Date - Jan 1 2012
Title - Tu Khang Ading A Nungta Pawli
(efesa. 1:22-23)
Title - Tu Khang Ading A Nungta Pawli
(efesa. 1:22-23)
File Size -10.7 Mb
Duration - 23:28s
Duration - 23:28s
Tu Khang Ading A Nungta Pawlpi (efesa. 1:22-23)
(The Living Church for This Generation)
Revd S Pau Khan En, Ph.D
Happy New Year!
2011 kum i thubulphuh “Pasian’ Kammal i Nuntakna” tawh kisai-in Zomite lamlak aksipi dingin tua Lai Siangtho Kammal mah i masuat pen ding ahihna kiphawksak phapha nuam hi hang. 1999 Chin Christian Centenary Pawipi-ah hunkhak thugenna ka neihna-ah: Hong uk kumpite, Kawlgam sunga teng mipihte aw, ko Zomite in thauvui thautang kengin kumpi do lo ding hi ung. Pasian’ kammal ahi Lai Siangtho zangin panmun la ding hi ung, ci-in ka gen hi. Tua mah bangin 2011 December kha sung a kibawl Global Zomi Alliance (GZA) khawmpi ah “Zomi u le naute aw, Lai Siangtho longal GZA zuih ding lampi dang thei tuan khang. Zomite galhiam zong himah hipah hi. Hih Lai Siangtho tungtawnin gamta peuh leeng, singdang kalah gual tawh tan bang kimzo ding hihang” cih ka lungsim tawngaa veina tawh ka pulaakkhia hi. ZCLS ah kum tampi asem Rev. Paul Thuam Thang in tua kammal pen “Ama Tongdam Guabang Hinna” ci-in kammal ngumngektak tawh a na genkhiat a hihi.
2012 kum hong tun ciang tua thubulphuh zang nawn lo ding cihbang hi lo-in, tua zong kum tawn kha tawn ading hisakin, a dang teelthuah hong kul ciang “Tu Khang Ading A Nungta Pawlpi” (The Living Church for This Generation) ci-in khensatna tawh kong teelkhiat uh a hihi. Pawlpi a bulphuh nuam i hihi.
Tu hun: Hun i lap ding kisam hihang. Hun in ei hong ngak lo hi. Hunthak i lutteh, i pom ding, i khah ding, i paihkhiat ding, i letcip ding thu tampi om hi. Bang hang hiam cihleh, tu khang pen lungsim kihon hun hita hi. I lungsimte kipiak hun hita hi. Ka cihsa ka cihsa hi, ci-in i lungkhauh teta ding zong hikhin khol lo hi. Mi pau, mi ham tawh zong kiho, kithuza-in leitung mun tuamtuam tawh i kizop ding zong a hihi. Gamsung gampua thu kizakna zong zaitakin i sepkhiat ding hong kisam hi.
Khatvei Dala pan Kawl papi khat Yangon ah ohn gah (coconut) zuak ding hong pai-a, tua angah a sum pawlkhat tawh amkham tui dawn ahih manin a gunkuang tung tuangin zan thapai a hot leh zingsang khuavak ciang a gunkuang khau sutkhia lo ahih manin tua mun pan themkha bek zong kikhin lo, ci hi. Hunthak lutta hihang aa, i khau suktat hun hi. Biakpiakna dik i kalsuanna ah hong liah hong dal thei, zuih ding thukhun ngaatte, khanglui ngaihsutna le i leitung lungsim puakziate in hong khih hong kawi lai teitei ahih leh, i sutkhiat mengmeng ding kisam hihang.
A nungta Pawlpi: Khristian Pawlpi cih pen kipawlna (organization) hi lo hi. Pawlpi cih pen Khrih pumpi (the living organism) hi. Khrih pen i lutangpi hi-a, eite pen Ama’ khut le khete i hihi. Tua khut le khete in picingna ah a kalsuan ding a hihi. A Picing Pawlpi Pianzia (3) kikum dih ni.
(1) Thudang lading bulphuh lo-in Kha Siangtho bulphuh kilawmtatna mun hiding hi (Spiritual Fellowship). Pasian in mihingte behlephungin hong bawl hi-in, nop leh nuamkhawm, dah leh dahkhawmin a ki-uappih kim ding i hihi. A thanem, nuntakna a pangpa mite, meigong tagahte in maingal takin hong kihel uh ciang, tua Pawlpi pen ‘nuam’ kici hi. Paul in Philippi Pawlpi tung a laikhakna ah “Ka lungnopna le ka kisak theihna lukhu, ka it ka ngaih ahi Filippi Pawlpi mite aw, Topa sungah kipin om un. Hong pakta mahmah ing. Ahi zongin Euodia le Sintikhe in Topa’ sungah lung kituak takin a omna dingun ka thuum hi. Tua numeite huh dingin ka hong thuum nuam hi. Amau tegel in zong ka nasepna ah tampi hong huh numeite hi uh hi.”
Bishop Felix Lian Khen Thang in, “Zomite pen kigensiatna lamah tungtuangin distinction bang ngah zen ding hihang. Ahi zongin kipahtawina lamah niamkiatin supplementary phiphi taleng zong a ong zolo zah dong dingin kithanem hi,” ci hi. Gensiat ding pen Zomite ading tempukna i sak khak ding lauhuai hi. Zomite a kipumkhat, a kilem dingin Pasian in hong lunggulh a hihi.
(2) Pawlpi nungta i cih ciang, mimal in Pasian’ biakpiakna ah nuam a sa ngiat hiding hi. Pasian’ min kiphatna, Pasian’ kammal kigenkhiatna ah nuamsa tak le suakta takin a kihelkim i hih ding thupi hi. Topa’ kammal anduh tuidah bangin sun le zanin lungngai-in, Ama’ mite kikholh khopna ah nuam asa (Late 1) Pawlpi mimal i hih ding a kisam hihang.
(3) Pawlpi sung lam bekah lungkim hilo-in, Pawlpi pua lamah a semkhiate hiding hihang. Pawlpi sungah i muhkhiat nate le i telkhiat thute i kiim le paam phattuamna ding, huhhuai kephuaite a kem ding, septuak bawltuakte mapangin a semkhawm liailiai dingin leitung in ei hong kisam a hihi. Thasial lo takin i kipatkhiat ding a hihi.
Ei’ tha ei’ ngal muang khang. Topa’ tungah tha la dih ni!
Topa’n kumthak thupha note tungah hong piatek tahen!
Nong it na pastor Pa uh
Sia Enno
0 comments:
Post a Comment