KHANGMOITE TUNGAH LAIKHAK

December 29
 Nipi Ni

KHANGMOITE TUNGAH LAIKHAK

SIMDING:
3 John

Na gamtatna uh ka zakna sangin ka lungdamna lianzaw bangmah omlo hi.
___3 John 4

KUMTAWN LAI SIANGTHO:
 Zechariah 9-12
 Mangmuhna 20

A nuntakna a tawp dongin C.S Lewis in khangthakte tungah kha lam pattahna pia lai hi. Lupmun tungah a om laitak nangawn, naupang Philip kici ii laikhak thukzo lai hi. Tua lai pen thupisa ahih manin Lewis zong lungdam mahmah a, a diakin Lewis’ gelh “the Narnia Chronicles” sunga humpi pen Jesuh Khris hi cih a theih pen lungdam lua peuhmah hi. A zing ciangin Lewis’ nuntakna bei-a, kum 65 cinna ding nipi khat sap hun ahi hi.
    Sawltak John in zong kha lamah a tate tungah laikhak khak hi. Tua laikhak sungah khangthak thu-umte tungah a khangham khinsa puteek khat ii thapiakna lai kihel hi.
    John in, “Na gamtatna uh ka zakna hangin ka lungdamna sangin a dang lungdamna lianzaw bangmah omlo hi” (3 John 4). Thuciam Thak sunga thute tom-in, John’ laigelh diakdiak pen hong tung ding khangthakte’ khansuahna ah lungdamna a neihna pulaakna hi phadeuh se hi.
    A khanghamsa Khristian-te in ahihleh, khangmoi lai Khristian-te’ nuntakna thapia dingte ahi uh hi. Lungdampihna, angtanna kammalte, thungetsakna, deihsakna cihte tawh Pasian’ lamah khancinna thu a hilh dingte hi uh hi. Dennis Fisher

Khris sungah mite a khancin theih na’ng,
Man na piak kul
Na nuntakna na piakna tawh zong
Biakpiakna a lui na hi hi.__D. DeHaan

Lampi a theipa tawh khual i zinkhop ciang nuam deuh hi.