AMAH’N KEI HONG KHEEL

May 3
Kigin ni

AMAH’N KEI HONG KHEEL

SIMDING:
Late 107:1-16

Galte’ khut sung panin hotkhiatna a ngahsa mite in ci kikkik ta uh hen.
___Late 107:2

KUMTAWN LAI SIANGTHO:
1 Kumpite 14-15
Luka 22:21-46

2011 kumin computer lam asiam  Steve Jobs hong sih vat tak ciangin, online tung pan mi tampi takte in amah tawh kisai-in dahna pulaak tek uh hi. A gennop taktak uh pen Steve Jobs in bangzah ciang dong a nuntakna kikhelsak hiam, cih ahi hi. Ama bawlsa nate hangin a nuntakzia uh kikheel a, a lungdamna uhleh a dahna uh gawmkhawm-in a genkhia tek uh hi. Ama’ bawlsa Apple brand pen ipad, iphone, ipod ahih manin, mun khat ah laimal gol khat tawh “iSad” (ka dah hi) ci-in kigelh hi.
  

  Lungdamna teng i gawmkhop ciangin Late 107 sungah i muh bangin: “Topa’ tatkhiatsa mite in citek ta uh hen! Topa in amaute galte’ khut sung panin honkhia khin hi” (tg.2). Hih munah a cihnop pen haksatna lianpi a tuak mihonpite Topa’n a hotkhiatna thu kigelh ahi hi. Pawl khatte inn neilo hi uh a (tg. 4-5); Pasian’ thumang lote zong hi uh hi (tg. 10-11). Pawl khatte pen amau’ ngaihsutna a bei khit ciang Topa’ tung a kikote hi uh hi (tg. 26-27). Amaute khempeuh Topa in honkhia hi. “Tua mite in Topa’ hoihna hangin lungdamkoh taaklua zen si. Mite tungah asepsate lamdang lua hi!” (tg. 8,15,21,31) ci hi.
 

   Pasian’ itna thukin a zaizia, a tapa Jesuh Khris leitung ah eite ading hong sawl a, hong honkhia hi. Amah phatlo-in i om thei kei-a, Jesuh in i nuntakna bangzah takin hong khel cih midang tungah genlo-in i om thei kei hi! – David McCasland 

Topa, ka lungsim sungah nangma tung lungdamkohna kammalte bekbek tawh kidim hi. Nangmah in na Tapa nong sawla, ka nuntakna a khiatna, bulpi nong laihsak hi. Lungdam lua ing.

Topa tungah gupkhiatna hanga lungdamna i kohna in midangte tung i genkhiat nopna mei hong tawhkuang hi.

TAWLNGAKNA SINGKUNG

May 2
Laithai

TAWLNGAKNA SINGKUNG

SIMDING:
Ezra 9:5-9

Tuhunin zong Pasian in ama’ hehpihna tawh a teelsa mi tawmkhat omlai hi.__Rom 11:5


KUMTAWN LAI SIANGTHO:
1 Kumpite 12-13
Luka 22:1-20

Ka zumkhan pan ka muh lozau sunga singkung ka muh khat pen lamdang ka sa pian hi. Singkung tampi tak kiphuk khin-a, tua lozau sungah an zong kiciing hi. Ahi zongin singkung khat kiphuklo-in oma, a hiangte tawh etlawm mahmah hi. Tua singkung pen a khiatna nei dingin a kihawi ahihna ka theih ciang, lamdang ka sa nawn kei hi. Ahang pen nidang peka kipan lokhote in lozau sungah ateh ahau singkung khat hamtang hawi uha, tua pen nisat hun ciangin lokhote leh ganhingte in tua singkung nuai-ah niliap va bel uh hi.
 

   Khat veivei ciang i lawm i gualte bei-in ei bek i om sese hun khawng na ngaihsun ngei hiam? Galsimna pan silo-in amah bek a suakta galkap khat ii lungsim sungah alawm dangte sih laitakin amah bek a nuntak sese ci-in a ngaihsun kha diam?
   

 Thuciam Lui sungah Israel mite sal-in a kimat laitak, Pasian in pawl khatte a gam ah hawi lai veve hi. Tuate in Pasian’ thukhamte cingin, Biakinnpi zong lampha kik uh hi (Ezra 9:9). Sawltak Paul in amah le amah a kihing khawi lai minamte bangin kigen hi (Rom. 11:15). Amah pen Gentile mite tungah Pasian’ thu tangko dingin a kihawi pa ahi hi (tg. 13).
  

  Midangte a puuk laitak ei i puuk keileh, lungdamna tawh Topa tungah kiko-in, midangte’ liim ngah nadingin i khutte zankhia ding hihang. Pasian in eite’ nuntakna tungtawnin midangte tawldamsak nuam hi. – Julie Ackerman Link

Topa, ka tawldamna na hih manin ka lungdam mahmah hi. Kei tungah nong bawlsak sa nate tungtawnin midangte’ thakhauhsak nading hong suaksak in. Kei’ nuntakna hangin midangte’n nang hong phat ta uh hen.

Thapiakna themno khat bek in zong lam-etna khuavak sak hi.

NA UT TAKTAK LEH

May 1
Nili

NA UT TAKTAK LEH

SIMDING:
Matthai 8:1-4

Topa aw, nong damsak nop nakleh, hong damsak thei hiteh.___Matthai 8:2

KUMTAWN LAI SIANGTHO:
1 Kumpite 10-11
Luka 21:20-38

Molly in apa’ huh ding kisama, ahi zongin huhna ngen ngamlo hi. Computer tawh na asep laitak, a kinawngkai sak ding apa in a deihloh lam thei hi. Amah heh ding cih thei ahih manin, huhna ngen nawnlo hi.
 

    Jesuh kiang i zuat ciangin tua bang patauhna omlo hi. Matthai 8:1-4 ah miphakpa in Jesuh kiang huhna a nget ding zum huai salo hi. Ama’ natna in lungkiasak mahmah a – a kiim apaam in zong pawlpih nuamlo-in, amah thaneem hi. Jesuh pen mihonpi tawh ahih manin manlah mahmah a, ahi zongin Jesuh tawh kimuh nading mipi lak va phu hi.
  

  Matthai in a gelhna ah tuapa in Jesuh amuh ciangin “va bia hi” (tg.2) ci-in ciamteh hi. Amah in biakna tawh Jesuh va zuana, Ama’ vang zong muangin, kiniamkhiatna tawh Jesuh tungah ama’ kisap damna va ngen hi. Amah in, “Topa, ut hileteh kei hong siangtho sak thei teh” (tg.2) va ci hi. Hehpihna khut tawh Jesuh in tua miphakpa va lawng a, tua mun-ah tua miphakpa siangtho pah takpi hi.
 

   Tua miphakpa bangin, Jesuh kiang i zuat ding ahun hoih ngak niloh kullo-a, va zuat pah ding ahi hi. Ama kiangah kiniamkhiatna le biaknopna lungsim tawh i zuat ciang, Amah in ei-a ding ahoih pen hong geelsak ding cih i lungsim sungah muangin om den ni. – Anne Cetas 

Topa, hih miphakpa pen kei-a dingin etteh taak mahmah hi. Nang kong biak theih nading, na vangliatna ka muan theihna ding, leh ka kisapna nang kiang kong paipih ciang, Nang in ko ading ahoih pen nong pia hi. Nang’ deihna sungah hong lungkimsak thei ta in.

Hehpihna bucing i ngah theih nadingin, tua hehpihna tokhom mai-ah hangsan takin va naih ni. – Hebru 4:16

ZEKAI LUA TA

April
Nilai ni

ZEKAI LUA TA

SIMDING:
Hebru 4:1-11

Amah tawh i tawlngak theihna ding hong kamciam zo a, i lutlah loh na ding lau in kidawmin om ni. __ Hebru 4:1


KUMTAWN LAI SIANGTHO: 
1 Kumpite 8-9
Luka 21:1-19

Sangkah simin sangnaupang thak te in lai mantakin a bawl ding ka gen zelzel hi. Tua bang kawmkal panin in pawl khatin thudot mello in a ni cinkhinteh email peuh hong khak uh hi. Tua bang hun ciangin ka utloh pi mahin, “lungnuam het kei e. Hong zekai luata ciai,” ka na cizel hi.
  

  Tua bang sangnaupang thakte in a lai uh a thudot loh manin sumtampi suplawh uh hi. Tua sangin a lauhuai zaw a suphuai zaw pen Pasian thu donlo a, mawhna sungah kidiah cipna a hihi. Tua bangin Jesuh Khris sungah upna neilo in a site, tawntung munah Jesuh lotawh a kalsuan kul hi.
 

   Honpa mai-ah dingin, “Nang hong thei ngei keng. Na paikhia in (Matt 7:23),” hong cih ding pen bangzah in dahhuai a hihiam? Hebru Lai Siangtho in Pasian hong piak tawldamna i tan khakloh nading (4:1) hong phawksak hi. A lungdam huai thu pen “zekai” nailo cih thu hi. Tu ni-in Jesuh in a ma tungtawnin hotkhiatna le mawhmaisakna hong piapia lai hi. – Dave Branon
 

Pa Pasian itna na theih nop leh,
A it a Tapa Jesuh tawnin hong pai in,
Na mawhna hong maisak in a tawntung in na kha hong hon ding hi.
Na it tawntung ding hi. –Felten


Kalvary in a lian mahmah i mawhna leh a lian mahmah Pasian itna hong phawksak hi.