KITUAT LO

April 5
Kigin ni

KITUAT LO

SIMDING:
Matthai 20:1-16

A nunungte masa dinga, a masate nunung ding hi.___Matthai 20:16


KUMTAWN LAI SIANGTHO:1 Samuel 1-3
Luka 8:26-56

Laphuak siam Wolfgang Amadeus Mozart leh Antonio Salieri te’ nuntakna siksan a kiphuak ‘Amadeus’ cih limlah (play) minthang khat om hi. Kum zalom 18 lai a kiphuak tua limlahna sungah, Pasian’ lungsim theih ding a hanciam laphuak Antonio Salieri in music siamding hanciam lo-in a tulngeilo ding la (music) khat phuah ding a hanciam hizaw hi. Antonio lametna tawh kilehbulh takin Pasian in a naupang vai phengpheng Wolfgang Amadeus Mozart pen minthang sak zaw hi.
    
Amadeus limlah (play) phuakpa in a kilawmlo khat a minthan pen dik salo a, Job laigelh pa in Pasian in thuman mikhat gim a piak pen lem salo hi.
   
 Jesuh’ thugentehna sungah zong vai ciah kuan a, hong tung nasem pa leh sun tawntung a sem pa, a thaman a kikim ciangin lungkim lohna om hi (Mat 20:6-7).  Nai khat leh Nai 12 nasep thaman a kikimsak mihau pa’n nitha bangci tuat a hitam?
   
 Jesuh’ gen pen mihaute tuat bang a sum mal tawh kituat thaman hilo a, hehpihna tawh kituat letsong nam ahi hi. Pasian in thaman hawmkhia lo a, letsong hawmkhia zaw hi.– Philip Yancey
 
Itna, hehpihna le maisakna,
Thalawh theih a hihloh lam ka phawk kei zel hi.
Thaman a hilo, hehpihna letsong lianpi
Nong piak Lungdam mahmah ing Topa.

Hehpihna huam sungah, ‘kilawmlo’ cih kammal kizang lo hi.

Read More

SATHAU A OM HIAM?

April 4
Ninga

SATHAU A OM HIAM?

SIMDING:
Late 5

Topa aw zingsangin ka aw nong za a, zingsangin nang ma adingin biakna bawlin kong ngak hi. –Late 5:3

KUMTAWN LAI SIANGTHO: 
Ruth 1-4
Luka 8:1-25

Ka tanu mawtaw-hawlzia ka hilh ciangin mawtaw-kepcing zia zong tawm ka hilh hi. Mawtaw setah sathaute om maw omlo cih sittel ding ka hilh hi. Kei kamzat pen, “Engine sangin sathau tawm man zaw,” cih hi. Engine khat na khek ding sangin mantakin sathau thunzaw leteh kimet zaw ding hi.

    Tua bang mahin i kha nuntakna zong kepcing ding kisam hi. I cidam lai mah-in cidam nading kihanciam theibek hi. Nisim in Lai Siangtho simin, thungen in Pasian thu lungngai leng kha thakiam ngeilo ding hi. David in la na phuak a, “Topa aw zingsangin ka aw nong za a, zingsangin nang ma ading in biakna bawl in kong ngak hi” (Late 5:3), na ci hi. Simsuak lai lehang, a lungsim tawng tawh Pasian a phatna, a thungetna leh Pasian kiangah a thumnate kimu thei hi.
 
    Zing tho in email simphot lo-in, thuthang laihawm tuamtuam peuh simpah lo in zing kiallap na nekma-in Pasian’ kammal simin Pasian tawh daitakin hun lakna pen mitampi tawh a kilawm nuntakzia khat hi. Pawlkhat in bel thunget hun leh Lai Siangtho sim hun tuamlak hi.
    Nisim i nuntakna lampi ah i lungtang sungah Ama ompihna hong kilat ding thungen den ni. Tua pen Kha kepcingna a hihi. – David McCasland
 
Nisim in na kammalte a lungngai dingin,
Utna lungsim hong guan in.
Na thuman tawh kipelhlo in,
Ka nuntak nangin, Hong vak in la hong hilh in.

Pasian’ kammal le thunget tawh a kiphut nuntakna kip tawntung hi.

Read More

MIN A KHIATNA?

April 3
Nili

MIN A KHIATNA?

SIMDING:
Johan 1:35-42

Nang pen suangneu a cih nopna Peter na hihi. Hih suangpi tungah ka pawlpi ka lam ding hi. __Matthai 16:18

KUMTAWN LAI SIANGTHO: 
Thukhente 19-21
Luka 7:31-50

Ka lawm khatin a ta a suah ciangin a gol ciang a, a sim ding ci-in lai khat gelh a, “Ka ta aw, na Sen min pen Xin Xuan hi. Xin cih ciangin thumanna, cihtakna leh, lungkim theihna hi a, Xuan in khuavak le khualum a cih nopna hi,” ci hi.

    Jesuh in Simon pen Peter/Cephas (Johan 1:42) ci-in a min a laihsak pen ciimphawnna hilo hi. Peter cih pen suang a cihna hi napi in A min bangin Peter zong na picing pah samlo hi. Lungsim manlang in a kihei vatvat thei ngabeng pa Peter pen Jesuh tawh a thu-uh kituaklo in (Matt 16:22-23), mikhat namtem tawh vat a (Johan18:10-11), Jesuh nangawn thei keng ci-in nial lai hi (Johan 18:15-27). Ahi zongin Sawltak sung i sim ciangin Pasian in Peter tungtawnin a pawlpi na phut in ‘Suang’ na suakta hi.

    Nang zong Peter bangin Jesuh nungzui na hih leh pianzia a thak a nei na hihi. Sawltak 11:26 ah Antioch a om nungzuite pen Khristian na kici hi. Khristian cih pen Khris neute cihna hi a, nang zong Khris neu khat na hita hi. Hih min in hong lamto ding a, a min khiatna dong hong tung pihto ding hi. Pasian thuman mahmah a hih manin hong sem hamtang ding hi.– Poh Fang Chia
 
Pasian aw, ‘Ta’ ci a nong sap,
Lungdam mahmah ung.
Ko sung leh Ko tawn in na hong sem inla,
Jesuh Khris’ hihna hong telzo sak lai-in TOPA.

Pasian pen ‘Pa’ ci-in a tate bangin i gamtat ciangin Amah a pahtawi i hihi.

Read More

LAWM NA NEIZO HI

April 2
Nilai

LAWM NA NEIZO HI

SIMDING:
Late 23

Jesuh in “Note lawm ka hong ci zaw ding hi,” ci hi. __Johan 15:15

KUMTAWN LAI SIANGTHO:Thukhente 16:18
Luka 7:1-30

Tangpi kizopna (Social media) in a kilehbulh takin hong khattang (lonely) sak zaw hi. Online thusuak khat ah, “Kikholhpih lawm sangin online lawm (facebook) a thupisak zawte pen khattang zawin zong lungkia baih zaw,” ci hi.
 
   I lungkhamna vangikpite hong theihpih, hong telpih leh hong awlmawhpih mi khat peuh a omkha diam ci-in tuhun pilna (IT) zangin facebook khawngah i kan simsim a, kua mah in hong theihpih khollo na hizaw hi. Ahi zongin Khazih a um mite in khamuanna i nei hi. Tua pen laphuakpa in, “Khuamial thukpi sung nangawn ka nawk hangin ka lau kei hi. Bang hang hiam cih leh kei tawh nong om khawm a, na molhtum leh na ciangkhut in kei hong lungmuang sak hi (Late23:4),” na ci hi.
 
   Ei le ei’ kibawlin i khattang a, i ngeina hang lehi supna tuamtuam hangin i lungneu zongin ei lungtang hong cingpa Jesuh ah i tawlnga thei hi. Lawm hoih “Jesuh” na nei zo hi. –Bill Crowder

Kei in lawm hoih khat ka nei hi,
Ka theihma in hong it hi.
Ki itna khau tawh hong kai hi,
Amah tawh hong khih khawm hi.

Jesuh tawh a kilawmta mi peuhmah Khattang ngeilo hi.

Read More