TEDIM bAPTIST cHURCH – Yangon
Kumcin Kikhop (2012)
Church Pastor Pa’ thugenna
Thu patna
Hong bawl hong siam Tung Pasian in hong kalsuanpih-in 2012 kum hong mualsuahpih ahih manin Ama’ min siang i phat masa hi. TBC-Y Pawlpi Kumcin Kikhop aa hong kihel Pawlpi mi khempeuh le TBC-Y innkuan kim-ah Topa’ kiang panin daihna Kum Thak thupha a thakin hong tung kim ciat tahen!
1. Pawlpi Kalsuanzia
Pawlpi taangthute i et ciangin Khristian Pawlpi in a khangkhang-in tawnzia nam (2) na na zanga, tuate pen a masa-in lawpna bulphuh kha khanlawhna (Revival) a hihi. Hih tawnzia pen mimal (1) vai hi lo-in mihonpi vai hi a, Pawlpibup ahih keileh gambup leh leitungbup ah huih nung bangin a nung theizelzel a hihi. A tawntungin om den lo-in Pasian in kisam a sak hun leh kisam a sakna mun-ah piang kawikawi hi. A nihna tawnzia pen ngaihsutna bulphuh thaksuah tohtohna (Renewal) hi a, atunga i gen bangin tun hun nei lo-in a tawntunga neih ding tawnzia a hihi. Cing lo leh taak lo pi-in TBC-Y Pawlpi a kiphuh 1997 kuma kipan Pawlpi kong makaihna-ah hih atung aate gel i Pawlpi sungah dai lo, khing lo aa a om ding ngaihsun kawmin a hong makaih aa kinei ka hihi. Lawpna om lo-in Pawlpi in mainawt thei lo-a, ngaihsutna leh pilna omlo-in Pawlpi lamman ah kalsuan thei lo hi. Tua ahih manin hih tawnzia gel mah mailam kum tampi ah zong i kalsuanpih dingin ka lunggulh den thu a hihi.
2. Pawlsung Kivaanzia
I hih theih tawpin TBC-Y Pawlpi pen nopna dahna-ah i kivaan a, mihing’ makaihna ahih manin i taangcin lohna zong tampi omkha taseleh, Pasian’ huhna tawh i hih theih tawpa i sep i bawl ahih manin lungkimhuai ka sa hi. Ahi zongin Pasian in thupha hong pia-a, a mimal-in khang semsem i hih manin mailam-ah hih Pawlsung kivaanna pen a khauhzaw semsem a i pai le i hanciam kul ding hi. Pawlpi Syate leh Pawlpi Upate, Department tuamtuam-a makaite khempeuh in khut kilen dimdiam-in hih Pawlsung vaanna a thuukzaw leh a sangzaw-in kalsuan tum ni, ci-in Pasian’ min tawh kong hanthawn hi.
3. Pawlpi Nasep Lian Nih
A tunga thupatna-ah kong gen mah bangin Pawlpi in nasep lian (2) i nei a, tuate pen khanlawhna dingin Mission nasepna leh Pilna tawh kilamtohtoh nadingin Lai Siangtho sang (Tedim Christian College) te a hihi. Hauh man leh neih man aa sem ding hilehang TBC-Y in hihte i kipan nai kei ding hi. I Biakinn Thak lamna in i tha i ngal tampi hong suuk hi. Ahi zongin hih atunga i nasep lian (2) te pen neih man hauh man hilo-in sep masak loh a phamawh nasepte ahih manin hanciamin i sem a, Pasian in hong nungkikpih lo-in hong mainawtpih ahih manin Ama’ min i phat hi. Mailam-ah i nasep tegel i hanciam semsem leh i Pawlpi mainawt semsem ding hi, cih um ka hih manin thakiam lo-a i thahat semsem nadingin kong hanthawn hi.
4. Department-te Nasepna
Pawlpi khat adingin sep loh a phamawh nasepte Department kim-ah i sem a, tuate ah zong ei’ thaneihna sangin a lianzaw leh a sangzaw pi-in semzo zaw ka kisa-a ka lungdam hi. Ahi zongin Pawlpi’ nasepna pen matutna om theilo-in sep tohtoh ding (process) ahih manin mailam-ah hanciam toto-a a sangzaw, a sangzaw ah i kalsuan tohtoh dingin kong hanthawn hi.
5. Pawlpi’ Thubulphuh
TBC-Y Pawlpi ii khantawn thubulphuh pen “Khazih le Minam Ading” cih hi-a, hih thubulphuh anei TBC-Y Pawlpi ah Pastor ka sep khak manin ka angtang mahmah hi. Khazih ading bulphuh-in na lianpipi i sep kawmin i minam zong mangngilh lo-in i puah i zuun le i kalsuanpih toh kul ding hi. I Pawlpi sung bek hilo-in i minam sungah zong na lianpipi a semzo dingin TBC-Y Pawlpi Pasian in hong zatsak ding pen ka thunget denna hi. 2013 kum aa ding i thubulphuh pen “Na Gam Hong Piang Tahen” cih hi-a, tua Pasian’ gam a pianna dingin i mimal kim, i innkuan kim leh i minam sungah Pasian mah bulphuh-in nakpi takin na i sepkhawm kul ding hi.
6. Lungdamkohna
Kei’ pumpi mahmah leh ka innkuan-un dam loh hun tamveipi om mah taseleh Pawlpi in itna tawh hong telsiam-in na i sepkhawm manin seppih, bawlpih Sya, Syama-te leh Pawlpi Upa, Pawlpi makai khempeuh tungah lungdam thu kong ko hi. Kum (3) sung a tha a ngal, a siamna le ahun aphaat siit lo-a apia tukum aa khawl ding Pawlpi Upa-te, Numei makai, Khangno makai-te tungah lungdamna lianpi ka nei hi. Tua bangmah-in 2013 pana makai ding khempeuhte zong Pasian in lam hong lak-in i Pawlpi sungah Khazih leh Minam Adingin na lian tampi i sepkhawm ding lam-etna lianpi ka nei hi.
Thukhupna
TBC-Y Pawlpi a kipatcil aa kipanin hih Pawlpi pen etteh taak Pawlpi (Ideal Church) hih ding i hanciam den a hihi. Hih lungtup pen zan khat thu leh thakhat thu a kitungzo ding hilo-in, hih thu ngim kawma hanciam tohtoh ding cihnopna a hihi. Tu-in Pasian’ huhna tawh i Biakinn Thak a sawt lo-in zawh siang ding lam-en i hih manin tua Biakinn thak sung panin Pasian in tha hong pia-in hong zanga, Ama’ ading na lianpi a semzo dingin i mimal kim leh i Pawlpi bupin ki-apin tha la tek ni, ci-in kong zawn nuam hi.
Topa Pasian in i Pawlpibup thupha hong pia-in hong zangkim ciat tahen!
Na Church Pastorpa uh,
Rev. Dr. S. Pau Khan En