A KILAWM MIN

May 24
Kigin Ni

A KILAWM MIN

SIMDING:
Matthai 1:18-25

Ama’ min dingin Jesuh na phuak ding uh hi. ___Matthai 1:21

KUMTAWN LAI SIANGTHO:
1 Khang Tangthu 22-24
Johan 8:28-59

Asia gam-a Indonesia gam min pen Greek kammal nih kigawm hi-a a khiatna in “tuikulh” cih ahi hi. Tua min pen a kilawm mahmah min khat hi. Bang hang hiam cih leh, Indonesia gam pen tuikulh bekbek 17,500 apha gam khat hi-a, a zaina 750,000 m2 pha hi. Indonesia pen “tuikulhte’ gam” cih theih dong dingin min kilawm khat ahi hi.

    Lai Siangtho sungah mite zong min kivawh tek uha – suah khit ciang hi hamtang zaw hi. Tua min pen amau’ tangthu, ahih keileh gamtatzia tungtawnin phuak uh hi. Barnabas cih pen “thapiapa’ tapa” cihna hi-a, mi a muh khempeuh thapia den hi. Jacob “zuaukhem” zong mi tampi tak khembawl-in, ama’ hamphatna dingin thu tampi kawi hei-hei hi.

    Jesuh zah-in kuamah minpha kipia ka theihkhak om nailo hi. Vantung mi in Joseph kiangah a gen ciangin, “Amin Jesuh na phuak ding uh hi. Bang hang hiam cih leh amah in Amite mawhna panin honkhia ding hi” (Matt. 1:21) ci-in taangko hi.

    Jesuh’ min khiatna pen “Topa in honkhia hi” cihna hi-a, Jesuh kua bangmi hi-a, bang hang hong pia hiam, cih a genkhia min hipah hi. Immanuel zong kici lai-a, “Eite tawh Pasian hong omkhawm hi” (1:23) cih khiatna nei hi. Ama’ min in i lam-et tawntung nuntakna hong bucing sak hi! – Bill Crowder

Jesuh’ min mahmah a um mite’ bil-ah khum zungzung!
I dahna khempeuh, i natna khempeuh hong lakkhiat saka,
Launa khempeuh zong vengmang sak hi. – Newton

I upna le i lam-etna khempeuh ii bulpi pen Jesuh’ min ah i mu thei hi.

EI’ KILAWMZAH SANGIN

May 23
Ninga

EI’ KILAWMZAH SANGIN

SIMDING:
Late 103:6-18

Amah in i mawhna bangin thu hong khenlo-a, ikhialhna tawh hong thukkik tuanlo hi. _Late103:10

KUMTAWN LAI SIANGTHO:
1 Khang Tangthu 19-21
Johan 8:1-27

Mite in khatveivei “Bang na ci ei?” ci-in hong dong leh, “Hoihzaw veng e” ci-in ka dawng theizel hi. Ka kihopih khat pa in hong dawnkikna-ah “Joe aw, hoihzaw bek hilo, hoih sitset hive teh” hong cih ciang, kei zong kisuangin “Tuaci sam kei maw?” ci-in ka dawng pong hi. Pasian’ thukhenna ah kei bangci bang hi ding cih ka tel thei kei hi.

    Ei’ hihna taktak ah mimawh vilvel i hihna i kimangngilh kha pahpah hi. I hih ngeina sangin a hoihzaw-in i kingaihsut ciang, Pasian’ hehpihna a phawk  siamlo tawh i kibang hi. Tua in Pasian’ sepsa khempeuh a sumai tawh kibang hi.

    Na hihna taktak ngaihsun dih in! Late laphuak pa in, “Pasian in i mawhna bangin thu hong khenlo-a, i khialhna bangin hong thuaksak lo hi” (Late 103:10) ci hi. Pasian’ hoihna le sianthona sungah, eite pen hell gam tawh a kituakte bek i hi hi. Vantung gam tun ding cih pen ngaihsut aa zong kikoih thei thu hilo hi. Ahi zongin Khris, eite’ taang dingin singlamteh tungah hong si hi. Pasian in ei tawh a kituaklo zah dong dingin hotkhiatna letsong eite hong piakhia zo hi. Tua ahih manin Late laphuak pa in, “Vantung pen leitung tawh  kigamla mahmah-a, Ama’ hong hehpihna zong azahtakte tungah lian lua mahmah hi” (tg. 11) ci hi.

    I hihna i kitheih ciangin, eite in “Hong hehpihna lamdang, lamdang ka sa!” cih ding lobuang, adang kammal om thei  nawnlo hi. Ei tawh a kilawmlo zah dong dingin Pasian in eite hong pia hi. – Joe Stowell

Topa, ka mawhna bangin nong thuhkik loh ka lungdam mahmah hi. Nong itna le hehpihna leiba nang tungah tampi ka nei hi. Nangmah nong kipia-a, singkhuam tungah mawhmaisakna le nuntakna bukim nong pia hi. Kei’ hihna hang hi kei, nong itna hang hizaw!

Pasian in eite hong honkhia ahih nungsang, eite’ hihna sangin tampi hong semkhin ahi hi.

THUNGAIHNA


May 22
Nili


THUNGAIHNA

SIMDING:
Job 2:11-13

Ka thugen khat beek in hong zaksak leh!__Job 31:35

KUMTAWN LAI SIANGTHO:
1 Khang Tangthu 16-18
Johan 7:28-53

Joyce Huggett’ gelh “Midangte’ Thu Ngaihna” cih laibu sungah, mite’ gen thute va ngaihsak ding le haksatna kawmkal pan bangci dawnkik ding cihte kigelh hi. Ama’ theih tawm thute tungtawnin gelh ahih manin mite’ thu a va ngaihsak ciang, a lungdamna uh hong ko theizel ahihna zong pulaak hi. Ama’ gelhna ah, “Hun tamzaw pen kei’ gen kullo-in ka om hit-hiat mai hi. Ngaihsak ding bekbek hi tang-hial hi” ci hi. Tua ahih manin Joyce in a gelhbehna ah “thu ngaihsak ding bek acih zong pen midangte i huhna ah a thupi mahmah nasep khat hi” ci hi.

    Tua pen Job in a lawmte tung pan a ngahnop huhna khat zong ahi hi. Ni sagih sung bang bangmah kampau lo-in a tut a muh zong, “a thuakna lian mahmah hi” cisam napi’n (2:13), Job ii kampau zong ngaihsak nuamlo uh hi. Tua thamlo-in amau le amau kampauh ding bek kituh uha, va hehnem zolo uh hi (16:2). “Khat beek in zong hong ngaihsak lo!” ci-in Job kiko hi (31:35).

    Thungaihna i cih pen, “Nang’ thupi na sak khat kei-a dingin zong thupi hi” cihna ahi hi. Mite hong kamkuppih ding zong i kisam hi. Ahi zongin eite’ hong ki-it, hong kikhoi taktak ahihna pen i kammal hong ki-ngaihsakna pan kimu thei hi.

    Thungaih ding pen a haksapi khat hi-a, hunpiak kul hi. Alangkhat pa ii thuakna khempeuh a ngaihsak zo ding hun i piak kul a, tua ciang bekin ngaihsutna hoihtak, le amanpha pilna kammalte eite in i genpih thei pan ding hi.

    Topa, a it thei lungtang le, thu a ngai thei bil hong pia in. – David Roper

Topa’ mual siangtho panin ka kiko-a,
Amah in a bil keilam hong ngat hi;
Ka Pasian, ka Topa ka sam a,
Ka launa khempeuh hong hawlkhiat sak hi. – Watts

Mite in hong gen thute dawnkik nading kammal ka ngaihsut khak leh – kei pen thungaipa ka hi kei ding hi.

HUIHPI LAKAH SIKKIP

May 21
Nilai

HUIHPI LAKAH SIKKIP

SIMDING:
Joshua 1:1-9

Na paina peuhpeuh ah Topa in hong ompih ding hi.__Joshua 1:9

KUMTAWN LAI SIANGTHO:
1 Khang Tangthu 13-15
Johan 7:1-27

Sandy huihpi nakpi takin a nun laitak Matt le Jessica in Florida gam lam manawh-in gunkuang tawh a ciah mengmeng kula, tua laitak mahin upmawh lopi-in lei tawh kisukha hi. Huihpi in nakpi-in muut leuleu ahih manin tua mun san mah-ah a sikkip pen tui sungah khia suk uh hi. Tua hang bekin a suakta thei ahi uh hi. Amau genkikna ah tua sikkip khiasuk lo hi le-uh, “ka gunkuang uh kisia cip ding hi” ci hi. Tua sikkip omkei leh, cikziat a neilo huihpi in gunkuang pen nuaizan cip ding hi.

    I kha nuntakna ah zong i khamuan theih nadingin sikkip khat i kisam hi. Pasian in Moses a sih khit ciangin amite makaih dingin Joshua hopih a, tua laitakin Pasian in haksatna sungah a kingakh nading mun muanhuai pia hi. Topa in ama kiangah, “Nang tawh kong omkhawm ding a, nang hong taisan lo-in zong kong nusia kei ding hi... Na tuntunna peuh ah Topa nang tawh hong omkhawm hi” (Josh. 1:5,9) ci hi. Pasian in Joshua le amite “thukham laibu” zong pia a zuih ding leh lungngaih nading thu khunsak hi (tg. 7-8). Tua bek hilo, Pasian’ ompihna in zong haksatna tuamtuam nawkzawh nading tha guan hi.


    Haksatna thuaklah-in, muanlahna in i upna hong ze-et tak ciang, i sikkip bang hi ding hiam? Joshua 1:5 sung simpha in. I upna a kiam hun nangawn-in, Pasian’ thuciamna le ompihna tungah kinga peuh lehang, Amah in hong kemcing zo ding hi. – Anne Cetas


I kha hong kem gige khat i nei-a,
Tuihualpi hong nun hangin zong bangmah kihtak i nei kei hi,
A liing ngeilo suangpi tungah kikhihcip a,
Honpa’ itna sungah kiptakin ding ngiitngeet hi. – Owens

Huihpi nuaicipna i tuah khak ciangin, upna sikkip’ muanhuaina a sinkha i hi hi.

May 18, 2014 Church Program Audio File

Lai Siangtho Sinna(Pai. 2:1-10)~Asst. Pastor Zam Khen Khai

May 18, Church Program Audio All in One File

Siampi thungetna~Asst. Pastor Ai Lian Pau



YD thungetna~Lia Thang Suam Dim, Chairperson,YD


Laamna~Ultimate Dancer Group


Biakinn sumpi donna leh apna~Upa Khup Khan Mung, Advisor, YD

Phatnala~ Marty Group

Thungenna(MBC Mission Excursion, Bangkok)~Associate Pastor

Nipi Sumpi donna leh apna~Tg. Dal Cin Suum, Accountant,YD

Phatnala~Tg. Lian Sian Sing

Mawh sutna leh thupha ngetna~Lia Niang Sian Lun, Treasurer, YD

Khangnote ading thunget sakna~Nu E. Sian Kho Zam

Drama~Youth Department


Hun uk~ Lia Lian Lam Kim, Secretary, YD

Lapawl~ Church Choir

Hanthotna: Rev. Khoi Lam Thang, Honorary Pastor
"Ka Nau Aw Khang MengMeng..."

Thupah piakna~ Church Pastor

Lungdamkoh thungetna~ Rev. D. Suan Za Thang


Arise & Shine !
Khangnote

HUN KHAT LAI-IN

May 20
Ninih

HUN KHAT LAI-IN

SIMDING:
Matthai 24:32-44

Topa in Jonah a valh dingin ngapi sawl hi. Tua ngapi sungah Jonah sun thum le zan thum sawt hi.__Jonah 1:17

KUMTAWN LAI SIANGTHO:
1 Khang Tangthu 10-12
Johan 6:45-71

Mi pawlkhatte in Lai Siangtho pen tangthu maimai-in ngaihsun lel uh hi. Naupangno khat in ngal-khawhang khat a thahna, Ngapi in mikhat a nangvalhna, Noah teembaw bawlna cih-te peuh-in ciamteh uh hi. Thuzui mi tampite in zong hih tangthute pen limpha taka kigelh, gennop thupi anei cih ciang bek thei uh hi.

    Jesuh in zong Jonah le ngapi tang-thu, Noah le tuiciin cihte zong gena: “Noah hun lai-in up mawhlohpi khatin tuiciin a tun’ bangin Mihing Tapa zong hong pai ding hi. Tuiciin a tun ma hunin, mite in anne zusa-in om uha, mo kipi, mo kikha-in nuntak ngeina bangin om uh hi. Tuiciin hong tungin tui in mi khempeuh a tupcip hun ciangdong, kuamah in bangmah a theihloh mah bangin Mihing Tapa hong pai ciangin zong kuamah in thei khollo ding hi” (Matt. 24:37-39). I upmawh loh laitak hong paikik teekteek ding hi.

    Jesuh in Jonah ni 3 sung tawntung ngapi gil sungah a om mah bangin, Amah in zong han sungah ni thum sung omin thokik hi (Matt. 12:40). Peter in Noah thu le tuiciin thu gena, tua bang ngeei-in Jesuh hong paikik ding hun zong hong tung ding ahih lam hong phawksak hi (2 Peter 2:4-9).

    Pasian in hong ciamkhin hi; tuate tangthu mawkmawk hilo-in, thuman tawh a kidim thute a hi hi. Ni khat ni ciangin, Jesuh hong paikik dinga tua hun ciangin eite lungdam-in, Ama’ angsung ah nuamtakin i tawlnga ding hi. – Cindy Hess Kasper

Topa, nangmah kong ngak uh hi,
Nang hong pai-in nong ciahpih ding;
Nong kamciamsate kei’n ka thei,
Tuate um-in thuman ahih manin ka lungmuang hi. – Sper

Khris hong paikik ding lam-en tek lehang, thu le late pen ahoih lam hong kaai ding hi.

VAI KIPELH

May 19
Nipi Khuavak

VAI KIPELH

SIMDING:
Mark 5:21-34

Topa’ thu ngaihsutna kip ngitngeta, ama lungsim geelna khang tawntungin kip hi. __Late 33:11

KUMTAWN LAI SIANGTHO:
1 Khang Tangthu 7-9
Johan 6:22-44

Ka naunu tawh Taiwan aa zumkhak ka khualzin kal ding ka ngaklah mahmah hi. Vanleng letmat zong leikhin-in, hotel khan zong ka kawmkhol khin uh hi. Ahi zongin ka khualzin ding nipi nih sapin ka naunu in thukin khat om ahih manin Singapore ah omsuak ding hong hita hi. Ka geelna khempeuh hong kipelh ahih manin ka lungkia mahmah hi.

    Jesuh’ nungzuite zong a khualzinna ah a kinawngkai sak ciangin lungkim tuanlo uh hi (Mark 5:21-42). Biakna makai khat ahi Jairus’ tanu pen si dektak ta hi. Tua hun pen a thupi hun hi-a, Jesuh pen tua thu a zak ciangin Jairus’ inn lam masuan hi. Tua ciangin Jesuh hong khawl vat-in nungleh-et a, “Kua in ka puantual hong lawng na hi uh hiam?” (tg. 30) ci hi.

    Nungzuite zong lungsauzo nawnlo ahih manin, “Mihon hi zahta lai-ah bang hangin kua in hong lawng na hi uh hiam? hong ci na hiam?” (tg. 31) ci-in dawngkik hi. Jesuh in natna nei numeinu tungah na lianpi khat piang ahihna thei gige hi. Ama’ natna hangin a siangtho lo-in kiciamteh a, kum 12 sung bang mipi omna sungah kihel khuan ngahlo hi! (etkak ding: Siampi 15:25-27).

    Jesuh in tua nu tawh a kiho laitak, Jairus’ tanu pen na sikhin sawnsawn hi. Zekai lua ta – hunlap nawnlo! Ahi zongin tua banga Jesuh a zekai tak ciangin Jairus in Jesuh le ama’ vangliatna tampi mu zawkan hi – sihna tungah thunei pa!

    Khatveivei eite lungkim lohna lel pen Pasian’ geelna hizaw thei hi. – Poh Fang Chia

I lungkhamna – Ama’ angvanna
Na hoih a ii lo Pasian;
Paampaihna citeng i thuak khit ciang
Hong itna manpha ei-a hita. – Young

Hong kinawngkai sakna ah Pasian’ geelna musiam in.

MABAN THAK

May 18
Nipi Ni 

MABAN THAK

SIMDING:
Rom 12:6-21

Note khat le khat sanggam ki-itna tak tawh na ki-it unla, khat le khat na kipahtawi siam un.__Rom. 12:10
KUMTAWN LAI SIANGTHO:
1 Khang Tangthu 4-6
Johan 6:1-21

    Ka lawm khat in a nuntak nunung lam cianga sep ding khat ka man ci-in hong gen ngei hi. Tua pen a sanggamnu tawh Europe gamah khualzinna ahi hi. Amah ahihleh thumvei pai ngei-a, a sanggamnu ahihleh tung ngeilo hi. Ka lungsim hong sukha mahmah thu pen in a sihma teeiteei-a asepkhiat pen ahi hi. Tua in bang hong phawksak hiam cih  leh ka nuntak sung tawntung  kei-a ding bekin a nungta ka hiam, midang ading kihel lo maw, cih ahi hi.

    Rom 12:6-21 sungah Pasian in Khris’ pumpi sungah kihel dingin hong koih ciang, i nisim nuntakna bangci gamtat ding cih hong lak hi. Hih mun ah bel pualam gamtatnate bekbek kigelh hi. Laihilh syate in lai ahilh uh ciangin amau’ ut thu hilo-in midangte’ phattuam nading ahi hi. Tua bek hilo tg. 6 le 8 sunga kigelh letsongte zong tua bang ahi hi. Paul in eite tungah hong vaikhakna ah: “note khat le khat sanggam ki-itna tawh na ki-it unla, khat le khat na lunggulhnate uh na kihuh ta un” (tg. 10).

    Paul in hong gen ciangin ama’ deihna ah a nuntakna pen midangte tawh nuntak khop ding ciang bek hilo-in, hong pai lai ding khangthakte tungah zong khaici hoih atuh nuam ahi hi. Piakkhiatna, zindonna, mawh kimaisakna, le kikhualnate in ama’ nuntakna mapi hi.

    I nuntakna ah i ngah letsongte pen midangte tung piak khiat ding i kungmui hisak ni. – David Mc Casland

A piakhia ding hong huh in,
A lian le akhawn khong hehpihna tawh,
Ka nuntakna le ka bangkim
Nang tungah kong ki-ap uh hi. – Murray

Na kha a cidam nadingin, kiniamkhiat ding le midangte’ hehpih ding kisin in.