A KISAITE TUNGAH

November 16
 Kigin Ni


A KISAITE TUNGAH

SIMDING:
Rom 13:1-10

Phiangsiah piak dingte tungah pia-in, mangmu piak dingte tungah pia-in, zahtak dingte zahtak bawlin, pahtawi dingte pahtawi ta un.––Rom 13:7

KUMTAWN LAI SIANGTHO:

Ezekiel 3-4
Hebru 11:20-40

Ka tenna mun pen lo bekbek in hong umcihna mun hi-a, ka thuciin pen: “Tuni an neek khat na neek simin, lokhote tungah lungdamko in,” cih ahi hi. Lokhote tungah i lungdam kul hi. Nisa lakah gimpi tawlpi-in nasem uha, khai tuhin, an i ngawl loh nadingin an la uh hi.
 

   Tua bangin amau tungah lungdamna ka pulaak ciang, Pasian’ hong hehpihna zong a mangngilh ka hi tuan kei hi. Amah pen tua ante a piangsak, a khangsak pa ahi hi. Amah’n khuavak hong pia-in, guah hong zusak a, tua khaicite a pokhiat theih nadingin tha pia hi.
  

  Leitung le a sungate Pasian’ aa ahih hangin (Late 24:1), Amah in mihingte acing akem dingin teel hi. Pasian in leitung, ama’ aa banga akep bangin eite in zong tua nasep i zom toto ding hi (115:16). Ama’ bawlsa leitung ah nasemte i hih manin, Ama’ zeemsa kiim le paam zia zong i theih ding ahi hi. Tua bang ihih ciang bekin Amah in vang a piak mite zahtak siamin, siah piakna tawh ahizong, a gualzo khat peuh pahtawina, midangte tungah itna a laksiam (Rom. 13:7-8), tua nasepte i neitoto lai hi. Pasian ading ngiat khat i siit lai dinga: Phatna le vangliatna khempeuh Ama’ aa hitawntungin, na khempeuh a piangsak Pa pen Amah Pasian bek mah hi (Late 96:8) cih theih tawntung ding ahi hi.– Julie Ackerman Link
 

Tung aa maang Topa phat ni,
Na khempeuh a bawl Pa,
Vangliatna le itna nei Pasian,
Eite suahtakna hong pia Pa.___Schutz



Telzawh loh Pasian’ pianziate hangin a kiciangtanlo phatna tawh Amah kilawm hi.

LAUNA TUNGAH GUALZAWHNA

November 15
 Ni Nga

LAUNA TUNGAH GUALZAWHNA

SIMDING:
Matthai 8:23-34


Bang lau na hi uh hiam? ––Matthai 8:26


KUMTAWN LAI SIANGTHO:

Ezekiel 1-2
Hebru 11:1-19

Ka neu tuung a kipan khuazing aa ihmut ding ka kihta mahmah hi. Ka nute in mei hong mit khit phetin kei zong ka lupna tung ka zuanpah a, ahi zongin ka lupna nuai-ah tho banga a lengleng khat omleh kilawm ka sa pong a, ka ihmu thei vet kei hi. 

    Tua bang launa pen ka neu lai bek ka sak leh, hilo-in ka gol ciang dong ka tuakkha hi. Tua bang launa in mawhmaisakna ding le i neihsa teng Topa tung ki-apna ding panin hong khaktan thei mawkmawk hi. I lawmte’n a kingap mahmah khat pen ei’n ngaplo-in “ut keng” i ci kha thei hi. Lauhuai thopite i kiim i paam ah leengin, ei le ei i kilauthawng sak hi. 


    Nungzuite in gunkuang tungah mangbangin a omlaitak, a laulo penpen in Jesuh bek ahihna ka mu-a, lamdang ka sa hi. Huihpi kihtak lo, han pan hong pai dawi veipa zong kihta tuanlo-in om hi (Matt. 8:23-34). 


    Launa i tuah laitak, Jesuh in “Bang hangin lau na hi uh hiam?” (tg.26) cih hong dotna kammal i zaksiam kul hi. Amah in ei hong taisan lo ding hi (Heb. 13:5-6). Ama zawh loh thu bangmah omlo-a, a lau ding khatbeek omlo hi. Tua ahih manin, launa in hong tuamcip takciang Jesuh bek na muanna hisak inla,  launa neilo pa ahihna muang in!—Joe Stowell

Topa, Nang hong taisan lo ding ci na hih manin
ka lungdam hi. Ka lau hun laitak,
Nong ompihna ka muanga,
ka lungsim launa khempeuh veng mangsak hi.

Launa sungah launa azo Jesuh sam in.

MIDANGTE HUH

November 14
Ni Li

MIDANGTE HUH

SIMDING:
Siampi Laibu 19:9-15


Na leitang tung panun an na lak uh ciangin na lo uhah a nawl dongin an na la kei ding uha, an na laak khit uh ciangin a sang zong na khawm kei ding uh hi.–Siampi 19:9


KUMTAWN LAI SIANGTHO:
Kah La 3-5
Hebru 10:19-39

Mun khempeuh vuuk in a vuknelh khit ciangin gancingte in a gante uh khut tawh kambaak uh hi. Mawtaw tung pan an a kipiak ciangin a hatzaw deuh ganhingte in a mailam tuhphei uh hi. Anpiate in a va piak kei uhleh, a thahat lo, alaubaih ganhingte in ngah ngeilo ding uh hi.
  

  Refugee aa nasemte in zong tua bang gamtatna tual zelzel uh hi. A kisam mite tungah van le neek theih a piak ciangin a maizum baih, gualneek lo mite pen a nunung pen-ah om den uh hi. Gan anpiate mah bangin tua bang mite in a ngah theih nadingin nasemte in a va zuat uh akul ahi hi. 

    Tua bang nasemte in sawtpi laipek aa Pasian’ nasep asemte hi uh hi. Siampi Laibu 19 sungah, Moses in  “mizawngte le khualmite in neek ding an a ngah theih nadingun ante a vekpi-in lakhin lo-in tawmtawm-in hawi lai un” (tg. 9-10) ci-in loneite le anlate kiangah vaikhak hi. 


    Mi zawngkhalte le thanemte ading nasemte ihi hi. Sangsya hi-in gualneek hetlo sangnaupang-te tung laihilhna, naseppih lawmte’ haksatna theihpihte, thongkia na hihleh zong hong lutthak lawmte ahuhzote, tate’ vai ahawmzo nu le pa, cih bangin midangte i huh thei hi. 


    A kisam mite i huh ciangin, ei zong i kisap hunlai-in Topa in sapna khempeuh hong sikh hi, cih theihtelna tawh a sem mite i hih manin tua lungsim in eite hong sawlkhia hi. – Randy Kilgore


Topa, neek ding kisam mite tungah itna maan, 
lam-etna tak hong lak in. Itna angah khalo mite tungah
itna ka lah theih nading, ka khut kha khete hong manlangsak in.

Midangte’ na i sepsak ciang, Topa nasem ihi hi.

NANG AA ZONG KIHEL

November 13
Nilai

NANG AA ZONG KIHEL

SIMDING:
1 Korin 12:12-27


Tu-a i neih bang teekteekin Pasian in ama’ deih bangin pumpi na a tuamtuam a hong bawlsak hi.––1 Korin 12:18

KUMTAWN LAI SIANGTHO:

Kah La 1-2
Hebru 10:1-18

A suahni pawi-ah hong pai lengla teng khempeuh, Kriste in van khattek pia hi. Hong pai mite in amah bangci muh uh hiam, ci-in a gelh theih nading laidal khat hi-a, amau agelh khit uh ciangin tua laidalte gawmtuah-in mun khat ah koihkhawm ding ama’ ngimna ahi hi. A khiatna pen Khris’ pumpi ah mikim thupitek i hihna, le hih laidal a koih khalo mi a omloh ding ama’ deihna ahi hi. 

    Tua bang danin 1 Korin 12 pen muhna dang khat pan en lehang, kitel mahmah hi. Paul in Khris’ pumpi ahi Pawlpi pen mihing’ pumpi tawh tehkaak hi. Khut, khe, mit, bil cihte pen pumpi khat bulphuh-in a omtek uh ahi hi. Khris nungzui khat in kei Khris tawh kizom ke’ng aci omlo a, khat peuh in zong kei kisam ke’ng ee, aci om tuanlo hi (tg. 12-17). “Pasian in mi khempeuh ama’ nasep tek asem dingin koih khin hi” (tg. 18). 


    I sep theih le i neih a kibat loh ciangin mihing muhna pan thupi zawlo tuan i kisak hun om thei pahpah hi. Pasian in ahihleh Ama’ hong koihna mun-ah eite bangci gamtat cih hong mu nuam a, hong muh ding ngaklah mahmah hi. 


    Nang kihello-in a kisuai lim muhnop lo hi. Nang mun awngkhong ding hi. Pasian in Ama’ minthanna dingin Khris’ pumpi sungah nang hong kihelsak hi.––David McCasland

Topa, Na innkuan sungah midang tawh a kitehkaak dingin hong siam kei in. Nang nong deih bangbang thuumlo-in ka sep zawh nading, midangte’ nuntakna a huhzo khop dingin kei hong siamzaw in.

Na nuntakna pen Pasian’ letsong hi-a; tua pen letsong dingin Pasian piakik in.

TOMKHA SUNG HEHPAKNA

November 12
 Ni Nih 

TOMKHA SUNG HEHPAKNA  

SIMDING:
Johan 8:1-11


Jesuh in tua nu kiangah, “Kei’n zong thu kong khen kei ding hi; pai inla mawhna na bawl nawn kei in.--Johan 8:11

KUMTAWN LAI SIANGTHO:

Jeremiah 51-52
Hebru 9
 
Palik mawtaw tunga mei tang kipei valval ka muh ciangin bang thu hi ding hiam, ci-in ka en hi. Palik numei khat in a khut ah laibu tawi-in a mawtaw sungah lut-a, ama’ nungah cih nading a theilo mawtaw hawl khat zong atu ka mu hi.  Lam kiim lam paam mipaite in amuh loh nading ci-in tua nu in a khut tawh dal keei hi. Tua bang aa adal keei tak ciangin mipi in lunglut zaw tektek uh hi. 

    A mawh laitak a kiman numei nu Jesuh mai hong kitun-in, a mawhna a kipulaak tak ciang, mipite in et ding bekin ngaihsun nawnlo uha thu khat vaihawm uh hi. Thukhen ding bek gen huan uha, Jesuh in ahih leh hehpih hi. Hehpihna tawh kituak  nawnlo hi, ci-in thukham muhna lam pan ahi hi. Tua a mawhsak nuam mipite atona-in, Jesuh in tua nu kiangah, “Ke’n zong thu ka hong khen kei ding hi; pai inla mawh nawn kei in” (Johan 8:11) ci hi. Tua hehpihna in hong maisak thei itna thu laigil hong lak a, a thu vaikhakna in tua itna sungah lungnuam takin bangci nuntak ding cih hong gen lailai hi. Tua thu nihte in i mawh laitak le i khialh laitakpi mahin Khris’ lung hihmawhna bang hiam, cih hong theisak ahi hi. 


    Mawh i kisak lai pen mahin, Ama tungah i kap thei-a, hong itna in lamdang ci-in kimukhia thei hi. ___Bill Crowder

        Hong hehpihna, lamdang zen si!
        Kei bang lel hong hotna!
        A gammang sa hong mu kik hi;
        Mittaw tu’n khua mu ta.- Newton

Haksa i tuahkhak khempeuh sung panin Jesuh bek in hong huh thei hi.

ႏိုင္ငံေက်ာ္အဆိုေတာ္ ကိုမ်ိဳးႀကီး (Ironcross) ၏ဇနီးသည္ မလံုးလံုး သက္ေသခံခ်က္



ႏိုင္ငံေက်ာ္အဆိုေတာ္ ကိုမ်ိဳးႀကီး (Ironcross) ၏ဇနီးသည္ မလံုးလံုး သက္ေသခံခ်က္
Download
 https://db.tt/3ThcDTSm
ကိုမ်ိဳးႀကီး (နားခိုရာ ဓမၼေတးသီခ်င္း အား သီဆိုစဥ္)
 
https://db.tt/E7OQZH4C
  1. နားခိုရာ
  2. ေႏြးေထြးေသာရင္ခြင္

Phatna La (10 Nov 2013)

ေတးသံရွင္ဆုမြန္မွ ဂုဏ္ေတာ္က်ဴးဧ ေနစဥ္ (10 Nov 2013)
 
 https://db.tt/JklIvdZ0 

ေတးသံရွင္ဂဲေလးမွ သက္ေသခံျခင္းႏွင့္ ဂုဏ္ေတာ္က်ဴးဧျခင္း(10 Nov 2013)
https://db.tt/ltZRUOEs

THU CIAPTEHNA

November 11
 Nipi Khuavaak  


THU CIAPTEHNA

SIMDING:
Kah La 3:19-33


A hong itna kiam ngeilo hi. Zing nisuak thak bang hi-a, Nong hehpihna lianlua hi.– Kah La 3:22-23


KUMTAWN LAI SIANGTHO:

Jeremiah 50
Hebru 8

Yves Congar pen kum (10) khawng a phak hunin Galpi Khatna kipan a, amau omna khuapi pen German galkapte in la uh hi. Anu in tua hun sungin lai tawh ciapteh ding hanthawn-a, galkap nasep aneng atawngin ciamteh a, tua laibu pen tangthu hoih mahmah khat hong suak hi. Tua laibu pen naupang khat in galpi tawh kisai amuhna kigelh laibu ahi hi. Tua laibu a gelhna tungtawnin mite in Khris sungah lam-etna a neih dinguh a ma’ lungtup zong ahi hi.
 

    Tuma kum tampi lai-in Kamsang Jeremiah in Jerusalem khuapi pen Nebuchadnezzar in a sim lai thu na gelh hi. Tua amuh banga agelh laibu pen “Kah La” kici hi. Tua bang lungkiat huai dinmun panin Kamsang pa in Pasian’ lungtang sungah lam-etna om ahih lam mu hi. “A bei theilo Topa’ hong itna leh a hehpihna a kizom paisuak hi-a, zing nisuak bangin thaksuak tawntunga, ni a hong suak pelmawh mah tawh a kibang ahi hi” (3:22-23).
 

   Atamzaw hunte ah i nuntakna ah i galte hong kuan bangin i mu theizel hi. Ahi zongin tua haksatnate omden lo hi. Jeremiah bangin i lam-etna bulpi pen vantung aa i Pa’ thumanna le hong kepna hang hizaw hi. Pasian’ hong hehpihna zingsang simin thaksuak dena, a thumanna lian hi! --Dennis Fisher

Na Thumanna lian hi, Na thumanna lian hi!
Zingsang simin hehpihna thak ka mu;
Ka sapna teng Na khut in hong guan tawntung,
Na thumanna lian hi, Topa kei tung! ___ Chisholm

Lam-etna ding bulpi in Pasian’ thumanna ahi hi.

Pa' Kammal

November 10
 Nipi


PA’ KAMMAL


SIMDING:
Late 119:89-93


Na kammalte ka mangngilh kei dinga, tuate in kei nuntakna hong pia hi.––Late 119:93


KUMTAWN LAI SIANGTHO:

Jeremiah 48-49
Hebru 7
 
Jim Davidson pen Rainier mual zui-in vuk mualpi pan tuak suksuka, a tawpna ah khimkhua zingcip mun tawng khat-ah kiasuk hi. Tuikhal hiam tawh kitat kha hih manin, a ci tungteng liamin si le nai mah tawh tua kuam pan suahtak ding hanciam leuleu hi. Apa in aneu lai peka kipan ahilh “Tuahsiatna na tuak ta zongin hahkat teeiteei in,” cih kammal phawk gige hi. Tua zawh nai (5) khit ciangin damdam-in kahtoto a, hong suakta ngawngaw hi.
   

 Late laphuakpa in zong haksatna atuah laitak vantung aa om Pa’ kammal phawkin hanciam teeiteei hi. Amah in Pasian le A kammal-te in lungnop nading hong piangsak hi keileh, a lungkiatna tawh sih ngap hi (Late 119:92). Pasian’ tawntung kammal a muanna pulaak hi (tg. 89), Ama’ hihna zong kip den (tg. 90) cih thei hi. Pasian’ thumanna hangin laphuakpa in ama’ nuntakna ahonkhia le tha a pia Pasian’ kammal a mangngilh nawn loh nading kiciamna nei hi.
    

A zing mahmah i nuntakna le hunte ah, i kha in van-a om Pa i lunggulhna tawh kizui-in hong malh dinga, i lungsim sung lungdamna hong kidimsak ding hi. —Marvin Williams
   
NGAIHSUN IN
A lauhuai nuntakna kiil-ah na din laitak ahiam?
Na lungsim le kha Pasian’ kammal tawh na dip
theih nadingin na hun bangci zat ding,
cih na ngaihsun kha hiam?


Pasian’ kammal i phawkkhak hun ciangin i kha tha hong nosuak hi.