.  Pasian in amite pen ka tuuhonte (Ezek. 34:31) cingiat hi. Shrek bangin ei le ei-in ahoih pen teel theilo  hihang. Tua hangin i mawhna vangik hong lianlua hi (Ezek. 33:10). Tua vangikte a zaan theih nadingin, hong cingpa Tuucing hoih kiangah om-in, amah bek i muan theih ding kisam hi. Amah in eite hong bawlsia lo-in hong bawlpha ding hi. – Julie Ackerman Link

Kei hong cingpa itna tawh kidim,
A hoihna kikhel ngei kei;
Ama aa ka hih sapna nei keng,
Amah bek a tawntungin ka nei. – Baker


Pasian hong thuhilhna in upna lamah picin ding dong ngimna nei hi.

June 15, 2014 Service

...



01. Siampi thungetna~Rev. Dr. S. Pau Khan En, Church Pastor
02. Drama~ KG 1&2, CED

03.Lapawl~WD

04. MD thugenna~Pa Cin Lam Tun, Chairperson, MD

05. Letsong piakna~MD secretary leh makaite

06. Phatna La~ Pa Khual leh Lia Lian

07. "PATE' LUNGTANG"~Rev. Khoi Lam Thang, Honorary Pastor



June 15, 2014 Bulletin
24 June 2014 Bulletin



Photo of the Week

NUI IN!

June 18 
Nilai ni

NUI IN!

Simding:
Gamlak vakna 6:22-27


Topa  in note tungah a maitang hong taangsakin note hong ompih ta hen. – Gamlak vakna 6:25

Kumtawn Lai Siangtho:
Nehemiah 10-11
Sawltak 4:1-22


Ka laisimna sungah nuihna cih pen cidamna ding ahoih mahmah khat hi, ci-in gen hi. Tua sungah nuihna in i lungtang damtakin kisai saka, patauh dipkuatna kiamsak hi, ci hi.
    Nuihna cih pen nang bek ading phattuamna hilo-in, kineih khemna omlo nuihna in a mu khate ading zongin thupha sanna khat ahi hi. Kampau khiat kullo-in, na kiim na paam ate a pakta, amau tawh nuam asa na hihlam kitelsak hiteh. Maitaina in i sukkhak loh mi khat zong a kawi thei, khut tawh kibang hi.
    Nuntakna in nuihna ding thu tampi hong pialo hi. Ahi zongin naungeekte’ nuihna le khanghamte’ maitaina tungtawnin lungsim tha la thei hihang.
    Nuihna cih pen Pasian’ mel kilatsakna hi gige hi. Gamlakvakna Laibu sungah Pasian pen nui hi, ci-in kimu thei hi: “Topa in note tungah a maitang hong tangsak henla, note hong hehpih ta hen. Topa in note tungah a maipha hong pia henla, note tungah nopsakna hong pia ta hen” (Gam. 6:25-26). Hih kammalte pen mite’ nuntakna ah Pasian’ maitaina a tun theih nading lampi khat-in kizang hi.
    Tua hi-a, Topa in nangmah hong it khit nungsang, Amah in Ama’ maitang hong taan ding pen thasial lo-in angtang mahmah lai hi. – Joe Stowell

Topa, ka nuntakna nang ading a deihhuai hong suaksak ta in. 
Nangma maitang kei hong taan den ta in.
Ka nuntakna ah maipha nong piak bangmah-in,
nuihna tawh ka lawmte khat beek thapia zo dingin hong hehpih ta in.


Na maitaina in kha thu lamah a gilkialte adingin Pasian’ lungdamna thu a pulaak na hihi.

TUUNO KHUAVAK

June 17
Pithai

TUUNO KHUAVAK

Simding:
Mangmuhna 21:14-27


Pasian’ minthan’na vang pen khuavak hi a, Tuuno zong meivak hi khin ahih manin tua khuapi in nitaang leh khataang cihte kisamlo hi. -- Mangmuhna 21:23

Kumtawn Lai Siangtho:
Nehemiah 7-9
Sawltak 3

Leitung piancial aa kipan eite in Ni le Kha pen sun le zan ah khuavak hong pia hi, ci-in i theitek hi. Amaute in i gamtat theihna ding khuavak hong pia-in, anteh theipuam ading a kisam dat zong pia hi. I pumpi ading cidamna hong guan khuavak hong paina Ni le Kha pen Pasian’ bawlsa ahi hi. Piancil Lai Siangtho sungah Pasian in, “khuavak lianzaw pen sun a uk ding, khuavak neuzaw pen zan a uk dingin bawl hi” (Pian. 1:16) ci hi.

Ni khat ni ciangin Topa in tua sangin a lamdang zaw khat bawl lai ding hi. Tawntung mun vantung gam ah, “khuavak apia ding ni le kha kisam nawnlo dinga, Pasian’ vangliatna intaan ding hi. Tuuno in tua khuavak pia ding hi” (Mang. 21:23) ci-in John in gelh hi. A minthang Khris pen leithak le vanthak adingin khuavak apia meivak hong suak ta ding hi.

    Topa Jesuh pen “Leitung mite’ mawhna a puakhia Pasian’ Tuuno” ahi hi (John 1:29). Amah pen kha lam khuavak hong puak ding pa zong hi-a, ama nung a zui peuhmah “leitung khuavak” (Matt. 5:14) ahi uh hi. Tawntung mun ah a mah pen khuavak hong pia den meivak hong suak leuleu hi (Mang. 21:23). Tuuno’ vaang tang nuai-ah i om ding hun pen bangzah takin lawp huai! – Dennis Fisher

Jesuh a beel mite khuamial sung omlo –
Jesuh leitung khuavak ahi;
Hong makaihpa’ khuavak nung i zuih tak ciang –
Jesuh leitung khuavak ahi. – Bliss


Leitung khuavak sungah meimit cih bang om ngeilo hi.

NAUPANGTE

June 16
Pizing

NAUPANGTE

Simding:
James 1:22-2:1


Pa Pasian in a siangtho biakna citakin a ngaihsut thu in: Tagahte leh meigong numeite a haksatna uhah hoihtakin kemin, leitung siatnate tawh kisawhkha loin siangtho takin omna ahi hi.— James 1:27

Kumtawn Lai Siangtho:
Nehemiah 4-6
Sawltak 2:22-47

Sangnaupang pawl khat tagah sang khat ah va pai uha, tua mun ah sangnaupang khat pen a lungnuam hetlo hi. Bang hang hiam, ci-in a kidot ciangin tuma kum 10 lai-a ama’ nuntakna genkik hi.

    Tua naupang pa pen gamdang tagah sang khat ah om ngei hi. Amau kiangah mite hong paizel uha, ciahkik pahpah uh hi. Khat veivei ciangin khat le nih hong paikik uha, naupang khat le nih ciahpih-in ta dingin nei uh hi. Ahih hangin hun sawtpi simsim amah kiciahpih lo ahih manin khasia-a, “Kei a bangci tuan deuh?” ci-in lungngai hi.

    Tua sangnaupangte’ khualzinna in tua ngaihsutna phonglo kik hi. Tua lai-in, alawmte kiangah a genleh, a lawmte in thungetpih uha ni khat ni ciangin tu-a anu in va pi-in ta bangin nei hi. Tua ciangin tua naupang pen in itna a ngah lam le lam-etna a neihlam kitheitel kik hi.

    Pasian’ itna a ciamkha nailo naupangno tampi leitung ah om uh hi (Matt. 18:4-5; Mark 10:13-16; James 1:27). Tua naupang khempeuh i va donzo kei ding hi. Ei hih theih bang ahi: huh ding, panpih ding, thapiak, thungetsak ding cih tawh mapang ni. Naupangte i it leh, eite ta banga hong nei Topa’ min a thangsak i hihi (Gal. 4:4-7). – Dave Branon

Topa, mi khempeuh nangma’ meel suunin na bawl hi.
Amaute itna ka lak zawh nading hong huh in.
Kote’ itna le huhna khutte a zaptel nading hong siam in.

Khris’ itna i sungah hong khan semsem ciangin, Ama’ itna ei’ sung pan hong luangkhia ding hi.

NUNTAKNA TAWH THUHILH

June 15
Pate’ Ni

NUNTAKNA TAWH THUHILH

Simding:
Efesa 6:1-11


Pate aw, na tate uh a hehtheihna dingin bawl kei un la, Khristiante ngeina tawh kituakin taii-in hilhin pantah un. — Efesa 6:4

Kumtawn Lai Siangtho:
Nehemiah 1-3
Sawltak 2:1-21

Ka mit ensak dingin ka ngak laitak kawm tunga kisuang lai ka sim a: “Kum 12 apha naupang 100 ah 80  in a muhna tawh pilna ngah hi” ci hi. Naupangte’n mit tawh a et uh lai, TV, film, thupiang, kiim le paam, innkuan sung gamtatna tungtawnin pilna a ngahlam ka phawk hi. Pate’ Ni-in zong, pa khat ii vangliatna i ngaihsun phakik ding hi.

    Paul in tate hehsak lo-in Topa’ thu hilh-in, khangcing sak ding (Efesa 6:4) ci-in pate thu na hilh hi. Pate’ gamtatna tungtawnin tate’ zahtakna akhang tektek ahi hi. Amah pen a picing hituanlo napi, picinna lamah a manawh hita hi. Pasian’ zia bangin i nuntakna ah i gamtat ciang, tua nuntakna in vanglian-in na lianpi sem hi.

    Nulepate khempeuh aw, Paul in “Topa le a vangliatna sungah thahat-in om un” (tg. 10) hong cih pen tua thu hang ahi hi. Ama’ vangliatna bek tawh Topa’ itna le lungduainate a pulaak khia thei ding hihang.

    I tate pen i thuhilh zawhna sangin i gamtatna tawh tangzai takin pilna i pia thei hi. – David McCasland

Vantung aa om Topa, Na itna ka thei nuam hi. 

Midangte ka it theih nading leh na lungduaina le itna midangte tung ka hawmkhia nuam hi. Kei hong guan inla, kei hong zang in.

Pate i pahtawi hi: Amaute in nuntakna bek hilo-in, koici nuntak ding cih hong lak uh hi.