THANEEM

March 13
Nili


THANEEM

SIMDING:
Isaiah 40:27-31; 41:10

Amah in mi thaneemte thapia-a, a zawngkhalte hatsak hi.––Isaiah 40:29

KUMTAWN LAI SIANGTHO:

Thuhilhkikna 20-22
Mark 13:21-37

October 2012 sungin US gam nisuahna lam ah huihpi nasia takin nungin, tuikhang ziahziah-in na tampi kisia hi. Huih nun sawng tengin, mi 8,000,000 bang in mei ngahlo-in om thapai uh hi. Tua bangin mei ngahlo ahih manin an kihuan theilo-a, tui zong hoih tak kingah nawnlo-in kizop kikawmna zong hong nawngkai mahmah hi. Mun tampite ah huih mutpaihna hangin kisia, tui in vuknelh, sehnel tawh kidim  cih bangin omziazua hi. Tua amu thuthang kante in hibangin ci uh hi: “Mei pailo nuntakna tulza tampi” ci-in gelh uh hi.
 

    Huihpi nawkpaih zah bangin i nuntakna zong mei taanglo-in, khuazing sung om tawh i kibang theizel hi. Tua bang hun ciangin Pasian’ kammal in: “Amah in a zawngkhalte tungah thahatna pia-a, thazawmte’ tha khauhsak hi” (Isa. 40:29).
 

   I lung a kiat dikdek laitak, huhna nget ding i kisap laitak hunin, Topa tungah i muanna le i lam-etnate koih-in tha la ding hihang. Amah in nisim le hunsim-in, “Topa a muang mite a tha uh dim tawntung dinga; muvanlai bangin kha tawh lengin, atai uh hangin tawl ngeilo dinga, lam a pai uh hangin bah ngei nawnlo ding hi” (tg. 31).
 

    Pasian pen nuntakna huihpi sungah i kha thahatna bulpi ahi hi. – David McCasland
 

Tanglai-a a lianbel Topa,
Nungciang a lawpna hi;
Gimna thuak ciang hong keempha in,
Na inn ah hong kha in. – Watts

Huihpi in bukna muanhuai i neihlam hong kilangsak hi.