A NUNGKIK LO GANHINGTE

June 1
Nipi ni

A NUNGKIK LO GANHINGTE

SIMDING:
Filippi 3:12-17


A beisa thute mangngilh bawlin mainawtin ka han-ciam a, Khris Jesuh nasepna tawh van-tung nuntakna ah Pasian’ hongsapna ahi hamphatna ka ngah theih nading-in, kung lam zuanin tangtakin ka tai hi
– Filippi 3:13-14

KUMTAWN LAI SIANGTHO:
 2KhangTangthu15-16
John 12:27-50

Australia gama kimu thei ganhingte lakah sa-ipnei le emus-te in kibatna khat nei uh hi. Amau pen nungkin theilo uh hi. Sa-ipneite pen a pumpi kilamzia mahmah zong a mei uh sau-in, amailam ah diang thei bekin, nung lehheek theilo uh hi. Emus-te zong a khe uh tawh manlang takin tai thei uha, a khuk uh pen nungkik nading ah kizang theilo hi. Australia mite in tua ganhing tegel minam ciaptehna-in zang uha, a deihna pen mainawt ding le khangto semsem ding cihna ahi hi.

Paul in Filippi khua mite tungah: “A beisa thute mangngilh bawlin mainawtin ka hanciam a, Khris Jesuh nasepna tawh vantung nuntakna ah Pasian’ hong sapna ahi hamphatna ka ngah theih nadingin, kung lam zuanin tangtakin ka tai hi” (3:13-14) ci hi.

A beisa hunte sung pan pilna i lak ding tampi oma, tua hunte sungah om ding piang theilo hi. A beisa hunte pen lakkik theih hun hilo a, Pasian’ itna hangin mailam a nawt ding le, tuhun le hong pailai ding hunte ah Topa’ na i thaneihzah aa sep ding ahi hi. Upna tawh nuntakna pen mainawt nuntakna hi-a, Khris tawh a kisun semsem ding i hihi. – Bill Crowder

A sangna lam ka kahto hi,
Nisim a thak ka tungto hi;
Kahto kawm kong thumlai Topa
Hong suanto in a sangzaw ah.— Oatman


Mainawt ding hi peuhleh, koikoi ah ka pai ding hi.