September 8
Nipi
AKSI BANG
SIMDING:
Daniel 12:1-3
A pilte ahih uhleh, vantung khuavak tawh a tangkhawm ding uh hi.
KUMTAWN LAI SIANGTHO:
Paunak 3-5
2 Korin 1
Tuuk hun hong beikuan ciangin van hong kihongin khapi taang nuai-ah mi tampi takte in tui gei-ah hong pai uha vandawn-ah mei-ekte puakkham sak dingin kikaikhawm uh hi. Tua mei-ekte in khapi kiangah va kahto-in khapi tawh kibangin va taang khawm ci-in mite in muhnopsa mahmah laizang uh hi.
Tua bangte ka ngaihsut ciang, tua bang hun leh ka buai pen hun tawh kituak ahih manin ka tam omkhak kei hi. Ka lungdam bilbelna khat ah, New York khuapi ah Conference ka va kah leh, tua bang nasep sem ding hong kizotna ka thei kha hi. Khua 100 pan mi 1,000 kiim in amau’ omna khuapi ciat-ah leitung khuavak ahi Khris’ vangliatna bangci tangkhia sak thei ding, ci-in hong kito hi.
Kamsang Daniel in “A pha-in gamtat ding mi tampi a hilhte aksi bangin tang tawntung ding uh hi” (Dan. 12:3) ci hi. Eite zong hong cihna ahi hi. Khuazing sungah i nuntakna le sepkhiatna tawh i taan hun ciangin, Jesuh in aksite a munmun-ah hong koih dinga etlawm mahmah ding hihang.—Julie Ackerman Link
Nang ading hih leitung ah ka taangkhia nuam hi, Topa.
Leitung khuavak bangci tawi ding cih hong hilh in.
Mi hon tampi takte tawh kigawmkhawm-in Nangma’
khephung ah kun-in kong biak ding uh ka ngaklah uh hi.
Leitung khuavak in khimkhua zing sungah hong taan tak ciang,
Ama’ hoihna gam khempeuh in munuam ding hi.