ITNA TAKTAK

November 26
 Ni Nih 

ITNA TAKTAK

SIMDING:
1 Korin 13:1-8

Itna neite lungkia cih om ngeilo hi. A upna, a lam-etna lungduai takin a ngaknate uh a mawkna cih om  ngeilo hi.  Itna pen a tawntungin a kip ahi hi.––1 Korin 13:7-8

KUMTAWN LAI SIANGTHO:

Ezekiel 27-29
1 Peter 3

Tuma deuh-in ka lawm’ pianna nu pen natna nasia mahmah nei laizang hi. Tua ahih manin a nu adon dingin a lungsim  khensat  hi. Hun khatkhat ciangin anu’ naak bekbek en-in a lunggim mahmah hun tampi tuak mawk hi. Tua laitakin, Beth in itna taktak cih pen a olno ahihlohna, a kingah thei ziauziau ahihlohna phawk pha mahmah hi.   

 Tunung kumin anu zato ah ni nih sung kipuak a, a lawmte kiangah hibangin laigelh hi: “Ka nu tawh ka khualzin khopzia nungthu ka ngaihsut ciang, ka lungdam mahmah hi. Tu laitakin na khempeuh a sum, bangmah phawk nawnlo, huh theih nading lampi zong aphawk lo ka nu pen nuntakna a it le tawlngakna nuam a ngaklah nupi hoih ahihna tel ing. Itna taktak koici bang hiam, cih zong tel mahmah ta ing. Kei tawh kumsawt hong nuntakpih in ci-in khitui naptui tawh ka kiko ding amah’n hong phal kei. Bangmah tawh ka kheek ngam loh ding ka tuahkhak thu hi,” ci hi.
 

    Lai Siangtho in itna pen lungduai-in, zong lungneem hi, ci hi. Angsung thu bek ngaihsun lo-in, heh pahpahlo hi. Na khempeuh thei-in, um-a, lam-etna nei-in, thuakzawhna zong nei hi” (1 Kor. 13:4-7).
 

   Itna taktak i Pa’ kiang pan hong pai hi-a, Amah in a Tapa hong piakhong hi. A hong itna mite tung lah ding i hanciam ciang, Khris’ nungzui-in, midangte-a ding nuntakna i pia ngam ding kul hi (1 Johan 3:16-18).___Cindy Hess Kasper 

Hong it theisak in, kong thuum Topa -
Na itna lungtang hawmkhia-in,
Tui hai khat piak ding zong ka kiging,
Midangte’ adingin kei nungta.___Peterson

 
Itna taktak i cih pen Jesuh ading midangte va huhin, hong thuhkik ding a lam-enlo itna ahi hi.