Nisim Thalakna: A KIKHEL NGEILO ITNA

September 14
Kigin ni

A KIKHEL NGEILO ITNA

SIMDING:
Luka 22:54-62

A bei theilo Topa’ hong itna le ahehpihna a kizom paisuak hi.... Na thumanna lian hi.
––Kah La 3:22-23

KUMTAWN LAI SIANGTHO:
Paunak 19-21
2 Korin 7

Chicago aa O’Hare vanleng tual ah lam ka pai laitak, ka muh khat – inn golpi sung pan mi khat, lukhu khu kawmsa-in hong taiphei hi. Ka lunglut mahmah pen a lukhu tungah: “Na khempeuh nial in” cih laimal kigelh hi. Bang a khiatna hi ding hiam, ci-in ka ngaihsun hi. Mawhlo ding ka hanciam na teng? Leitung nopsakna le lunggulhnate? Tua laimal tungtawnin ka lung sungah a suak bangbangin ka ngaihsun hi.
    

Jesuh’ nungzuite lakah Simon Peter in na nial hi. Jesuh a theipa hinapi dotna thupi a kidot ciang “Ka thei kei hi” ci-in thumvei vilvel nial hi (Luka 22:57, 58, 60). Tua bang nialna pen launa tawh kizom ahih manin a lunggim a, a kha zong nungtolh khinta hi. Tua ahih manin a pualam-ah taikhia-in nakpi takin kap hi (tg.62).
    

Ahi zong Peter in Khris a nialna, kha thu-ah Khris i nialna cihte in Pasian’ itna maimangsak zolo ding hi. Kamsang Jeremiah in, “Topa’ hehpihna hangin eite i maimang kei-a, Ama’ hong itna bei ngeilo hi. Zingsang simin thaksuak den-a; Ama’ thumanna lian mahmah hi” (Kah. 3:22-23). I lungsim sungah i mawh pen hun nangawn-in, Pasian’ thumanna hong tunga, a hehpihna ei ading bei ngeilo hi!– Bill Crowder 

Pa aw lungdam ing, a bei theilo nong itna hang hi.
Nang le midangte ka nial hun ciang mawhmai hong pia in.
Nong hehpihna luangden ahih manin Nang kiangah
kong zuan hi.

I picinlohna in Pasian’ hehpihna ah i kingakna ding thu bulpi ahi hi.

Nisim Thalakna: I ZUIH DING I PA

September 13
 Ni Nga

I ZUIH DING I PA

SIMDING:
2 Khang Tangthu  17:1-10

Ama’ pa, Pasian zongin Ama’ thupiakna a zui hi.––2 Khg Tangthu 17:4


KUMTAWN LAI SIANGTHO:
Paunak 16-18
2 Korin 6

Ka pa’ thu ka ngaihsut ciangin, hih kammal ka phawk hi: “Amah’n koici nuntak ding hong gen kei; amah gamta-in, kei zong tua bang ka nuntak ding hong sawl hi.” Ka khangno lai-in, Pasian’ thu ah a nuntakzia ka en hi. Nipi simin kikhawm den-a, Lai Siangtho thu hilh-in, sumpite zong sim kawm, Pawlpi upa zong hilai hi. Hun a neih sungin Pasian’ thu hilh ding le Lai Siangtho sim ding hahkat hi. Ama’ nuntakzia tawh Pasian a it lamtak lak hi.
    

Judah kumpi Asa in Pasian’ biakna kin mahmah mi khat hi (2 Khang. 14:2). Ama’ gam sunga milim biakna khempeuh hemkhia-a, Pasian biakna ding tausang lam hi. Pasian le mipite kiciamna pia sak hi (15:8-12). A tapa Jehoshaphat in tua bang nuntakna luahto-a “Apa’ khekhap le Pasian’ thukhamte zui hi” (17:4). Jehoshaphat in milim biakna munte suphiat-in (tg. 6), Judah gam sung tengah siampite le thukham hilhsiate Topa’ thuhilh dingin sawl hi (tg.7-9).
    

Jehoshaphat in apa’ khekhap zui-a; Pasian zahtak hi. Athupi khat-ah Jehoshaphat pen “a lungsim sungah Topa’ lampi zui-in lungdam hi” (tg.6) kici se hi. Tuni-in, na zuih ding pa a zong na hiam, vantung aa Pa phawk inla, Ama’ lampi ah nuamsa in. ––Jennifer Benson Schuldt 

I Pa Pasian i pahtawi,
Phatna late tawh i liansak;
Eite Ama’ hangin i lungdam,
A Tate hi-in, A thu ah nuam i sa.—Ball

Pasian pen Pa ci-in A tate bangin i nuntak ciang Pasian’ min a thangsak i hi hi.

Nisim Thalakna: VANGLIATNA

September 12
Ni Li

VANGLIATNA

SIMDING:
2 Khangtangthu
16:6-13

Ama’ thu ah a lungsim a paubaanglo mite tungah Ama’ vangliatna a lak dingin, Topa’ mit in leitung khempeuh en kawikawi hi...––2 Khang Tangthu 16:9

KUMTAWN LAI SIANGTHO:
Paunak 13-15
2 Korin 5

Boxing kitumte le mi thahat-te in amau’ hatna midangte tungah a lakkhiate ahi uh hi. A kimawl laitakun, amau’ thatang mahmah lakkhia thei uh hi. Khut kibuan zong tua bangmah ahi hi. Nang pen a hat pen na hihna a kigenkhia na hi hi.
    

Pasian’ vangliatna i cih zong ama’ thahatna a gen nuam i hihi. Ama’ hatna bangci bangin hong lak hiam? Amah’n eite’ mit ah ni le khate ut-ut na mun-ah koih cih bang hong sem tuan samlo-a, mihing mit tawh a kimute aa nasem zong hi tuanlo hi. Ei banga huh ding a kisam mite tungah Ama’ itna le hehpihna hong kidimsak-in, “Lungsim paubaanglo mite tungah Ama’ vangliatna a lak dingin” (2 Khtt. 16:9) eite hong teel hi.
   

 Tua pen Lai Siangtho sunga i muh thu ahi hi. San Tuipi a khen khapna pan kipan, gamlak-ah manna moh a piakna, nungak siangtho sung pan hong suahna, thawhkikna vang hong lahkhiatna cihte hangin vanglian Topa Pasian in Ama’ thahatna eite thupha hong pia ding, hong kem ding, hong cinna dingin zang hi.
   

I nuntakna ah Ama’ vangliatna hong lah ciangin Topa lungdam cih phawk tawntung in. Ama’ vangliatna eite tungah hong kipulaak ciang, eite in zong i pawlpih ding hi.–Joe Stowell Topa, 

Ka kitangsap laitak
Nangmah in na vang nong kilangsak hi.
Ka thazawm laitak, na vangliatna khut in kei hong cingin,
hong hu ding cih hong telsak in!


Pasian’ kamciamna khempeuh pen Ama' pilna, itna, le vangliatna in nungzuih den hi.

Nisim Thalakna: ITNA THU

September 11
Nilai

ITNA THU

SIMDING:
1 Johan 4:7-19

Pasian in eite hong itna thu eite mahmah in thei-in i um hi. Pasian pen ki-itna hi.––1 Johan 4:16

KUMTAWN LAI SIANGTHO:
Paunak 10-12
2 Korin 4

Kizop kipawlna tawh kisai-in Biakinn mai-a lai kisuang khat: Itna la in. Itna pia in. Tua bangin bawl kikkik in.
    

I ngah itna lakah Pasian’ itna pen a lianpen ahi hi. Amah in eite hong it lua ahih manin A Tapa Jesuh ei-a ding nungta-in, si-a, sihna pan thokikin hong honkhia hi (1 Johan 4:9). Jesuh i gumpa le Topa-in i saan tak ciangin Ama’ itna a sangkha i hihi. “Amah um-in, a sang mite tungah Pasian’ Ta hihna khuan pia hi” (Johan 1:12).
    

Pasian’ itna i theihtel khit zawh ciang, eite in zong itna piak ding i kisin thei hi. “Pasian in ki-itna ahih manin eite zong khat le khat i ki-it ding hi” (1 Johan 4:7).
   

Pasian’ itna in Khris sunga sanggamte hong itsak hi. Eite thu kihilh-in, tha kipia-in, le i kitaai hi. I kap a, i lungdam khawm hi. I piak itna in neem-in, kho-a, phattuamna zong hong pia hi. I galte it ding Jesuh in hong hilh hi: “Nang hong hua mite tungah na hoih na bawl inla, nang tungah lungsim kawi tawh thusia hong bawl mite ading zong thu na ngetsak un” (Matt. 5:44). Midangte tungah itna piak ding cih pen hun khempeuh ah piang theilo ding sa kha ding hiteh. Ahi zongin Pasian in Ama’ itna hong pia masa ahih manin piangthei takpi hi.
    

Tuni na nuntakzia ding: Itna la in. Itna pia in. Tua bawngin bawl kikkik in.–Anne Cetas
SIMBEH DING 
Khris’ itna bangci ngah thei ding? (Johan 15:10).
Pasian’ itna eite’ nuntakna ah koici kingah? (1 Johan 4:16-21).
Pasian’ itna koici lahkhiat thei ding?

Itna la in. Itna pia in. Tua bangin bawl kikkik in.

Nisim Thalakna:THUPI SIMNA

September 10
Ni Nih


THUPI SIMNA  

SIMDING:
1 Korin 1:4-9

Jesuh Khris hangin note tungah Pasian in hehpihna thupha hong pia ahih manin ka lungdamna thu Pasian' tungah ka ko tawntung hi.––1 Korin 1:4

KUMTAWN LAI SIANGTHO:
Paunak 8-9
2 Korin 3

Tunai aa thukanna khat ah nasem mi  200,000 te bang hangin nasepna ah a daupai lo hiam cih dotna khat kidong hi. Tua thukanna tungtawnin a muhkhiat thu-ah: ‘kithusimna le lungkimpihna’ a naseppihte’ tung pan lunggulh pen uh hi, kici hi. Tua tungtawnin mihing nuntakna ah zong kithupi sim ding pen a phamawh khat hi.
   

Sawltak Paul in zong tua thu na phawkkha hi. Tua ahih ciangin Korin khua-a Pawlpite kiangah laigelh-a thuhilhna ding kammal a zat ma-in, thusimna kammal na zang masa hi. Kha lam-a pa ahi Paul in amau’ nuntakna ah Pasian’ hehpihna hangin lungdamko hi.
    

Nidangin ahih leh, amaute pen Pasian tawh kigamla ngei-a, Jesuh’ sihna le thawhkikna hangin hehpihna sangkha uh hi. Jesuh tawh kipawl uh ahih manin Jesuh tung panin nuntakzia ngah uha, tua kipawlna ah a siangtho nuntakna gahsak hi (1 Kor. 1:4-7). Paul in Korin thu-um mite nuntakna-ah Pasian’ sepsa nate hangin lungdamko hi. A nunung lam ciangin Paul in nakpi takin a tai hangin tua thupi simna hangin thuakzo gawp ding uh hi, ci-in ka ngaihsun hi.
    

Mite in Topa’ thu a ngaih lam na muh ciang, tua bang ahihna hangin Topa’ tungah lungdamkoh nading hun la in. ––Marvin Williams
Topa, kei’  nuntakna le midangte’ nuntakna ah lam tuamtuam-in na nasem hi. Khris sungah ka sanggamte a hanthawn thei dingin hong huh in. Amau tungah Nangma’ sepsa nate a gen dingin theihsiamna hong guan in.


Phat ziahziah inla – damtakin thuhilh in.

NIPI BIAKPIAK KIKHOP PHOTO (8 Sep 13)




Shield apna leh pahtawi piakna

. Lungdam pihna: Yangon Lai Siangtho sangte Tukpeng kidemna ah TCC sangin a khatna ngah ahih manin Pawlpi’n kilungdam pih hi.

                                                 Lungdamkoh thungenna & Phatna La ~ TCC

Male Voice



Thupha piakna                      ~ Church Pastor

“NUNTAKNA KEUTE-AH CIKTUI A PHUL SAK PASIAN” ~ Rev. Langh Za Kap


Hanthotna : Rev. Langh Za Kap (8 Sep 2013)

Download

Late

Alian 107

35
Amah in sehnel gam pen bualtuite suaksak a, leitang keu pen ciktui a suaksak hi.

Isaiah

Alian 44

3 "Bang hang hiam cih leh a dangtak leitang tungah tui ka sung ding a, lei keu tungah luitui ka luangsak ding hi. Na suanlekhakte tungah ka kha ka sung ding a, na tu na tate tungah ka thupha ka pia ding hi.