Nisim Thalakna: KHAT, MANPHATNA

October 5
 Kigin Ni

KHAT, MANPHATNA

SIMDING:
Luka 15:1-10

Tuu za lakah khat a mansuah pa in, a dang sawmkua le kuate nusia-in, a mang khat zong dingin kuankhia hilo hiam? ––Luka 15:4


KUMTAWN LAI SIANGTHO:
Isaiah 23-25
Filippi 1


Kim Haskins in lukhu neelkai alaak madeuh nai khatin mawtaw kibutna hangin apa si-in, anu zato ah kipuak hi. A zingciang a Syapipa zato ah hong hawh-in sang pan thu khat vaihawm ding hoih asakna gen hi. James Drew in a laigelhna-ah Syapipa a kipan, Sya/mate, makaite, le a sangkahpih lawm le gualte’ itna pan Kim ii thuakna hangin dah uha, buaih kipiak zawh ni tawm khat sungin tua innpi dimin hong kikaikhawm uh hi, ci hi.
    

Syapipa in, “Pilna sinna ah naupang khat zong kinelhsiah loh ding kigenpha hi. Galkap sungah zong galsung ah kuamah kinusia lo ding cih thu om hi. Tuni-in, sangmansa khat nusia kei ni” ci hi.
    

Jesuh in mimal khat ii  manphatna gentehna thum tawh gen hi: tuu mang, sum mang, le tapa mang (Luka 15). Tua gentehnate ah manpha a saktek uh a mang ahi hi. A muhkik uh ciangin, innvengte samin lungdamna pawi bawl uh hi.
   

A gennop thu in: Pasian’ mai-ah manpha  hi hang, Khris hangin nuntakna thak le mawhmaina hong kipia hi. A itna le hehpihna tawh eite hong zong lailai hi. Mimawh khat a kisik ciang, vantung ah lungdamna lianpi om hi (tg. 7).– David McCasland

    Kei ka gammang Jesuh’n hong mu -
    Tuu banga gamang hong mu,
    A khut tawh kei hong kawi-a,
    Ama’ lampi maan ah hong kha.___Rowley


Pasian’ hong sepsakna tungtawnin i manphatna kiteh hi.

Nisim Thalakna: A KITEH ZOLO

October 4
 Ninga


A KITEH ZOLO

SIMDING:
Efesa 3:14-21


Note’ sunga Pa pen leitung a ompa sangin lianzaw hi.__1 Johan 4:4



KUMTAWN LAI SIANGTHO:

Isaiah 20-22
Efesa 6

Hong piang mahmah kei’n teh, Aunt Julie aw. Na lungsim sungah ngaihsun nawn vet kei in.”
 “Piang kei mah inteh. Ahi zong piang theilo cih bang hilo hi” ka ci veve hi.
    

Kum sawtpi lai-in ka tunu tawh ka innkuan vai ka kupna khat pan kihona ahi hi. Tua sungah kong genloh thu khat pen in: “Hong piang thei ding cih lam-en ing. Bang hang hiam cihleh, Pasian in na khempeuh piangsak thei hi” ka ci hi. Ka lungsim sungah bel: “Midangte’ innkuan sungah bel tua bang a piang hibek” ci-in ka ngaihsun hi.
   

Tunung deuh-in ka pastorpa un Efesa Lai Siangtho thu hong gen hi. Hun a man ding ciangin mipi in: “Eite-a dingin na a hong sepsak, eite’ ngetzah val, le i ngaihsut zawhloh zah dongin a vangliatna tampi tak ahong hihsak thei eite’ Pasian pen, Pawlpi mite khempeuh le Khris Jesuh tawh a kipawl mi khempeuh in a khang khangin phat ciat ta uh hen! Amen” (Efesa 3:20-21) cih thungetna tawh ka khup uh hi.
    

Tukum pen Pasian in ko’ innkuan sungah “simzawhloh thupha” hong pia ding cih ka lam-en mahmah hi. Bangci bangin sem thei ding hiam? Tua bang piang thei cih ka thei hi. Lamdang sak huailo hi! Satan in itna pen huatna ah kheel thei ahihleh, Pasian in huatna pen itna tawh laih thei taktak ding hi.– Julie Ackerman Link
 

Lungdam, Topa. Ngaihsut zawhloh zah dong dingin na Nong sem hi.
A piangtheilo ding hun nangawn ah a piangsak thei dingin na Nong sep ciang ka lungdam mahmah hi.

Satan’ siatsak theihna vang sangin Pasian’ itna vang lian zawpek hi.

Nisim Thalakna: OMPIHNA THUPHA

October 3
Nili

OMPIHNA THUPHA

SIMDING:
Johan 11:14-27


Nupi pawlkhat in Martha le Mary va kahpih uha, a lunggimna teng va hehnem uh hi.
___Johan 11:19


KUMTAWN LAI SIANGTHO:

Isaiah 17-19
Efesa 5:17-33

Company khat ah manager dingin hong kiteel tuungin, ka muh ngei nailoh ka nasemte khat ii kivuina ah ka kihel hi. Amah pen leiseek nasep sempa khat hi-a, a lawmte in it mahmah uh hi. Azi ahih leh, a phawk khalo tamzaw uh hi. Khatpa in azi va hehnem aa, “Mi tampite in nang hong hopih lohna ahang pen kammal khat peuh hong genkha-in nang na lungnop zawlo-in na dahna a khan semsem ding a deihloh man uh hi,” ci hi.
    

Tua bang dahna a kituah ciangin mite in a kampaute uh phawkin a neilo om thei hi. Tua sungah a kihel lam bek thei uha, adang teng thei nawnlo uh hi. Meel kimuhna bek in zong gennop tampi genkhia khinzo a, dahna tampitak phatuamsak thei hi. Tua banga va kihelna bek in kipiakkhiatna khat hi-a, kammal tampi zong genkul nawnlo hi.
    

Nupi pawlkhat zong Martha le Mary-te a sanggampa Lazarus sihna hangin a hehnem dingin hong pai uh hi (Johan 11:19). Tua sungah amuhnop mahmah uh Jesuh hong pai-a amah zong kap hi (tg. 33-35). Tua bang amu mite in “Amah’n zong Lazarus it mahmah hi ding hi!” ci uh hi (tg. 36).
    

Tua bang dahna tuamtuam i tuah ciangin, Jesuh in Ama’ ompihna tawh hong hehpih hi. Eite in zong midangte tungah tua thupha i va bawl thei hi.–Randy Kilgore
Ka telkhial ngei kei ding,
Kei tungtawna na deih hehnepna;
Kei ka omlam na thei ding
Dahna phualpi ah ei i kapkhawm.

A muibun pen hehnepna in va uappihna zong hithei hi.

Nisim Thalakna: KITEENNA

October 2
 Nilai ni

KITEENNA

SIMDING:
Mangmuhna 19:6-9

Tuuno zi neih ding hun hong tungta a, a Lawmnu a kithawisa-in omkhin ahih manin lungdam kipakin amah phat ni.__Mangmuhna 19:7

KUMTAWN LAI SIANGTHO:


Isaiah 14-16
Efesa 5:1-16

To Marry an English Lord cih tangthu laibu sungah kum zalom 19 lai-a American kumpi nam mihau khat in Britain gam-a kumpi nam-te khat a teenpihna thu kigelh hi. Hau tek uh hinapi, vaang le liim iplah uh hi. Tua laibu sungah Queen Victoria’ tapa Prince Albert American gam-ah vapai-in lawm le gual vaihawm ding khual azinna tawh kipan masa hi. Anneek pawi khaam uha, Prince Albert teenpih theih ding a kigingsim giugiau tampi hong pai uh hi.
   

 Khris a um mi peuhmah lam-etna bek tawh hilo-in, ni khat ni ciang Vantung Mopawi khaamna ah a kihel dingte i hihi. Johan in Mangmuhna Lai Siangtho sungah: “Tuuno zi neih ding hun hong tungta a, a lawmnu a kithawisa-in omkhin ahih manin lungdam kipakin amah phat ni. Puan siangin a paak mahmah, ama’ silh dingin kipia hi” (19:7-8).  Jesuh pen tuuno hi-a, motal pa zong hi ding hi. Thu-um mi khempeuh a monu ding hi uhhi.
   

 Khris’ mo dingte i hih manin eite zong tua nitawp ni cianga i motal pa tawh i kimuh ding ngaklah-in i omtek hi. Amah tawh zong i kimu nuama, zong i nai om nuam hi. Tua hun ciangin lungdamna cingtaak i ngah dinga (tg. 7), kumpite’ Kumpi, tote’ Topa i pahtawi ding hi!– Dennis Fisher
   

 Jesuh, Nang tawh kong omkhop ding uh ka lawp mahmah uh hi. Ka kiging tek uha, nang kote’ sungah nong teen den lohin kote nuntak siangtho ka nei thei kei ding uh hi. Hong kheel inla hong puah in.

Kumpite’ Kumpipa theihna sangin hamphatna dang omlo hi.

Nisim Thalakna: Hubble, Ganhing Khawina, le Naupangte

October 1
 Ni Nih

HUBBLE, GANHING KHAWINA, LE NAUPANGTE

SIMDING:
Late 148

Van-a om aksite aw, Amah phat un!__Late 148:3

KUMTAWN LAI SIANGTHO:

Isaiah 11-13
Efesa 4

Van dawna Hubble Space khua-etna, ganhing khawina, le lasa naupangte a kibatna na theihzawh leh? Late 148 tungtawnin cileng, amaute in Pasian’ bawlsa nate kawk uh hi.
    

Pasian in leitung bawl mah hiam, cih a kidong den dotna hi. Tua dotna a dawng ding hile hang, i Pasian’ hoihna le Ama’ bawlsate in hong lak hi.
    

Hubble khua-etna in leitung dangdangte zong hong lak hi. A kimu thei aksite in Pasian’ vangliatna bulphuh uh hi. “Van-a om aksite aw, Amah phat un!” ci hi.
    

Ganhing khawina ah pai lehang, Pasian’ bawlsa ganhing namkimte kimu thei hi. Tg. 7 le tg.10 na en-in Topa tungah ganhing namkimte hangin lungdam i koh theih ding kisam hi.
    

Naupangte in Topa phatna lasa-in, leitung le a sunga omte in a bawl Pasian’ vangliatna phatna in (tg. 11-13) Lai Siangtho sunga kigelh thuman hipah hi.
    

Aksite, ganhingte, le naupangte in: “Topa, Amah bek vanglian ahih manin A min phat un” (tg. 13) cih hong lak hi. Ama’ bawlsa leitung le na khempeuh en-in “Topa’ min phat un” ci-in lungdamko ni!– Dave Branon

Topa phat un, Amah vanglian Pa hi-a,
Na khempeuh a piangsak Pa zong hi!
Ka kha aw Amah phatna la gingsak inla,
Nang hong honkhia Pa hi!
Topa’ omna nai-ah Amah zahtakna tawh hong pai ta un!

Piansak naate in Pasian’ vangliatna hong lak hi.

Bible Study Matt 12:22-32 by Honorary Pastor Rev. Khoi Lam Thang

Honorary Pastor Rev. Khoi Lam Thang (29 sep 2013)
 

Matthai

Alian 12

22 Tua ciangin mi pawlkhat in Jesuh kiangah mittawt leh pau theihloh a thuah dawivei mi khat hong paipih uh hi. Jesuh in amah damsak ahih manin amah hong pauthei-in khua zong hong muthei hi.
23 Tua ciangin mi khempeuh in lamdangsa mahmah uh a, "Hihpa, i lametet David' suan hilo ding ahi hiam?" a ci uh hi.
24 Ahi zongin Farisi mite in hih thu a zak uh ciangin, "Dawimangpa Beelzebul min tawh dawi a hawlkhia hi lel hi," a ci uh hi.
25 Jesuh in amaute' ngaihsutna thei ahih manin amaute kiangah, "Gam khat peuhpeuh, a gammite kiphelkhamin pawlkhat leh pawlkhat kido le uh tua gam a sia suak ding hi; khua khat ahi a, innkuan khat ahi zongin kiphelkhamin kido le uh kiplo ding hi.
26 Tua mah bangin Satan leh Satan kihawlkhia le uh a ukna bangci kip theih ding ahi hiam?
27 Keimah in Beelzebul vangliatna tawh dawite hawlkhia ka hih leh na mipihte un a kua' vangliatna tawh hawlkhia ahi uh hiam? Na mipihte un na ngaihsut khialhna uh hong kilangsak hi.
28 Note' ngaihsut bang hiloin, Pasian' Kha in dawi hawlkhiatna ding vangliatna kei tungah hong pia ahih manin note lakah Pasian' ukna hun hong kipan khin ahihna hong kilang hi.
29 Mi khatpeuh in mi thahat khatpa' innsungah lutin a neihsate a laksak theihna dingin tua inn nei a thahatpa a hencip masak phot ding kisam hi. A hencip zawh khit ciang bekin a inn-ah lutin a neihsate lathei pan hi.
30 Kei hong pawlpihlo peuhmah keima lang hi uh a, kei hong kaihkhoppih lo peuhmah a thehthang ahi uh hi.
31 Tua ahih manin note kiangah kong genin-ah: Mihingte' kampau khialhna leh gamtat khialhnate kimaisak thei ding a, ahi zongin Kha Siangtho langpangin a gensiate kimaisak lo ding hi.
32 Mihing Tapa langpangin a gensiate a mawhna uh kimaisak thei ding a, ahi zongin Kha Siangtho langpangin a gensiate pen tuhuna kipan a tawntungin a mawhna uh kimaisaklo ding hi.

Nisim Thalakna: TUI TAMPI DAWN

September 30
 Nipi Khuavaak

TUI TAMPI DAWN 

SIMDING:
Johan 4:7-14

Kei’ piak tui a dawn mi peuhmah sung panin nuntak tawntungna tui phul ding hi.__Johan 4:14

KUMTAWN LAI SIANGTHO:
Isaiah 9-10
Efesa 3

Colorado gam khual azinte in theihkholh lohpi-in bah thei pahpah uh hi. Khuapha-in ni zong sa pian ahih manin mualtung kah bang ciangin pumpi tunga tui teng kang thei mawk hi. Tua bangin tua kiim tengah tui tampipi dawn ding lai kisuang hi. 

    Lai Siangtho sungah Jesuh pen eite’ kisap thupipen ahi Nuntakna Tui tawh kigenteh hi. Tua ahih manin Jesuh in  a ciapteh huai thu kikupna zong tuikhuk gei khat ah nei hi (Johan 4:1-42).  Jesuh in Samaria Numei nu kiangah tui dawn khat a ngetna tawh kipan hi (tg.7).  Tua pan kipanin a kihona uh damdam-in hong thuuk zaw semsem a: “Hih tui a dawn khempeuh dangtak kik ding uha, ahi zongin keima’ piak ding tui a dawn khempeuh dangtak nawnlo ding uh hi” (tg. 13-14).
    

Tua kihona hangin numeinu le ama’ khuapihte in Jesuh pen leitung hong honkhia ding a hong pai Khris hi, ci-in um uh hi (tg. 42).
    

Tui lo-in i nungta theikei hi. Jesuh Khris in eite hong piak nuntakna tui a dawnkha lo hileng tu le a tawntungin nuntakna i tan ding hi. Nuntakna hong pia tui mah tuni-in dawn masa ni. – David McCasland

Itna le Vangliatna a nei tawntung,
Na khempeuh pianna Pasian,
Ka dangtaakna na hong kamsak in,
A nungta tui, a ciim le a siangtho. – Vinal

Nuntakna tui Jesuh bek in i dangkeuna
hong kamsak ding hi.

Nisim Thalakna: MEEL TEEL SIAM

September 29
Nipi

MEEL TEEL SIAM

SIMDING:
1 Korin 4:10-17


 Keimah in Khris gamtatzia ka zuih mah bangin note in zong keima’ gamtatzia hong zui ta un.__1 Korin 11:1

KUMTAWN LAI SIANGTHO:
Isaiah 7-8
Efesa 2

Nai kizuakna tawh kisai muhkhiat thu khat-ah: Nai pen a leinuamte in a mel kilang theithei lei uha a deih pen puan tawh silhkhawm hi, ci hi. Tua ahih manin mi khat ii nai bulh le a puansilh meel enin, ‘Hih pa/nu meel tawh kisai-in teelsiam ei,’ ci uh hi.
    

1 Korin 4 sung sim pak le uhcin, Sawltak Paul pen Ama’ kipiakkhiat zawhna hangin kiphasak na cikha ding uh hi (tg. 16). Ahi zong ama’ nuntakna encik le ucin, tua bang a cingam ding zong ahi hi. Sawltakte laka sawltak lian pen Khris’ nuntakzia etteh ahih manin ama’ nuntakna ki-etteh ding kisuanglo hi (11:1).
   

 Bawlsiatna a thuakna le Pawlpi sungah a thuneihna (4:10-17) cihte pen Jesuh’ nung a zuihna hang hizaw hi. Korin khua thu-um mite in sia 10,000 keek a nei zongin upna lam-ah amah bek Pa hithei ding hi (tg. 15), a kicih ciangin mite in ama’ thugenna bulpi Jesuh bek ahihna a phawk ding uh deihna hizaw hi.
   

 Mite in hong etteh ding i deih ciang, Topa i ettehna hang hizaw tahen. Ei’ nuntak dan i kizuihsak nopleh, Khris kiang i tutnop leh, Ama’ hang bek hi-a, ei’ tha kihel lo hi. ___Anne Cetas
Jesuh’ nung lungdam takin ka zui
Nisim hong makaihna ka muang
Ei’ nuntakna mite’n a etteh huai
Haksatna hong tun ciang zong zuih huai.__Sper

Ei’n Khris nuntakzia i zuih ciang bek
midangte’n hong etteh thei pan ding hi.