Nisim Thalakna: KIMU LO

October 12
 Kigin Ni


KIMU LO

SIMDING:
Isaiah 40:25-31

Pasian in a zawngkhalte tha guan hi__Isaiah 40:29


KUMTAWN LAI SIANGTHO:

Isaiah 39-40
Kolose 4

Ka lawm Jane in a nasepna tungtang thupiang khat hong gen hi. Kuamah’n dawnglo hi. Khatvei hong genkik a, kuamah’n dawng tuanlo hi. A naseppihte’n theihmawh bawl hi. A telkhiat thu khat in tua thu thupi khollo hi ding hi, ci-in mu hi. Kuamah’n thudon pihlo hi, ci-in kingaihsun hi. Tua bang tuakkha ngei ding hiteh.

    Pasian’ mite in tua bang ngei-in  tuakkha uh hi (Isa. 40). Amau’ nuntak haksatna a thudonlo pen Pasian bek hi, ci-in ngawh nuam uh hi! Khanglam kumpi gam Babylon khutnuai hong tun ciang amaute in: “Ka lampi kiseela, ka thuumnate Topa’n hong dawnglo hi” (tg. 27) ci uh hi.


    Isaiah in Pasian tawh kiteh lehang, “gamte pen tuikuang sunga tuimal khat bang bek hi dinga, leivui cia bekmah hi ding hi” (tg. 15) ci hi. Ama’ deihsak mite tungah tha le vang neihna a piaklam gen hi (tg. 29). Topa lunggulh peuhleng, Amah’n tha hong guan thei hi, ci hi. Amaute mu vanlai tawh kibang dinga, amaute tai napi-in tawl ngeilo ding hi (tg. 31) ci hi.


    Mite in hong theihmawh bawl hangin, Pasian in hong mu-in hong it ahihlam phawk in. Amah ngak in, thathak hong guan ding hi.– Anne Cetas


Leivui tawh kibawl no mite aw,
A kisia thei na hi uha, Amah bek muang un.
Topa itna kip tawntung hi, A tawp dong om den ding!
Amah eite hong bawl, hong keem, i lawm hoih pen.__Grant

Pasian’ hong ompih lam i theihloh hang, Ama’ hong itna in hong tuam den hi.

Nisim Thalakna: A SUNGA THUPI

October 11
 Ninga

“A SUNGA THUPI”

SIMDING:
Rom 8:1-11


Kha Siangtho’ uk ngaihsutna in nuntakna le lungnopna ahi hi.___Rom 8:6

KUMTAWN LAI SIANGTHO:

Isaiah 37-38
Kolose 3

Lampi nih kikal a innpi khat pen deih huailo mai hi. Iplah ding zong omkhol lo-in, ngaihsut huailo phial hi. Tua zawh ni tampi khit ciangin tua inn mai-ah “Kizuak hi” cih lai na kisuang hi. Tua lai tawh “Inn sung bel nasia mahmah hi” cih kammal khat kisuang khawm hi. Inn lei dingin a pai ka hih loh hangin, tua laimal in kei hong lunglutsak mahmah hi. Ngaihsut ding ka sak hetloh inn pen bangci bangin nasia mahmah thei ding? ka ci hi. 

    Tua tawh kizomin: Jesuh’ nungzuite zong tua bangmah hilo hiam? cih ka ngaihsun hi. Lungngai pak dih. I puatham ah etsuah ding bangmah i nei kei phial zong, Pasian’ itna le Ama’ nasepna in eite’ nuntakna hong tuam hilo ahi hiam? 


    Lai Siangtho in sunglam hoihna bangci gen hiam? Roman 7:22 ah, “Ka lungsim tawng taktak ah Pasian’ thukham sungah nuam ka sa hi” ci hi. Rom 8:6 ah Paul in, “I lungsim Kha Siangtho in hong uk leh nuntakna le lungnopna kingah” ci hi. Galati 5:22 sungah Kha Siangtho hangin i sunglam panin Kha Siangtho gah kigah hi, ci hi. Tuate in itna, lungdamna, kilemna, lungduaina, le hehpihnate ahi hi. 


    Lai Siangtho tungtawnin lungdamna le Kha Siangtho i lungsim sungah na i sepsak tak ciangin - sunglam hoihna tawh i kidim dinga Pasian’ min i  thangsak hi.__Dave Branon

Topa, kei’ sunga om na Kha Siangtho hangin midangte nuntakna a kaizawlzo nuntakna ka hih theih nading, le Nangma’ min a thangsak dingin ka kipuahpha ding hi.
 

Na lungsim sungah thumanna vom peuh lecin,
Na gamtatna-ah hoihna kilangsak zo niteh.

Nisim Thalakna: TECI PANNA

October 10
 Nili


TECI PANNA

SIMDING:
Sawltak 1:1-9

Ahi zongin note tungah Kha Siangtho hong tun ciangin vangliatna tawh na kidim ding uha, ...keima thu na gen ding uh hi. ---Sawltak 1:8



KUMTAWN LAI SIANGTHO:
Isaiah 34-36
Kolose 2

Ka neulai kum (10) gual ka phakin mawtaw kibut mu ka hih manin thusitte’n hong dong hi. Tua pen nasia mahmah-in zong a thu zong tam mahmah hi. Tua thupiang amu kei bek ka hih manin, sitnite khat khit khat in ka muh bang ka gen ding hong kal uh hi. Mawtaw kisiatzia le mi liam, mibai cihte hong dong vetlo uh hi. Bang lian mu na hiam, cih hong dong sese uh hi.
   

 Jesuh nungzuite ihih manin, Jesuh in ei-a ding bang sepsak cih teci a pangkhia dingte i hihi. Mite’n Jesuh a theih nadingin Lai Siangtho thusinna thukpite zong kisamlo a, dotna khempeuh zong dawn ding kisamlo lel hi. I genkhiat ding pen Jesuh in Ama’ sihna le thawhkikna hangin ei tung ah bangci bangin na hong sem hiam, cih pulaak ding ahi hi. Tua sangin a thupi zaw khat in tua bangin i taangko khiat ciangin ei’ hih theihna bek suanglo ding hihang. Jesuh in, “Ahi zongin note tungah Kha Siangtho hong tun ciangin vangliatna tawh na kidim ding uha, Jerusalem, Judea gam, Samaria gam, le leimong dongin keima thu na gen ding uh hi” (Sawltak 1:8) ci-in hong vaikhak hi.
   

 Kha Siangtho’ vaang-ah kinga ihih manin, natna a thuak leitung-a ding honpa Jesuh tungah i lah ding ahi hi. Ama’ huhna tawh eite tungtawnin midangte in a nuntakna uh kikheel bek ding uh hi.––Bill Crowder
     Athu ka gengen nuam hi, Muh nailoh vantung gam;
    Jesuh le Ama’ vangpi, Jesuh le hong itna.
    Tua thu ka gengen nuam hi, Thuman ahih manin;
    Ka lungsim hong kimsak hi, thudangte bang lo-in.

I genkhiat ding thu in Pasian’ hong sepsate thu ahi hi.

Nisim Thalakna: KHOMUN LO NUNTAKNA

October 9
 Nilai ni

KHOMUN  LO NUNTAKNA

SIMDING:
Johan 6:25-35


Kei pen nuntakna khomun ka hi hi.
____Johan 6:48


KUMTAWN LAI SIANGTHO:

Isaiah 32-33
Kolose 1

Duh bangbang teel theih hunah, khomun (pongmoh) pen a kisam pen an hisamlo ahih manin pawl khatte in thu tuamtuam hangin nelo lel uh hi. Kum zalom khat lai-in khomun pen kihello theilo nisim neek theih khat na hi hi. Khomun kihello an cih pen tu lamlam ciang beka kizang ahi hi.
    

Nikhat, mipi in Jesuh mu nuamin zong uha, ahang in khatvei lai-in moh lumte khangsak thei ahih man ahi hi (Johan 6:11, 26). Amaute in tanglai hunin Pasian in vantung pan manna mohte a khiat bangin, tua bang a piansak ding ngen uh hi (6:30-31; Pai. 16:4). Jesuh in “Kei pen vantung pan hong pai khomun hi ing” (Johan 6:32) ci-a mipite in tel theilo uh hi. Amaute in nisim an bekbek lunggulh uh hi. Jesuh in ahih leh amaute’ kha an dingin hong kisawl ahihna gena; amaute’ nisim kha tha kisapna teng a pia ding hong pai ahihna gen hi. Amaute in upna tawh sangin amau’ kha adingin la thei le uh, tawntung lungdamna ngah ding uh hi (tg. 35).
    

Jesuh in deih leh neek, deih keileh neekloh cih bang an hong pia hilo-in, i nuntakna ading kihello a phamawh an hong pia nuam hizaw hi. Nidang Jew mite bangin khomun lo an ahihloh bang mahin, kha an ahi Jesuh lo tawh nisim kalsuan kha kei ni!– Marvin Williams
NGAIHSUT BEH DING
Nuntakna khomun ahi Jesuh kihello-in
nisim na gilkialnabang ci bangin,
a thu lo tawh vahsak thei ding na hi hiam?

Kha an bek in a gilkial khate lungkimsak zo ding hi.

Nisim Thalakna: PASIAN IN HONG KOICI SIKH?

October 8
Ninih


PASIAN IN HONG KOICI SIKH?

SIMDING:
Thuhilhkikna
24:19-22


Ama’ lo akho pa in khamkhop an ngah ding hi. –Paunak 12:11


KUMTAWN LAI SIANGTHO:

Isaiah 30-31
Filippi 4

Inn pua ah zulei in a singgah neihsun khat phalbi hun sung mun bitna le olno taka kilakkik theihna mun-ah koih dingin buai mahmah hi. Ka lunglut mahmah laizang hi. Ka huang pua lamah sanang tampi tak dai hiat-hiat-in pai hialhial uh hi. Ahi zong dena zulei khat a gin pen  lian mahmah hi. 

Hih ganhing tegel kilamdang tuak mahmah uh hi. Sanangte in phalbi ading ngaihsunlo uh hi. Vuuk hong kia leh zong lamkiim lampaam aa nektheih nekmawh teng ne uh hi. Ahi zongin zulei in tua bangin anneek ding baihlo hi. Amau an ding haksa mahmah hi.
   

 Tua sanangte le zulei in Pasian’ hong kepna kilangsak hi. Nasem dingin hong nungtasak a, mailam hun ah i kitangsapna khempeuh hong mu hi. Mipil thugenna in hong hilh bangin “kitangsapna khempeuh ah a kicing dingin Pasian in tampi tak hong piazo hi” (Paunak 12:11) ci hi. Topa in lauhuaina kawmkal panin mun nuam-ah hong paipih hi (Late 23).
    

Thu dang khat leuleu ah, Topa in mizawngte a hawmkhia dingin mihau tampite thuhilh hi (Thuhilhkikna 24:19). Topa hong huhna i ngaihsut ciangin Lai Siangtho’ hong hilh thu in: sep theihlai-in nasem ding, khol theih lai khol ding, piak theih lai piakhia ding, le kisapna khempeuh ah Topa muang ding cih ahi hi.–Julie Ackerman Link
        

Topa, ka lungdam, Nang ka kisapna teng ah hong sikh teh. Lau lohna ding le muan khialh loh ding hong huh in. Kote nong encik dena, ka kahna awte Nong za zo hi. 

        Pasian’ huhna in i kisapna hong cinlah lo ding hi.

Nisim Thalakna: MIPI LAKAH PHATNA

October 7
Nipi Khuavaak

MIPI LAKAH PHATNA


SIMDING:
Late 96

Ama’ minthanna gam khempeuh ah phuang unla, mite tungah kitheisak un.__Late 96:3


KUMTAWN LAI SIANGTHO:

Isaiah 28-29
Filippi 3

Hoih ka sak mahmah YouTube video ah vanzuakna khat-ah mite in vanlei-in a om laitak mi khat in “Hallelujah Lapi” nakpi takin sa-in mi’n en ngeingai uh hi.  Tua bek hilo-in agei a khatpa in zong sakpih-in, tua ciangin khat khit khat kilawh ngeingai uh hi. Tua ciangin atawpna ah tua vanzuakna phualpi pen tua lasakna mun hong suak mawk hi. Tua pen company khat in la sa ding teng mun khempeuh ah koih sitset sa-in nei a, Pasian’ hoihna a kilangsak dingin, nisim neek le dawn tawh a buai mipi tungah a taangko khia hi hi.
   

 Tua video ka etkhak simin ka khitui hong luang hi. Nisim nuntakna khat peuh-ah Khris tawh kibang nuntakna tawh Pasian’ minthan sak nading hong theisak gige ka sa hi. Mi pawlkhatte Pasian’ thupha a sangkha dingin zong a kingaihsunlo tampi om, cih thei in. Tuate ading lampi khat hongin Pasian’ hehpihna i theihsak ding le a lunggim i lawm le gual ading zong ngaihsut sakin, buaina tawh a kidim hih leitung ah zong nopna, lungdamna khat a tangko khia dingin Pasian hong sawlnate zong phawk ni.
    

Late laphuakpa bangin “Pasian’ minthanna le a khutmate mi khempeuh tungah genkhiat ding” (Late 96:3) nasep lianpi sem ding hong kisam ahi hi.–– Joe Stowell 

Topa lungdam ing.
Nisim ka nuntakna lel tawh
Nangma’ vangliatna midangte’ tung kizelsak ding hong sawl hi.
Na sepna khempeuh midangte in a tel theih dingin kei’ tungtawnin hong bawl in. 

Nang tunga hong tang Jesuh, 

midangte’n lamdang a sak dingin pulaak khia in.

WORLD COMMUNION SUNDAY 6 OCT 2013 PHOTO

Lai Siangtho Sinna  (Matt. 12:38-50)~ Asst. Pastor Zam Khen Khai

Siampi thungetna~Rev. Ngul Cin Thang

Sumpi apna (Doxology)~Church Secretary
Phatna La (Solo) ~ Lialian

Phatna La (Quartet) ~ Didim leh alawmte

Neekkhawm hunzatna~ Church Pastor

Hanthotna:          KHRISTIAN THUBUL NI ( “Two Major Doctrines”)

CHURCH CHOIR

 Hun uk:  Associate Pastor



Phatna La (Solo) ~ Sum Mung
Camera hong zang sak YD- Secretary Lia Thang Suan Dim tung ah Lungdam na nei hi.

Matt. 12:38-50 (Bible Study)

Asst. Pastor Zam Khen Khai (6 OCT 2013)
Alian 12
38

Tua ciangin Thukham hilh siate leh Farisi mi pawlkhat in Jesuh kiangah, "Sia aw, na lamdang khat nong lah ding ka deih uh hi," ci-in a ngen uh hi.
39

Ahi zongin Jesuh in, "Tuhuna mite bangzahin giloin, Pasian' thu theilo ahi uh hiam? Na lamdang ka bawl ding na hong ngen tazen uh hi. Jonah thu tawh kisai na lamdang longal adang hong kilaklo ding hi.
40

Ngasa gilpi sungah sun thum leh zan thum sung Jonah a om mah bangin Mihing Tapa zong sun thum leh zan thum sung mah leisungah om ding hi.
41

Jonah in amaute kiangah thu a hilh ciangin a mawhna panun kisikkik uh ahih manin thukhen ni ciangin Nineveh khuamite in note mawhsakna thu hong gen ding uh hi. Note kiangah kong genin-ah: Tu mahmahin note kiangah Jonah sangin a lianzaw khat a om hi.
42

Leitaw lam gam kumpinu in Solomon' pilna thu a ngai dingin leitung phelkhat kantanin hong pai ahih manin thukhen ni ciangin amah in note mawhsakna thu hong gen ding hi. Note kiangah kong genin-ah: Tu mahmahin hih lai-ah Solomon sangin a lianzaw khat a om hi
43

"Mi khatpeuh sung panin dawi a kihawlkhiat khit ciangin a ten'na ding mun keuna zongin a vak kawikawi hi. Ahi zongin a ten'na ding mun a muh zawhloh ciangin,
44

'Ka paikhiatnasa inn mahah ciahkik ning,' ci hi. A hong paikik ciangin tua inn na awnglai a, kipuah siangin hoihtakin a om a mu hi.
45

Tua ciangin va paikik a, amah sangin a siahuaizaw dawi sagih hong tun'pihin tua mipa sungah a teng uh hi. Tua ahih manin tua mipa pianzia pen a masa huna sangin a siazaw hi. Tua ahih ciangin tuhuna migilote zong hih mipa' pianzia mah tawh kibang ding uh hi," a ci hi.
46

Tua bangin mite kiangah thu genin a om laitakin a pualamah a nu leh a naute in Jesuh hopih nuamin a om uh hi.
47

Tua ahih manin tua lai-ah a om mite khat in Jesuh kiangah, "Na nu leh na naute in nang hong hopih nuamin a pualamah om uh hi," a ci hi.
48

Ahi zongin Jesuh in tua mipa kiangah, "Ka nu kua bangte hi a, ka naute kua bangte ahi uh hiam?" a cih khit ciangin
49

a nungzuite lam kawk a, "Hihte pen ka nu leh ka sanggamte ahi uh hi.
50

Vantungah a om ka Pa' deihna bangin a gamta mi peuhmah ka sanggam pasal, ka sanggam numei, ka nu ahi uh hi," ci-in a dawng hi.

Nisim Thalakna: A LAUHUAI HUN

October 6
 Nipi  Ni

A LAUHUAI HUN

SIMDING:
2 Khangtangthu
20:1, 15-22

Galdona in note-a hilo a, Pasian-aa ahi hi.–2Khang.20:15


KUMTAWN LAI SIANGTHO:
Isaiah 26-27
Filippi 2

Nick Wallenda in Niagara Tuizeu tung asanna pi 1800 ah khut-dawh cia apha khau tungah lam apai pen mi awn tampi in TV panin en uh hi. Nakpi takin kiging mahmah hi. Anuai-a tui luang, le tuikhute in a mit nuamsak lo a, huih in zong mut pian hiauhiau a sawi pai pianin, dipkuat huai mahmah hi. Tua bang lauhuaina kawmkal panin, amah in “Topa tungah nakpi tak thungen-in, Amin ka phat hi” ci hi.
   

Israel-te in zong lauhuaina kawmkal panin Topa’ min phat hi. Ganhang tampi takte in amau sim dingin hong kuan uh hi (2 Khang. 20:2). Pasian tungah huhna a nget ciangin, kumpi Jehosafat in gal maitang ah akuan dingin lasa dingte paipih hi. Amaute in “Topa phat un, Ama’ itna kip tawntung hi” (tg. 21) ci uh hi. Tua bangin a sak uh ciangin, Topa in amau le amau kidosak manggawp uh hi.
    

A lauhuai mahmah hun nangawn-in Topa phat ding cih pen i mihing lungsim zawhgawpna ahi hi. Ei le ei kihu nuam, kidal nuam-in, i patau hi. Ahi zongin Biakpiakna in tua bang mihing kimuanna le patauhnate thengsak hi. Israel-te in a tuahsa uh ahih mah bangin eite in zong: “Galdona pen Topa-aa hi” i cih ding ahi hi.–– Jennifer Benson Schuldt
   

Topa, Na min kong phat hi. Nong itna kipden hi.
Ka nuntak sunga ka do gal khempeuh Nang-aa hi.
Zawhna khempeuh zong Nang na nei tawntung hi.


I mai-ah bangbang a om zongin Pasian i nungah omden hi.