KUA’N THUMAN GEN?

November 2
Kigin  Ni

KUA’N THUMAN GEN?

SIMDING:
Johan 8:31-47

Kua in ka mawhna nong lak thei uh hiam? Nong lak theiloh hangun, bang hang hong umlo na hi uh hiam?–– Johan 8:46

KUMTAWN LAI SIANGTHO:

Jeremiah 27-29
Titus 3

2012 kum US gam Kumpi kiteelna ding kam kinial thugenna ah, kumpi sem ding mi nihte’ thugenna tuamtuam-te amaan mah hiam ci-in thu telkan mahmahte in encik uh hi. Thuman gen uh hiam, ahih keileh amau’ deih kai-in gen uh hiam cih TV etkawmsa-in encik uh hi.
 

   Nungzui Johan in Jesuh le amah a mawhsak mite kinialna na ciamteh hi. Jesuh in amaute kiangah, “Ka thu sungah na om uhleh, keima’ nungzuite na hi ding uh hi. Thuman na thei ding uha, tua in note hong suaktasak ding hi” (Johan 8:31-32) ci hi. Amaute in sal ka suak ngei kei uh hi, ci-in dongkik a, “Bang hang note suakta ding hong ci na hiam?” (tg. 33) ci hi.
 

   Tua bangin a kinialna ah Jesuh in thuman a gen hinapi (tg. 34,40,45-46,51) pawl khat in um uha, pawlkhatte ahih leh heh-in tel theilo uh hi.
 

   Tua bangmah-in tua thu kiseelna zong tudong kizomtoto lai hi. A langpang mite in khemna tawh kawi vialhvialh uh hi. Jesuh in “Kei’n thuman kong gen hi” hong ci-a bangmah ii hotkhiat theihloh ding panin hong suakta sakzo lai hi.
 

   Lai Siangtho sunga Jesuh’ nuntaknate in ‘thuman hong lak a’ kua zui ding cih hong laktel hi. I zuih ding pa’ teelkhial kei ni.____David McCasland
Upna in Ama’ kamciam muanna piangsak a,
Jesuh sung na muan leh na tha hong khauh-in;
Ama’ thu sungah lungnuam takin,
Jesuh i Topa tawh launa tuamtuam pan hong hon.___Teasley

Pasian’ thumanna in ze-etna khempeuh dozo hi.

MITE IT DING AA HONG IT

November 1
 Ni Nga 


MITE IT DING, AA HONG IT


SIMDING:
Thuhilhkikna 10:12-22

Topa na Pasian in bang hong kal ahi hiam, ... Ama’ lampi zui-in Amah it ding hilo ahi hiam?
---Thkna. 10:12


KUMTAWN LAI SIANGTHO:
Jeremiah 24-26
Titus 2

Lungtang khat pen midangte koi zahin it cih tawh thu kikhenlo a, amau bangzah-in hong it cih tawh thu kikhen hi” ci-in tangthubu the Wizard of Oz cih laibu sungah ka mu ngei hi.
 

    Tua tangthubu pen a hoih mahmah khat hi-a, ahi zongin kha nuntakna ah picing zo tuanlo hi. Pasian in tua tawh a kilamdang deuh-in gen hi. Itna neih ding thukham lianpen hi a, Amah it-in midangte zong it ding (Marka 12:29-31) hong gen hi. Lai Siangtho in hong ki-it thukkik ding ciang bek na genlo  hi. Jesuh in: “Midangte in keima hangin a manlopi-in hong simmawhin hong bawlsia a, a nam tuamtuamin hong gensiat uh ciangin thupha ngah mi na hi uh hi. Note’ ading vantungah thaman lianpi kikoih kholhsak ahih manin tua bang na tuah uh ciangin nuamin na lungdam un” (Matt. 5:11-12). 

    Midangte i it ding ciangin i mangngilhloh ding thu khat in: Pasian bek tawh itna khempeuh kipan hi (1 Johan 4:19).  Moses in Israel mite kiangah midangte sangin Pasian itna ngahzaw ahihna gen hi (Deut. 10:15). Tua hangin khualmi a kipan midangte it ding Topa in kal hi (tg.19). Ama’ itna a ngah mite in midangte tungah a luansak kik dinguh Pasian in deih hi.
 

   Pasian pen itna ahih manin, Amah lo-in itna man taktak kipiakhia thei lo ding hi (1 Johan 4:7-8).– Julie Ackerman Link
 

Itna in angsung zong lo
Pasian’ van tokhom nusia’n,
Bawng kuang le Singlamteh teelin
Itna ahih lam hong kilaak. – Wilmshurst


Pasian pen itna ahih manin, itna neilote in Pasian theilo uh hi. –1 Johan 4:8


Nisim Thalakna: ITNA MIT

October 31
Nili

ITNA MIT

SIMDING:
Marka 10:17-27

Tua ciangin Jesuh in amah en gige a, it mahmah hi.__Marka 10:21


KUMTAWN LAI SIANGTHO:

Jeremiah 22-23
Titus 1

Marc Salem in mi lungsim thei hi ding hi, ci-in pawi en hong paite in gen tek uh hi. Ahih hangin amah in, kei pen lungsim lam siam, ai siam hi keng. Ahi zongin mipi’ lungsim bangci ding cih naitaka a enpa hi ing, kici hi. Amah in laigelh Mulson kiangah, “Eite pen a kimu theilo na tampi kawmkal-a nasem ihi-a.... mipite in hong piakte ka ngaihsut ciang lunghimawh theihloh dingin ka tuat hi” ci hi.
  

  Jesuh in mipi tawh a kimuh ciang ciapteh huai nono tampi om hi. Matthai, Marka, le Luka Lai Siangtho sungah tawntung nuntakna a lunggulh khangno mihaupa’ thu i mu hi. Marka in “Tua ciangin Jesuh in amah en gige a, it mahmah hi” (Marka 10:21) ci hi. Mi pawlkhatte in ahih leh hih pa pen mudah ding uh hi (tg. 19-20). Ahih keileh, haza ding uh hi. Ahi zongin Jesuh in itna mit tawh en hi.
 

    Eite in, hih tangvalpa’n pen a neihsa khempeuh piakhia-in Jesuh’ nungzuih ding kingap phalo ahihna khat bek i bulphuh hi (tg. 22). Mihau khat Pasian’ gam sung tun ding abaihlohzia nungzuite’n a zak uh tak ciangin (tg. 26), “Jesuh in amaute en a, ‘Mihing’ ngaihsutna tawh piang theilo a, Pasian’ ngaihsutna bek tawh piang thei hi; Pasian tawh na khempeuh piang thei hi’” (tg. 27) ci hi.
 

    Tuni-in, Jesuh in eite itna mit tawh hong en-a, ama’ nungzui dingin hong sam hi.__David McCasland

 Vangliatna taangpi tawh Amah hong pai,
Mawhna dim leitung ah;
Ka mawhna le maizumna khempeuh amah’n pua gai,
Tua zah liangin hong it.__Roth

Pasian in na khempeuh a muthei mit le a maisak thei lungtang nei hi.

Nisim Thalakna: A NUNUNG PEN

October 30
Nilai

A NUNUNG PEN

SIMDING:
Mangmuhna 22:6-20

Na lungneemnate midangte’n hong thei tahen. Topa’ hun hong naita hi._Filippi 4:5


KUMTAWN LAI SIANGTHO:

Jeremiah 20-21
2 Timoti 4

Ka lawmte lakah khat in tangthu-bu khawng a sim ding hileh, a tawpna lampan sim citciat se hi. Amah in, “I sim laitak i tawldam zaw hi” ci hi. Khristian-te zong: a tawpna a thei khinsate ihih manin, lauhuaina tampi i tuah hang a lungnuam dingte ihi hi. 

    Sawltak Paul in Filippi 4:5 ah ‘nun neem ding” hong to hi. Tua pen haksatna sung pan lungnopna ahi hi. Tua in tuhun aa tuihual a bang nisim nuntak haksatna ah lungnopna le suahtakna bulpi ahi hi. Gampi kisia dinga, lawmte in hong taisan thei-in, Pawlpi zong kikhakcip thei hi. Tuipi khangin, mualte kicim thei-a, eite i lungmuang thei veve hi. 


    Tua hileh eite bangci gamtat ding? I lungsim sungah “Topa’ hun hong naita hi” (Fil. 4:5) cih i theitek a, Amah hong naita hi. Kongkhak kiangah dingin i lungsim sungah bang om cih hong tel hi. Hih leitung le a sunga om khempeuh Ama’ kumpi gam hong suak dinga, “Tuite in tuipi a tup mah bangin leitung khempeuh in Pasian’ pilna mu ding uh hi” (Hab. 2:14).
  

  Jesuh in, “Kei kong pai baih mahmah ding hi” (Mang.22:20) ci hi. Tuni zong hikha thei hi! A laibupi sungah a nunung pena a gen thu ahi hi. ––David Roper
 

     Topa, a tawpna thu ding teng telkhin ka hih manun bangmah ka patau kei ding hi. Nang hong umte in Nang tawh ni khat ni ciang tawlnga ding cih ka thei uh hi.
 

Topa hong paikik ding cih thu sangin leitung nuntakna ah hong phawksak thei thuhilhna kicing ka thei kei hi.

Nisim Thalakna: LAMDANG LUA!

October 29
Ninih

LAMDANG LUA!

SIMDING:
Job 42:1-6

Kei bangmah a theilo kimlai, ‘bang hangin ka pilna hong dem ngam na hiam? nong ci hi. Keimah in ka tel zawhloh thute, kei-a dingin lamdang lua hi.__Job 42:3


KUMTAWN LAI SIANGTHO:
Jeremiah 18-19
2 Timoti 3

Ka vanleng uh lei-ah atuk ding a kithawi laitak, vanleng nasemte in lei-ah tuah nading thu tawh kisai hong gen samsam uh hi. Tua pen amau zong ngeina bangin ngaihsun lel uh ahih manin  “Lungdam takin tuni zang in” cih  tawh tawp hi. Amah’n zong tua bang a gen ciangin ngeina seh lela, lawp huailo hi. “Lungdam tak” cih azat hangin hong gen dan hileh, lungdam tuaklo mawk hi. 

    Tua bang kampau tawh i Topa Pasian i biak khak ding ka kihta mahmah hi: Ngeina. Cimtaak. Lungsim kihello. Lawpna kihello..., cihte. Khris hangin Pasian’ innkuan sungah i kihel kha-a, ahi zongin a ngeina bang danin kingaihsun khazel ahih manin lawp ding zong i ngaihsun nawn kei hi. 


    Job in ama’ thuakna hangin Pasian tungah dotna nei-a, Pasian in Ama’ bawlsa nate tungtawnin a ngaihsut theih ding thu pia hi. Job in, “Kei bangmah a theilo kimlai ‘Bang hangin ka pilna hong dem ngam na hihiam?’ na hong ci hi. Keimah in ka tel zawhloh thute, kei-a dingin a lamdang lua thu a gengen ka hi hi” (Job 42:3) ci-in dawng hi. 


    Pasian in ka lungsim hong kepzawh nading Ama’ lamdanzia ka thei nuam hi. Pasian in kei hong kem - bangzah-in lamdang hiam!––Bill Crowder


    Aw lamdang lua! Lamdang mahmah!
Keima’ lapi hisak ning:
Aw lamdang lua! Lamdang mahmah!
Ka honpa’n kei hong it hi! ___Gabriel


Pasian’ vangliatna le itna longal in i lungsim hong picingsak thei lo hi.

Nisim Thalakna: PASIAN NGAK

October 28
Nipi Khuavaak


PASIAN NGAK

SIMDING:
Late 27

Topa lamen-in ka ngak ngiungeu a, amah kei lam hong nga-in ka kikona hong za hi.
__Late 40:1

KUMTAWN LAI SIANGTHO:

Jeremiah 15-17
2 Timoti 2

Tuhun pen phone khawng tawh i kiho theizela, i kizak dan nop keileh i langte’ hong dawnna khat zong ei-a dingin nuihzak huai lel hi. Internet khawng ah connection khawng hoih keileh zong i lung sauzo tuanlo hi. 

    Khat veivei Pasian in i thungetna hong dawnglo ahih manin i khasia thei hi. I lungsim sungah, “Topa, ka thungetna hong dawng in, ka lungkia lua hi!” (Late 143:7) i cih hun tamveipi hita hi. 


    Pasian i ngak theih tak ciangin upna lam-ah a picingte kisuakzo pan hi. Kumpi David in kum tampi sung Saul’ hehna hangin galtai-in oma, a tawpna-ah kumpi suak veve hi. David in, “Pasian ngak inla, thakhauh in; Na lungsim hong khauhsak ding hi” (Late 27:14) ci hi. A dang khat leuleu-ah, “Topa ka ngak tinten-a, Amah in ka kahna le sapnate hong za hi. Amah in ka khete suangpi tungah hong dingsak a, ka lampi kipsak hi” (40:1-2) ci-in hong hanthawn leuleu hi. David pen Pasian’ lungtuakpa hi-a, Pasian a ngakzo pa zong ahi hi (Sawltak 13:22; 1 Sam. 13:14). 


    Pasian in i thungetna hong dawn pakloh ciangin, Amah in i upna le cihtaknate i khahsuah ding deihloh ahihna i tel semsem a, Ama’ sungah hong khangcingsak hi (James 1:2-4). Topa ngak in!__ Dennis Fisher


Thunget hun nuam, thunget hun nuam,
Va lenpih in kei ma thuumna,
Keima kha thupha a pia nuam,
Thuman a dik Pasian kiangah. __Walford


 
Pasian in i kha a picin nadingin hong lungduaisak hi.

Nisim THalakna: HUIHPI LAKA PASIAN

October 27
 Nipi Ni 

HUIHPI LAKA PASIAN

SIMDING:
Job 37:14-24

Pasian vanglian taktak hi.__Job 37:23

KUMTAWN LAI SIANGTHO:

Jeremiah 12-14
2 Timoti 1

Zingsang tuung khatvei, huih le guahmal kithuah-in ka inn uh suang ii den bang hi. Innpua lamah ka dak khia-a, huih in a naak mut mahmah singkungte ka en hi. Vanpi gingin keek kia ziahziah hi. Mei zong mitzel, taangzel-in hong oma, tua bang khuasiat sawtveipi hong hih ding ka dah hi. 

    Tua huihpi hong daih tak ciangin nisim a ka neihzel Lai Siangtho simna ka nei hi. Job Lai Siangtho sunga Pasian’ vangliatna le huihpi ka tehkaak hi. Job’ lawm Elihu in, “Pasian’ aw pen keek kia bang hi” (37:5) ci hi. “Amah in keek thupia a, a kap nop penpen a kha dingin a sawl hi” (36:32). Pasian pen “vanglian taktak hi” (37:23). 


    Pasian tawh tehna-in mihingte pen thazawm hi. Ei le ei zong kihuh zolo-in, i lungsim zong i damsakzo kei hi. Siatna khempeuh zong i zozo kei hi. Huihpi Pasian in tua a thazawm mihingte hong huh ahih manin hampha hihang; “Amah’n ei leivui ihihna hong thei hi” (Late 103:14). Pasian in “mi zawngkhalte vang pia-in, tha hatlote zong tha guan hi” (Isa. 40:29). Pasian vanglian ahih manin, i thaneemna khempeuh-ah hong huh thei hi.__ Jennifer Benson Schuldt


Pasian’ vangliatna ka phat ding hi,
Mualte sang sawn sak thei-a,
Gunte zong ama’ thu tawh luangsak thei,
Vanmongpi nangawn Ama’ bawlsa. __Watts

Pasian pen i thahatna bulpi hi.