KHA LAM GUTA

November 25
 Nipi Khuavaak

KHA LAM GUTA

SIMDING:
Johan 1:1-18

Tua thu mihing hong suakin kote lakah hong oma,...Pasian’ pianzia a neihna ka mucian uh hi. Hih pianzia pen Pasian’ tapa khatbek hihna tawh a neih pianzia ahi hi.–Johan 1:14

KUMTAWN LAI SIANGTHO:

 Ezekiel 24-26
1 Peter 2

Manglai ka hilh lai-in, sang naupangte lai ka gelhsak theizel hi. Kei’ mai teekteek a agelhte uh amau kammal le theihna taktak hi, cih thei ka hih manin amau kammal zatte ka tel thei hi. Midang khat aa a kawm, a etteh  le ettehlo ka thei thei hi. Amau gelhzia le gelh kammalte zui-in thei ka hih manin amaute in zong lamdang hong sa uh hi. Amau kammalte zong ka theihsa dikdek hita hi. Eite’ kammal zatte pen i lungsim sung panin hong  phulkhia ahih bangmah-in i atkhiat laite zong tua bangmah ahi hi. Tua i laigelhte in ei bangmi hi, cih hong gentel thei hi. 

    Pasian’ kammal tungtawnin Amah tawh i kithei tel hi. Ama’ gelhkhiatte tungtawnin i simna tawh Amah kua bang hi-a, eite’ theih dingin hong kikoici phuankhiat hiam, cih hong lakkhia hi. Lam khat panin Satan pen Pasian hong kineihkhem theizel hi (2 Kor. 11:14). Pasian’ kammal pen tawm khat melhsuk ziau-in thuzuau pi tawh hong kuan thei hi. Pasian’ thu a bang thu khat tawh eite hong khem sawm a, Jesuh’ sihna hangin hotkhiatna a kingahna sangin, kikep kibawl tawmna tawh hotkhiatna kingah thei cih bangin thuzuau pi khat hong umsak theiziau hi (Kol. 2:23). Satan in mi tampi takte khemzo khin hi.
  

  Pasian in ahih leh, Ama’ aw za-a i theih ding hong kipulaak den hi. Ama’ kammal bek hong pia hilo-in, tua kammal mihing Jesuh in (Johan 1:14) hong piazo lai hi. Ama hangin khemna le thuzuau i mawk up nawn kei ding hi.––Julie Ackerman Link

    Ka lungtang sungah, Topa,
    Nangma’ kammal hong theisak in,
    Na kammalte tungtawnin hong zasak in
    Na deihna kei’ deih hong hisak in. ___D. DeHaan

Na kammalte siangtho a; keimah in ka it hi.__Late 119:140