TUAKSUK O!

April 26
Kigin ni

TUAKSUK O!

SIMDING:
2 Khang tangthu 12:1-8

Ka mite.. a mau kiniam tawmin, thungen in ka mai hong zong a, a mau gitloh na panin a kihei uh leh kei mahin vantung panin ka za ding a khialhna maisakin a leitang uh ka hoih sakkik ding hi. ___2 Khang tangthu  7:14

KUMTAWN LAI SIANGTHO: 
2 Samuel 23-24
Luka 19: 1-27

Kahlei tungpan a tuaksuk ngamlo uino khat tawh video kipan hi. Anuai pan a otsan mite kiangah painuam mahmah napi-in a tuahsuk ding lau mahmah hi. Tua leh a golzaw deuh uital hong pai in kahlei tungpan a tuahsukzia ding tua uino uino hilh hi. Uital in a mai khe tawh kahlei cial siksuk in kahto zel tuaksuk zel hi. Uino in sinngam tuan nailo hi. Nihvei thumvei a hilh khit ciangin uino zong kahlei ah kumsuk theita hi. A en mipite’n zong khut beeng ngeingai uh hi.


    Bang zahin lungnop huai hiam? Nungzui siam ding dan hong hilh thu ahi hi. Mihingte a kahto lam bek i kitam hilh zaw a, a tuahsuk lam pen kihilh kha lo hi hang. Pasian in kiniamkhiat ding hong deih hi. Judah mite a kiniam khiat uh manin Pasian in ka susia nawn kei ding, ci hi (2 Khang 12:7).
 

    Pasian in kiniamkhiatna lim in hong tuaksuk zel hi (Pai 3:7-8; 19:10-12, Mikah1:3). A tawpna ah Pasian in Jesuh hong sawl suk in kiniamkhiat zia ding hong hilh-in, nungzuih siam ding zong hong hilh lai hi (Fil. 2:5-11). – Julie Ackerman Link

Topa tawh kisun semsem,
Kiniamkhiat semsem, nunnem semsem,
Hanciam semsem, Thuman hangsan semsem
Hong sawlna a semding siangtho semsem.Gabriel

Kiniamkhiatna a omkei leh kihilhna om theilo hi.

A LAULO NGASA

April 25
Ninga

A LAULO NGASA

SIMDING:
Johan 1:6-14

Tua thu mi hong suak in kote lakah hong om a, a vangliatna ka mu uhi. --Johan 1:14

KUMTAWN LAI SIANGTHO: 
2 Samuel 21-22
Luka 18: 24-43

Innsung ka nga khawina maan tawh a kibawl tuikuang sung a ngasa te ading, a tha om theihna ding , a cidam na ding ci-in limtak in an bawl sakin tui bang hoihtakin ka khaihsak hi.  An pia dingin ka naih phei ciangin a lawpkeei ding, a na lungdam keei ding ka sak leh, hong kihta-in buktheih bukmawh in bu uh hi. Kei pen a hehpih thei, an a pia nuampa ka hih lam hong theilo uh hi. Kei mah ngasa suak in ngasate’ teltheih dingin pau ding cih lah gen mawkmawk hi lel hi.

    Leilevan na khempeuh a bawl Pasian in tua bang a piangtheilo ding vaikhat hong hawm hi.  Naungek in hong piang a mihing-in hong kibawl hi. Johan in, “Amah tawh leitung a kibawl hi napi, leitung in amah theilo hi,” na ci hi. Pasian in laibu tung a kigelh a hilo tangthu hong gelh a, “tua thu mi hong suak in kote lakah hong om a, a vangliatna ka mu uh hi(Johan 1:14). – Philip Yancey

Cilesa a silh Tawntung Pasian,
Mikhempeuh in hong phat ta hen.
Kumpi tokhom dingin gan ankuang nong tel,
Leitung khempeuh nang a’ hi ven. ___Luther

Tawntung nunna letsong hong pia dingin Pasian mihing bangin hong kibawl hi.

BEI NGEILO

April 24
Nili

BEI NGEILO

SIMDING:
Kahla 3:13-26


Topa hong hehpihna bei ngeilo a, zing nisuak bangin thak den hi. ___Kahla 3:22-23


KUMTAWN LAI SIANGTHO: 
2 Samuel 19-20
Luka 18:1-23

Paakhuan sung a peulip (seesaw) tuan pen ka neulai in nop ka sak mahmah kimawlna khat hi. A dawn tuakah tuangin khat lam a santoh ciangin a langkhat na niam suk hi. A gilo khat tawh tuang kha leng bel a mah a niam laitak na paikhia ziau-in a sangpan thakhat a lei-ah a kiatsuk teh bel, na mahmah thei hi.


    Jesuh in zong khat veivei tua bangin hong hih hiam ci-in ka ngaihsun zel hi. Nuntak haksa, a suk a to ah Jesuh pen na kihem ziau in ei guak hong nusia hiam i cih hun om thei hi. Ei bek in na i sak mahmah hun laitakin Jesuh a gelkhia hiam, cih huai phial hi.
 

    Ahi zongin Kahla 3 na-ah, “Topa hong itna leh hong hehpihna a kizom paisuak hi a, bei hun neilo,”  (tg. 22) ci-in hong phawk sak hi. I theihtel ding thu in na khempeuh a kisia phial zongin Pasian in a tawp dongin eite tungah hong thuman hi, cih i phawk ding kisam hi. Thakhat a i kiatsuk laitakin zong Pasian itna in hong ompih hi. Khattang kisa in i thanem hun mah in i phawkloh bek hi a, hong ompih denin ei guak hong koihdak ngeilo hi. – Joe Stowell
 

Khattang lungzuang ka om laitak,
Nong ompih lam nong phawksak maw.
A beithei lo hong itna tawh,
Nong ompih lam hong phawksak in Topa.

Mi khempeuh in hong nusia zongin Jesuh pen a muantak pen i lawm ahihi.

Haleluiah!

April
Nilai ni

Haleluiah!

SIMDING:
1 Korin 15:55-58


Sihna aw na gu koi ah om hiam? __1 Korin 15:55


KUMTAWN LAI SIANGTHO: 
2 Samuel 16-18
Luka 17:20-37

Ka lawm Bod, kimawlna thasanna mun-ah ka mu-a, a khutme tungah si tehna khat koih-in a mit tawh a salh gega lam ka muh ciangin kei zong om theilo-in “Bang hih na hia?” ka cih leh, “A nungta lai mah ka hiam cih thei nuam a, a kiteh hi ing” hong ci hiat hi. “A si peuh hi le cin e,” ka cih leh, “Haleluiah, ci’n awng ning,” ci’n hong nuihsan hi.
 

   Tuteng Bob a kha tha hong dim keei hi. Cidamlohna le haksatna tuamtuam thuakzo in, upna le lametna tawh a hun nunung maingat zo hi. A taktakin cileng, upna a mu bek hilo-in, amah a nawngkai sak thei ding sihna nangawn kizo khin hi, cih luangmuan khamuanna nei hi.
 

    Laitah hun lai takin daihna le lametna banah nuamna a neizo kua om hiam? Tawntung Pasian um in tawntung nunna a neite a hihi (1 Kor 15:52,54). Bob bangin kha muanna neileng, sihna lauhuai lo hi. Khris’ maitang mu-in nuamhuai mahmah zaw hi.
 

    Bang hang sihna kihta ding? Bang hang lungdam lo? “Tawmvei ihmu-in, tawntung ah  i khanglo ding hi.” – David Roper
 

Honpa tawh i om ciangin,
Ni tumloh na, Lungdamna ni suak,
Leitung gimna bei-in vangliang zingsang i muak,
Vangam hong piangta.

Khristiante adingin sihna pen leitung ii nilim nunung  hi-a, vantung adingin phalvak hun zong ahi hi.

Dikna

April 22
Ninih

Dikna

SIMDING:
Sawltak 4:1-13

Note in singlamteh tungah na thah uh, Nazareth khuami Jesuh Khris’ min vangliatna tawh hih mipa ci damin hong ding hi. __Sawltak 4:10

KUMTAWN LAI SIANGTHO: 
2 Samuel 14-15
Luka 17:1-19

Ka lawmte tawh ka khualzinna lampi tungah innkuan khat cimawh in a om ka mu uh hi. Ka lawmte’n tua innkuante hopih-in a mawtaw sathau leinang sum pia in a huh ciangin a nu-in lungdamko phapha hi. Ka lawmte in, “Kong huhthei uh nuam ung. Jesuh min tawh a sem uh hizaw ung,” ci-in dawng hi. Jesuh tawh i kizop ciangin midangte huhding pen ngeina suak cih ka phawk hi.

    Peter le Johan in zong Jerusalem biakinn mai a khebai pa a huhzia zong a nak Jesuh min mah tawh a hihi (Sawl3:1-10). Hih thu hangin “Kua min leh vangliatna tawh hih na hi uh hiam,” ci-in kimatna thusitna a tuak uh ciang Peter in, “Note in singlamteh tungah na thah uh, Nazareth khuami Jesuh Khris’ min vangliatna tawh hih mipa ci damin hong ding hi (Sawl 4:7-10),” ci-in dawng hi.


    Dikna pen Kha Siangtho gah (Gal 5:22) hi a, midang te kiangah Pasian thu i genna ding a vanglian mahmah thu a hihi.- David McCasland

Sepkhiatna leh Kammal tawh midangte itin,
A kisapna uhah huh zo dingin,
Mawhna sungah a mang mite lainatin,
Ka sungpan in itna leh hehpihna a luankhiatna ding hong huhin Topa. – Fitzhugh

Hanthotna tampi sangin dikna no khat in Pasian itna kilangsak zaw thei hi.

SIHNA ZO VANGLIATNA

April 21
Nipi Khuavak

SIHNA ZO VANGLIATNA

SIMDING:
Johan 5:24-30

Han sungah om misi khempeuh in a aw za-in han sung panin hong pai khiat hun hong tung ding hi. ___Johan 5:28-29

KUMTAWN LAI SIANGTHO: 
2 Samuel 12-13
Luka 16

Anastasis – ‘thawhkikna’ cih thulu tawh a kisuai tanglai limkhat ah Jesuh in sihna a zawh gawpna kilang saksak mahmah hi. Tua limsungah han pan a thokik Jesuh in Adam le Eve-te tawntung nuntakna ah a kaikhia to-in kisuai hi. Kha leh pumpi sihna pen Jesuh’ thawhkikna in thakhat thu-in lumlet hi.


    Jesuh singlamteh tung hong sih ma-in mailamah a mah a um mite pianzia ding na gen khol hi. “Han sungah om misi khempeuh in a aw za-in han sung panin hong paikhiat hun hong tung ding hi (Johan 5:28-29),” na ci hi. 


    Sihna tungah Khris gualzawhna hangin hanmual pen a tawpna hilo hi. Mihing hihna tawh i it khat a sih ciang, i kikhen ciangin i dah tek hi. Ahi zongin ei thu-umte adingin lam-etna neilo mite’ dah bang hilo hi (1

Thes. 4:13). A thokik vanglian pumpi silhin nikhat ni ciangin han pan i thokik zia ding Jesuh thawhkikna in hong lak hi (1 Kor 15:42-44). Tua ciangin a tawntungin  Topa tawh i om ding hi (1 Thes. 4:17).___ Dennis Fisher
 

Nang nuntakna nong kipiak manin
 ko a nungta thei hi ung Topa, Lungdam ung.
Khatvei ciangin sih lohna ah nang tawh ka omding uh
na sihna leh na thawhkikna in hong khamuang sak hi. Lungdam ung Topa.

Jesuh a hin kik bangin ei zong i hing kik ding hi.

NISIM THAWHKIK NI

April 20
Thawhkik Nipi 

NISIM THAWHKIK NI

SIMDING:
Hebru 10:11-18


Amah hiah om nawnlo hi; a gensa mah bangin Amah thokik khin hi.__Matthai 28:6

KUMTAWN LAI SIANGTHO:
2 Samuel 9-11
Luka 15:11-32

Ka lawm mucu siama khat in a sang naupang te kiho a zak hong gen hi. Little Maria in, “Kua in Pasian it?” a cih leh “Kei’n it, kei’n it, kei’n it,” ci ngeingai uh hi. Billy in, “Kei’n Jesuh it,” a cih se leh Kelly in “amah a sikhin ve” ciphei. Billy in dawng pahin, “Easter ni simin a thokik zel ve,” ci hi.

    Billy in damdam in tel toto ding hi. Rom 6:10 ah “Jesuh pen a tawntung adingin khat vei si” ci hi. Tua bang mahin Hebru 10:12 ah “khat vei thokik” ci hi. Eite mawhna tangin si a, nithum ni ciangin mawhna le sihna vangliatna zogawp in thokik hi. Hih pen tu leh a tawntung a Pasian tawh ki zopna ding a kibua, a nunung pen biakpiakna si a hihi.

    1 Kor 5:3-4 ah, “I mawhna hangin Khris si a, kiphum in nithum ni ciangin thokik hi,” ci hi. Johan 14:1-4 ah ei om na ding mun bawlkhol dingin hong kamciam a, a la ding hong paikik ning ci hi. Nikhat ni ciangin amah bangin i thokik ding hi.

    Late 34:1 ah “Topa ka phat tawntung ding a, a mah phatna ka gengen ding hi” a cih bangin Thawhkikni sim kum simin Jesuh’ thawhkikna i geggen ding hi. – Cindy Hass Kasper

A nuntakna tawh hong it a, a sihna tawh hong hon hi.
Ka mawhna teng lei-ah phum a,
a thawkikna tawh dik hong tangsak hi.
Nikhat ni ciang Tua Vangliatpa hong paikik ding hi.- Chapman

Jesuh thawhkikna hangin lungdamna pawi i kham hi.