Nate' Hun

November 6
Nilai 

NATE’ HUN

SIMDING:
Thuhilhsia 3:1-8


Na khempeuh in hun sehsa neiciat hi.---Thuhilhsia 3:1

KUMTAWN  LAI SIANGTHO:

Jeremiah 37-39
Hebru 3

1960 kiimin, lasa siam The Byrds-te’ la “Turn! Turn! Turn!” a cih pen minthang mahmah hi. Billboard ah a minthang penin zong sauveipi om hi. Tua hun lai-a mite in tua lamal pen deih tek uh hi. Tua lamalte pen Thuciam Lui Thuhilhsia sunga lamalte a zangkik na hi citciat hi.
 

   “Na khempeuh in hun sehsa neiciat hi” ci-in Thuhilhsia in gen hi. Mihing nuntakna ah a kituak theizel thute ahi: nausuahna le sihna, ngahna le zatna, khitui le nuamna, dahna le lungdamna cih bangte ahi hi. Leitung khuahun a kikheel mah bangin i nuntakna zong kikheel den hi. Kibang den cih bang om theilo hi. I nuntakna ah kikheel ding i lam-en mahmah hi. Ahi zongin i ngaihsut zawhloh hun zong omzel hi. Sihna le supna i tuah ciang thuak hak i sa penpen hi. Tua hun mah panin i Biak Topa Pasian kikheel ngeilo hi, cih pen lungdam takin i theih ding kisam hi. “Kei in na Topa Pasian ka hi hi, ka kikheel ngei kei hi” (Malakhi 3:6) ci-in Pasian in gen hi. 

    Pasian pen kikheel ngeilo ahih manin, a kikheel hunte sungah Ama’ tungah i kinga den ding hi. Ama’ hong ompihna in eite tungah om paisuak hi (Late 46:1). Ama’ daihna in i lungsim hong kemzo hi (Fil. 4:7). Ama’ itna in i khamuanna ahi hi (Rom. 8:39).---Jennifer Benson Schuldt


    Kulhpi muanhuai Pasian hi a,
    Sia theilo kidalna hi;
    Tuikhang bang gimna ah bit a,
    Sihna ding pan hong hon hi.---Luther


A kikheel ngeilo Pasian’ hihna in a kikheel den leitung ading i bukna ahi hi.