KAWKMUN

April 19
Kigin Ni  


KAWKMUN


SIMDING:
Rom 5:1-11


Topa mangngilh ding na hiam?__Rom 5:11


KUMTAWN LAI SIANGTHO:
2 Samuel 6-8
Luka 15:1-10

1993 kum Thawhkik Nipi ni a, Bernhard Langer in Master Golf kimawlna ah a khatna a ngah pen ka phawkden hi. Golf kimawlna lamah a thupi pen letsong sang dingin hong pai ciangin, “Nang ading in ni thupi pen hi-in teh maw,” ci-in thudongpa khat in a  gen leh Bernhar Langer in, “Leitung ah a minthang pen kidemna ah ka gualzawh pen lungdam ing a, tua sangin Ka honpa leh ka Topa’ Thawhkik Ni a hih sese pen ka lungdam zawlai hi,” ci-in dawng hi.


    Langer in amah le a mah a kipahtawi sangin Jesuh pahtawi zaw hi. A kawkmun laih hi. Paul in zong, “Pasian tawh hong kilemsak i Topa Jesuh Khris hangin Pasian tungah i nuam mahmah hi (Rom 5:11),” na ci hi.
 

    Ei le ei kipahtawi khak ding ol mahmah hi. Paul in zong a mah a kiphat nopnate “niin bangin” ngaihsun a, a kawkmun pen Jesuh ah laih hi (Fil3:8). I etteh ding ahihi.
 

    Kiphatna ding khat peuh na neih leh Jesuh ah na kawkmun laih pahpah lelin Jesuh phatphat in. – Joe Stowell

Thalawh hilo piakkhong ka ngah,
Umna tawh hehpihna ka ngah,
Kiphatsak nang  omlo kei pawh,
Hehpihna in hong hon kei mi mawh -Gray

Nanglenang na kithupi sak leh, Jesuh ah na kipak thei kei ding hi.

KEI NUNGTA

April 18
Good Friday

KEI NUNGTA

SIMDING:
Efesa 2:1-10


Amah in mawhna le khialhna ah na sih laitakun note hong nungta sak hi.___ Efesa 2:1


KUMTAWN LAI SIANGTHO:
2 Samuel 3-5
Luka 14:25-35

Kum 52 apha, ta nih nei Laura Brooks pen 2011 kum misi sazian 14000 sungah kihel khial kha hi. Kumpi panin a ngah huhna sum tuamtuamte a ngah nawnloh ciangin a va dot leh nang pen a sikhin in hong kiciamteh na ci  mawk hi. Min kikhial kha hi teeiteei ding hi!
 

    Sawltak Paul in Efesa khua thu-ummi te kha lamah si hi, a cih ciangin a cikhial hilo hi. Pasian tawh kigamla-in mawhna sungah kibual uh a hihmanin a si uh ahi hi (Ef 2:5). Pasian’ hehna nuai-ah a om uh hi-a, tua hun tak ciangin bangzah lamet beihuai ahi hiam?
 

    Pasian hoihna in hihte hong lehkhuh a, “A site nuntakna a pia (Rom 4:17) a nungta Pasian a hihna a Tapa hong piakna tawh hong lak hi. Jesuh sihna le thawhkikna in ei hong nungta sak hi (Ef. 2:4-5).
 

    Jesuh’ sihna le thawhkikna i up ciang in a nungta i suak a, Pasian hoihna i mu hi. Tua ahih manin i lungdamna lian mahmah hi.– Marvin Williams

Ka mawh lam ka phawk a, Khris ka kisam hi.
Ka sepzawhna hi lo, a ma sihna kei hotkhiatna hi,
A kicing hong sepkhiatna ka muang hi.
Amah ka sang a, tawntung nunna ka ngah ta. – Anon

Jesuh sihna in nuntakna hong pia hi.

HUHNA TUAMTUAM

April 17
Nili

HUHNA TUAMTUAM

SIMDING:
Piancil 41:46-57

Faro in Joseph kiangah, “Na Pasian in hong hilhna bangin gamta lecin, nang kan a pilna le theihna kicing nei om lo ding hi.__Piancil 41:39


KUMTAWN LAI SIANGTHO:
2 Samuel 1-2
Luka 14:1-24

Connecticut, Newtown khua, tanniam sang khat ah thau tawh kikapna hong om ciangin huhna tuamtuam piakding kivei ciat hi. Sisan a hawm tawh, sun an a vakvak tawh, huhna pia nasemte ading niangtui peuh a awm-awm tawh mapang tek uh hi. A gamla a om te’n thapiakna laikhak leh, sum peuh khak uh a, pawlkhat in bel a phual ah va pai in gimtuak innkuante va kawi in va holimpih hi. Pawl khatte’n naupangte ading letsong puak uh a, a mau kivakna ciat, kizawhna ciat tawh huhna pia uh hi.
    Joseph in kialtun hun kum 7 sung Pasian piak a siamna zangin mite na huh hi. Haksat hun hong tun ding theikhol a hih manin na kiginkhol   hi. Joseph in Faro a gen khit ciangin Faro in kigin hun kum 7 sung a vaihawm dingin seh hi. Pasian piak a siamna zangin Egygt gam kial tun adingin kigin kholhna nei hi. “Pasian in hihte khempeuh nang hong lakkhin a hih manin nang bang a, thu ngaitsun siam leh a  pil om lo hi (Pian.

41:39),” na ci hi. Leitung khempeuh kialpi a tun ciangin Joseph in a an kholna khempeuh hong khia (n56) ci hi. A innkuan pihte nangawn na huh zo hi (45:16-18).
    Pasian in leitung a khuallam tak hih tangthu in hong hilh hi. I hih theih bangin midangte a huh dingin Pasian in hong kiging sak hi. – Anne Cetas


Topa, midangte lungsim natna hong theisak in la,
Lungsim liammate a damsak zo  ding in
Kei hong huh in Topa. D. DeHaan

Lainatna in lungsim liammate damsak hi.

INNKUAN SUAHNA

April 16
Nilai ni


INNKUAN SUAHNA



SIMDING:
Galati 3:26-4:7


Jesuh Khris sungah upna tawh note Pasian’ ta na suak khin uh hi.__Galati 3:26


KUMTAWN LAI SIANGTHO:
1 Samuel 30-31
Luka 13:23-35

Maurice Griffin pen 32 a phak ciangin taseel (adoption) ding in kila pan hi. Tua ma kum 20 sung bang Lisa le Charles Godbolh te-in kem hi. Maurice pen khangcing ta hi napi, pianna-lo nulepa tawh innkuan hihna nuam sa mahmah ci hi. Zum pan “Innkuan suahna” vai teng a sian ni-in, “Tuni innkuan suahni ka lungdam pen ni hi,” na ci hi.


    Pasian innkuan ah a lut eite zong “tua ni pen i lungdam pen ni” a hihi. Khris gumpa-in i san ni pen Pasian’ ta i suah ni, amah i pa a suah ni hi. Galati 3:26 ah “Jesuh Khris sungah upna tawh note Pasian’ ta na suak khin uh hi,” na ci hi. Pasian ta a suak eite pen Khris sungah sanggamte i nei a, tawntung gamh i luah ding hi (Kol 1:12). I lungtang sungah Jesuh hong lut ciangin naupangte’n ‘Papa’a cih bangin Pasian pen ‘Pa aw’ ci-in thu i ngen thei hi (Gal 4:6).


    Hong it, hong sang, hong kin Pasian’ bitna ciamkha a, tua tawh a kinai omte Pasian ta hipan hi. Pasian innkuanpih suahna pen a nuam pen a hihi. – Jennifer Benson Schuldt

Leitungah pemta ka hi ngei a,
Khualmi in a mawhsa in ka piang hi.
Innkuanpih hong kisuah in, ka min kiciamteh hi.
Innhoihpi luah in Puanpi leh Kham lukhu ka ngahta.-Buell

Pasian in a ciah nuam khempeuh kong hon hi.

CIKHUM KEU KHAT

April 15
Ninih

CIKHUM KEU KHAT

SIMDING:
Late 19:7-14

Topa’ ngeina kipte thuman a, a vekpi-in kituak takin mankim hi. Khuaizu le khuaizu taak sangin zong khumzaw lai hi.__Late 19:9-10

KUMTAWN LAI SIANGTHO:

1 Samuel 27-29
Luka 13:1-22

A nuam hun beisate phawkkikin tua hunte hong tung kik ding bangin ka lungngaih ciang “Mary Poppins” min nei video khat ka phawk zel hi. Hih video sungah Dahpa khuang tum bangin ut bangbang a sawl thei naucing nupi khat om hi. Lungnopna ding ka lunggulh a, ka lungsim a siat mahmah hun nangawn-in zong a hoihlam aa amu thei ding mi khat peuh ka ngai vangvang hi. Amaute ka kisap dan pen zatang kha mahmah khat a valh baih nadingin a kisam cikhum keu khat bangin ka tuat hi.


    David in hih bang pian lakhat na phuak a, “Pasian thuman pen Khuazu sangin khumzaw lai (Late 19:9-10),” na ci hi. Thuman leh a khum cihpen kamkop in ki tamzat lo hi. Thuman pen kha in valhhak  mahmah ci-in kizang zel zaw hi. Ahi zongin natna a damsak thei zatuite pen a tamzaw kha hi. Thuman pen natna dalna zatui kisut bang hi lo a, i gil kial laitak a, a lim mahmah a kihuan an i neek bang a, Topa hoihna kiciapna (34:8) nam ahihi.
 

    Min khempeuh lakah Jesuh pen a khumpen hi ci-in la i sak hangin pawlkhatte ading in a thuk a hau pi zong na hithei hi.  Kiphatsakna in a siatsak loh, a siangtho thuman pen Kha thu-ah a dangtak mite a dingin a khum penpen a hihi. A gilkial leitung adingin eite a khum thuman i hihi. – Julie Ackerman Link

Min teng lak ah Jesuh a khum pen,
Amin mah bangin it huai pen,
Tua man Amah ka it pen,
Min teng lak ah Jesuh a khum pen – Long

Topa’ thutakna a tawntungin kip ngitnget hi. --Late 117:2

HIHNA MAANLO

April 14
Nipi Khuavak


HIHNA MAANLO

SIMDING:
Matthai 16:13-20



“Note in kei kua hi hong ci na hi uh hiam?” aci hi.__Matthai 16:15


KUMTAWN LAI SIANGTHO:
1 Samuel 25-26
Luka 12:32-59
 
Ka naupa Scott tawh kum tamzek kikhai hi ung. Kei tan 10 ka kah ciangin a mah suakpan hi. Amah College hong tuntoh ciangin kei leh ka nu uh tawh ka thum un college ka pai uh leh ‘Scott Crowder a pa leh a pi hong pai’ kici mawk hi. Bang bangin ka gen uh hangin ka nau Scott le kei pen mite’n ka hihna manuh thei theilo uh hi, ka cinuam hi.
  

  Jesuh in Farisaite kiangah, “Kei kua hi nong ci uh hiam,” ci-in a dot ciangin, “David suan hi teh (Matt 22:42),” ci-in dawng uh hi. Messiah hihna taktak pen a telhak thukhat hi a, David suan cih tawh kicing lo hi. David kumpi tokhom tungah ukna nei ding ci-in Lai Siangtho in genkhol hi.
 

   Ahi zongin Jesuh in amah pen David sangin a lianzaw a hihlam hong phawksak hi. Amah in David a cih ciangin “Topa” a cihna hi.
   

 Peter in mantakin na dawng a, “Nang pen a nungta Pasian Tapa Khris na hihi,” ci hi. Tuni dong mahin Jesuh kua hiam cih thudotna om toto hi.  Jesuh kua hi cih mantak a i telding pen tawntung ading in thupi mahmah hi. – Bill Crowder

Teeksia damlo bangin zaitha nem,
Tawntung hehpihna tawh nong hehnem,
Kong muan khialhloh nang ka kidawm,
Hong bawl, hong dal, hong hon ka lawm.

Jesuh’ hihna theihkhialh sangin, a lauhuai zaw khialhna om lo hi.

KHENSATNA

April 13
Nisuh Nipi

KHENSATNA

SIMDING:
Ruth 1:6,11-18; Luka 9:51-53


Na mite keima’ mi hi dinga, na Pasian keima’ Pasian hi ding hi.__Ruth 1:16

KUMTAWN LAI SIANGTHO:

1 Samuel 22-24
Luka 12:1-31

Gal tai gambelte mun a kipiakna TV  kilak khat ka et khak leh kum 10 a pha numei khat i thugen in ka dipngek hong vut hi. “Inn ka ciahciang ka vengte kiang khawngah hawh dingin ka lawmte khawng tawh kimawl ding. Ka pa’n bel ‘ei’n inn neilo’ hong ci-in, kei’n bel ka inn ding uh lam ding,” ci-in a gam ciahkik ding lametna a omlo phial kawmkal ah lungmuangtakin gen hiathiat hi.

    Pasian upna le midangte itna sungah zungthuk i khak ciangin i nuntakna sungah khensatna kician kinei thei hi. Ruth tangthu pen haksatna a tuak meigong numei thum tawh na kipan hi. A pasal le a tate nih a sih ciangin Naomi in Bethlehem a, a innah ciah ding leh a mote gel Moab ah ciahsak dingin khensat hi. Orpah in a teeknu thumang a Ruth in bel a teeknu Noami kiangah, “Na mite keima mite hi ding, Na Pasian keima Pasian hiding hi (Ruth 1:16),” ci-in a teeknu zuih ding khensat hi. Tua khensatna kician a theih ciangin Naomi leh Ruth in innlam zuan uh hi (tg.18).
 

    Lungkhauhna pen kiphatsakna pan hi a, ahi zongin itna sung panin kipumpiakna hong luangkhia hi.     Luke 9:51 ah “Jesuh, Jerusalem manawh in pai hi,” ci-in singlamteh lampi a teelna na gen hi. Amah ei adingin hong si a hih manin Ama’ adingin i nungta ding hi. – David MacCasland

Ka nuntakna nang kong pia hi.
Kei tangdingin hong si zo hi.
A tawntung ka thuman ding hi.
Hong hon Pa Pasian aw. -Hudson


Itna in a kipumpiak dingin hong sam hi.