Nisim Thalakna: A BEISA HUNTE

October 13
 Nipi ni

A BEISA HUNTE

SIMDING:
Sawltak 9:20-30

Nungzuite tawh kipawlkhop ding a hanciam hangin amaute a man ding sa ahih manin amaute in um ngamlo uh hi.__Sawltak 9:26

KUMTAWN LAI SIANGTHO:

Isaiah 41-42
1 Thessalonika 1

Thonginn thunget khopna a phuankhia Chuck Colson in kum (40) sung Jesuh Khris’ thu genkhiatna hunin zang hi. 2012 April kha-in hong nusiat taktak ciang, thu kizaakna lai khat sungah: “Charles Colson acih Nixon’ thusia bawlpa in kum 80 -in si hi” ci-in kigelh hi. Tua bang upna lam-ah a thahat mahmah mi khat pen, Khris a theihma a beisa ama’ tatkhialhna tungtawnin thu a khen uh lamdang ka sa gige hi.
    

Sawltak Paul ii pianthakna le a genkhiat thute pen uplahna le launa tawh mite in muangmawh uh hi. Jesuh in Pasian’ Tapa hi, ci-in a tangko ciangin, mite in “Tua banga tangko mite a bawlsiapa amah ngei mah hilo hiam, tua bang a genkhiat nading bang thu ngah ahiam?” (Sawltak 9:21) ci uh hi. Paul, Jerusalem ah pai-in nungzuite a va pawlkhop ciangin amaute in kihta sim pian uh hi (tg. 26). Paul in ama’ nunglam thu kimangngilh bawllo-in, Pasian’ hong hehpihna bekbek hi (1 Tim. 1:13-14) ci hi.
   

 Paul in i nuntakna lui sunga thupiangte nelhsiah tuanlo-in, a pianglo bangin omloh ding hong theisak hi. Tua a beisa siatnate hangin Pasian tungah lungdamna ko-in, a beisa hunte hong kimaisakna, tuhun zong a thakin a kikheelna, le hong tung lai ding hunte zong lam-etna tawh Topa’n hong kidimsak ahihna i mu ding hi.– David McCasland
 

 Itna lian tawh hong kikheelsak,
Vangliatna Nang aa hi;
Nang’ deih bang, Topa
Kote ka tawlnga hit-hiat theita. –Burroughs

 
Jesuh bek in i nuntakna hong kheel thei hi.